Carta a bay pa Minister Oduber “Gasto di operacion di AZV a aumenta cu 110 miyon den 10 aña y lo alcansa 500 miyon aki 4 aña”

​Parlamentario Endy Croes ta splica cu nan ta avansando pa cu e cuestion di AZV. Segun Parlamentario Endy Croes ta basta tempo nan ta trahando riba esaki pa asina logra pone tur nanishi den mesun direccion pa duna AZV un atencion real. AZV su gastonan a crece enorme ultimo 10 añanan y si no haci nada esaki lo crea un problema unda AZV por crash den futuro.


Si tuma como ehempel na 2009 e costonan total di cuido medico tabata 319 miyon mientras beheerskosten tabata rond di 17 miyon pa un total di 336 miyon. Si nos mira cifranan di 2018 e costonan di cuido medico a aumenta pa 428 miyon mientras e beheerskosten a alcansa 18 miyon pa un total di 446 miyon. Ta trata un aumento di 110 miyon den ultimo 10 añanan cual ta igual na 33% y pues un crecemento structural di 3.3% pa aña.


Si nos extrapoleer e tendencia aki pa e proximo 4 añanan e costo di operacion lo aumenta cu 13.2% y lo surpasa un operacion di 500 miyon pa aña. Pa ley awor aki gobierno ta mara cu gobierno mester contribui cu un landsbijdrage pa tur deficit of buraconan financiero cu por existi den AZV. Parlamentario Endy Croes a sigui splica cu esaki no ta husto y Aruba no lo por carg’e mas.


Pa e motibonan aki Fraccion di MEP a manda un carta pa Minister Danqui Oduber cu copia pa Minister President di Aruba pa forma un comision den luna di februari kendenan na nan turno mester bin cu diferente recomendacion pa Minister y pa asina trece cambionan kisas grandi pero necesario den e Ley di AZV.


Fraccion a propone 5 nomber di expertonan riba e tereno aki pero semper Minister ta esun cu na final por scoge entre nan y agrega mas experto manera hurista etc den dicho comision. Fraccion di MEP lo keda enfoca e promer kwartaal aki fuertemente pa mira e proyecto aki cana y lo duna tur nan contribucion na ideanan nobo y sostenibel pa garantisa futuro di AZV, Parlamentario Endy Croes ta termina bisando.