Dialuna mainta Minister Maduro di Economia a reuni cu Aruba Food and Beverage Association pa asina scucha nan preocupacion y nan sugerencia pa e medidanan necesario cu ta wordo tuma pa combati COVID19 na nos Pais. E reunion aki a bira necesario despues cu siman pasa diasabra varios empleado di restaurantnan riba e strip di Palm Beach a demostra nan malcontento pa e horario nobo di toque de queda como medida necesario pa baha contagio di COVID19 na Aruba.


E tabata un bon reunion den cual Minister Maduro a brinda informacion tambe riba e otro trabounan cu Gobierno ta haciendo pa asina por brinda apoyo na comercio den e momentonan dificil cu e crisis di COVID19 ta trece cune. Minister Maduro lo pasa e preocupacion y sugerencianan pa e crisisteam lidera pa Minister President cu lo mester evalua y tuma un decision.

Dialuna mainta Minister di Turismo, Salubridad Publico y Deporte Sr. Dangui Oduber a reuni cu voorzitter di Raad van Bestuur di hospital Sr. Korver y tambe excecutive chairmain di AMI Sr. Walker. E encuentro aki tabata uno hopi necesario caminda a discuti diferente puntonan di atention pero mas importante pa gradici y sondia e posibilidad pa amplia e capacidad di personal specialisa riba tereno di pandemia y epidemia na HOH.
​
AMI a splika cu nan tin diferente expertonan den cuido rond mundo y experiencia amplio riba tereno di pandemia y epidemia. Durante e encuentro AMI y HOH a anuncia cu dentro di 2 siman HOH por conta cu 50 profesionalnan di cual 40 verpleegkundigen y 10 intensivista pa sigui yuda HOH cu e total casonan di COVID-19 positivo.

AMI ta e compania cu gobierno Hulandes a contrata pa busca personal pa nos hospital.
Nos ta agradecido na e ayudo aki cu sigur den e temponan dificil aki ta alivia e presion na hospital.
Actualmente tin 38 persona caba di AMI na Aruba y nos lo extende esaki te cu 50 ampliando nos capacidad di cuido

Recientemente Departamento di Asunto Economico a introduci formularionan digital pa permisonan di negoshi (vestigings vergunning). E proyecto aki ta den cuadra di e Maneho Economico di Minister di Finansa, Asunto Economico y Cultura, sra. Xiomara Maduro como parti di e trayecto di y eGovernment pa contribui na reduccion di Red Tape.

Beneficio di e formularionan digital
Sra. Maria Dijkhoff-Pita, directora di Departamento di Asunto Economico a splica cu e meta di e proyecto aki ta pa mehora e servicio na e cliente door di facilita e cliente pa por entrega atraves di formularionan digital nan peticionan pa un negoshi nobo, director of cambio den un negoshi existente 24/7 for di comodidad di cas of oficina. Otro meta di DEZHI ta pa acelera e proceso di dunamento di permiso pa negoshi den 2 siman. E formularionan aki ta bay facilita e sector comercial y asina aporta pa inversionistanan y comerciantenan por wordo atende mas rapido y comodamente. Cu e digitalisacion aki Departamento di Asunto Economico ta drenta den un era nobo pa mehora servicio na cliente. Otro aspecto positivo di e sistema di formularionan digital ta cu Camara di Comercio tambe tin acceso 24/7 riba e sistema y asina por duna nan conseho y acelera e proceso.
Peticion pa permiso di negoshi lo sosode solamente digital
Entrante dia 19 di september ta bira obligatorio pa tur persona/compania entrega peticion via di e formularionan digital riba e website www.deaci.aw . Esaki kiermen cu NO ta acepta ningun otro forma di peticion. E directora ta enfatisa cu tur peticion cu a drenta prome cu dia 18 di september, lo wordo atendi ainda pero peticion desde dia 19 di september mester wordo haci via e formulario digital.


