Prome Minister Evelyn Wever-Croes durante Conferencia di Prensa dialuna mainta a duna un relato amplio riba e ultimo desaroyonan tocante Citgo. E situacion ta tenso y Citgo mes a indica cu nan lo desea di bay pa 31 di januari benidero. E siman aki lo ta un siman determinante pa esaki logra of no. Mientras tanto, negosacionnan ta andando ainda pa asina Aruba haya bek e ‘yabi’ di e refineria y pa Citgo no bay cu e ‘yabi’ y tene Gobierno den corte pa hopi aña.


Prome Minister a enfatisa cu e motibo pa cua ta importante pa yega na un areglo di terminacion di contract cu Citgo ta pa asina Gobierno por haya e oportunidad pa drenta y drecha caminda cu mester drecha. E ekiponan den e refineria ta den mal condicion y hasta tin ta den cay den otro. E waf tambe a mustra señalnan di hopi mal condicion. Y di un caminda Gobierno lo mester haya e placa pa haci e inversionnan necesario.


Prome Minister a duna di conoce cu e miho cos cu por pasa pa Aruba ta pa Citgo bandona e isla pa asina Gobierno busca un otro operador. Mientras tanto e compania estatal, RDA, a cuminsa prepara pa e momento cu Citgo bay. Opcionnan cu tin ta, cu si Citgo bay e fin di luna aki, ya dia prome di februari mester tin ekipo eynan pa sigui cu e trabounan di e terminal na unda cu na februari un otro barco lo drenta cu gasolin, fuel y HFO y asina garantisa e suministro. Contrario na e rumornan di fin di siman na unda a conseha tur hende pa bay tank nan auto pasobra gasolin lo caba na Aruba, Prome Minister ta enfatisa cu e suministro local niun momento tawata na riesgo y lo no ta na riesgo tampoco pasobra Gobierno tin un Plan B.


Plan B, segun Prome Minister ta encera e compania cu RDA a lanta pa opera e terminal y tuma over e trabounan, Terminal di Energia Aruba. E compania aki ta un compania estatal cu ta cay bou di RDA y RDA bou di Gobierno. Pa motibo di e menasanan di Citgo di lo bay un ora pa otro, e compania aki mester a bin pa sigui cu e trabounan especialmente pa e parti di gasolin, HFO pa WEB y jetfuel.


Pa loke ta trata e trahadonan, Prome Minister a referi na e reunionnan cu ta tumando luga na unda cu tin mediador di Gobierno den e negosacionnan. E compromiso di Gobierno ta pa percura pa pronto haya un operador nobo cu lo tuma nan over. Algun lo wordo tuma den servicio pa Terminal di Energia Aruba pa garantisa cu e trabounan na e waf ta continua ora cu e barco yega na februari.


E suminstro di gasolin, Prome Minister ta enfatisa cu e rumornan no ta berdad y ta pidi pa pueblo no cay den panico. Aruba ta den e ultimo pa loke ta trata e capitulo yama Citgo cu a tarda masha hopi mes pa finalisa siendo cu ya desde mei aña pasa Prome Minister a informa cu e lo institui un comision pa nan bay busca un otro operador of studia kico otro lo por haci cu e refineria y despues di tanto luna ainda no por a ni institui e comision aki. Pero poco poco te yegando e punto na unda cu lo institui e comision aki mirando e ultimo desaroynan. Mientras tanto, Prome Minister ta pidi Aruba pa no cay den panico. Gobierno ta manehando e situacion cu diferente plannan riba mesa pa garantisa especialmente suministro di gasolin.


Pa loke ta trata e diferente atakenan di oponentenan, Prome Minister ta duna di conoce cu nan ta bin di esnan cu no ta desea pa Citgo bay pasobra esaki lo no conbini nan saco pa motibo di e hopi beneficionnan personal cu nan tawata tin cu Citgo. Sinembargo pa Gobierno, Aruba ta conta. Y cu Citgo, nos lo no mira desaroyo economico den nos pais. P’esey, Citgo mester bay.

