​Un di e personanan cu un trayectorio impresionante den politica ta nos amigo y colega mr. Ady Thijsen, kende  diahuebs a dispidi di su funcion como parlamentario di pais Aruba. Desde 2005 cu Ady Thijsen pa prome biaha a subi riba lista di MEP, el a ser eligi e mesun aña ey como miembro di Parlamento/lider di fraccion di MEP y despues a ser reeligi na 2009 y 2013. Pues den total un record di 12 aña sirbiendo nos pueblo dignamente den e organo di mas halto den nos constitucion.
Locual semper a resalta di Ady tabata su forma elocuente di hiba su debatenan, cualnan semper tabata al caso, profesional, cu hopi dedicacion y specialmente Ady como experto tin un conocemento amplio riba tereno estatal y den e relacionnan di Reino. Alavez prome y durante e ultimo 12 añanan aki Ady a demostra su lealtad incondicional na MEP y semper a defende e ideologia di nos partido fielmente. Aunke cu Ady lo no ta den Parlamento mas, nos ta convenci cu e lo sigui yuda nos partido y nos pais. Danki Ady pa tur bo trabaonan tremendo y exito cu bo retonan nobo. Danki tambe na su familiarnan kendenan semper a sostene den su trayectorio como politico.
Finalmente un expresion popular di Ady: Mientras MEP ta existi, Aruba ta salba!
 

Segun palabracion haci entre Sr. Gobernador y Formador Evelyn Wever-Croes, diamars atardi Sra Wever-Croes a haci un bishita na Gobernador pa asina informa di progreso di formacion di gobierno nobo. Na su salida di Gabinete di Gobernador, Sra Wever-Croes a wordo encontra pa prensa y el a duna e siguiente informacion riba diferente puntonan cu el a conbersa cu sr Gobernador.
 
Programa di Gobernacion:
Ainda no ta cla cu e programa di Gobernacion. Esaki ta tumando su tempo pa asina sigura pueblo cu esaki lo bay ta bon hinca den otro. E programa di gobernacion ta inclui puntonan di e programa di campaña di tres partido. E puntonan aki mester wordo sincronisa pa asina drenta un gobierno hunto mas pronto posibel.
Sinembargo, no ta riba tur punto por yega na un sincronisacion asina facil. Tin cierto puntonan cu partidonan kier mira den e programa di gobernacion y nan mester splica e puntonan aki detayadamente pa asina yega na un consensus si e puntonan aki mester bin den e programa of no. Den e caso aki, pa cuminsa un coalicion, ta importante pa papia di e puntonan aki di adelanta, pa asina evita e boksmento cu cosnan cu por a papia di adelanta riba nan. Pero pronto e programa lo keda cla pa despues drenta den e ultimo fase di e procedura aki cua ta reparticion di cartera.
 
Reparticion di Cartera:
Riba e tema aki sra Wever-Croes ta indica cu ainda no a yega na e punto aki. Prome cu acopla e personanan na carteranan, ta necesario pa haci e reparticionnan di e carteranan. Nos ta siguiendo recomendacionnan specifico di Sr. Gobernador pa forma un gobierno a base di un coalicion amplio di partidonan MEP, POR y RED. Y pa esaki ta wordo haci mas structural posibel pa yega na un consensus amplio di tur tres partido. Despues di reparticion di carteranan, cada partido lo bay bek den nan seno y apunta esnan cu lo bira minister pa despues sigui e screening manera nos landsbesluit ta exigi.
 
