Un reunion cu pa algun tempo tabata pending. Nos a reuni cu Representantenan di ATIA, esta sr. Tito de Cuba cu ta sectretaris di Board di ATIA y sra. Michelle de Groot Director di ATIA.

ATIA como organisacion ta traha cu diferente comision interno. Un di nan ta esun di labor. Sr. Tito de Cuba ta presidi dicho comision pa ATIA.


Industria Turistico
Durante e reunion di awe mainta nos a trata diferente punto. Entre otro a trata e retonan grandi riba mercado laboral, si tene na cuenta e posibel desaroyo economico cu ta keda premira pa e industria turístico. Desaroyonan cu lo crea cuponan di trabou y cual na e momentonan aki nos mercado laboral no por yena.
Un manera cu a keda trata pa contra aresta e problema aki, ta door di stress riba un mihor matching entre labor y enseñansa.


Hobennan & Empleo di Futuro
Otro aspecto interesante y cu ATIA tambe ta subraya su necesidad ta e maneho y plan di accion dirigi riba nos hobennan. ATIA ta indica cu mester haya un bista total y completo di e hobennan aki pa enberdad nos por yudanan. Aki nos a informa cu Gobierno a informa Parlamento cu esaki lo ta cla na mei awor.
Otro aspecto interesante cu nos a touch un rato ta empleonan di futuro manera Coding y tambe e posibilidad pa haci uzo di remote work - traha for di cas. Segun ATIA den futuro mas y mas nos ta bay tin mester di nan y sigur e ultimo a demostra cu e por beneficia e productividad di un trahador y aporta na e bienestar social di nos país.


Imagen doño di trabou
Un punto hopi importante cu ATIA a presenta ta cu nan kier bay traha riba e imagen di e doño di trabou (por ehempel pa kita e stigma cu nan ta exploita trahadornan). Pa logra esaki nan lo bay traha riba data, esta cuanto trabou nan ta crea, cuanto placa/salaris esakinan ta genera, info over tur e community work, sponsoring etc cu ta sali di nan miembronan. Cu por tin doñonan di trabou cu ta actua Incorrecto por ta e caso pero ATIA sigur no ta sostene e practicanan aki.
Tambe nos a papia over di e structura salarial di entre otro e industria industrial caminda tips ta hunga un rol hopi importante.


E reunión en general a bay den bon ambiente y caminda mas puntonan a keda trata manera:
- Redtape den Gobierno y e Fast-track cu Gobierno kier introduci pronto
- Info session di ATIA pa su miembronan encuanto Ley di Labor, impuesto etc.
- Un parti di reforma fiscal
- Posibel introducción den futuro di un certificacion pa e sector di
- Construccion
- Coronavirus: ATIA a sinta cu DVG y lo tin un info session pa nan miembronan dentro di poco
- Vergrijzing


Na final a keda palabra cu lo bay mantene un relacion mas estrecho y cu lo percura pa reunionnan mas regular entre e Comision di Labor y Sector Primario di Parlamento cu ATIA.

Parlamentario Endy Croes a tuma nota cu e conseho di CAFT data 25 di februari 2020 riba e vierde uitvoeringsrapportage esta e di 4 kwartaal 2020 cual a yega Parlamento. CAFT a duna un splicacion amplio. Manera nos sa di acuerdo cu e normanan palabra den e Protocol di 22 november 2018 cual ta valido di 2019-2021, Aruba lo mester logra baha e deficit (di e desaster di AVP) y alcansa -25 miyon florin na final di 2019 cual ta igual na un deficit di -0.5% di e BBP (GDP).


Resultadonan di SVB y AZV
Den e conseho aki CAFT a amplia riba e collective sector awor cu tin informacionnan adicional hopi relevante di SVB y AZV pa asina por haya cifranan concreto pa cu aña 2019. E saldo di e collective sector a wordo influencia positivamente door di resultadonan di SVB (30 miyon) y AZV (13.3 miyon) pa un total di 43.3 miyon mas halto cu a anticipa. Esaki ta igual na un overschot di + 0.7%. E saldo financiero di pais Aruba a resulta den di 4 kwartaal na 3.8 miyon. Como cu Refineria di Aruba no a “come across” cu 14 miyon na dividendo manera palabra, e saldo financiero di pais Aruba a resulta -10.2 miyon. Como cu di acuerdo cu presupuesto y norma financiero e saldo financiero mester tabata -24.8 miyon esaki a resulta di ta na final 14.6 miyon mihor cu a anticipa.