Proceso digital
Pa yena e formularionan digital e cliente mester lesa e instruccionan riba website. Tin un lista di documento cu mester wordo entrega hunto cu cada tipo di permiso, cu e cliente mester scan y agrega na e peticion. Si e documentonan no ta completo e cliente lo ricibi un email bek informando cu falta documento y cu e peticion no por wordo acepta. E cliente tin cu entrega un
peticion di nobo hunto cu tur e documentonan necesario. Na momento cu e peticion ta completo e cliente ta ricibi un factura di pago cu e suma cu mester wordo paga via online banking y esaki ta wordo manda via un link na e cliente. Ta hopi importante pa tuma nota cu entre e fecha cu e cliente ricibi e factura di pago y e fecha cu e cliente ta manda e comprobante di pago no por tin mas cu 10 dia di trabou. Si esaki no sosode lamentablemente e peticion ta wordo rechasa automaticamente.


Gradicimento
Directora di Departamento di Asunto Economico Sra. Maria Dijkhoff-Pita ta gradici ITP Caribbean pa e trabou realisa den e procesonan di digitalisacion. E directora a enfatisa cu DEZHI ta hopi orguyoso di a forma parti di e proyecto aki cu ta un paso importante pa e solucionnan di eGovernment pa Pais Aruba. Sra. Maria Dijkhoff-Pita tambe a gradici e seccion di Vestiging Vergunningen di Departamento di Asunto Economico bao guia di sra. Mary Baarh pa e trabounan haci pa asina e proyecto di digitalisacion por a bira realidad. Un palabra di agradecimento ta bay tambe na FUTURA cu a financia e proyecto aki como parti di e Masterplan “Reposicionando e rumbo di nos pais”.

​Minister di Turismo, Salubridad Publico y Deporte Sr. Dangui Oduber ta elabora riba e situacion cu Aruba Airport Authority (AAA) ta pasando aden.

E mandatario a splica cu AAA ta pasando den momentonan hopi dificil debi na e situacion di COVID-19. Nos aeropuerto a sera su portanan pa varios luna y desde cu e frontera a habri bek e cantidad di pasaheronan a baha drasticamente. Tur esaki ta haci cu AAA a perde hopi na entrada, segun Minister Oduber den aña 2019 Aruba tabata tin un turismo floreciendo, un di e mihor aña den historia di nos pais.

Na 2019 AAA tabata tin un entrada di 156 miyon florin y e aña aki na 2020 AAA ta premira cu nan lo bay atras cu 100 miyon florin na entrada compara cu aña 2019. Segun proyeccion di aña 2021 Aruba lo yega na 40% di e cantidad di pasaheronan compara cu 2019. Segun expertonan den aviacion te na aña 2024 mundo di aviacion lo ta bek na e nivel prome cu e pandemia, asina Minister Oduber a trece dilanti.

Teniendo na cuenta cu e proyeccion di aña 2020, AAA a propone pa ofrece pakete di retiro voluntario na nan empleadonan pa scapa e compania financieramente. Segun e mandatario 27 empleado di AAA a bay di acuerdo cu e pakete di retiro voluntario y a entrega nan retiro. Despues gerencia di AAA a cuminsa e proceso pa sinta na mesa pa negosha cu sindicato STA y FTA riba un posibel retiro obligatorio. Minister Oduber a expresa bon cla cu Gobierno como e doño di AAA no ta di acuerdo pa AAA retira ningun trahador awor aki. Gobierno no ta comparti e opinion cu den pleno tempo di crisis un compania estatal ta retira trahadornan.

Minister Dangui Oduber a duna di conoce cu siman pasa diahuebs Gobierno a reuni cu e CEO di AAA caminda a bise e pensamento di Gobierno como accionista 100 porciento di AAA riba retiro obligatorio di e trahadornan. Minister Oduber a duna di conoce cu Gobierno ya ta dunando AAA pa 5 luna caba loonsubsidie y lo sigui haci esaki. Pesey Minister Oduber no ta mira pakiko mester retira ningun trahador obligatoriamente na e momentonan aki.
​
E pensamento tras di e loonsubsidie aki ta pa tur esnan cu ta labora mantene sikiera 60% di nan entrada. Pa Gobierno e no ta acceptabel cu AAA ta bay over na retiro obligatorio di un gran cantidad di trahador caminda Gobierno ta duna loonsubsidie. Gobierno a instrui e CEO di AAA pa bay sinta bek na mesa cu dos sindicatonan y pa pone e retiro obligatorio on hold y purba yega na un solucion, asina Minister Oduber a trece dilanti.