 
Kico ta pasa si no keda cla pa huramentacion:
Riba e pregunta aki, Formador ta contesta cu si pa diabierna no tin un gobierno nobo, esaki no ta nifica cu tur cos lo cay den otro y lo no tin motibo tampoco pa cay den ansha. Diahuebs Parlamento ta bay despidi di Parlamentarionan cu no ta sigui den Parlamento mas. Diabierna 27 di october, Parlamentarionan nobo lo huramenta pa e Parlamento nobo. E merdia ey mes e Parlamento nobo lo scohe e Presidente y Vice-Presidente nobo di Parlamento. Fraccionnan lo apunta nan líder di Fraccion y despues ta sigui e reunionnan pa reparti e trabounan di diferente comisionnan. Parlamento ta bay funciona normal entrante diabierna. Mientras tanto, e gobierno demisionario lo sigui te ora cu e gobierno nobo huramenta. Pero nan por atende solamente e asuntonan cu ta andando. E ministernan demisionario no por tuma desicionnan nobo cu ta mara país Aruba.
​
Sra Evelyn Wever-Croes ta conclui bisando cu e lo tene prensa y pueblo informa di cualkier informacion nobo cu lo tin den e dianan nos dilanti.
 
 
 

​Diabierna mainta, Formador di proximo gobierno di Aruba, sra Evelyn Wever-Croes a bishita Sr Gobernador di Aruba pa un briefing como tambe entrega sr Gobernador un copia di e Acuerdo di Formacion cu a wordo firma diamars ultimo. Esaki ta un palabracion cu a wordo haci cu un biaha pa siman lo mantene sr Gobernador na haltura di e avanse di formacion.
 
Na su salido, el a wordo ricibi pa prensa y a informa den detaye e avansenan cu tin den e siman aki pa locual ta trata e diferente fasenan cu mester wordo trata prome cu yega na un gobierno stabiel. Sra Wever-Croes ta bisa lo siguiente:
 
“Despues di a firma e Acuerdo di Formacion diamars ultimo, nos ta den e fase di e programa. Esaki ta un proceso cu ta tuma su tempo. Tur tres programa a wordo poni banda di otro pa asina compara nan y descuti tur e visionnan di cada partido. Logicamente tin algun diferencia entre e tres programanan y pesey ta necesario pa atende cu e puntonan aki prome cu nos drenta den un gobierno hunto”.
 
Sra Wever-Croes a enfatisa cu e tres partidonan a yega na e acuerdo pa traha riba e puntonan di gobernacion y palabracionnan concreto prome cu bay scohe e ministernan cu lo atende e diferente carteranan.
 
“E motibo di esaki ta cu nos ta bay tin un gobierno di coalicion. Por lo tanto lo bay tin carteranan cu lo no bay ta di MEP pero si nos kier pa nos vision ta den e programa. Y esaki ta mescos pa e dos otro partidonan. Pa e motibo aki ta importante pa nos pa yega na palabracionnan concreto riba e programa y acuerdonan riba e puntonan cu ta mas principal prome pa despues sigui pa e fase di reparticion di carteranan. Esaki ta trece mas stabilidad den un coalicion pasobra di adelanta cada ken sa e encargonan di nan ministerio”.
 
Pa yega na e acuerdonan y palabracionnan aki, ta importante tene cuenta cu varios puntonan. E prome ta e vision di loke bo kier logra den 4 aña. Esaki ta wordo detaya den e programa di gobernacion. Nos ta palabra con nos ta bay traha cu otro. Tambe nos ta palabra e cantidad di personal cu un minister por tin pa traha cu n’e. Y asina aki, nos ta trahando pa wak kico mas nos por palabra pa nos tur ta den mesun linea den gobernacion. Nos ta spera cu nos keda cla cu esaki den e siguiente oranan pa asina nos firma e Acuerdo di Gobernacion mas pronto posibel”.
 
Pa loke ta trata e particion di carteranan, sra Wever-Croes ta laga sa cu ainda no a yega na e fase aki. Unabes cu firma e Acuerdo di Gobernacion, lo cuminsa cu e fase di reparticion di carteranan sigui pa e screening manera nos landsbesluit ta exigi.
 