Den su discurso durante e Acto Protocolar riba Dia di Betico, Prome Minister Evelyn Wever-Croes a enfatisa riba un pregunta particular cu a wordo haci na dje door di un hoben. Durante e siman di celebracion di Dia di Betico, coleganan di Gabinete y Prome Minister a bishita varios scol y otro organisacionnan. E meta tabata pa combersa cu e hobennan riba ken ta Betico, y kico tur nos pais a logra Danki na Dje.


Cada scol a prepara pa e bishitanan na un forma unico. Algun a trece tur alumno hunto, y canta e Himno y hisa nos Bandera. Un otro scol a prepara un presentacion pa asina mustra con hopi nan sa di Betico. “Nos a pasa momentonan bunita y tambe di emocion”, Prome Minister a expresa.


Docentenan a prepara e alumnonan cu e informacion di e bukinan y tawata notabel cu e muchanan tabata fascina cu e storianan di Betico. Nan a scucha cu atencion tur locual tabata tin di conta nan y nan tambe a haci pregunta. Ta di aprecia y di ta orguyoso di mira con nos maestro y maestranan ta inculca e legado di Betico den nos muchanan. “Mi ta sigur awor cu e historia real di Betico ta graba den nan curason”.


Durante su bishita a surgi diferente pregunta for di hobennan curioso pa conoce mas di Betico y e impacto cu e Libertador di nos pueblo tin ainda riba e bida como politico y mandatario di Prome Minister. “Si Betico tabata na bida awe, kico lo bo a bise?”, un hoben a puntra.


Prome Minsiter a considera e pregunta aki hopi profundo biniendo di un hoben asina jong. Sinembargo, un pregunta facil pa contesta, di curason.


“Si Betico tabata na bida, lo mi a bise DANKI. DANKI pa a lucha pa nos biba den un pais autonomo, cu nos propio Gobierno, nos propio Parlamento, den cual nos por tuma nos propio decisionnan. DANKI pa a demostra cu maske Aruba ta un isla chikito, si bo tin vision y determinacion, bo por logra bo meta. DANKI pa a inspira nos, y pa sigui inspira nos, den kere den e idealnan di nos pais y di kier hiba nos pais padilanti. DANKI pa a sacrifica su mes y su famia y a pone e interes di pueblo di Aruba, prome cu su interesnan personal of familiar.
Si mi lo por a bisa Betico algo, e lo ta DANKI, pasobra ta Danki na Dje awe nos por lanta nos yiunan den e dushi pais aki cu yama Aruba”, tawata e contesta di Prome Minister Evelyn Wever-Croes riba e pregunta haci.


Prome Minister a enfatisa cu p’e ta un honor di por ta guia nos pais awe pasobra esaki ta yen’e cu un sentimento profundo di orguyo, especialmente como sobrina y iha di Betico. “Orguyo di a gara e bandera, y sigui cu e lucha”.

Diasabra 25 di januari, un dia nacional na unda cu pueblo di Aruba a celebra Dia di Betico y a conmemora su fecha natal. Betico lo a cumpli 82 aña. Sinembargo na un edad jong nos Creador a yam’e den Su Reino.


Prome Minister Evelyn Wever-Croes, durante su discurso na e ceremonia protocolar di Gobierno di Aruba riba Plaza Gilberto François ‘Betico’ Croes diasabra mainta, a elabora riba e bida di Betico y tur loke el a nifica pa nos pueblo.


“Betico tabata un persona humilde, cu un carisma enorme. Un persona mescos cu nos tur y toch mes momento un persona special, cu a logra cosnan grandi. Ya desde un edad hoben, el’a mustra e caracter di un Lider. Di un meneer di school el’a bira un politico y despues a comberti su mes den e politico di mas grandi cu Aruba a conoce den su historia, cargando e nomber tambe di Nos Libertador.


Masha poco pais den mundo a conoce un lider asina grandi y cu a logra cosnan grandi pa nan pais. Nos na Aruba SI a conoce un lider asina y pa esaki nos ta hopi agradecido.
Betico tabata tin un vision pa nos pueblo, pero manera nos tur sa, un vision sin accion ta keda solamente na un soño. Betico sinembargo a sa di converti e vision den accion, cu determinacion, a sa di uni nos pueblo, y asina a logra cosnan grandi pa Aruba.


