Mi nomber ta Glenbert François Croes, yiu di Glenda y Betico Croes. Desde 2018 mi ta felizmente casa cu mi señora Erika cu ken mi a forma mi hogar di homber y muhe y 4 yiu. 

 

Como e yiu di Betico, nos a pasa gran parti di nos hubentud activo den e mundo politico te 1982 ora cu mi a bay studia den exterior. Mi tata semper a papia cu nos y envolve nos den su caminda di lucha pa libertad.

 

Despues di a gradua den Business Management na Webster University, Leiden Hulanda, mi a regresa Aruba. Mi prome funcion laboral tabata di ‘Junior Loan Project Officer’ na Aruba Investment Bank.

 

Despues di tabata pa 8 aña activo den politica como Parlamentario y Gobernante, mi a retira for di politica na aña 2005 y a haci mi dos yiunan Lara y Thiara e prioridad den mi bida.

 

Politica semper a keda mi pasion y na 2013 mi a haya e oportunidad pa haci un re-entrada den politica como candidato nr. 29 riba lista di MEP. Den mi prome salida como e ultimo candidato riba lista, mi a obtene 2369 voto y a bira representante di Pueblo den Parlamento. 

 

Na 2017 mi a haya e confiansa di 2491 votador. Esey t’e aña cu MEP a drenta Gobierno y Lider di nos Partido Evelyn Wever Croes a pone su confiansa den mi designando mi e cartera di Asunto Social y Labor.