Parlamentario Endy Croes: AZV ta keda un prioridad. “Minister Dangui Oduber a ricibi e peticion oficial pa nombra e comision di trabou”

​Parlamentario Endy Croes desde inicio di aña ta trahando duro riba e tema di AZV. Manera a splica anteriormente cu AZV su gastonan operacional a aumenta cu 110 miyon den e ultimo 10 añanan y tin un crecemento anual di 3.3%. Esaki ta conduci cu pronto dentro di algun aña esaki lo surpasa 500 miyon. Esaki tin Parlamentario Endy Croes hopi preocupa pasobra pueblo sigur no lo por carga esaki mas den futuro cercano si e sigui e rumbo aki.


Manera a menciona gastonan ta preocupante y ta na su lugar pa actua awor promer cu ta laat. Parlamentario Endy Croes a splica cu den e carta cu Fraccion MEP a manda pa Minister Oduber cu copia pa Promer Minister Evelyn Wever Croes a propone 5 nomber di un combinacion y experiencia sublime. Mas cu claro Minister Oduber por scoge sea tur of algun y complementa esaki cu su escogencia. Un cos si algo mester wordo haci.


E comision aki den un tempo pre determina mester bin cu recomendacionnan concreto alrespecto AZV. Parlamento no lo descarta un cambio di ley y adapta esaki na manera cu mayoria pais rond mundo ta practica. En todo caso Parlamento cumpliendo cu su trabou pa asina logra haci AZV sostenibel pa futuro.