Gobierno di Aruba a declara 2020 como Aña di Innovacion y Enseñansa.

Desde inicio di gobernacion Wever-Croes, Gobierno a cuminsa traha riba e vision ambisioso pa cu innovacion. Innovacion ta un aspecto sumamente importante pa tur pais, industria, compania, y organisacion. E desaroyo riba tereno di tecnologia y automatisacion di ultimo añanan cu ta sosodiendo na un manera exponential tin un impacto grandi riba nos bida diario, con nos ta traha, y sigur riba e futuro di nos futuro generacionnan.
Prome Ministrer Evelyn Wever-Croes, hunto cu FUTURA a anuncia e 2020 Innovation Agenda na unda cu Prome Minister a comparti cinco (5) proyecto di prioridad trategico cu lo cuminsa e aña aki den cuadro di Aña di Innovacion y Enseñansa. E proyectonan di prioridad riba agenda pa 2020, tur di un forma of otro ta promove e vision di innovacion di Gobierno pa cu innovacion y enseñansa.
E cinco (5) proyectonan di innovacion cu ta nos prioridad den 2020:


1. eGovernment
Nos a cuminsa e proceso di eGovernment na aña 2018, y hunto cu e eGovernment Academy di Estonia, nos ta finalisando nos eGovernment Road Map cu dentro di poco lo wordo publica ora cu e fase di consultacion cu stakeholders termina. Cu hopi entusiasmo y optimism, Prome Minister ta duna di conoce cu ya caba nos a drenta den e fase di implementacion. Asina aki nos lo percura cu pa e aña aki, mas intercambio di dato lo tuma luga entre Departamentonan di Gobierno na un manera sigur, facil, y instantaneo, y tambe Gobierno lo por brinda aun mas servicio 'online'. Esaki lo mehora calidad di bida di e ciudadano, cu na final di dia ta nos meta principal.


2. 100 Innovations
E siguiente prioridad ta e proyecto “100 Innovations”. E proyecto aki lo ta un competencia cu ta habri pa tur ciudadano di nos isla. E meta ta pa encurasha tur hende pa trece dilanti ideanan
nobo, of ideanan existente, cu e meta pa logra 100 idea innovativo y aplicabel pa soluciona e retonan cu nos ta enfrentando como pais pa fin di aña 2020.


3. B-Lab Santa Cruz
E Lab aki lo ta e prome Lab di e tipo aki na Aruba y e focus lo ta riba ‘Bio-Tech’ y Agricultura. Sciencia y tecnologianan nobo lo wordo aplica y prueba, pa bin cu solucionnan riba e tereno aki, cu ta di sumo importancia pa Aruba. E proyecto aki ta un bes mas den colaboracion cu Metabolic Foundation y e meta principal ta pa uza tecnologia pa yega na ‘homegrown solutions’ riba e retonan riba e tereno aki. Den mesun rosea nos lo cuminsa na minimalisa nos dependencia riba importacion di cuminda, den e caso aki fruta y berdura y re-emplaza locual nos mesun hendenan por planta y cu lo por crece na Aruba.


4. Future of Work Vocational Training
Aki nos ta pensa di crea empleo pa cu cyber security. Cu proteccion di data y siguridad birando mas importante cu nunca den un mundo digital, mas y mas nos mester pone enfoke riba siguridad di nos datonan personal y nos conocemento di IT y Cybersecurity. P’esey nos ta anuncia nos di 4 prioridad di 2020 cu ta desaroyo di un programa nobo vocacional cu lo ekipa nos hovennan cu conecemento aplicabel di ICT y di cybersecurity.


5. eLearning 2.0
E di dos eLearning Pilot lo ta Colegio Pastor Kranwinkel den e bario di Paradera. E proyecto Piloto aki lo ofrece studiantenan y maestronan un experiencia mas personalisa y avansa. Esaki uzando tecnologia y maneranan nobo di siña y duna les. Nos kier crea un ‘digital environment’ cu lesnan interactivo, unda cu colaboracion ta wordo stimula. Asina aki nos kier desaroya e ‘21st century skills’ di nos muchanan.


