088A7117.JPG

Evelyn Wever-Croes

Nos Lider, 

Evelyna Christina Croes, 54 aña, a casa cu Kenneth Wever dia 2 di juli 1991. E ta mama di 3 yiu, Christine, Kevin y Claudine y tambe wela di un nieto, Trystan.


El a studia ley fiscal na Rijksuniversiteit Leiden na Hulanda y dia 25 di augustus 1989 a obtene su titulo di Meester in het Fiscaal recht.


Dia 15 di september 1989 ta e fecha cu el a inicia su carera na Inspectie der Belastingen na Aruba y entrante prome di April 1994 el a bira hefe di e departamento.

Exactamente 13 aña despues, dia 1 di april 2003, Evelyn a haci un cambio di carera y a bay traha como consehero fiscal na bufete di abogado CROES WEVER TCHONG. November 2018 el a huramenta como abogado, y desde e fecha ey a traha como consehero fiscal y como abogado.
13 di mei 2009 ta e fecha cu nos actual Prome Minister a tuma e decision pa sirbi su Pais den forma di drenta e arena politico y a participa pa prome biaha na eleccionnan Parlamentario dia 25 di september 2009. Den su prome salida Evelyn a sa di obtene 1621 voto y asina a drenta Parlamento cu voto preferencial dia 31 di october 2009.


Dia 28 di augustus 2011, durante un Congreso di Partido, sr. Nel Oduber a retira como lider politico y Evelyn Wever-Croes a wordo eligi como lider nobo di MEP cu 68% di e votonan. Esaki ta marca inicio di un etapa nobo den Partido MEP.


Dos aña despues den eleccion dia 27 di september 2013, Evelyn a bay eleccion como lider di partido MEP y a obtene 3396 voto y den eleccion dia 27 di september 2017, el a obtene  3503 voto.


Durante su trayectoria di 8 aña como Parlamentario den oposicion (desde 2009 te cu 2017), el a duna su contribucion balioso riba diferente tema, entre otro financiero, fiscal, huridico y social. Evelyn a sa di pone hopi atencion tambe na mehora e relacionnan den Reino specialmente despues cu e welga di hamber di e ex Prome Minister na juli di 2014, a pone hopi presion riba e relacion.


Dia 17 di november 2017 a forma un coalicion cu lider di Partidonan POR y RED y asina Evelyn, nos actual Prome Minister a marca historia como e prome Prome Minister femenino di Pais Aruba. Na e momento ey tambe Aruba a conoce un Gobierno di coalicion atrobe despues di 16 aña.


Durante e ultimo 3 aña y mey di gobernacion, Evelyn a sa di surpasa hopi reto. Retonan financiero, retonan social, retonan cu situacion politico na Venezuela, retonan den Reino y retonan den coalicion. Pero sin duda e reto mas grandi cu Evelyn a haya como lider di nos pais, ta e maneho di un Pais den e crisis ocasiona pa e pandemia mundial di COVID-19.


Prome cu e pandemia, Evelyn su liderazgo a sa di pone Aruba riba mapa internacional pa e vision social y sostenibel. E vision di integridad y e vision innovador. E pandemia a duna Evelyn e oportunidad di demostra Aruba y mundo henter su calidadnan di liderazgo: firme – empatico – profesional – integro – confiabel.


Dia 30 di maart 2021, el a entrega retiro di su Gabinete cerca Gobernador di Aruba debi cu un partner di coalicion a wordo sospecha di malversacion di fondo publico. Esaki ta bay en contra di e principionan di integridad cu e coalicion a wordo funda riba dje.
Evelyn Wever - Croes ta lidera Partido MEP den eleccionnan adelanta dia 25 di juni 2021.

Logo Mep - Horizontal.png