Contesta na Sr. Sneek di AVP
Minister Dangui Oduber kier a recorda Sr. Sneek cu locual cu ta pasando awor aki den AAA a wordo causa pa su mesun Partido bou di ex Minister De Meza. E ex mandatario a yena AAA cu patronahe politico. Tur esaki sin cu tabata tin funccionnan necesario y sin cu tabata tin necesidad pa pone hende den AAA. E ex mandatario di AVP a yena e compania estatal cu nan sostenedornan politico. Gabinete Eman 1 y 2 a yena e compania estatal cu nan sostenedornan y votadornan y automaticamente esaki ta crea un presion adicional riba e payroll di AAA. Un payroll cu ta core den miyones di florin y awe cu a bin e crisis e compania estatal aki ta haye confronta cu problemanan financiero serio.
​
Minister Oduber ta di pensamento cu mester warda y wak con tur cos ta desaroya prome cu mester bin cu pasonan asina drastico. Mester warda pa wak si e situacion financiero di pais Aruba ta mehora y tambe e situacion financiero di AAA den e lunanan nos dilanti.

Ya pa varios aña e luna di september ta dedica na e monumentonan di nos Pais. Aruba ta conta cu varios edificio y obheto cu ta monumento cu ta wordo conserva como parti di nos herencia cultural. Den cuadro di e luna di monumento Minister Maduro di cultura a reuni cu tur e instancianan cu ta traha riba conservacion di nos monumentonan.


Tin 3 instancia encarga cu monumento
E cuido di monumento na Aruba ta den man di tres instancia, Monumentenbureau, Monumentenfonds y Monumentenraad. Monumentenbureau ta e Departamento di Gobierno cu ta encarga cu tur asuntonan general di monumento, manera maneho, permiso, proteccion, restauracion y tur asuntonan tecnico di monumento. Stichting MonumentenFonds Aruba (SMFA) ta encarga cu restauracion, mantencion y huur di e edificionan monumental di Aruba y alabes ta aporta na conscientisacion tocante e balor di monumentonan di Aruba. Monumentenraad ta duna conseho na Minister di Cultura tocante proteccion di monumento y permiso despues cu Monumentenbureau controla e peticionnan.


Minister Maduro a haya un bista riba e trabounan
Recientemente Minister Maduro a reuni cu e tres instancianan aki pa asina haya un bista riba e trabounan cu ta wordo haci pa conserva nos monumentonan na Aruba. Mester bisa cu aunke COVID19 ta trece retonan pa e trabounan, asina mes proyectonan di restauracion y mantencion ta sigui na Corte di Husticia, Maria Convent, Botica Aruba, Museo Arkeologico, Weststraat y Lighthouse. Recientemente a pone un 'traplift' tambe na Edificio di Stadshuis pa asina e monumento importante aki por ta mas accesibel.


Un areglo di subsidio y proteccion pa casnan di cunuco
Un preocupacion cu Monumentenraad a trece dilanti ta e hecho cu Aruba ainda no ta conta cu un areglo di subsidio pa asina por brinda un yudansa financiero na doñonan di edificionan priva cu tin balor monumental. Pa e motibo aki ta wak cu hopi edificio, entre nan, casnan di cunuco, ta bay perdi. E speransa ta cu pronto Monumentenfonds por logra establece un revolving fund cu lo por yuda cu e meta aki pa por yega na conserva tambe e monumentonan priva.




Bayendo pa 25 aña di conservacion di monumento
Otro aña ta marca 25 aña di e trabou cu e tres instancianan ta haci pa conserva monumento na Aruba. Pa conmemora e fecha special aki, Monumentenbureau y Monumentenfonds lo ta preparando nan programa pa asina conscientisa riba e importancia di conservacion di monumento. Minister Xiomara Maduro ta gradici tur tres instancia pa nan esfuerso pa mantene y conserva nos monumentonan como parti di e herencia cultural di Aruba.