Betico su palabranan legendario tabata “Si mi cay na caminda gara e bandera y sigui cu e lucha”. Despues di Betico, varios persona a gara e bandera y a sigui cu e lucha. Awor ta toca turno na nos generacion pa sigui cu e lucha pa mantene nos autonomia, pa gana respet y confiansa bek den Aruba y pa hiba nos pais y nos ciudadanonan padilanti.


Betico a demostra tambe e importancia di UNION. El’a sa di uni nos pueblo den e lucha pa Status Aparte. Su palabranan tabata: “Arubiano no ta solamente esun cu a nace na Aruba, sino tambe esun cu a haci Aruba su nacion. Y mi ta concuri completamente cu esaki. Awor nos pais Aruba ta para dilanti retonan grandi atrobe y mi ta convenci cu si nos UNI y enfrenta nan den UNION nos lo surpasa esakinan.


Betico a construi e cas, e hogar cu nos ta yama Aruba y ora e cas tabata cla, e mes no por a goza di dje pasobra el a fayece na edad hoben. Pero el a pasa nos e yabi di e cas cu yama Aruba, pa nos biba aden, pa nos lanta nos yiunan aden. Pa nos cuid’e, y pa nos percura pa bienestar y progreso di nos pueblo.


Pa mi ta un honor di por ta guia nos pais awe y e ta yena mi cu un sentimento profundo di orguyo, especialmente como sobrina y iha di Betico. Orguyo di a gara e bandera, y sigui cu e lucha. Mi ta haci un suplica na cada un pa ban sigui su ehempel. Traha duro. Sin temor pa sacrificio. Lucha cu integridad y honestidad pa hiba nos pais padilanti.


Nos pais ta enfrentando retonan grandi. Pero nos tin e VISION, e DETERMINACION y sigur e CURASHI pa surpasa e retonan aki. Un dia manera awe, esta Dia di Betico, ta brinda nos e oportunidad pa reflexiona, pa yena nos cu inspiracion, curashi, sabiduria y amor patrio pa atende cu tur reto y pa asina garantisa felicidad di e pueblo aki, locual Betico semper a anhela.


Na un di e scolnan cu mi a bishita durante siman, un hoben a puntra mi, “si Betico tabata na bida awe, kico bo lo a bise?’. Mi contesta tabata cu si Betico tabata na bida, lo mi a bise DANKI.


DANKI pa a lucha pa nos biba den un pais autonomo, cu nos propio Gobierno, nos propio Parlamento, den cual nos por tuma nos propio decisionnan.
DANKI pa a demostra cu maske Aruba ta un isla chikito, si bo tin vision y determinacion, bo por logra bo meta.
DANKI pa a inspira nos y pa sigui inspira nos, den kere den e idealnan di nos pais y di kier hiba nos pais padilanti.
DANKI pa a sacrifica su mes y su famia y a pone e interes di pueblo di Aruba, prome cu su interesnan personal of familiar.
Si mi lo por a bisa Betico algo, e lo ta DANKI, pasobra ta Danki na Dje awe nos por lanta nos yiunan den e dushi pais aki cu yama Aruba”.


Prome Minister a conclui su discruso gradiciendo tur esnan cu a lucha hunto cu Betico pa realisa nos Status Aparte. Un danki na politiconan cu den e añanan despues di obtene e Status Aparte a sa di lucha pa conserv’e. Tambe Prome Minister a gradici henter e famia di Betico kendenan semper a sosten’e y kendanan a haci hopi sacrificio hunto cu ne. Especialmente su yiunan, Guisette, Glenbert, Junior, Glendeline kendenan a comparti nan tata cu nos pueblo y a compronde cu Betico no tabata un tata pa un hogar so di mama, tata y cuater yiu, sino un tata pa henter Aruba.


Pa finalisa, Prome Minister Evelyn Wever-Croes a gradici nos Minister encarga cu cultura, sra. Xiomara Maduro y su ekipo, pa e bunita celebracion cultural diabierna anoch y pa e acto protocalar diasabra mainta na unda cu a surpasa tur expectativa. Un Pabien caloroso.