Gastonan ta 33 miyon mas abou cu presupuesta
CAFT ta sigui cu su elogio pa e maneho financiero y ta splica den su conseho cu a tuma nota cu gastonan ta 33 miyon mas abou cu presupuesta y ta muestra di e disciplina cu e gobierno aki tin. Alabes e reduccion (criyoyo na papiamento e special) cu gobierno a obsekia riba dividendo unda normal bo lo paga 25% pero den 2019 por a paga solamente 10% momento di saca dividendo y esaki a trece den caha di gobierno 47 miyon total. Esakinan ta basa riba e vision y conviccion di nos Minister di Finansas Xiomara Maduro y su Team y e experticio den e tema aki di nos Minister President Evelyn Wever Croes pa por logra e metanan aki den solamente dos aña.


Gastonan di personal a baha
Si compara 5 aña pasa Mike Eman tabata tin un deficit di 444 miyon den su presupuesto y na 2019 Evelyn Wever Croes a logra un SURPLUS di 11 miyon ta un cambio di rumbo di cielo y tera na fabor di nos pais Aruba. Gastonan di personal cu na october /november 2019 tabata un punto di discusion cu CAFT unda CAFT a hasta recomenda un KB riba e tema aki na Rijksministerraad a resulta awor cu a termina na 474.7 miyon plus 2.7 miyon di Social Crisis Plan esaki ta alcansa 477.4 miyon cu ta menos cu locual ta ancra den e protocol esta 479 miyon pa aña 2019. Pues aki tambe e gobierno a slaag y ta muestra cu tur e decision e tempo aya tabata innecesario. CAFT riba pagina 2 den su “oordeel” ta duna gobierno un compliment general pa promer biaha den historia por escrito bisando: “het CAFT acht dit zeer positief.”


Parlamentario Endy Croes ta termina bisando cu nos no a yega ainda unda nos lo kier ta pero gobierno aki ta haciendo milager pa drecha e desaster di AVP unda awe te hasta CAFT a realisa cu locual Evelyn y Xiomara a bin ta haciendo ta fantastico pa un finansas publico sostenibel pa pais Aruba convertiendo esaki den realidad y pronto pueblo tambe lo cuminsa sinti su fair share pa cu esaki. Pabien na gobierno y Aruba ta den bon man y ta riba e bon rumbo.

Parlamentario Endy Croes a tuma nota cu Dowers a cuminsa traha por lo menos na cas di partido. Durante 2020 Dowers no a yega Parlamento ainda y esaki ta e puro berdad. E no a bin reunion publico dia a trata e rapport “Bo Aruba”, no a bin ningun reunion di Comision Central, no a bin ningun reunion di Comisionnan Fiho y diripiente por a tuma nota cu Dowers a cuminsa papia den prensa for di cas di partido. Dowers ta bay den historia como e minister di mas malo cu Aruba a conoce den husticia. Dowers banda di no a yega Parlamento e aña aki nos a tuma nota cu e gusta cos pornada y ta cay den categoria number uno riba e lista di rating di sinberguensa.


Come y bebe pornada estilo haragan
Por a tuma nota cu Dowers dia 27 di februari a atende un recepcion na un hotel y a bebe y come pornada pero traha niet! Asina riba mesun dia el a atende un di dos recepcion y por a tuma nota con e ta come y bebe pornada estilo haragan. Dicon e por saca tempo pa bay come y bebe pero no tin e interes pa bin trabou y traha pa e placa cu pueblo ta pag’e. Aki honor y dignidad ta hunga un rol. Un hende cu lanta humilde y wordo educa decente ta siña e eticanan y balornan di bida entre otro honor y dignidad. Ora bo yega trabou laat mes un persona “normal” ta sinti berguensa y ta pidi un disculpa cu un splicacion cortico. E politiconan di AVP a perde tur nocion y no ta carece di ningun tipo di balor den bida entre nan honor y dignidad.


Tres luna sin presenta na trabou
Dowers ta keda 3 luna sin presenta na trabou y e promer invitacion cu drenta pa Parlamento cual bo ta haya riba bo celular el a baña bisti un bachi “menudo” y ate ta come y bebe pornada sinta den eerste rij manera un sinberguensa di marca mayor. Su consenshi no tin tipo di remordimiento of berguensa pa atende actividadnan asina, cobrando 8200 florin pa luna sin presenta pa 90 dia na trabou? Bay conferencia di prensa un bes pa siman den cas di partido segun Dowers ta hustifica su trabou? Mas ainda den conferencia di prensa Dowers a coy un “kick” riba webo y banana. Gritando cu WEBO y BANANA a subi. Dowers no a splica sinembargo ta con esakinan a subi. Den mesun rosea Dowers den su afan pa critica nos Minister Presidente Evelyn Wever Croes, e no a keda afor y a bin cu acusacionnan fofo y sin base. Parlamentario Endy Croes kier recorda Dowers riba e dicho “cada ladron juzga por su condicion”.