 
 

Manera ley ta stipula:

Manera ta conoci, e resultado di eleccion di dia 22 di september 2017 a indica e deseo di pueblo pa un cambio completo den gobernacion y den e rumbo di nos pais. Pueblo a duna Partido MEP 9 asiento den Parlamento di Aruba. Pero tambe pueblo a indica cu e proximo gobierno lo ta uno di coalicion. Pa e motibo aki, Partido MEP, POR y RED, a dicidi pa hunto forma un gobierno stabiel y integro.
 
Como Formador di e proximo gobierno, sra Evelyn Wever-Croes ta informa cu e proceso di formacion di gobierno ta canando den bon pasonan. Ya caba e prome acuerdo, cu ta e Acuerdo di Formacion, a wordo firma pa tur tres partido y e siguiente acuerdo, e Acuerdo di Gobernacion, tambe lo wordo firma pronto.
 
Mientras e proceso di formacion di gobierno ta canando, nos lo defini tambe e ekipo cu ta bay Parlamento dia 27 di october. Awor aki ta e numbernan 1 te cu 9 ta poni pa MEP den Parlamento segun ley ta stipula. Esaki lo ta un formalidad mientras formacion di gobierno ta den proceso.
Manera cu nos caba cu formacion, algun lo move pa asumi otro posicionnan. Algun ta bira minister, otro ta bira consehero y of lo wordo ubica na unda miho nan por yuda den e proximo gobernacion. E ora lo atende tambe cu e palabracion di esun cu mas voto ta drenta Parlamento.
 
Tocante  comentarionan cu ta aparece riba medionan social Sra Evelyn Wever-Croes ta bisa lo siguiente:
 
Mi ta pidi pueblo pa duna nos partido un espacio pa asina nos sigui cu e procedura pa yega na un bon gobierno pa Aruba cu por garantisa stabilidad pa 4 aña. den esaki nos lo sa di haci e miho reparticion posibel.”
 
 
 
 
 

Despues cu AVP a sufri un derota aplastante den e eleccion ultimo caminda nan a bay atras cu 10000 voto, 4 asiento menos y caminda nan lider Mike Eman a laga su votadornan na caya door di bati retirada, nos a haya e siman aki un integrante di AVP, esta Marlon Sneek kende den su ansha y desesperacion ta sigui tira lodo riba MEP y e proximo gobierno cu ta den formacion ainda. Hecho ta cu te ainda Marlon Sneek no ta realisa cu pueblo den forma cla y raspa a rechasa su persona como politico, caminda den e ultimo eleccion el a bay atras den voto cu 21% y di carambola lo bolbe fungi como parlamentario pa AVP.
 
Cantidad di minister
Awor den un conferencia di prensa Marlon Sneek a trece padilanti e asunto di cantidad di minister cu e proximo gobierno lo mester ta consisti di dje, siendo a ser splica caba door di formador cu e reparticion di cartera no ta alcaso na e momento aki ya cu e prioridad ta ser poni na formula e programa di gobernacion cu mester wordo sosteni pa tur tres partido, esta MEP, POR y RED. Hecho ta cu Marlon mester tin berguensa di toca e tema aki, ya cu tabata su propio partido AVP na 2013 a dicidi di amplia e cantidad di ministernan te na 9, djis pa complace dos politico nobato Juan David Irausquin y Paul Croes, kendenan a menasa lider di AVP di lo no sostene e gobierno si nan no bira minister. Y Marlon Sneek mes por a mira unda e dos politiconan oportunista aki ta awe? Irausquin a bira e di 8 minister pa AVP, despues el a tuma su retiro, a bay reflexiona den exterior y pa despues bolbe wordo nombra como Minister Plenipotenciario. Paul Croes a bira e di 9 minister pa AVP, a wordo benta den prison y esaki pa motibo di henter e escandalo di ‘ontheffingen’ y cual ta un prueba palpabel cu henter e gobernacion di AVP  tabata pesta cu fraude, impunidad, nepotismo y corupcion.
 