Aruba a celebra e dia aki na grandi y a demostra nos orguyo y nos amor pa nos pais. Pabien Aruba!

Durante e Manifestacion Cultural organisa pa Ministerio di Cultura y Comision Celebracion Dianan Nacional, Minister Xiomara Maduro a tene un bunita discurso, cual nos ta relata awe un parti di esaki. E mandatario su discurso tabata dirigi pa gradici Nos Libertador, Gilberto François (Betico) Croes y a recorda un y tur cu "Danki na Dje", cu awe nos por tin Pais Aruba.


E mandatario a enfatisa cu Betico su anhelo tabata di mira felicidad di su pueblo, pa su pueblo ta liber, liber den expresion, liber den decisionnan. Awe Danki na Dje, nos tin nos mesun Parlamento y nos propio Gobierno pa dicidi riba e futuro y rumbo di nos Pais.
Betico a percura pa nos tin nos simbolonan di identidad, nos propio Himno y Bandera, Nos propio Moneda, Procurador General, Banco Central, djis pa nombra algun di su logronan. Y locual ta mas importante ta nos propio ortografia di Papiamento. Minister di Cultura a bisa cu asina e por sigui nombra un sinfin di logro mas di Betico den e corto tempo di bida cu Creador a dune mey mey di nos. E mandatario a accentua cu pesey awe nos ta para un rato keto y bisa ‘Danki na Dje’ Aruba tin su mesun identidad cu cada Arubiano por ta orguyoso di dje.


Minister Xiomara Maduro a subraya cu durante e paseo e siman aki, pa entrega di e bukinan na diferente scolnan basico rond Aruba, e por a mira riba e cara di e muchanan, e goso y atencion cu nan tabatin pa conoce mas di e historia di Betico. Tambe ela nota cu hopi mucha a ser educa door di nan propio mayornan y famia pa sa Ken di Betico. Nan tabata conta di Betico asina entusiasma manera cu nan tabata conoce Betico den persona. Esaki a yena su curason cu alegria paso ta ora nos conoce nos historia, nos por compronde nos presente y ta yuda nos fiha nos futuro. E mandatario ta indica cu ta masha importante pa specialmente nos hobennan y futuro generacionnan cu no a conoce Betico den persona, siña conoce ken tabata Betico Croes. Pa nan siña e importancia di Betico Croes den historia di Aruba y pa por sigui su ehempelnan. Pa nan sa cu ‘Danki na Dje’ cu awe nos ta un Aruba liber.
​

E mandatario a termina su discurso yamando Betico un biaha mas Danki! Tambe a yama henter pueblo di Aruba masha pabien y desea un y tur un Felis Dia di Betico.

Un publico grandi a disfruta den bon ambiente y trankilidad

E celebracion di Dia di Betico a resulta exitoso. Dos evento dedica na e gran estadista arubano G.F. Betico Croes. Un programa bon coordina pa ambos evento tanto  pa e Manifestacion Cultural cu a tuma luga diabierna anochi 24 di januari como tambe e Acto Protocolar diasabra 25 di januari parti mainta. E asistencia di parti comunidad tabata grandi tanto diabierna como diasabra, un plaza cu un publico grandi. Pa tur cos por a cana bon, coordina y cu e seguridad necesario pa e invitadonan y tur esnan presente Comision Celebracion Dianan Nacional igual cu añanan anterior  a haci uso di un paar di agente di seguridad pa e dos eventonan aki, como tambe pa vigila e equiponan cu mester a permanece riba Plaza Betico. Como organisacion responsabel ta nos deber pa percura pa un bon coordinacion di e evento y seguridad di invitadonan y tur esnan presente, cual ta un exigencia ora cu ta organisa evento cu un masa di publico.

Un danki na un y tur pa haci e eventonan aki posibel especialmente na Gobierno di Aruba, Departamentonan, tur musico, artista y cantantenan, prensa como tambe tur instancia cu a brinda nan servicio pa a haci e eventonan aki sublime y exitoso.

