Parlamentario Endy Croes cu hopi asombro por a tuma nota di un articulo di Robert Candelaria, un ex Polis kende a bay haci negoshi na Corsou y basa riba fix “package deal” pa e y su casa nan a bin Aruba riba custia di pueblo pa el a subi lista di AVP. Robert Candelaria sin gevoel y sin berguensa a expresa cu e Gobierno actual no tin vision y ta drecha cos pa nan mes! Parlamentario Endy Croes lo splica Robert Candelaria awe ken y con a fix cos pa nan mes.


Un partido pata pata di hendenan corupto
Robert Candelaria ta un abusador di marca mayor di placa di pueblo. Robert Candelaria na 4 ocasion promer cu elecion 2017 a biaha bin Aruba for di Corsou pa negosha su number riba lista di AVP. Un partido pata pata di hendenan corupto y ladron. Un partido cu su ex lider tin sentencia strafrechtelijk riba su cabes di e caso di Fondo Desaroyo San Nicolas. Un partido cu un otro ex minister Paul Croes kendo a bende rond di 2000 ontheffing pa miyones di florin y tin un condena di 4 aña di prison riba su cabes. Un partido cu un otro ex minister Benny Sevinger ta bou investigacion pisa pa corupcion y fraude cu tereno. Pruebanan tur ta na Ministerio Publico y Aruba ta en espera pasobra e gay ta casi canta y pronto lo cuminsa piki poco hende pa bay KIA. Wel ta cu e partido aki Robert Candelaria a cera su dealnan. “Soort zoekt soort.”


Asina ta chupa sanger di pueblo
Robert Candelaria mientras cu e no tabata ambtenaar y no ta traha den gobierno el a acepta na 4 ocasion pa Mike Eman cu placa di pueblo paga bou di e nominacion como dienstreis tur su costonan di pasashi, auto di huur y estadia cada biaha cu el a bin Aruba den juni/juli 2017 pa negosha su number riba lista di AVP. Pueblo por compronde awor cu Robert Candelaria ta un ex Polis corupto y putri? Anto abo Robert Candelaria kier tribi di papia alrespecto di fix cos? Adhunto algun prueba. Esaki no ta tur pasobra manera Robert Candelaria a yega Aruba nan a push’e den augustus 2017 cu un salario di Afl. 8000,- pa luna como coordinador di Mike de Meza, por cierto otro abusador (adhunto mira e prueba pa bo mes). Esaki ta integridad cu Robert gusta papia di dje? “Scucha mi voz pero no mira mi actonan”.


Señora tambe a djodjo riba custia di pueblo
Esaki no a caba aki. Nos a ricibi prueba cu no solamente pasashinan di Robert Candelaria a wordo paga cu placa di pagadornan di belasting di pueblo cual a wordo autorisa door di Mike Eman, pero pasashi di Señora di Robert Candelaria, esta Sra Davelaar Candelaria tambe a wordo paga cu placa di pueblo. Den e “package deal” cu Candelaria a cera (‘fix’) cu Mike Eman y AVP banda di paga pasashi pa señora di Candelaria tambe a “fix” su casa un trabou schaal 16 cu tur toelage na Departamento di Impuesto. Segun Parlamentario Endy Croes cu tin hende cu suerte den bida y den AVP ta un free for all tabata tin y aparentemente ta esaki Candelaria ta gusta. Pero tampoco esaki tabata tur ainda.


Negocia puesto di Director Scheepvaart
E mesun Robert Candelaria a negosha tambe un puesto pa bira Director di Scheepvaart cu un salario di Afl. 20.000,- pa luna. Esaki tambe Mike Eman a aproba pe den un Ministerraad. Ta
gracias na Dios y gracias na e pueblo votador kendenan a manda AVP atras cu mas di 10 mil voto y consecuentemente a manda AVP y Mike Eman cas nos a drenta y a detecta e actonan coruptivo di sinberguensa di Mike Eman y Robert Candelaria y asina a logra “hold” y reverse e decision di Ministerraad di Mike Eman cu un decision di e Ministerraad nobo prohibiendo Robert Candelaria pa asumi e posicion di Directeur di Directie Scheepvaart cual tanto el a anhela pe. Pues na Candelaria e disco aki no ta raya y bo articulo di fix cos ta fit hopi bon pa bo mes.