Deficit di 195 miyon florin
Riba dje nos a haya Marlon Sneek ta papia tambe di e finansa publico, haciendo como sifuera cu su gobierno di AVP lo bay laga un situacion di color di rosa pa e proximo gobierno. Den su ignorancia e kier a bari for di mesa e carta cu Director di Departamento di Finansa a manda pa Informador, caminda ta ser constata cu e presupuesto di 2018 lo bay tin un deficit astronomico di 195 miyon florin. Sinembargo te ainda no tin un bista cla cuanto gasto miyonario extra e presupuesto supletorio 2017 lo bay contene, mirando con e ministronan di AVP – mescos cu den e aña di eleccion 2013 – a derocha fondo publico na nan antoho y p’asina nan por a practica nan patronahe politico den e eleccion 2017.
 
AVP no ta cumpli cu promesa
Hecho ta cu durante e ultimo simannan tur hende mes por a constata con diferente sindicato, fundacion y organisacion priva y publico a haci peticion caba na e proximo gobierno pa yuda nan, ya cu e gobierno di AVP a laga nan tur na caya y no a cumpli cu promesanan haci y te hasta compromisonan firma cu nan. Asina nos por a mira con e sindicatonan SPA, SIMAR, SADA y SEPPA ta sperando pa e gobierno nobo sinta pa caba y p’asina nan haya loke e gobierno di AVP a priminti nan (promesanan bashi!) pa loke ta e structuranan salarial, beneficionan secundario, promocionnan pendiente, uniformnan y otro material necesario etc. Tambe Orden di Abogado ta na porta di e proximo gobierno caba pa haya e compensacionnan cu mester ser paga na e abogadonan liber y cu a ser acorda cu e ministro di Husticia Dowers y cu awor e no kier cumpli.
 
Negligencia completo
OPPA tambe kier pa e proximo gobierno duna e pensionadonan e Gelijk Bedrag y Bashi Premie cu e gobierno di AVP a kita for di nan. Fundacion SVGA tambe ta warda e proximo gobierno sinta pa logra na ratifica e tratado pa derechonan di hendenan cu limitacion y cu e gobierno di AVP a neglisha completamente. Pues claramente por mira cu e gobierno cu Marlon Sneek ta defende ciegamente no a cumpli cu tur e organisacionnan aki ya cu nan a prefera di malgasta tur fondo publico cu nan amigo y compinchinan na lugar di cumpli cu tur e compromisonan cera cu tur e instancianan aki.
​
Ta pesey MEP ta condena tur e expresionnan haci e ultimo dianan aki door di Marlon Sneek ya cu e ta e ultimo politico cu por mustra dede den direccion di MEP, siendo cu tin tres dede largo ta mustra den su propio direccion. “Een toontje lager, alstublieft!”
 
 
 
 
 
 
 
 
 
 
 
 
 
 
 

Danki P’e Cambio
 
Diamars ultimo, no solamente tawata un dia special pa Partido MEP na e momento cu e Acuerdo di Formacion a wordo firma pa asina cuminsa cu e fase di Programa di Gobernacion, sino tambe tawata un dia sumamente importante pa MEP ora cu e checkers a wordo gradici pa e trabou elocuente cu nan a haci durante eleccion dia 22 di September.
 
Presidente di Partido, dr. Gerrit Croes a duna un discurso cortico y a gradici tur esnan presente. El a duna un splicacion di kico a bay bon y malo y kico por mehora pa e proximo eleccion. Sr Croes tambe a haci un apelacion pa tur presente keda den contacto cu partido y yuda den directivanan di bario unda nan ta pertenece.
 
“E trabou pa controla cada urna den tur districto no ta uno facil, sinembargo e cooperacion cu nos a haya di boso, cu a pone boso mes disponibel ful e dia, tawata enorme. Pa e motibo aki, ami, den nonber di lider di MEP, sra Evelyn Wever-Croes y Partido MEP, ta yama cada un di boso danki pa boso trabou di controla cada urna durante e eleccion,” dr Croes a bisa.
 