Casa di Dowers a cobra 400 mil florin
Patricia Dowers ta casa di Dowers y Patricia segun informacion fidedigno a cobra 400 mil florin durante gobernacion di Dowers y AVP pa duna algun conseho. Ainda falta! Nos ta reta Dowers pa bin afo y nenga esaki. Anto Dowers kier usa smoke screen acusando hendenan drechi cu ta rescatando e pais aki for di e desaster cu AVP a laga atras? Parlamentario Endy Croes ta pidi Dowers pa e pasa busca rapport ultimo di CAFT na Parlamento y lesa “oordeel” riba pagina 2: “Het CAFT acht dit zeer positief”. Puntra bo colega Marlon Sneek cu si a bin reunion cu CAFT kico CAFT a expresa den Parlamento: “Wij moeten de regering een pluimpje geven”. Pues pa prome biaha ta duna compliment. Bay busca den tur e consehonan di CAFT desde 2015 cu AVP a introduci’e te 2017 ora pueblo a core cu boso malamente ningun caminda por haya un compliment pasobra boso simplemente tabata horta e pais aki manera Piratanan di Caribe di decadanan atras.

Parlamentario Endy Croes ta felicita Promer Minister di Aruba Evelyn Wever Croes, Minister Glenbert Croes y henter Gobierno di Aruba cu na un manera elegante y inteligente bou guia di Promer Minister ta resolviendo e contracto desastroso cu AVP a mara Aruba na dje alrespecto CITGO. Ta un secreto publico cu Mike de Meza y Richard Arends di AVP ta esnan cu e negocia un contracto di 2000 pagina y mantene esaki scondi pa Parlamento horcando pais Aruba cu e deal desventahoso aki. Ta fresco den nos memoria con Mike de Meza, Mike Eman, Richard Arends y henter AVP a derocha y fiesta cu 20 miyon di RDA cu 3 apertura y por corda e fiesta di luho cu DESTRA unda a gasta 780 mil riba un anochi. Despues lo bin bek riba esaki.


CITGO no por a cumpli
Despues cu gobierno Mericano a pone sancion riba CITGO esaki a bira cada dia mas cla cu CITGO no por cumpli cu su contracto y poco poco pero sigur Promer Minister y su Team negociador a negocia lunanan largo pa scapa Aruba di tur claims y pa Aruba por sali ileso sin hay’e cu casonan grandi den corte cual porcierto por a dura varios aña y lo a tranca tur cos. Asina a logra sali poco poco pero sigur segun tempo a bay ta avansando y CITGO cada dia tabata mas den default.


Diabierna 28 di februari ultimo a logra firma e “transfer agreement” entre CITGO, Gobierno y RDA. CITGO a entrega simbolicamente diasabra 29 di februari e yabinan traspasando asina e operacion pa RDA y TDEA ambos companianan estatal di gobierno kendenan lo atende operacion temporalmente.


RDA lo keda encarga pa preserva e refineria
Den e proceso aki por a mira CITGO baha su bandera na gate di e refineria. Esaki sinembargo ta e promer paso comokiera cu ainda Gobierno pronto mester bini Parlamento cu un concepto di Ley alrespecto condicionnan di terminacion di e contracto y momento Parlamento aproba dicho Ley nos por celebra cu finalmente Gobierno oficialmente a sali for di e contracto y a haya e refineria bek y ta liber pa por negocia cu cualkier otro operador tanto pa e terminal como e refineria. RDA lo keda alabes encarga pa preserva e refineria mientras gobierno lo busca otro inversionista. Pa locual ta e terminal nos ta hopi positivo cu den tempo relativamente cortico gobierno lo haya un operador e aña aki y pa locual ta e refineria esaki por tuma su tempo. Un cos si nos ta mas cerca di cosnan grandi pa pais Aruba y esaki lo por ta e shocks cu Aruba tabata tin mester pa cubri cualkier eventualidad.


Pabien Evelyn Wever Croes, Pabien Glenbert Croes, pabien team negociador y pabien pueblo di Aruba den su totalidad.