Nos lo manda un pregunta por escrito na Minister Presidente actual pidiendo Gobierno pa cobra Candelaria e 4 ticketnan di dje y esun di su casa cu Pueblo a paga pa e por a bin Aruba sin cu e tabata den servicio di gobierno of tabata tin derecho riba nan. “Mi ta reta Robert Candelaria personalmente pa bin dilanti y nenga esaki”, Parlamentario Croes ta termina bisando.

Parlamentario Endy Croes a splica cu pueblo practicamente no tin pasenshi mas riba casonan di corupcion di ex ministernan di AVP. Manera ta conoci desde ex lider di AVP Tico Croes a wordo condena den e famoso caso di Fondo Desaroyo Nobo San Nicolas, pueblo a pordona AVP na aña 2009 pensando cu Mike Eman y AVP a siña di nan les di corupcion y no lo haci esaki nunca mas y asina a brinda Mike Eman y AVP un segundo oportunidad. Lamentablemente esaki no tabata asina. Tin un dicho ta bisa cu “e burico no ta perde su mala maña”. Tempo a demostra cu esaki a pas perfectamente pa AVP.


Caso corupto di IBIS
Desde 31 di october 2009 pa 17 di november 2017 cu AVP a goberna pais Aruba por a tuma nota cu constantemente tabata tin actonan di corupcion cu tabata wordo señala. Tur esaki banda di e desaster financiero cu nan a crea y banda di e Mega Debe cu nan a laga atras. Asina tambe Ministerio Publico a pone man riba Paul Croes den e caso IBIS unda a keda prueba cu Paul Croes ex minister di AVP a duna alrededor 2000 ontheffing pa permiso a cambio di pago. Tur esaki mientras tabata tin lista di mas di 5000 Arubiano of hendenan cu permiso caba inscribi na DPL en espera di un trabou. Consecuentemente cifranan di desempleo a aumenta drasticamente bou di e maneho coruptivo aki. Tur esaki a wordo prueba dilanti corte unda e ex minister di AVP Paul Croes a wordo sentencia na 4 aña di prison mas 10 aña cu e no por traha den ningun funcion di gobierno. Paul Croes ta bringando su caso awor den Hoge Beroep cual pronto lo bolbe bin dilanti pero no lo spera mucho cambio den e veredicto en bista di e gravedad di locual e y AVP a haci.


Caso corupto di Avestruz
Ora a kere cu esaki lo tabata tur por a tuma nota con Benny Sevinger aparentemente tabata facilita un banda criminal cu permiso riba optie riba terenonan comercial y facilita e ayudo pa bende shares di NV (cu ni tabata opgericht ainda) unda opties di tereno comercial tabata bay cu e sharenan aki pa miyones di florin. Algun hende a bira miyonario y muy probablemente e minister por tabata haya su share den esaki na banconan pafor di Aruba. Nos por a tende aña aden y aña afor e propaganda di Leoncita na Canal 90 “Haci mi Miyonario”. Wel tempo lo mustra. Asina cu gobierno a cambia a logra inventarisa hopi documento cu a logra pone man riba nan y a entrega un keho oficial na Ministerio Publico contra Benny Sevinger di AVP y su banda criminal.


Despues cu Ministerio Publico a evalua e caso den su totalidad nan a yega na e conclusion cu mester start op urgente un investigacion. E investigacion aki a conduci den e siman di 1 di october 2019 cu Ministerio Publico a haci diferente inval entre otro na cas di un otro ex minister di AVP esta Benny Sevinger amigo intimo di Mike Eman. E caso aki a haya e nomber oficial di Avestruz. Tambe e mesun dia aki a drenta cas di Leoncita di Canal 90 kende tambe aparentemente ta involucra deep deep den construccionnan fantasma pa bende tereno. A compronde cu a tira inval hasta na Corsou na cas di un abogado. Pues claramente ta trata aki di un banda criminal basta pisa.