Nos ta habri un siman hopi interesante. Na comienso di siman pasa tawata tin hopi reto pa por cumpli cu e obligacionnan financiero di pais Aruba. Esey tawata na momento cu nos a wordo informa cu Hulanda a cambia su condicionnan pa cu e fiansa na ultimo momento. Prome Minister Evelyn Wever-Croes a duna di conoce cu Hulanda a cambia e condicionnan di tal forma cu nos lo a perde como Awg. 130 miyon simplemente pasobra nan a cambia e carta di condicionnan cu tawata aplicabel cu nan a duna den prome instante compara cu di dos biaha. E cambio aki ta pasobra cu den e prome carta Hulanda a bisa cu Aruba lo haña Awg 204 miyon pa juli, augustus y september y diripente den e ultimo carta di 4 di september, Hulanda a cambia esaki pa juli, augustus, september, oktober y November, pa e mesun suma di Awg 204 miyon. Prome Minister a expresa cu Hulanda no a consulta cu Gobierno di Aruba prome y esaki tin consecuencia hopi grave pa Aruba.


“Mi a contact Hulanda mesora y a wordo notifica cu nan no ta bay fia nos e placa mas y a forsa nos asina pa nos mes bay busca fiansa. Na e momento cu nos a bay busca nos a tuma nota cu tin interes riba mercado local financiero atrobe pa Aruba y e siman aki nos ta bay mira si berdad nos ta logra yega e suma aki cu nos tin mester. Mientrastanto fin di siman pasa Hulanda a bin bek y bisa cu nan a recapacita y realisa nan eror y nan ta dispuesto toch pa presta nos e 2 lunanan ey cu nan a kita di nos, pero cu nos tin cu cana un procedura pe. Nan a referi na un procedura via CFT. Esaki ta un procedura cu nos a cuminsa cu ne for di 2 siman caba kiermeen cu ya nos a encamina pero cu ta tardando hopi na man di Hulanda”, Prome Minister a duna di conoce..


Prome Minister a sigui bisa cu e siman nos dilanti ta un siman hopi interesante pasobra nos tin plan A y plan B. Plan A ta pa sigui den negociacion cu Hulanda. Hulanda a indica cu nan ta dispuesto di presta Aruba tur e 5 lunanan aki, pero ainda tin e cuestion di diferente condicionnan riba mesa y ainda nan tin di contesta si nan ta bay acepta e dos lunanan cu nan a scrap den prome instante. Hulanda a indica siman pasa cu nan ta disuesto pero Gobierno no a haya un contesta definitive ainda. Aruba ta den espera di esaki. Si Hulanda bisa cu nan ta dispuesto pa fia Aruba pa tur e 5 lunanan e ora bo por bisa cu Gobierno por sigui papia di dje.


Plan B ta cu nos mercado financiero local mes. E siman aki Gobierno lo mira cuanto interes tin ora cu e deadline yega di e bononan cu Gobierno a emiti y e ora lo mira si plan B ta un alternativa. Berdad plan B ta mas caro cu plan A, pero e no ta mas caro cu loke Aruba ta custuma. Di otro banda plan B ta algo cu nos mester awor paso awor Aruba mester paga e gastonan di cuido medico, di FASE y di loonsubsidie di e luna aki. Ta hopi urgente pa Aruba
haña e placa, y si tin cu paga un poco mas interes pa esaki, Gobierno mester hacie. Hulanda a forsa Gobierno pa tuma e paso aki ora nan a nenga Aruba e fiansa manera a wordo palabra.


“E siman aki ta interesante pasobra e ta un siman cu ta mustra cu tin opcion atrobe. Nos no ta mara na un plan pero nos tin otro opcion y nos mester pone ambos den balance y mira kico ta miho pa pais Aruba. Pero ta urgente si pa haña e placa y no por sinta warda pa tende di Hulanda. Ban mira e siman aki kico ta bay pasa, si nos ta haña contesta di Hulanda of nos ta haña contesta di mercado local financiero, pero en todo caso como Gobierno responsabel nos a traha un plan A y B y e responsabilidad cu nos ta carga ta pa percura cu Gobierno por cubri su gastonan di Gobierno y di sector priva. Tin hopi comerciante ta depende di loonsubsidie, di e sosten di Gobierno pa nan tambe por cubri nan gastonan. Esaki ta un luz na horizonte cu cosnan ta mehorando pa Aruba. Gobierno su meta ta pa tin un maneho responsabel”, Prome Minister Evelyn Wever-Croes a duna di conoce.