E comunidad a demostra su gran aprecio y stimacion pa nos Libertador Betico Croes pa cual Comision Celebracion Dianan Nacional ta felicita e pueblo pa celebra Dia di Betico na un bunita forma y ehemplar.

Durante e evento di FUTURA pa ‘kickoff’ nan 2020 Innovation Agenda, Prome Minister a comparti cinco (5) proyecto di prioridad trategico cu lo cuminsa e aña aki den cuadro di Aña di Innovacion y Enseñansa.


E vision di innovacion y educacion en general di Gobierno di Aruba:
Innovacion ta un aspecto sumamente importante pa tur pais, industria, compania, y organisacion. E desaroyo riba tereno di tecnologia y automatisacion di ultimo añanan cu ta sosodiendo na un manera exponential tin un impacto grandi riba nos bida diario, con nos ta traha, y sigur riba e futuro di nos futuro generacionnan. Y e rol di e ser humano den esaki ta uno crucial.


Manera cu su exelencia gobernador di Aruba - Sr. Alfonso Boekhoudt - a indica den su discurso di aña nobo: ohala nos por aplica solucionnan di automatisacion den forma mas completo sin perde bista pa e factor humano cu ta sostene e automatisacion aki. Esaki sigur ta e punto di salida di Gobierno di Aruba. E ser humano ta y lo keda central den tur nos proyectonan di innovacion.


Den 2020 nos lo sigui enfoca riba habilidadnan nobo cu lo trece oportunidadnan laboral alternativo y diversificacion di nos economia. Den esaki educacion y life-long learning ta di sumo importancia. No solamente pa nos muchanan, pero pa tur persona interesa den desaroya nan habilidadnan, of siña habilidadnan nobo. Y esaki ta algo cu Gobierno ta enfocando riba dje, y e proyectonan di prioridad riba agenda, tur di un forma of otro ta promove esaki. E cinco (5) proyectonan di innovacion cu ta prioridad pa Gobierno den 2020:


1. eGovernment
2. 100 Innovations.
3. B-Lab Santa Cruz
4. Future of Work Vocational Training
5. eLearning 2.0


Prome Minister Evelyn Wever-Croes: “Cu esaki mi kier a oficialisa pa prome biaha den historia di nos pais hoben, Aña di Innovacion y Enseñansa, cu enfoke riba innovacion den enseñansa. Mi kier gradici e ekipo completo di FUTURA. Ora mi a asumi e encargo di Innovacion, mi tabata tin un deseo, un vision, un deseo di Innova Aruba, di prepara nos pais pa e retonan cu nos ta bay enfrenta den futuro. Especialmente pasobra mi tabata sa cu e retonan cu nos ta enfrentando ta hopi hopi grandi, y den circumstancianan asina, hopi facil como mandatario bo ta enfoca solamente riba paga candela. Y ta hopi candela nos a haya nos ta paga, ta manera un stoof cu 8 candela pareu, bo ta paga un, otro ta cende, y asina el a sigui.


Bou e circumstananan asina masha facil un mandario por lubida riba su vision, riba e vision pa su pais. Mi tabata sa tambe cu un vision sin un plan y sin accion, ta keda simplemente un soño, pues mi mester a percura pa tin un ekipo cu ta bay encarga su mes cu e plan y cu accion. Y den nos Chief Innovation Officer Varelie Croes, y henter e ekipo di FUTURA, mi a haya e ekipo aki. Mi a presenta mi vision y pa e no keda na un soño so, nan ta encarga cu e plan y cu accion. Tambe mi colega ministernan pa nan cooperacion y finlmente na Parlamento pa aproba e alicacion di fondo schaars cu nos tin. Sin boso, innovacion lo a keda na un soño.


Danki pa haci e soño di nos pais un realidad. Nos vision pa cu innovacion ta ambicioso y nos so no por logr’e. P’esey mi kier gradici cada un di boso cu ta colabora y coopera cu nos, boso cu ta adpota proyecto y ehecuta nan hunto cu nos. Ta hunto nos lo innova Aruba, y prepara nos futuro generacionnan pa enfrenta e retonan cu futuro lo trece”.