Pueblo ta ansha y poco desespera
Mientras tanto mas tempo a ocuri desde cu a tira inval pueblo a cuminsa bira poco poco mas impaciente. Señalnan ta yega Aruba cu por ehempel na Corsou politiconan corupto ta tras di trali, politiconan corupto na St Maarten ta tras di trali y aki na Aruba aparentemente ministernan corupto ta goza den carnaval. Parlamentario Croes a splica cu esaki ta e reclamo di mas pisa cu Parlamentarionan ta encontra tur dia riba caya. Pues ta notabel cu pueblo ta ansha y kisas poco desespera. Nos trabou ta pa calma pueblo y splica nan cu Ministerio Publico ta completamente independiente y pa nan tin e siguransa y garantia cu Ministerio Publico lo ta trahando duro pa trece e criminalnan di AVP dilanti mesa berde.


Parlamentario Endy Croes tin e fe cu den 2020 Ministerio Publico lo ta asina leu. Kisas lo ta bon pa Ministerio Publico duna un update di ambos caso di corupcion di AVP, esta IBIS y Avestruz. Ambos caso ta trata di ex ministernan di AVP amigonan di Mike Eman. Un update di Ministerio Publico sigur lo trece poco trankilidad den pueblo pa e proximo simannan, Endy Croes a termina splicando.

​Parlamentario Endy Croes den un conferencia di prensa siman pasa a ilustra 4 rapport cu Algemene Rekenkamer a entrega na Parlamento di Aruba. Ta trata di rapportnan 1. Focusonderzoek, zicht op subsidie, 2. Focusonderzoek, Oorzaken overwerk KPA, KIA, en CEA, 3. Publiek Private Samenwerking (PPP) Green Corridor y Watty Vos Boulevard, 4. Bo Aruba. Rapport Bo Aruba sinembargo ta trata proyectonan balora na 1600 miyon florin di cual Mike Eman y Benny Sevinger a otorga 1000 miyon florin caba, esta 1 Biyon florin promer cu nan a baha.


Desde 2018 Parlamentario Endy Croes a splica cu el a manda un carta Hulanda y tambe pa Ministerio Publico solamente puntrando nan opinion riba e rapport aki. Lamentablemente ni Hulanda tampoco Ministerio Publico a duna un contesta alrespecto. Fraccion di MEP a reuni riba e 4 rapportnan aki siman pasa y a yega na e conclusion cu e 4 rapportnan aki mester wordo trata den un debate publico, esta un reunion publico pa asina pueblo por wordo informa di nan contenido, primordialmente “Bo Aruba” y asina ilustra e decadencia con AVP a maneha, horta y “mafia” e pais aki publicamente.


E reunion aki lo nos yega na conclusionnan y mediante algun mocion Fraccion di MEP lo urgi gobierno pa entrega kehonan oficial na Ministerio Publico pa inicia cu un otro investigacion contra Benny Sevinger kende te hasta a nenga di contesta Algemene Rekenkamer su preguntanan.


Fraccion di MEP a haci un suplica na Presidente di Parlamento pa yama e reunion publico lo antes posibel pa nos por debati riba e rapportnan aki, pa trece claridad y esnan cu a comete actonan di bandido lo mester para responsabel pa nan actonan.

Parlamentario Endy Croes a reacciona riba Robert Candelaria alrespecto su ultimo articulo. Den e articulo aki Candelaria a splica cu e unico vision cu e gobierno actual tin ta pa “fix cos pa nan mes”.