WOW Aruba, Women empOwering Women, ta un organisacion funda na aña 2017 pa muhenan hoben y profecional pa impacta e comunidad Arubano den diferente area. Un obhetivo di WOW Aruba ta tambe pa duna bek na comunidad di Aruba pa medio di obranan caritativo.


WOW Aruba, den e temporada dificil cu nos pais ta pasando aden desde maart di e aña aki na unda cu Covid-19 a dal nos pais duro, a reconoce esfuerso y maneho di Prome Minister Evelyn Wever-Croes. Recientemente WOW Aruba a nombra nos Prome Minister como ‘IMPACTFUL WOMAN’ pa luna di September 2020.


Prome Minister ta gracidi WOW Aruba pa e reconocemento hopi importante aki den temponan crucial manera esun cu nos pais ta pasando aden. Alabes, Prome Minister ta expersa cu tur loke e ta bin ta haciendo desde e prome dia di gobernacion di Gabinete Wever-Croes ta na bienestar di progreso di nos pais. Y awo mas cu nunca e ta determina pa saca Aruba for di e situacion doloroso cu Covid a ocaciona na nos pueblo.


Pa lesa e entrevista completo di WOW Aruba cu Prome Minister, bishita nan pagina di Facebook WOW Aruba.

Durante e reapertura di Museo Arqueologico Nacional di Aruba (MANA) aña pasa, Minister Maduro a enfatisa cu hunto cu e reapertura, un era nobo y duradero lo cuminsa pa MANA. Trabounan a continua y a forma un ekipo dinamico cu expertonan di museo y cultura bou di guia di director ad interim Pancho Geerman. Otro colaboradornan di e team ta Renwick Heronimo y Ruby Eckmeyer.


Recientemente e team aki, pa medio di un concepto preliminario cu Renwick Heronimo a presenta e prome concepto pa un plan strategico titula ‘MANA: Manteniendo nos Herencia Bibo den Tempo’. Hunto cu e mandatario a presencia e reunion den forma personal y virtual representantenan di UNOCA, Banco Central di Aruba y di oficina di Minister Maduro.


Sr. Heronimo a haci un presentacion for di e punto di bista di un futuro museo como agente di cambio y dialogo. Esaki ta basa riba un definicion nobo cu Internacional Council of Museum (ICOM) kier usa pa adapta e concepto bieu di kico ta un museo.


MANA ta consisti di diferente edificio di gran balor monumental y historico. Meta di e plan di inovacion ta pa maximalisa e experiencia di bishitantenan den cada edificio y crea expresionnan cu ta conta storia di e edificionan, di famia Ecury y e vinculo bibo cu arkeologia di Aruba. Ta e intencion pa bay traha riba exposicionnan moderno, interactivo y digital, pa medio di cual ta expresa balor di naturalesa, obhetonan y placa den historia di Aruba. Continuidad di arkeologia tambe lo haya su luga den e exposicionnan nobo. Alabes exposicion virtual lo bay forma parti di e presentacionnan di MANA den futuro.
Pa loke ta historia y nificacion di placa cu tabata circula y ta circula na Aruba, Banco Central di Aruba lo ta un aliado principal den e proyecto aki hunto cu UNOCA.


Minister di Cultura a keda hopi impresiona cu e presentacion y ta reconoce cu MANA tin hopi mas potencial. E uzo multifunctional di cierto espacionan lo por sostene investigacion y documentacion di nos herencia cultural. E mandatario ta enfatisa cu den un futuro cercano nos comunidad y turistanan por disfruta di un ‘state of the art’ Museo Arqueologico Nacional Aruba.

Pa Gabinete Wever-Croes, nos grandinan ta prioridad y den e tempo dificil di e pandemia aki, Prome Minister Evelyn Wever-Croes ta pone hopi enfasis pa nos pueblo cuida nos grandinan cu ta esnan mas vulnerabel y na risico.


Tirzlyn Kolfin den conferencia di prensa di pa duna informacion di e ultimo desaroyonan di Covid-19, a duna un splicacion amplio riba maneho di e virus den casnan di cuido priva y di SABA. A implementa e medidanan di precuacion cu a tuma na comienso di e prome ola di Covid. A pone un stop di opname y di bishita na tur cas di cuido. Den caso si tin excepcionnan, lo evalua esakinan pa tuma e miho desicion. Personanan di casnan di cuido cu sali for di hospital pa bay bek casnan di cuido, mester wordo isola y wordo monitoria. Asina por proteha e demas grandinan den e cas di cuido.