Colegio Pastoor Kranwinkel na Paradera a ricibi e grato noticia cu nan lo bira e di dos e-Learning Project. Prome Minister Evelyn Wever-Croes hunto cu Minister di Enseñansa Armando Lampe, Directora di Skoa Juffrouw Baly, CIO Varelie Croes y Pancho Croes di FUTURA, a bishita e scol pa asina duna e bon noticia aki na Colegio Pastoor Kranwinkel.


Na luna di april aña pasa, den colaboracion cu Minister di Enseñansa, Armando Lampe, Gabinete Wever-Croes a lansa un proyecto piloto innovativo den educacion primario pa stimula e 21Century Skills for di un edad hoben caba. Un proyecto hopi importante na unda cu Scol Basico Cacique Macuarima y Scol preparatorio Aterima a wordo digitalisa.


Prome Minister a duna di conoce cu mirando e exito di e Proyecto aki, y mirando tambe cu nos ta den Aña di Innovacion y Enseñansa, Gobierno di Aruba lo percura hunto cu docentenan pa digitalisa henter e scol. Poco poco pero sigur nos ta logra nos meta pa digitalisa tur scol na Aruba y pone enseñansa completamente innova. Den Aña di Innovacion y Enseñansa, Gobierno kier dal e pasonan concreto den innovacion y educacion pa modernisa, fortalece y capacita nos como pais pa e retonan actual y di futuro.


Cabesante di e scol, señora Angeline Leung a vocifera cu tawata un grato noticia cu nan scol a wordo scogi pa wordo digitalisa y haci asina cu dunamento di les lo ta mas agradabel pa maestronan como tambe pa tur alumno. Señora Leung a gradici Gobierno di Aruba, SKOA y FUTURA pa scoge nan scol pa un proyecto asina grandi y bunita.

Colegio Laura Wernet Paskel na Santa Cruz tawata e ultimo scol cu a ricibi bishita di Prome Minister Evelyn Wever-Croes en conexion cu celebracion di Dia di Betico. E siman aki, siman di celebracion di e fecha natal di Gilberto François ‘Betico Croes’, Prome Minister a bishita un total di 8 scol den diferente bario na Aruba. Pa Prome Minister, e entusiasmo y e alegria di nos muchanan ta yene cu animo y energia positivo pa sigui traha pa nos pais.


Juffrouw Eta Figaroa Geerman a ricibi Prome Minister na su yegada na unda cu tur klas ya tawata riba speelplaats cu nan bandera den man ta warda riba su yegada. Prome cu Prome Minister a drenta den klasnan 5 y 6, el a pasa saluda e muchanan y docentenan kendenan a dun’e un caloroso bon bini.


Den klas di muchanan di klas 5 y 6, Prome Minister a conbersa riba e tema di e aña aki: ‘Danki na Dje’ enfatisando cu ta danki na Betico, danki na tur e sacrificionan cu el a haci pa logra realisa e soño di nos pueblo, Aruba a haya su Status Aparte na 1986. Betico sin miedo a enfrenta tur reto y obstaculo pa asina cumpli cu e deseo di su pueblo.


Esaki tawata tambe e conseho cu Prome Minister a laga tras pa cada mucha. Caba cu nan estudio. Haci tur nan esfuerso pa caba scol basico y sigui studia mas leu pa logra nan soño. Enfrenta tur reto sin miedo. Mescos cu Betico a enfreta Hulanda, Antia y tur cu a purba pone obstaculo den su caminda, sin miedo. Cada mucha, por logra cosnan grandi si nan haci tur nan esfuerso pa sin miedo logra nan meta.


Presente tambe den klas tawata e klas di Scol Basico Cacique Macuarima cu recien a wordo kima. Colegio Laura Wernet Paskel a tuma nan den nan cas mientras cu nan scol ta wordo drecha mas pronto posibel.


Prome Minister no a bandona e klas 6 sin cu e muchanan a pidi’e pa e firma e buki ‘Danki na Dje’.