Parlamentario Endy Croes por a sigui un conferencia di prensa cu AVP a yama dilanti compania estatal WEB. Benny Avestruz Sevinger a hiba palabra mientras su “carnenan” Richard Arends, Michael Lampe, Marlon Sneek y Robert Candelaria kende tambe tin un storia basta scur di aparentemente a “presta” Afl. 50 mil di pueblo na biahenan di Corsou pa Aruba tabata esnan cu tabata para den background.


Acusacionnan falso di Benny
Benny “Tropicana” a bin cu un cantidad di acusacion falso sin tin ningun documento pa substancia su ponencia. Por ehempel a sinta yora cu ex minister Rudy Croes ta riba payroll di gobierno y ta cobrando miles di florin. Gritonan den bashi! Rudy Croes a caba di pasa den un operacion hopi grandi y ainda ta den hospital recuperando na Colombia mientras cu Rudy Croes nunca pero nunca desde november 2017 ta riba un of otro payroll di gobierno. Esaki ta pa ilustra e caracter y mentalidad di mafioso cu ta core den venanan di Benny. No ta pornada a compara Benny cu un bandolero. Su actonan mes ta papia pa su mes.


Facilitador pa horta tereno di pueblo
Nos por corda con Benny a grita den Parlamento despues cu el a caba di masacra Aruba y a forma parti como facilitador pa horta un cantidad di tereno como patrimonio di pueblo “I don’t give a damn!” Esaki ta tipifica AVP su mentalidad. Asina nan a haci cu nos finansas publico tambe creando e Mega Debe y e desaster financiero. Benny a sinta yora cu BAVP ta trece aden 106 miyon y ta apenas 82 Miyon nan a mara Aruba na proyectonan PPP. Benny no ta splica pueblo si cu 82.4 miyon aki pueblo mester pag’e te cu aña 2044. Pues 24 aña na 82.4 miyon ta 2000 miyon, pues casi 2 BIYON e pueblo aki lo paga pa e desaster di Benny y AVP. Pa colmo manera un “lolo di awa” Benny a haci como sifuera cu tur cos ta ok. Benny a lubida cu esakinan ta trece costonan adicional di interes cu mester paga riba placanan cu pais ta presta pa cumpli cu e locuranan di e bandoleronan Mike Eman y Benny?


Ta ken Benny kier bay culpa?
Parlamentario Endy Croes ta suplica Benny gaña pasa na Parlamento y nos lo duna bo e documentonan corecto. Na 2019 e pais aki a paga 232 miyon solamente na interes. Esaki ta igual na 635 mil pa cada dia y 365 dia pa aña pagando e desaster di AVP. Ainda Benny ta esun cu kier bay culpa hende? AVP boso bin bij. Benny ta un corupto, Benny ta meti den fraude di tereno y Benny ta un sospechoso cu no por ni biaha representa Parlamento.


Ki ora cu Benny of cualkier miembro di AVP papia algo for di sla por conta cu nos lo t’ey manera baranca pa corigi nan. Hustamente Benny, Mike de Meza y AVP a somenta 230 miyon di placa di pueblo den WEB na hedging. Rapport oficial di WEB ta ilustra e cifra aki. Pues sigur Benny y AVP boso no ta bon bini pa para dilanti WEB tampoco. Cuminsa prepara bo mentalmente pasobra e aña aki ta Bo aña.

Ultimo simanan por a tuma nota di e desesperacion cu ta reinando den partido AVP despues di a hiba un maneho financiero desastroso di 2009-2017 bao di Gabinete Mike Eman 1 y 2, unda cu pais Aruba a conoce un redoblacion di debe y di proyectonan grandi cu no tabatin cobertura financiero pa esakinan. Awendia den nan desesperacion y den nan ansha di morto partido AVP ta instigando pueblo cu e Gobierno actual ta matando nan cu medida. Y e partido aki cu a haci un daño financiero grandi na país Aruba awe kier pretende cu ta otro cu ta sinta awo ta causante di kico ta pasando na Aruba. Nan ta sinta pensa cu e pueblo aki nan por tum’e haci ki ora cu nan kier y p’asina nan por bolbe un biaha mas na poder hayando e cama drecha pa bolbe masacra país Aruba financieramente. Y sigur AVP ta orguyoso di tur debe crea cu na final di dia nan líder Mike Eman cu boca grandi a grita: “e debe t’ey pa pueblo paga”.


