Parlamentario Endy Croes: Lo cortes no quita lo valiente. “Durante Conferencia di Prensa a desea beterschap na Doina Eman y tur patient na Aruba”

Parlamentario Endy Croes durante su conferencia di prensa diaranson ultimo a elabora riba diferente punto. Entre otro a papia riba AZV y e comision cu lo wordo lanta dentro di poco pa asina trece recomendacionnan pa cambionan cu gobierno lo eherce. Tambe Parlamentario Endy Croes a elabora riba “red tapes” den e aparato gubernamental entre otro pa saca permiso pa habri un koffiehuis, tardansa na Notarionan pa lanta un NV of VBA, tardansa pa haya un vestigingsvergunning y tardansa pa haya un bestemmingswijziging pa nombra un paar. Un hende por ta facilmente 6 luna bezig cual ta tranca nos economia y a splica cu ta trahando duro pa corigi esakinan.


Na final Parlamentario Endy Croes a splica cu el a scucha Mike Eman elabora den un conferencia di prensa extraordinario di AVP dunando un update di salud di su casa sra. Doina Eman. Aki Parlamentario Croes a bisa cu malesa no ta discrimina color politico, rasa of religion y cu su persona ta compronde hopi bon e dolor cu cualkier famia ta pasa aden na momento cu un ser keri wordo diagnostica cu cancer of cualkier otro malesa pisa. Parlamentario Endy Croes a sigui splica cu e mes a pasa den e proceso di cancer cu su señora y sa kico esaki ta significa pa cualkier ser humano. Nos por ta contrincante politico fuerte pero alabes a expresa cu tin momento den bida cu gentiles di e ser humano mester por supera tur diferencia y a expresa palabra di beterschap pa Doina Eman y pa tur conciudadano cu por ta sufri di un of otro tipo di malesa pisa. Cu un Fe intacto y speransa Endy Croes a termina cu e dicho “Lo cortes no quita lo valiente”.