Parlamentario Endy Croes a keda hopi babuca cu net Candelaria kier papia di esaki. Hustamente Candelaria cu a deal su posicion riba lista di AVP. Hustamente Candelaria cu kier a bira Directeur di Scheepvaart cu un salario di Afl. 20 mil pa luna. Robert Candelaria a biaha riba custia di pueblo sin cu e ta den servicio di gobierno. Candelaria y su casa Davelaar - Candelaria ambos a biaha riba custia di pueblo sin ta den servicio di gobierno. Mike Eman a pidi Ministerraad e tempo aya aprobacion pa paga tur cos pa nan como sifuera ta un dienstreis. Esaki yama “fix cos pa bo mes”. Candelaria por desmenti esaki? Mi ta reta Candelaria. Awor ora Candelaria papia cu gobierno su vision ta pa “fix cos pa nan mes” Candelaria mester pensa cu e cos aki ta bounce bek riba bo y bo hendenan di AVP toch?


Barbaridadnan di Mike Eman
Candelaria ta na altura cu tata di Jennifer Reyes a wordo gefix pa Mike Eman pa drecha autonan den APA y ta strica rond 10 mil florin pa luna? Candelaria sa cu te cu awe tata di Jennifer ta den APA? Con Candelaria ta yama esaki? Mike a fix tata di Jennifer? Ora Jennifer y “ the walking dead” Michael Lampe ta papia spektakel na Canal 90 nos lo recorda nan di esaki y lo record’e den Parlamento un biaha mas. Politica tin biaha ta cruel. AVP a fix Speed cu Patrick Paskel via diferente compania entre otro Thera group, Paxi, Paparazzi rond di 7 miyon florin. Mike Eman a fix Sjiemfat 5.3 miyon na advies. Mike Eman a fix Wubbo Ockels (dfm) 2 miyon florin. Mike Eman a fix TNO y Phillips Lighting 10 miyon florin. Mike Eman a fix Horizon Consultancy di Richard Arends, boso colega 4 miyon florin. Mike Eman y Mike De Meza a fix Richard Arends un contract CFO di RDA di 2 miyon florin. Mike Eman a fix su ruman homber 1.6 Miyon florin pa un auto di dragrace. Mike Eman a fix coordinadornan 142 miyon den 8 aña. Tabata tin ta cobra Afl. 25 mil pa luna sinta na cas sin nunca a skirbi un advies. Manda pidi mi e nomber y mi lo publik’e. Aunke mi a yega di publik’e caba. Asina tabata tin cantidad.


Stop di hunga cu inteligencia di pueblo
Pues Candelaria, Jennifer y Lampe kier papia di un gobierno cu ta fix cos pa nan mes? Compara pa boso mes! Boso nunca tabata sa kico Mike Eman y ministernan di AVP tabata haci? Of boso ta di acuerdo y ta complice di tur e actonan bochornoso aki? Boso ta contento cu Mike y AVP a redobla e debe di Aruba y a presta 2000 miyon den 8 aña? Esey boso kier gaba cune? Boso ta contento cu Aruba mester paga 232 miyon solamente na interes riba placa cu Mike Eman y AVP a presta? Boso ta corda tempo cu Henny Eman a otorga garantianan na mafiosonan Italiano? Na maart 2018 nos a caba di paga e 206 miyon dollar na barbaridad di Henny y awor a cuminsa paga esun di Mike. Tristo no? Jennifer, bo no a haci bo trabou y a aproba tur e cosnan aki. Asina nos por sigui. Ki ora boso kier trata na hunga cu inteligencia di pueblo nos lo sa di recorda boso y pueblo di e desaster cu boso a laga atras y e manera di sinberguensa y sin gevoel cu AVP a goberna e pida baranca aki,


Parlamentario Endy Croes a termina splicando. Por fabor boso yega Parlamento pa caba, presenta na trabou y traha pa boso placa cu pueblo ta paga boso.

Parlamentario Endy Croes ta keda preocupa cu e tardansa enorme actualmente promer cu un entrepreneur por haya un permiso pa e por habri su negoshi. Nan ta wordo manda di cashi pa muraya pa tur sorto di papel. Hopi biaha e ambtenaar no t’ey y e entrepreneur mester warda te ora cu e ambtenaar bolbe. Tin tardansa y retraso cual ta costa e entrepreneur masha hopi tempo y placa mientras esun sinta tras di e lessenaar, kende su salario ta garantisa tur fin di luna cu tur sorto di proteccion di LMA, ta “chill” y no ta sinti e dolor di e homber cu ta inverti pa aporta na economia ta pasando aden.