Accion pa salba Aruba
Na Aruba tumamento di accionnan necesario pa percura pa mehoracion di finansas di nos país ta ser bendi na pueblo como medida. Hecho ta cu den otro paisnan unda cu no a tuma medidanan pa salba finansas di nan país awendia ta reina caos manera ta nos país bisiña, unda cu debi na mal maneho financiero di tur gobernacion y sin tuma e accionnan (medidanan) necesario awe nan placa no tin ningun balor mas. Y netamente esaki nos na 2018 a tuma e decision di bin cu e accion yama crisisheffing unda nos a pone 2.5 % extra riba BBO haciendo esaki 6%, debi cu practicamente Aruba tabata den un rumbo cu si nos sigui asina nos moneda tampoco lo no tin su balor mas ya cu 93% di GDP tabata suheto na debe, pues di cada florin 93 cen ta bay pa paga debe. Y nos a tuma e accion aki conscientemente pa por cubri e gastonan di debenan manera PPP. Tambe hopi ta broma cu a haya 106 miyon na e BBO extra ey y e debe di PPP ta 82 miyon y e resto supuestamente ta bay pa famia y amigonan, pero nan tur a lubida di menciona cu nos debe a aumenta di 2 biyon pa 4 biyon florin y nos ta pagando un interes riba e debe aki di 232 miyon florin. E pregunta ta for di unda nos lo tin di saca placa pa paga e debe y interes? Sigur for di e 106 miyon florin ey e no ta yega pasobra pagando PPP plus pagando interes acumula nos tin un deficit di 208 miyon florin cu nos tin di yena cu otro entradanan pa por cumpli. Y sigur pa 2020 nos tin mas reto ainda di yena e buraco financiero di e aventura di Citgo y tambe 50 miyon extra pa por tin un presupuesto cu un surplus di 25 miyon. Banda di e accion di 2.5 % di BBO nos a aumenta accijns riba alcohol y tabaco causando cu prijs di esakinan a aumenta pero esakinan ta productonan cu cada ken ta haci nan escogencia di nan uzo personal. Pues di 2017 te awo na 2020 e unico dos accion pa yuda stabilisa nos finansa cu nos a tuma tabata e aumento di BBO cu 2.5% (pa yuda paga e proyectonan PPP y un parti na e interes haltisimo di e 4 biyon na debe) y tambe aumento di accijns di tabaco y alcohol.


Medidanan pa yuda pueblo
Mi ta bay resumi tambe cual ta e medidanan cu nos a tuma pa pueblo tambe por tin un tiki alivio pasobra nos a bisa cu no ta husto pa tuma accionnan pa salba Aruba pero nos tin di tuma medidanan pa asina nos pueblo tambe por sinti un alivio. Y esaki ta e siguiente medidanan cu nos a tuma pa yuda pueblo:
1. A baha tarifa di loonbelasting y inkomstenbelasting y januari 2020 nos a bolbe baha e loonbelasting cu 4% y esaki a traduci su mes cu tarifa a baha pa 25.000 hende
2. Reduccion di grondbelasting: esaki a causa cu 27775 persona a conoce un rebaho
3. Dividend belasting a ser reduci di 25 % na 10%
4. Rebaho di prima di AZV di 4% pa pensionadonan
5. Aumento di reparatietoeslag pa pensionadonan
6. Aumento di pensioen
7. Aumento di minimumloon
8. Reduccion di coriente di 10% pa nos ciudadanonan y pa comercio 7%
Pues nos a percura - banda di tuma accionnan pa salba Aruba - nos a tuma medidanan tambe pa por duna pueblo un tiki cu por yuda compensa e accionnan tuma. Accionnan cu tabata necesario pa motibo di iresponsabilidad di Mike Eman y su Gabinete completo pa locual ta maneho financiero.


Di con oposicion no ta critica e prijsnan di container??
Mi ta haya cu cada bes AVP of un grupo comprometi na AVP bin dilanti y trata na pega algo cu a ser tuma na 2018 manera tabata e aumento di e BBO cu 2.5 % pa por yuda contribui na paga e debenan crea door di AVP, ningun hende no ta papia di e aumento di tarifa di container na Barcadera. Esaki no ta causa cu e prijsnan local no ta aumenta? Ta dicon AVP no ta papia riba esaki cu ta causando mas dolor cu nunca na pueblo pasobra e aumento di tarifa aki finalmente ta ser paga pa e consumidor cu ta pueblo, unda cu prijsnan ta subi drasticamente pero ningun hende no ta papia riba esaki. Y ta p’esey mi ta apoya Minister Chris Romero totalmente den su vision y mi sa cu e ta basta leu pa bin cu un Portshaven na San Nicolas cu lo competi cu e containerhaven na Barcadera y asina tambe nos por yuda reduci e prijs di containernan cu ta un peso hopi pisa pa pueblo eyfo cu ta wanta e sla cada bes cu esakinan ta ser aumenta manera ta e tarifanan pa 2020 cu AVP ta asina keto riba esaki. Porque sera????