“Ora mi a asumi e encargo di Innovacion, mi tabata tin un deseo, un vision, un deseo di Innova Aruba, di prepara nos pais pa e retonan cu nos ta bay enfrenta den futuro. Especialmente pasobra mi tabata sa cu e retonan cu nos ta enfrentando ta hopi hopi grandi, pero cu colaboracion y cooperacion di nos tur como un pais, nos lo innova Aruba, y prepara nos futuro generacionnan pa enfrenta e retonan cu futuRo lo trece”, Prome Minister a expresa.

Siman pasa, Prome Minister Evelyn Wever-Croes a ricibi e bunita Kalender 2020 for di Fundacion “Sea Bunita Sea Bo Mes”.


Tur aña Fundacion “Sea Bunita Sea Bo Mes” ta traha un kalender na unda cu algun celebridad di Aruba ta compaña nos muchanan special na diferente parti rond di Aruba pa asina saca potretnan bunita y diferente pa nan kalender anual. E aña aki, Prome Minister tambe a forma parti di e bunita proyecto aki y ta aparece den e luna di maart hunto cu e hoben bunita Johnisha. Prome Minister ta gradici e fundacion pa e Kalender 2020 cu lo ta tambe un bunita recuerdo.


“Pa Gabinete Wever-Croes inclusion di nos ciudadanonan special ta riba un prioridad hopi halto. E compromiso di Gobierno ta pa pone e ser humano central, no laga niun hende atras especialmente nos hendenan special”, Prome Minister Evelyn Wever-Croes a expresa.


Fundacion “Sea Bunita Sea Bo Mes” ta informa tambe pa Aruba ta pendiente pa nan acostumbrado show na mei proximo na unda nan ta celebrando nan di 5 aña den un gran evento.

Minister Maduro a celebra Aña Nobo Chines hunto cu e comunidad Chines na New China Club. E mandatario a disfruta di un anochi agradable cu musica, baile y cena. Locual tabata di aprecia tambe cu durante di e anochi a presenta dos video na Papiamento den cual a brinda un splicacion na e invitadonan riba e origen di e celebracion di Aña Nobo Chines y tambe di e presencia di colonia Chines na Aruba, cu ya tey pa mas di 100 aña.


E mandatario a hiba un discurso durante cual el a recorda e palabranan di Nos Libertador: ‘Arubiano no ta solamente esun cu a nace na Aruba, sino tambe esun cu a haci Aruba su nacion y boso a haci Aruba boso cas leu for di cas’.


Na nomber di Gobierno Minister Maduro a gradici e Board Chinese Club pa e invitacion. Alabes a gradici e comunidad Chines pa nan aporte na nos comunidad y nos economia.
Na final e mandatario a desea henter e comunidad chines un Feliz Aña Nobo yena salud, rikesa y prosperidad!

E manifestacion cultural riba Dia di Betico e aña aki a kibra tur expectativa cu un concierto di Grupo di Betico y orkesta riba Plaza G.F. Betico Croes. E evento aki a resulta den uno magno y sobresaliente cu ainda ta wordo comenta den pueblo. Minister di Cultura ta expresa palabranan di pabien y agradecimento na tur musico y cantante di Grupo di Betico y orkesta cu a engrandece e concierto. Un danki tambe na e artistanan invita Margareth Marin, Zaina Falconi, Jeon y Claudius Philips.


Despues di e concierto e mandatario encarga cu cultura a bay “backstage” y personalmente a gradici Grupo di Betico pa nan tremendo concierto presenta na honor di Betico na ocasion di su fecha natalicio, como tambe e mandatario a gradici e musiconan cu a bini di exterior pa presenta den e magnifico concierto aki.