Un carta contra programa di gobernacion
Parlamentario Endy Croes ta splica cu su trabou ta pa controla gobierno y momento cu e ta sinti cu mester atencion pa cumpli cu facetanan den nos programa e lo sa di adresa esaki pa e wordo corigi. No por ta asina cu un Directeur di un departamento a manda un carta rond durante aña 2018, pues durante e gobernacion aki, anto e carta ey ta bin na vigor sin mas, pio ainda cu e carta ta liña recta contra nos programa di gobernacion 2017-2021. Riba pagina 14 di e programa di gobernacion 2017-2021 “Hunto pa Aruba” firma pa Coalicion ta stipula hopi cla lo siguiente: “Gobierno lo aumenta efectividad y eficiencia di servicionan cu sector publico ta brinda na sector priva y lo elimina ‘red tapes’ y tardansa innecesario den proceso di otorgamento di diferente permiso mediante un Ley di Restauracion Economico (Crisis en Herstelwet)”. Esaki hustamente pa acelera procesonan pa diferente tipo di permisonan.


Caminda di cruz
Cu e cambio cu DWJZ a haci via un carta na 2018 ta incomprendibel cu gobierno por a acepta esaki sin mas. Mas bien mi ta kere cu e carta aki no a capta atencion di gobierno. Resultado awe un cantidad di casonan unda hendenan ta solicita pa un permiso por ehempel pa un koffiehuis vergunning of restaurant vergunning A of B di cual tur ta pasando caminda di cruz cu un tardanza nunca bisto pa nan por logra haya un permiso.


Parlamentario Endy Croes ta urgi gobierno pa dedica atencion na e maneho aki cual Parlamentario Croes a considera “maneho morocoy” orkestra pa Directeur di DWJZ y ta pidi Gobierno pa tuma pasonan necesario den e proximo simannan pa asina corigi esaki y cumpli alabes cu e programa “Hunto pa Aruba” alrespecto fomenta crecemento economico.


Ningun hende ta indispensabel
Parlamentario Endy Croes ta sigui splica cu “ningun hende” ta indespensabel y esaki ta conta pa su propio persona. Tampoco por ta asina cu un ambtenaar no ta na trabou awe y tur proceso ta tranca. Aki tambe mester atencion y si tin baranca den caminda cu no kier coopera, wel segun Parlamentario Endy Croes masha facil: Hala nan un banda y pone esnan cu si ta sigui vision di Gobierno pa logra cumpli cu entre otro e crecemento economico. Echo ta cu e coordinacion entre DVG-Polis-Brandweer y DWJZ ta “FATAL”.


Mester di boluntad pa drecha cos
Mientras mester corda cu sector priva ta emplea alrededor di 50 mil trahador. Nos tin 4000 hende inscribi na DPL “sin trabou” buscando un trabou. Nos tin un cantidad di inversionista
y entrepreneur cu kier core e riesgo pa habri un negoshi pa crea empleo y entrada pa gobierno. Nos tin un maneho morocoy implementa pa DWJZ cu no ta traha y ta contra e vision di gobierno. Parlamentario Endy Croes a manda un carta pa gobierno pa agrega e punto aki riba agenda e siman binidero pa den reunion cu Ministernan esaki wordo atendi mientras Parlamentario Endy Croes mes lo acerca entre otro Minister Danqui Oduber bou di kende esaki ta cay pa discuti un cu e otro pa corigi esaki di inmediato. Segun Parlamentario Endy Croes e cos aki ta masha facil pa corigi y hunto cu e boluntad di gobernantenan nos lo mester drecha esaki. Nos ta priminti pueblo cu lo trece un cambio den esaki.