Diasabra 29 di februari a marca un fecha importante pa pueblo di Aruba unda cu Promer Minister Evelyn Wever-Croes ta logra e traspaso di parti di Citgo di e terminal y refineria na pais Aruba un biaha mas. Un logro importante y cu den e momentonan dificil financiero cu pais Aruba ta pasando aden, debi na decision robes di a endeuda e pais aki, e traspaso aki ta crea speransa un biaha mas pa Aruba y pa esnan cu sa kico e refineria aki ta nifica pa locual ta su impacto financiero y economico pa nos país. Y sigur esaki tabata te na 2012 e di dos pilar economico di Aruba, pero cu lamentablemente bao di Gabinete Eman 1 a conoce su ciere y bao di Gabinete Eman 2 a purba gaña pueblo cu lo habri esaki cu Citgo. Hecho ta cu te dia di awe - despues di dos fiesta di apertura cu a costa pueblo alrededor di 800.000 florin, sin conta e avion paga door di Utilities pa bay firma na Venezuela carga cu hende incluyendo prensa - a logra solamente empeora e infrastructura di e refineria cu nunca a conoce produccion di ni un solo bari di petrolio.


Crea speransa nobo
E traspaso di e yabinan di e terminal y refineria na RDA (Aruba) ta crea speransa nobo pa locual ta e futuro di e refineria y e terminal. E siguiente paso pa caba cu e odisea di Citgo ta e ley di terminacion di contracto oficial cu tin di bin parlamento den corto tempo pa por aproba esaki y por bay na e siguiente fase cu ta busca na promer lugar un operador pa e terminal y alabes tin e oportunidad y tempo pa explora si tin interesado cu por brinda e confiansa financiero pa por rehabilita esaki y por compromete su mes pa un periodo di 25 pa 30 aña lo percura pa e refineria aki keda operacional. Y si no logra, e siguiente fase lo ta busca alternativanan industrial cu por genera mesun of mas impacto financiero economico pa país Aruba y asina nos por sigui diversifica nos economia y tambe crea cuponan di trabao den futuro pa e siguiente generacionnan.


Prueba di e fracaso di Mike Eman como gobernante
Mike Eman den un desesperacion politico pa motibo cu su pilar economico Berde cu el a priminti pueblo y cu a costa pueblo mas cu 1 biyon florin creando un Mega Debe di riba 4 biyon florin, unda cu den 8 aña a duplica nos debe nacional causando un debe cu a yega 93% di nos GDP y unda Aruba tabata practicamente failliet, a core cera un acuerdo dudoso cu Citgo di mas di 2000 mil pagina y cu a ser pasa den parlamento di Aruba den 1 dia, cu un gerencia di Citgo cu awendia mayoría di nan ta cera pa corupcion den Citgo y PDVSA. Y awo despues di 4 aña cu a logra manipula CAFT cu presupuestonan cu entradanan di e deal di Citgo pero cu e entradanan aki na 2017 no a drenta y nos cu a drenta na november 2017 a haya nos confronta cu esaki, unda pa culpa di esaki nos a haya nos cu deficit financiero y pa e añanan siguiente e refinería no a produci pero si a causa un peso financiero pa presupuesto di nos pais. E deal aki ta prueba di e fracaso di Mike Eman hunto cu su Gabinete completo. Esaki ta incluyendo Richard Arends cu si a saca un bon probecho unda cu su compania den Utilities so a saca 567.000 florin na conseho huridido di apertura di e refineria.

Parlamentario Endy Croes ta siguiendo hopi di cerca e casonan grandi di investigacion cual ta wordo haci pa Ministerio Publico. E caso IBIS di Paul Croes por ehempel a inicia desde augustus 2015 y awor tin 5 aña andando mientras e caso AVESTRUZ di Benny Sevinger y Leoncita Arends a inicia desde maart 2018 y a drenta su di dos aña den investigacion.


OM cuestiona formalmente
Parlamentario Endy Croes a tuma nota cu tanto na Corsow como Sint Maarten aparentemente e investigacionnan ta cana mucho mas liher y sospechosonan hopi mas rapido ta wordo hiba mesa berde y te hasta tin cu a cuminsa paga caba pa nan delito cu nan a comete sea cu placa of patrimonio di pueblo. Pueblo sinembargo ta keda hopi atento y no ta pasa un weekend cu preguntanan di pueblo den comunidad y alabes den prensa casi tur dia ta cuestiona nos Ministerio Publico formalmente. Parlamentario Endy Croes ta sali semper na defensa di Ministerio Publico splicando cu nan mester di tempo pero den e mesun rosea Parlamentario Croes ta sinti cu Ministerio Publico mester di mas mankracht y experticio. No kier exclui otro pensamentonan politico.