Secretario General di MEP, Xiomara Ruiz-Maduro tambe a hiba palabra y a gradici tur presente pa a forma parti di e cambio cu awe nos a logra.
 
Como ultimo, tur candidato presente a duna un gradicimento final especialmente na tur esnan cu a yuda nan na nan respectivo urnanan.
 
E encuentro di checkers a tuma luga na Piedra Plat Entertainment Center.
 

​Formador di Gobierno, sra Evelyn Wever-Croes, den proceso pa forma un gobierno nobo, a reuni pa e di dos dia hunto cu partidonan MEP, POR y RED diamars mainta pa sigui cu negosacionnan na unda a logra e prome acuerdo entre e partidonan menciona. Tocante esaki Sra Wever-Croes ta bisa lo siguiente:
 
“Nos ta den e prome fase di formacion y nos a logra e prome acuerdo, esta e Acuerdo di Formacion. Lidernan di e tres partidonan a yega na acuerdo pa firma dicho acuerdo pa asina sigui cu e siguiente fase, cual lo ta e Programa di Gobernacion. Aki nos lo pone tur e puntonan cu partidonan a bay campaña cu n’e y descuti riba nan pa asina cada vision wordo inclui den nos programa di gobernacion”.
 
E Acuerdo di Formacion a wordo firma diamars atardi na Ayo Rock Formations durante un conferencia di prensa.

Nos meta ta pa brinda Aruba un gobierno stabiel
 
Dialuna, den edificio di APA, a inicia e reunionnan di formacion di e proximo gobierno di nos pais entre e tres partidonan. Lidernan di tur tres partido y nan conseheronan y miembronan di comision tawata presente pa asina duna inicio na e negociacionnan cu lo tuma luga pa asina pronto Aruba conoce un gobierno di coalicion manera pueblo a pidi p’e.
 
Lider di Partido MEP, sra Evelyn Wever-Croes, kende tambe ta Formador di gobierno nobo ta amplia riba e procedura di formacion di gobierno como lo siguiente:
 
“Diahuebs ultimo, mi a ricibi e encargo di Formador for di Gobernador y den cuadro di esaki nos lo bay cuminsa cu diferente reunionnan. Mi a haya instruccion pa purba forma un gobierno di coalicion entre partidonan MEP, POR y RED.
 
Den e ultimo dianan desde cu Gobernador a nombra mi como Formador, tin basta rumornan y speculacionnan ta circula di diferente aspectonan di formacion. Ta asina cu te hasta e gobierno a wordo forma caba cu varios diferente minister. Sinembargo, tur esakinan no ta corecto y ta completamente falso. Awe nos ta bay cuminsa. Y e procedura ta bay tuma luga den e siguiente fasenan:
 
Acuerdo di Formacion: Esaki ta e combersacionnan tocante e puntonan den lineanan general pa yega na un programa di gobernacion.
 
Programa di gobernacion: Despues cu nos tin e Acuerdo di Formacion defini, nos lo bay na e programa di gobernacion. Tur e puntonan cu partidonan a bay campaña cu n’e, ta wordo descuti pa asina cada vision wordo inclui den nos programa di gobernacion. Ta importante pa tuma tempo pa descuti tur e puntonan aki pa asina nos por yega na palabracionnan concreto pa brinda pueblo un gobierno stabiel.
 
Reparticion di Carteranan: Una bes cu nos yega na e fase aki, Partidonan ta bay bek den nan seno pa palabracionnan kende lo bira candidatonan pa minister cu lo representa nan partido pa eherce e diferente funcionnan.
 
Proceso di Screening: Candidatonan apunta pa bira minister lo pasa un proceso di screening. Una bes cu e resultado di screening drenta, nos lo entrega e reportahe na Gobernador, cu e deseo di a forma un gobierno cu un base amplio manera Gobernador a pidi.”
 
