Parlamentario Endy Croes: Felicitando Minister Danqui Oduber, Di acuerdo cu peticion di Fraccion di MEP Ta “Freeze” tur medidanan di AZV cu mester a drenta na vigor 1 di Februari

Parlamentario Endy Croes ta cuminsa na felicita Minister di Salud Danqui Oduber cu e desicion diabierna ultimo encuestion cu e asunto di AZV. Manera ta conosi gobierno Hulandes na un manera tracionero y cruel a tuma conseho di CAFT di 6 di mei 2020 cual ta papia di un reducion di 5 miyon y durante reunion di conseho di ministernan di Reino Militair Knops y BZK a cambia esaki pa 5 miyon “per maand” y crea for e scenario desastroso aki mei mei den un pandemia. Dia 13 di Januari  representantenan di 15 diferente zorgverleners a bishita Staten den un reunion di comision fiho. Despues di scucha tur representantenan den zorg cu hopi atencion a escohe pa forma un plataforma nacional unda tur ta dispuesto pa participa y hunto yega na un solucion sostenibel. Tur a sali di e punto di bista cu nan ta di  acuerdo cu mester traha cu otro pa corta gasto  na un manera responsabel cu no lo bay acosto di e calidad di cuido. 
Minister di Salud Danqui Oduber “freeze” medidanan di 1 di Februari:
Minister Danqui Oduber a reaciona hopi positivo riba e carta di Fraccion di MEP kende den nomber di e 15 representantenan den zorg cu a bishita Staten 13 di Januari ultimo a hasi un peticion special alrespecto. Minister Danqui Oduber a presenta su idea y a haña sosten di Conseho di Minister. Gobierno di Aruba lo institui un “Comision Nacional” multi disciplinario pa dialoga riba e reforma den sector di cuido. Comision Nacional cu participe di tur zorgverleners den combinacion cu representantenan apunta pa gobierno lo evalua, investiga e sector di cuido y hunto lo bin cu proposicionnan con ta e mihor manera pa reforma cuido y baha gastonan den cuido sin mester touch e calidad. Finalmente enfoke mester ta pa hasi e sector di cuido y fondonan di AZV uno sostenibel. 
Comision Nacional lo consisti di entre otro:
E Comision Nacional lo consisti entre otro di Hunta di Directiva di Stichting Ziekenverpleging Aruba, Instituto Medico San Nicolas (IMSAN), Respaldo(FMSA), Stichting Algemene Bejaardenzorg Aruba ( SABA), Asociacion di dokternan di cas ( HAVA), Asociacion di Specialistanan Medico (VMSA), Asociacion di Boticanan (BVA), Asociacion di Fisoterapistanan (AVF), Asociacion di Specialistanan di Hospital(ASHA), Aruba Dental Society(ADS), Asociacion di Parteranan(VVA), hunto cu personanan apunta pa gobierno y lo percura pa hunto por trese un solucion sostenibel den cuido. Pabien Minister Danqui Oduber cu e bon iniciativa, Pabien Fraccion di MEP cu e peticion  por escrito rapido despues di e reunion desde 13 di januari 2021, Pabien Gobierno di Aruba pa atende esaki riba nivel di Conseho di Ministers. Nos ta aplaudi e desicion. Mientras Gobierno lo informa Hulanda cu lo “Freeze” esaki pa algun tempo y lo keda alaves purba convense Hulanda cu 5 miyon pa luna ta un crueldad mei mei di Pandemia y trata na yega na algo cu tur por carga. Den temponan dificil union ta hasi forsa y tur hende pensando hunto den mesun direcion lo enpodera nos pa tuma e mihor desicionnan.