Hulanda a forsa Mike Eman acepta un CAFT/LAFT temporal unda CAFT como un advies orgaan tin aceso completo na e parti di finansas y cifranan di Aruba y avisa riba e tema financiero cual AVP a laga bagatalisa. CAFT ta temporal y lo retira momento Aruba por controla bek e situacion financiero na un manera sostenibel (2021). Nos sa cu e situacioin financiero a bay completamente for di man bou regimen di 8 aña di AVP kendenan a crea e Mega Debe lagando un desaster atras. Esaki enberdad a kita parti di nos autonomia temporalmente.


Un comision similar na CAFT pa husticia
Parlamentario Endy Croes ta di opinion pa con “zuur” cu e por zona pero ta tempo pa pidi Hulanda asistencia pero e biaha aki den husticia. Parlamentario Endy Croes lo basa su peticion riba un “Falend OM” usando e parti di art 43 ( rechtszekerheid) pa salvaguardia nos estado di derecho pero mas cu claro den forma temporal mescos cu CAFT/LAFT y asina pusha pa ‘get things done’. Pues instala un comision similar na CAFT pa husticia pero solamente pa controla Ministerio Publico y brinda nan conseho y asistencia necesario pa por termina e cantidad di investigacionnan pisa andando. Esaki ta opinion personal di Parlamentario Endy Croes y lo bay inicia e bueltanan pa pusha e pensamento aki riba nivel di Parlamento y Gobierno pa saca peticion oficial dentro di poco bon argumenta pakico tin e pensamento di “een falend OM” y pakico lo ta na su lugar un tipo di CAFT (kisas CAJT, College Aruba Justitieel Toezicht) solamente pa Ministerio Publico mara na un tempo defini y asistencia. No por ta asina cu politiconan cu a “horta” miyones di pueblo y a comete fraudenan y masacra comerciantenan ta cana liber manera nada no a pasa. Ainda falta casonan di RDA y Utilities cu mester wordo investiga. Sin kier pensa mes riba posibel corientenan politico cu por ta core internamente den OM.


Pues Parlamentario Endy Croes ta kere ta e momento pa haci uso di art 43 (rechtszekerheid) pa con zuur e por zona pero na un manera responsabel y temporario mescos cu CAFT.
Disfuncionamento di Ministerio Publico ta mina e “rule of law”. Nobody is above the law! Not EVEN BENNY!

Parlamentario Endy Croes ta bastante indigna riba comportacion di Canadian Bank Note y Lotto pa Deporte den cuadro di e ayudo real cu deporte mester ricibi. Parlamentario Endy Croes a splica cu e vision pa lanta un Lotto a bin di e Lider inmortal Betico Croes, Remy Zaandam y Roy van Putten. Lotto a wordo lanta na aña 1982 y desde cu a funda Lotto e meta su tras tabata pa paga operacion, premio y comision na rebendedornan y locual cu Lotto gana lo bay bek 100% entre otro den Deporte. Pues e placa di Lotto ta yega bek na e deportista y facilidadnan deportivo. Desde aña 2000 a cera un contract cu Canadian Bank Note unda nan a percura pa manda Lotto online.


Inversionnan di Lotto, 2001-2009
Desde gobierno di MEP a drenta na final di 2001 a percura pa e “boom” economico di Lotto pa Deporte. A haya un Lotto bendiendo apenas 16 miyon pa aña y den 8 aña a entrega AVP un Lotto cu un benta cu a alcansa 42 miyon florin na 2009. Un aumento di 163% den benta bruto. Tras di e vision di ex minister Ramon Lee a logra construi Stadion Frans Figaroa y den e stadion a construi Technical Center Angel Botta (e ultimo aki hunto cu FIFA), Parke Jaburibari, Complehonan Deportivo Simeon Antonio y Jara, Stadion Nadi Croes & Crismo Angela (ex veld di Winston), Veldnan na Pos Chikito, a organisa 2 Wega di Reino, a patronisa completamente Olimpiada Escolar, a drecha diferente poste di luz entre otro Estrella, Sportboys, Dakota, RCA, San Luis, Britannia, veld di Paradera, La Fama, Kudawecha y Palo Marga, a pone luznan nobo na Flatstone y Arsenal, Veldnan tabata ricibi riba costo di Lotto graniet despues di temporadanan di yobida. Tur federacion tabata ricibi sosten financiero mediante Subsidie Commissie y deportenan cu no tabatin un federacion tambe tabata ricibi ayudo directamente door di Lotto. Lotto tabata inverti 500 mil pa aña na instructornan capacita deportivo pa duna les na scolnan rond Aruba. Esakinan ta un tiki di tur locual Lotto tabata duna pueblo bek di su ingresonan.