Sra Wever-Croes ta sigui bisa cu no solamente el a haya encargo pa forma e proximo gobierno sino tambe pa reuni cu diferente instancianan na Aruba, gremio, departamento di gobierno, sector priva y instancianan social y caritativo. Nos lo bay tene cuenta cu esnan cu ya caba a reuni cu informador y lo invita e otronan durante e simannan aki.
 
“Ta bay ta dos trayectoria pareu cu lo tuma luga den e dianan aki, ambos sin duda lo bay ta hopi pisa, pero atencion principal ta pa forma e gobierno.”
 
Sra Wever-Croes ta conclui bisando cu lo tene prensa informa lo maximo posibel di e procedura di formacion di gobierno nobo. Alabes e ta pidi pa prensa duna espacio y trankilidad pa yega na un bon acuerdo. Y ta priminti cu manera tin algo di informa, lo yama prensa pa asina pueblo tambe keda bon informa di henter e procedura.

Dialuna 16 di october, trabaonan di formador a cuminsa basa riba e tarea di formacion cu Sra. Evelyn Wever-Croes a ricibi for di Sr. Gobernador.
 
Na e edificio di APA NV tabatin un conferencia di prensa na unda Lider di MEP y alabes Formador hunto cu e lidernan di POR y ReD, despues di un introduccion di Formador, tambe a contesta preguntanan di prensa.
 
Despues di e conferencia di prensa Formador a habri un reunion cu e lidernan di e partidonan MEP, POR y ReD hunto cu nan conseheronan pa delinea con e proceso di formacion ta wordo ehecuta.
 
E reunion a wordo suspendi pa e partidonan bay den nan ceno pa discuti detayenan di entre otro e Acuerdo di Formacion cu a keda anuncia durante di e conferencia di prensa.
 
Den oranan di merdia Director di Departamento di Finanzas, sr. Derrick Werleman, a reuni cu Formador. E intercambio tabata hopi intensivo na unda Formador a ricibi hopi informacion en cuanto de e situacion financiero di Pais Aruba.

Partido MEP a reuni cu Departamento di Asuntonan Social.

Lider di partido MEP Evelyn Wever-Croes a encabesa un delegacion grandi di politiconan di MEP cu a reuni cu Departamento di Asuntonan Social.
Di parti di MEP a participa na e reunion Setty Christiaans-Yarzagaray, Darlaine Guedez-Erasmus, Hendrik Tevreden, Daphne Lejuez,  Roderich Lopez, Amy Richards, Eddy Paris, Sharlene Starke, Stephanie Croes, Jerehm Campbell, Endy Croes y Evelyn Wever-Croes.
 
Durante e reunion e politiconan a haya un presentacion di e situacion social na Aruba. Pa e politiconan di MEP e situacion ta hopi alarmante y ta teme pa un explosion social. Tur esaki ya e partido politico a accentua varios biaha cu ta pasa pasobra gobierno actual a prefera di inverti den klinker, en bes di den e problemanan social. Mester evita cu e "bom" social aki rementa.
E expertonan di Departamento di Asuntonan Social a delinia e maneho pa atende cu e problemanan social riba termino corto y termino largo.
Tambe a enfatisa e importancia di e nucleo familiar den e proceso aki.
 
Di parti di partido MEP, Lider di MEP Evelyn Wever-Croes a expresa su gratitud pa e presentacion:
"Pa nos di MEP prioridad ta pa pone e ser humano central atrobe y pesey ta importante pa reuni y scucha di e departamento cu ta atende cu e ser humano cu mester di asistencia pa haya sa con por yuda pa cada ser humano tin un miho calidad di bida. Mi ta impresiona pa e plan di e Departamento di Asuntonan Social, y di nos parti nos ta determina pa duna nan e sosten cu mester pa por logra atende cu problemanan social na Aruba".