Sra. Kolfin a reacciona riba e criticanan cu tin tocante e trahadonan di e casnan di cuido. Esakinan segun Kolfin ta trahadonan cu ta trahando desde e comienso di e virus aki na Aruba, cuidando nos grandinan incansablemente. Poniendo nan mes den risico diaramente. Mayoria casnan di cuido a cera cu trahadonan hunto cu e grandinan pa asina keda cuida y proteha nos grandinan. Mayoria trahado ta sali bay cas y bolbe trabou sin haci nada otro pa no pone nos grandinan na peliger.

Ta importante si pa keda mantene contacto cu nos grandinan. Esaki por via telefoon. FUTURA a facilita conectividad y apoyo pa nos grandinan y temporalmente a entrega casnan di cuido algun tablets pa yuda e habitantenan di casnan di cuido mantene contacto cu nan famia, amigo y sernan keri.
​
Prome Minister Evelyn Wever-Croes den diferente ocacion a expresa tambe cu nos grandinan na cas mes tambe mester di proteccion. Y esey ta responsabilidad di cada ciudadano pa cuida nos grandinan. Nos mester concentra pa contene y preveni cu e virus ta wordo transmiti na nos grandinan cu ta esnan mas vulnerabel y na riesgo.


“Ban cuida nos grandinan bon. Si bo ta sali, no bishita nan. Mantene contacto via telefoon. Si bo ta biba cu nan, mantene reglanan pa evita di contagia nan. Laba man mas tanto posibel y uza hand sanitizer ora no por laba man. Uza tapaboca. Evita di bin den contacto fisico cu otro hende, saluda otro sin duna man, brasa y sunchi. Gobierno di Aruba ta haciendo di su banda. Pueblo tambe ta wordo pidi pa tuma tur paso di prevencion. Esaki ta den bo man. Mi ta conta riba bo pasobra mi sa cu bo ta stima bo mes, bo famia y Aruba y hunto nos ta logre”, Prome Minister Evelyn Wever-Croes a expresa.

“E cifranan di casonan positivo di e siman aki ta mustra cu nos ta bayendo den e mesun direccion cu siman pasa cu tawata e peor siman den henter e crisis. Tur medida cu a wordo tuma, tur e tempo cu ta treciendo informacion y papia obviamente no ta dunando e resultadonan cu nos ta desea”, Prome Minister Evelyn Wever-Croes a expresa durante e conferencia di prensa pa duna informacion di e ultimo desaroyonan di Covid-19.

E fin di siman aki, Gobierno di Aruba y Crisis Team ta evaluando algun medida sperando cu esakinan lo yuda den evita cu hopi hende ta mobilisa riba caya y keda mas posibel paden. Diabierna lo anuncia e detayenan di e medidanan aki.

Ademas di e medianan nobo, a amplia e capacidad di control, call center pa loke ta trata casonan di isolacion y cuarenena, ta trahando mas proactivo. Crisis Team y Gobierno di Aruba ta haci un peticion na tur empleado publico tambe pa yuda den e crisis aki. A logra haña un ekipo basta grandi di empleado publico cu ta sali di nan departamento y yuda cu e crisis. Motivacion ta halto y Prome Minister ta gradici tur pa nan ayudo.

Prome Minister a duna di conoce cu mester si di mas hende y ta haci un apelacion na tur empleado publico cu kier yuda, pa laga sa a traves di hefe di trabou of a traves di departamento di recurso humano pa por wordo inlcui den e team cu ta trahando tur dia duro pa yuda den e crisis. Prome Minister a indica cu si no haya suficiente interes lo cuminsa apunta hende pa yuda pasobra e trabou aki mester wordo haci y ayudo di mas ta hopi importante pa logra.
​
Prome Minister ta recorda tur persona cu ta den isolacion of cuarentena pa keda paden di lo contrario lo por haya un boet cuminsando na Awg 1000. Esaki ta e disciplina di mas grandi cu e ciudadanonan aki por mustra pa evita mas contagio.