AVP a bende Lotto cu CBN di Canada
Parlamentario Endy Croes a splica cu pueblo ta e cumprador cu ta purba haci su soño bira realidad pero aun si nan no gana un premio nan ta orguyoso como cu nan tabata mira unda nan placa tabata bay. Kico ta e diferencia awe? Un set di “bobbo” hunto cu e ministernan di AVP encarga na 2012 a laga Canadian Bank Note “lolia” nan di tal manera cu nan a core firma un contracto desventahoso cu Canadian Bank Note traspasando practicamente operacion completo pa Canada unda Aruba awe ta ricibi un miserabel 4 miyon bek pa aña for di un benta awe cu a alcansa 54 miyon pa aña. Esaki ta e tristo realidad. Pio ainda tur cu a forma parti di e desaster historico aki awe ainda ta esnan den bestuur y na timon di Lotto. Veldnan manera Riverplate den curason di Madiki a wordo nenga un ayudo y asina tin masha hopi mas.


Parlamentario Endy Croes ta bisa cu e tempo a yega pa decisionnan pisa cuminsa cay. Kico ta e balor agrega pa sigui cumpra Lotto? Lo traha duro den luna di maart pa Aruba por yega na su Lotto berdadero. No tin sentido na manera cu cos ta bayendo den sosten na deporte. Di Guatemala pa Guatepeor, Croes a termina bisando.

Parlamentario Endy Croes hunto cu Minister di Deporte Danqui Oduber diahuebs ultimo a bishita veld di Riverplate. Manera ta conoci desde 18 di januari 2020 un poste di luz lo a cay durante wega di LIFIDA y milagrosamente esaki no a causa ningun daño personal. Mesora directiva di Riverplate a laga baha e demas postenan pa garantisa siguridad.


Lotto pa Deporte no tin placa?
Lamentablemente esaki a tranca nan programa como cu tin varios mucha ta train desde oranan di atardi tempran te den oranan di anochi, pues ta trata muchanan di diferende edad. Por lo pronto despues di 6pm no por usa e tereno mas. Tanto presidente Earnie Panneflek y Elvis Tromp y demas miembronan di directiva presente a splica nan preocupacion como cu awor nan mester huur otro veld mientras tanto pero e disponibilidad pa haya otro veld tambe ta hopi limita. Presidente di Directiva Sr. Panneflek a comenta cu nan ta acercando diferente compania y mas cu claro a acerca tambe esnan encarga cu Lotto pa Deporte pa un ayudo. Remarcabel ta cu Lotto a referi nan pa Stichting Subsidie Commissie (SSA) splicando cu Lotto mes no tin placa.


CBN ta mesun culpabel cu Lotto
Parlamentario Endy Croes den un otro articulo lo amplia riba e maneho anti deporte cu tin awe den Lotto pa Deporte pero ta lamenta di un Fundacion cu a wordo lanta tras di vision di Betico Croes, Remy Zaandam y Roy van Putten na aña 1982 cu e meta pa sostene deporte 100% y awe ta mira con inhusto deporte ta wordo trata den un inversion cu pueblo ta aporta na un benta di 54 miyon florin pa aña. Un parke den curason di Madiki no por haya 50 mil pa drecha nan luznan bek. Shame on you CBN! Canadian Bank Note ta mesun culpabel cu Lotto den e caso aki pa a atraca e “bobbonan” di Lotto cu a firma e contracto desventahoso na 2012 cu CBN cual contracto ta termina te na 2031. Sabionan di Canada a probecha di mandatarionan di AVP y Bestuur incapaz di Lotto na 2012. Awe deporte ta mendiga y ta wordo manda di cashi pa muraya.


Parlamentario Endy Croes y Minister Danqui Oduber a haci un promesa cu “sin Lotto” nan lo busca un solucion muy pronto pa Riverplate. Lo ta bon pa Lotto splica si unda su benta di 54 miyon pa aña ta bay y bon pa pueblo evalua si ta bale la pena sigui cumpra Lotto.