​Parlamentario Endy Croes a entrega un plakaat di reconocemento den nomber di partido Movimiento Electoral di Pueblo na ex Minister di Husticia Rudy Croes durante celebracion di Dia di Betico.


Dia 25 di januari a recori Aruba bishitando un cantidad di actividad cultural den e gran celebracion di Dia di Betico riba su fecha natal. Riba e mesun dia aki T.T.T (Terrible Tuesday Thunders) Bike Organisation a organisa nan di 9th Aruba International Bike Week y alabes e di 13 Betico Memorial Ride cual porcierto a wordo dedica na ex Minister di Husticia Rudy Croes.


Mester accentua cu esaki a resulta di ta un exito rotundo cu masha pero masha hopi Bike’s tanto local como internacional participando. Na final di e atardi e Bike Tour a stop dilanti Mundo Nobo na Santa Cruz net pabou di Sta Cruz Rum Shop. Un aglomeracion di masha hopi motociclista. Eynan tur e participantenan a haya nan cuminda y tabata tin algo pa refresca e curpa. Como sorpresa den nomber di partido Movimiento Electoral di Pueblo (MEP) Parlamentario Endy Croes hunto cu Shailiny Tromp Lee, Edgard Vrolijk, Joe Koolman y Setty Christiaans-Yarzagaray a haci entrega di e bunita plakaat na Rudy Croes como muestra di gratitud.


Despues cu Parlamentario Endy Croes den nomber di Lider di MEP Evelyn Wever Croes a lesa e texto gradiciendo Rudy Croes pa tur locual el a haci pa Aruba y pa partido MEP, Rudy a bay over na expresa algun palabra pero alabes tabata un momento sigur hopi emocional pa su persona. E multitud enorme cu tabata presente a rindi Rudy cu un aplauso enorme.


“Mo Rudy” manera e ta wordo yama den pueblo ta sufriendo di un kebrante di salud y e siman siguiente mester a regresa Colombia pa continua cu su tratamento. Den nomber di henter Famia, Partido MEP, Team T.T.T. y henter pueblo di Aruba nos ta desea Rudy Croes un pronto recuperacion. Pabien cu bo reconocemento merecidamente y danki “Mo Rudy” pa tur bo trabounan eherce cu hopi amor y determinacion pa bo pais Aruba. Danki Rudy!

​Mi persona a scoge pa no skirbi ningun articulo di e caso lamentable cu a sosode na Cacique Macuarima School pa netamente laga politica leu di locual a pasa y enfoca riba con por yuda pa por trece un alivio a corto plaso pa e scol. Nunca mi persona y tambe e cuerpo di docentenan di Cacique Macuarima no por a drumi y pensa cu algo asina lo por a sosode na nos scol, pero el a pasa y sigur esaki a laga un impacto grandi pa e bario, pa e docentenan pero tambe pa comunidad unda cu pueblo den su totalidad a rechasa e acto aki ya cu pueblo a realisa e importancia di educacion pa Aruba.


Politica barata di AVP
Partido AVP a haci mal uso di e desgracia aki pa por hunga politica barata. No por a spera nada otro di AVP y e tres miembronan di AVP, esta Marlon Sneek, Jennifer Arends-Reyes y Michael Lampe kendenan enbes di uni nan mes na e dolor di un bario y un cuerpo di docente cu a traha semper cu alma y cuerpo pa engrandece Cacique Macuarima School, awe ta para y cuestiona e ayudo cu scol ta ricibi di comunidad y en especial gremionan comercial y tambe otro scolnan y personanan cu a dicidi di contribui cu Cacique Macuarima School por ta pronto riba pia atrobe. Awor kier cuestiona un Promer Minister cu desde e sucedido tabata t’ey pa e scol y bario y su persona a haci un yamada na e pueblo di Aruba pa por yuda resolve e caso y alabes a gradici comunidad pa nan ayudo brinda na Cacique Macuarima School. Pueblo a sa di reacciona pasobra esaki ta algo cu a touch un pueblo den su totalidad y pueblo a sa di uni y duna su aporte na Cacique Macuarima. Esaki nos ta yama solidarismo y esaki ta locual ta caracterisa nos dushi isla Aruba como un pueblo cu ta saca su man y yuda otro y sigur e union cu a yuda Aruba por t’ey unda e ta awe.


