Erich Jacinto Genser. 

 

Mi tin 37 aña y mi ta casa cu Juf. Ghislady Genser-Angela y nos tin 2 yiu, Princess Holly-J y Prins Jacob. Mi a nace na Aruba y a crece den e bario di Ayo. Full mi infancia y recorido educativo mi a pasa na scolnan na San Nicolas, Rayo di Solo, Filomena college basis y Filomena College Mavo. Y despues Colegio Arubano na Oranjestad. 

 

Na 2005 mi a tuma e iniciativa pa haci un estudio den area di Systeem beheerder na Hulanda. Na 2008 mi a gradua como systeembeheerder na Groningen. Desde Juni 2010 mi ta traha na Instituo Pedagogico Arubano como systeembeheerder. 

 

Hunto cu mi casa nos tin un grupo di gospel, Ministry On Fire. Unda nos ta alaba Señor a traves di musica. Cual mi persona ta toca percussion. Y como mi ta sinti Arubiano di curason y ta stima mi cultura, mi ta toca na diferente actividad cultural. Tambe a yega di bay representa Aruba na Jornada Mundial de Juventud cu grupo di hobennan. 

 

Mi ta un hende cu gusta deporte baseball, futbol, volleyball y mas. Actualmente mi ta practicando coremento cual mi ta train marduga y ta participa den careda nan cu tin durante aña. Mi gusta biaha y pasa vakantie cu mi famia.

​

Actualmente mi a cuminsa carera nobo como politico. “Desde hoben caba mi tawata tin anhelo pa ta den politica. Awo como adulto tata di famia y esposo e anhelo a bira mas fuerte. Un punto fuerte di mi caracter ta yuda hende y asina mi kier yuda mi Pais caminda mi a nace y ta stima manera mi yiu ta bisa ‘duro duro’. Kisas mi no ta un profesional den tur area pero mi curason ta pa Aruba pa un Aruba fuerte, uni y stabiel. Un Aruba unda cu cada un ciudadano ta duna di su banda pa completa loke falta. Un comunidad consciente y presente na tur momento. 

​

E motibo cu mi a scoge pa forma parti di Movemiento Electoral di Pueblo ta pasobra den un momento asina dificil cu henter mundo a pasa aden, MEP a demostra cu e ta traha pa e bienestar di pueblo cu nos den mente, pa cu futuro y stabilidad como pais. Mi kier a gradici na prome luga Dios pa e oportunidad cu e ta duna mi aworaki cu mi ta cuminsa mi careda politico. Na full team di MEP y nos lider Sra. Evelyn Wever-Croes pa acepta mi riba e lista prestigioso aki. 

​

Como prome Minister Sra. Evelyn Wever- Croes a sa di goberna y dirigi e pais aki sublimemente. Lamentablemente a bin e pandemia cu a pone cu hopi plan y proyecto mester a wordo para. Mi tin hopi respet y ta admira con nos Prome Minister hunto cu e ekipo di MEP ta manehando e situacion di Covid-19. Caminda cu a percura pa e bienestar di nos hendenan prome. Danki y sigui cu e bon maneho Prome Minister. 

​

Mi tey pa Aruba with a humble heart.