Prome Minister a gradici tur mucha, tur maestro y Cabesante di Colegio Laura Wernet Paskel y a recorda nan riba e Manifestacion Cultural diabierna awo, 24 di januari di 7:00 pa 10:30 PM na Plaza Libertador G.F. Betico Croes. Esaki ta tambe un invitacion pa henter pueblo di Aruba.

St.Rosa College na Oranjestad ta e scol na unda cu Prome Minister Evelyn Wever-Croes a haya su prome añanan di enseñasa escolar. Pa e motibo aki tambe diahuebs mainta, muchanan y docentenan di St.Rosa College a prepara un bunita bon bini na e mandatario principal di nos pais.


Prome Minister a wordo ricibi pa caranan alegre di tur mucha y un entusiasmo cu a wordo sinti di biaha na su yegada. Casi 200 alumno tawata para riba speelplaats cu nan bandera di Aruba den man na unda cu Cabesante di scol, Juffrouw Lai Ping a yama bon bini na Prome Minister. Despues a sigui cu e Himno di Aruba na unda tur mucha tawata duna e respet cu nos bandera merece.


Prome Minister a comparti e historia breve di e gran lider y estadista di nos pais, Gilberto François ‘Betico Croes’ enfatisando cu Aruba ta recorda e balentia di un luchador incansabel cu a logra nos Status Aparte riba su fecha natal, 25 di januari.


Prome Minister a enfatisa riba e tema di e aña aki: ‘Danki na Dje’. Danki na Betico, despues di lucha duro, entrante 1 di januari 1986, Aruba a logra Status Aparte. Betico a hiba un lucha sagrado pa nos libertad. Esaki ta nos ehempel pa sigui gara nos bandera y sigui lucha pa libertad di nos pueblo.


Esaki ta e dicho di Betico cu e muchanan mas tin graba den nan mente: “Si mi cay na caminda, gara e bandera y sigui cu e lucha”. Cu esaki, Prome Minister a laga atras un bunita mensahe pa cada mucha, pa nan no laga nada stroba e soño di nan curason pero traha duro semper pa logra nan meta. Cada un ta un Betico, sea mucha homber of mucha muhe, e importante ta pa sigui studia bon pa un dia logra nan meta.


Na final, un coro a presenta un cantica masha bunita y tur alumno di e scol a canta hunto lagando nan bos resona den melodia dushi.


Prome Minister a gradici St.Rosa College pa un bunita mainta y alabes a invita tur pa asisti na e Manifestacion Cultural diabierna awo, 24 di januari di 7:00 pa 10:30 PM na Plaza Libertador G.F. Betico Croes.

Minister di Enseñansa, sr. Armando Lampe a ricibi for di Prome Minister Evelyn Wever-Croes, e buki ‘Danki na Dje’ cu a wordo imprimi pa reparti na scolnan en conexion cu Dia di Betico. E buki ta contene e Historia Breve di Status Aparte.


Na luna di februari di aña pasa, comision “Ken ta Betico” a wordo institui formalmente cu miembronan Manolo Giel y Guisette Croes. E comision lo percura pa graba e historia di Betico y e historia di nos Status Aparte como tambe historia di nos simbolonanan nacional. E estudio lo no limita su mes na e bida di Betico so, sino lo inclui tambe tur esfuersonan cu a wordo haci prome cu nos a logra nos Status Aparte. Den e trabou aki, lo traha hunto y lo entrevista e personanan cu a hiba e lucha hunto cu Betico, entre otro sr. Nel Oduber.


Ta importante pa nos realisa kico ta e berdadero historia tras di esaki y traspasa e historia real di bida di Betico, su logronan y su lucha pa nos futuro generacionnan. Pa garantisa esaki, nos Gobierno ta comprometi pa graba e historia aki, y inclui esaki den curiculo na scolnan, cu e meta pa preserva y inspira nos comunidad. Pa asina no tin discusion riba e parti importante aki di nos historia. E memoria di Betico Croes y su logronan pa nos himno y bandera mester ta eleva riba tur partido politico, riba tur gobierno. Esaki ta partimonio nacional, y nos mester preserv’e.