Gobierno lo asumi su rol
Sigur Gobierno lo asumi su rol den yuda Cacique Macuarima School pero e parti cu e parlamentarionan di AVP ya menciona a lubida di bisa ta cu e edificio aki no ta di gobierno pero e edificio ta di un stichting, den e caso aki e ta cay bao di Bisdom. Y niun gobierno no por haci nada riba un edificio cu no ta di nan si no tin permiso p’esaki. Y tin di warda pa haya kico ta e costonan pa restaura esaki y tambe tin di warda ora e doño di e edificio caba e proceso di seguro p’asina por contribui pa restaura esaki na un manera responsabel.


A ataca FUTURA
Desesperacion politico ta pone parlamentarioanan manera Michael Lampe y Marlon Sneek ataca un grupo di hoben bon prepara y cu sigur cu vision innovativo pa futuro pa e trabao cu nan ta bin ta haciendo. Si e parlamentarionan aki ta lesa nan por a tuma nota di tur e trabaonan cu e hobenan aki a bin ta haci riba tereno di innovacion y bao di e gobierno aki si nan ta ser brinda e oportunidad pa por bin cu proyectonan y no manera e gobierno di AVP cu tabata blo show. Un di e proyectonan cu FUTURA a adopta y nan a traha riba esaki y a percura pa e por a bira un realidad tabata e proyecto E-learning unda cu pa medio di fondonan di ‘maatschappelijke bijdrage’ por a realisa e bunita proyecto na Cacique Macuarima School. Esaki a forma e base y modelo unda cu Gobierno tambe a sigui cu e proyecto di E-learning den nan scolnan y siguramente e proyecto aki tabata asina exitoso cu a bay pa di dos scol piloto cu lo bira Pastoor Kranwinkel na Paradera. Mi persona ta gradici FUTURA pa a kere den e proyecto aki ehecuta na un forma entusiasma y profesional, cu nan
a traha riba e proyecto aki y cu esaki a bira realidad y un exito total. Awendia el a bira e modelo cu ta ser sigui na Aruba.


Conscientisacion den pueblo
Mi ta kere cu nos tin di enfoca pa percura pa locual a pasa nunca mas por ser ripiti. Comunidad uni tin di conscientiza nos yiunan di e importancia di scol y e importancia di un scol pa un bario y pa e futuro di nos isla. P’esey mi ta haci un yamada na comunidad completo pa nos ban cuida no solamente nos scolnan pero tambe nos canchanan deportivo y tur otro infrastructura cu ta di importancia pa nos pais Aruba. Ban sigui papia cu nos yiunan y educa nan na cas di e respet pa propiedad di otro y di nos banda nos lo percura pa enfoca pa por aloca fondonan den presupuesto cu ta nos dilanti pa yuda den prevencion.


Ban uni pa un bon causa
Tambe mi ta haci apelacion na pueblo pa uni den un bon causa pa por haci lo maximo pa e scol aki cu semper a lucha riba su mesun forsa pa progresa, pa hunto nos por logra cu den termino corto esaki ta operacional den bista di e importancia di e scol aki pa un bario grandi cu a ser afecta. Tur tres político di AVP a sali cuestiona e envolvimento di gremio comercial cu a saca un man pa yuda Cacique Macuarima School. Un berquensa total di dos ex docente cu no ta respeta dolor di un cuerpo di docente pero sigur di un bario cu ta stima nan scol y practicamente tur tres ta contra cu e scol aki ta hayando ayudo no solamente di gremionan comercial pero tambe di coleganan y scolnan cu si ta sinti e dolor cu e scol y bario ta pasando aden.