Siman pasa a tuma luga e Festival di Tumberito 2020. Un bunita Festival caminda nos muchanan a presenta nan Tumba pa Carnaval 2020. Por a tuma nota di un bunita interpretacion di tumbanan. E ganadornan maximo pa categorianan ta lo siguiente di Tumberito Pre Infantil 2020 a resulta Jordan Koolman, Reina di Tumberito Infantil a bay pa Javinah Besselink y Reina di Tumberito Hubenil a Sali Jorienne Angela. Siguientemente e resultado di tur e premionan pa categoria:


CATEGORIA PRE-INFANTIL:
Mas Popular : Akyrah Margarita
Mas Disciplina : Akyrah Margarita
Premio Ambiente : Jordan Koolman
Best Costume : Akyrah Margarita
Rookie of the Year : Akyrah Margarita
5 Lugar : Jurian Lanoy - Bataso
4 Lugar : Rahaylee Kock - Fantasia di Unicornio
3 Lugar : Akyrah Margarita - Bel a Bati
2 Lugar : Carl-Anthony Petrocchi - Dilanti nos ta bay
REY DI TUMBERITO PRE-INFANTIL 2020 :
Jordan Koolman - Taa Taa

CATEGORIA INFANTIL
Mas Popular : Asia Libiee
Mas Disciplina : Javinah Besselink
Premio Ambiente : Javinah Besselink
Best Costume : Javinah Besselink
Rookie of the Year : Javinah Besselink
5 Lugar : Georvin Angela - Ban live cu ne
4 Lugar : Caylee - Cosecha di Alegria
3 Lugar : Shaylee Croes - Brasabo bay
2 Lugar : Asia Libiee - Ban carge hibe te aya
REINA DI TUMBERITO INFANTIL 2020 :
Javinah Besselink - Reina di Ambiente
​
 CATEGORIA HUBENIL 
Mas Popular : Jorienne Angela
Mas Disciplina : Sergio Luis Garcia
Premio Ambiente : Jorienne Angela
Best Costume : Alysee Bernabela
Rookie of the Year : Sergio Luis Garcia
3 lugar : Sergio Luis Garcia - Esaki ta mi reto
2 Lugar : Alysee Bernabela - P'e amor pa Tumba
REINA DI TUMBERITO HUBENIL 2020 :
Jorienne Angela - Esey ta e cara di Carnaval


Minister di Cultura Sra. Xiomara Maduro ta exprea palabrabab di pabien y hopi exito na tur participante y e ganadornan. Como tambe ta gradici SMAC, organisadornan y tur musico cu a coopera pa haci e festival di Tumberito 2020 un exito. Un biaha mas pabien na nos gandornan di Festival Tumberito pa Carnaval 66.

E celebracion di Dia di Betico e aña aki a sobrepasa tur expectativa, diabierna dia 24 di januari na vispera di Dia di Betico a tuma luga e Manifestacion Cutural cual a resulta un gran exito. Na comienso di e anochi Omar Kock a presenta riba violin. Despues di e yegada di e mandatarionan e evento a inicia cu Himno di Aruba interpreta pa Aimee Middendorp cu acompañamento di e prominente guitarista Serghio Jansen.


Despues di e elocuente discurso di Minister di Finansa, Asuntonan Economico y Cultura Sra. Xiomara Maduro, e maestro di ceremonia Ruben Garcia a presenta Grupo di Betico hunto musiconan cu a bin forma e orkesta. Grupo di Betico a wordo funda pa Betico Croes dfm cu tabata yama “Betico y su Grupo” y awe tin e nomber di “Grupo di Betico”. Recientemente nan a celebra nan concierto di oro, 50 aña deleitando nos pueblo y como regalo Gobierno di Aruba a presenta esaki na e publico, un concierto na honor di Betico. Un repertorio di artista di Grupo di Betico manera Maikito Croes y Miguel Genser kendenan a presenta entre otro e cancionnan “Alegria”, “Lanta Para, di Aruba bo ta”, “Bati Riba Pecho”, “Felicidad”, “Nos Libertad”, “Mi Perla”, “Un Bandera Tan Special”, “Contento”, “Mi ta In Love”, “Nos Heroe” y “Ken Nos Ta”.