Por a tuma nota cu presupuesto 2020 tin partido AVP nervioso debi cu nan sa cu Gabinete Evelyn Wever-Croes tin e reto grandi pa percura pa e presupuesto aki por tin un surplus di 25 miyon florin, algo cu partido AVP cu tur sorto di consehero profesional no por a logra. Pero mas bien conseheronan manera Richard Arends a probecha di e momentum pa enrikece su mes mientras tabata crea deficitnan grandi cu a conduci cu Aruba a haya un KB na 2014 y a haci cu te dia di awe pa mal maneho financiero di AVP nos país ta bao supervision financiero di parti Hulanda.


Melvin no sa ni conta
Hilaridad di bida tabata cu den tanto desesperacion pa e presupuesto 2020 partido AVP a manda e “experto financiero” di AVP, esta Melvin Tromp pa cuestiona cu te ainda e presupuesto no a ser trata. Pero e supuesto experto aki no a siña nada den su 8 añanan di biba lekker den parlamento. Melvin Tromp no sa te dia di awe e fecha cu un presupuesto mester ser entrega cu ta 1 di september. Melvin Tromp lamentablemente ta usa e fecha di 1 di november pero e mas tristo ta cu e no sa ni conta na momento cu e ta menciona cu esaki tin 6 luna di atraso, mientras si usa e fecha corecto e presupuesto enberdad tin e retraso pero cu dia 1 di februari lo haci 5 luna. Pero mester tene na cuenta cu na e momento aki gobierno ta wardando riba e Hunta di Conseho manda esaki bek pa gobierno cu na su turno lo manda esaki pa parlamento y parlamento tin di fiha un fecha p’esaki ser trata. Pero Melvin Tromp lamentablemente no sa mes e fecha cu un presupuesto mester ser entrega y sigur si usa su fecha lo haci cu esaki lo bay cumpli 3 luna di retraso y no 6 luna manera el a declara.


Presupuestonan 2014 y 2018
Ta bon pa recorda e meneer experto aki den calculo cu bao su nanishi a trata na 2014 presupuesto na luna di mei y unda cu tabatin un deficit financiero di 444 miyon florin cu a conduci cu su líder Mike Eman a bay yora y bebe Ensure bay off dilanti Fort Zoutman. Tristesa con un partido por caba na nada asina door di sigui manda nan mucha manda pa sigui declara su disparatenan.


Ta bon pa recorda pueblo cu na 2017 ora nos a drenta parlamento nos no a encontra presupuesto 2018 y sigur nos a topa un biaha mas un deficit financiero di 137 miyon florin laga atras pa entre otro Melvin Tromp cu nunca a sa di haci su trabao di controla malgastamento di su ministernan.


Presupuestonan 2019 y 2020
Nos tin di recorda nan cu bao di maneho di Gabinete Evelyn Wever Croes mester a asumi responsabilidad di partido AVP unda mester a traha riba presupuesto 2018 y unda a haya esaki cu un deficit di 275 miyon florin y mester a mara faha aki aya y reduci esaki te na 131 miyon pa 2018. Y pa 2019 a sa di reduci esaki te na 4 miyon florin di deficit y pa 2020 mester percura pa un surplus di 25 miyon florin.


No a gasta ni un florin mas den 2018 y 2019
Tur esaki por ta posibel pasobra Parlamento ta haciendo nan trabao debidamente y sigur cu e mocion pasa unda cu den augustus gobierno tin di bin parlamento y duna cuenta con ta bayendo cu locual a ser aproba a haci posibel cu pa 2018 y 2019 gobierno no a gasta ni un florin mas di locual el a presupuesta pero al contario unda cu pa 2019 mester tabatin un deficit di 25 miyon florin a percura p’esaki a caba na 4 miyon florin. Pues no tin otro conclusion cu partido AVP y Mike Eman ta hopi desespera pasobra locual nan nunca por a logra, den dos aña di tempo Gabinete Evelyn Wever-Croes a logra y sigur cada dia cu tur obstaculo di AVP y Hulanda nos ta mas cerca di por logra un biaha mas di por ta Baas in eigen hui