Pa e concierto aki “Grupo di Betico” tabata tin como artistanan invita Margareth Marin kende a interpreta “Celebra bida”, Zaina Falconi cu a interpreta “Bendiciona”, Jeon cu e popular cancion “Gosa bida” y Claudius Philips presentando “Bonconco”. Pa sera e anochi Miguel Genser y Maikito Croes a presenta e hit “Weekend a yega”.




E invitadonan y publico presente cu a bini hunto un biaha mas riba Plaza Libertador Gilberto François Betico Croes pa celebra Dia di Betico den grandi yena cu alegria y emocion a disfruta di un magnifico concierto dedica na e arkitecto y autor di nos Status Aparte. Nos mester gradici tur e musico di Grupo di Betico y tambe tur esnan cu a bin di exterior pa engrandece e concierto. Alabez mester gradici e publico grandi cu a bin presencia e Manifestacion Cultural dedica na nos Libertador Gilberto Françios 'Betico' Croes en conexion cu su fecha natalicio. Danki na Dje, awe nos ta Pais Aruba cu tur ingrediente pa forma y conserva Patria.


Na final Minister Sra. mr. Xiomara Maduro a pasa saluda y gradici e elenco grandi di Grupo di Betico y Orkesta personalmente pa nan bunita contribucion na e celebracion sobresaliente di Dia di Betico.

Dialuna merdia Minister di Salubridad Publico Sr. Dangui Oduber den nomber di Gobierno di Aruba a presenta un reconocimento na Sra. Edna Eckmeyer pa su 40 añanan laborando na Wit Gele Kruis. Sra. Eckmeyer a drenta den servicio di Wit Gele Kruis na aña 1980 y ta trahando keto bay den e parti administrativo.

Minister Oduber a tene un combersacion hopi ameno cu Sra. Eckmeyer riba su bunita y largo trayectoria. Actualmente Sra. Eckmeyer tin un bunita edad di 76 aña y cu bon salud, segun Sra. Eckmeyer e ta wak su mes ta traha pa 2 aña mas. Locual tabata hopi remarcabel ta cu Sra. Eckmeyer no a laga modernisacion den e systema strobe di eherce su funccion, Sra. Eckmeyer a sa di adapta su mes cu tempo y sigui cu su trabou y esei sigur ta algo di admira.
​
Señora Eckmeyer sigur ta un ehempel pa hopi den Wit Gele Kruis, finalmente e mandatario a manda un palabra di gratitud special pa e gran labornan cu Sra. Eckmeyer a eherce durante tur e añanan.

Recientemente a toca e honor na Minister Xiomara Maduro pa haci inauguracion di e oficina prinicipal di Total Finance den Rutena Mall na Playa. Total Finance ta un compania na Aruba cu ta duna servicio financiero na nos comunidad y ta conta tambe cu un sucursal na Noord.


Confiansa den economia di Aruba
Total Finance a expande su oficina na Rutena Mall y tambe a haci un rebranding y a introduci nan logo nobo. E mandatario encarga cu Economia a enfatisa cu e inversion di e expansion di e oficina di Total Finance ta un muestra di confiansa den crecemento economico di Aruba y futuro di nos Pais. Cu e ampliacion di e Oficina Principal na Playa, Total Finance por brinda tambe un mihor servicio na nan clientela.


Gradicimento
Minister Xiomara Maduro a gradici Gerencia di Total Finance pa e bunita inversion aki cu ta duna un empuhe na economia nos Pais. E mandatario a desea e gerencia y personal di Total Finance hopi exito den nan oficina nobo.

Recientemente Minister Xiomara Maduro a bishita nos grandinan di Grupo Flor di Aloё den cuadro di celebracion di ‘Dia di Betico’.
E mandatario a entrega na nos grandinan un buki ‘Danki na Dje’ cu ta contene un historia breve di Status Aparte.
E grandinan a keda masha contento cu presencia di Minister di Finansa, Asuntonan General y Cultura y a gradici e mandatario pa e buki.
E mandatario a pasa un rato agradabel hunto cu nos grandinan durante cual ela gradici nan pa e lucha cu nan a hiba hunto cu Betico cu awe nos por tin locual Aruba ta ofrece nos.