​Aña pasa na luna di april despues cu Covid 19 a azota nos pais, Gobierno di Aruba pa medio di Minister di Finansa, Asuntonan Economico y Cultura Sra. Xiomara Maduro a tuma e prome pasonan y a anuncia Alivio Fiscal 1 pa asina brinda un flexibilisacion fiscal na e companianan cu mas a wordo afecta pa crisis cu Covid19 a ocasiona. Pa e lunanan di april, mei y juni 2020 a hiba un maneho fiscal mas flexibel pa cu pago, areglo di pago, boet y control. E mandatario hunto cu su departamentonan y conseheronan a sigui traha duro riba proposicionnan di incentivanan fiscal y na luna di november 2020 a anuncia e pakete di Alivio Fiscal 2 cu a consisti di 11 incentiva pa trece alivio na nos comercio y e pueblo en general cu e meta pa reactiva y stimula economia di nos pais Aruba. Na luna di december 2020 e mandatario anuncia dos incentiva mas, pa asina por completa 13 incentiva di Alivio Fiscal 2.
 
E incentivanan di Alivio Fiscal 2 ta:

• Comerciante chikito cu un benta te cu 84 mil florin pa aña ta liber di BBO, BAZV y BAVP desde januari 2021 (KOR). Esey ta nifica cu e comerciantenan cu ta cay den e categoria aki no lo paga primanan di BBO, BAZV y BAVP desde prome di januari 2021. E incentiva aki ta conta pa companianan chikito manera snacktruck, taxi, bus, artesano, musico, pelukeria etc. y tambe companianan chikito cu start awor.
• Companianan den sector prometedor di turismo, economia di conocemento, logistica, agricultura, economia circular y industria creativo ta haya un deduccion di 50% riba prestamo te cu 30 mil florin for di nan inkomsten y winstbealasting pa añanan 2020, 2021 y 2022.

• Compensacion di Perdida fiscal di aña 2020, 2021 y 2020 te cu 7 aña. Actualmente e companianan tin un periodo te cu 5 aña pa por compensa nan perdida. E crisis di pandemia ta trece cune cu companianan lo sufri perdida fiscal posiblemente pa añanan 2020, 2021 y 2022. Actualmente e companianan aki tin un periodo di maximal di 7 aña pa por compensa nan perdida.
• Gastonan di formacion profesional por wordo un deduci cu 300% pa aña 2020, 2021 y 2022.
• Deduccion di 200% di gasto di promocion y mercadeo te un maximo di 30 mil florin pa aña 2020, 2021 y 2022. 
•  Un maneho suavisa di tarifa di 10% di dividendo pa accionista biba na Aruba.
• Un maneho mas amplio di e regulacion di fondo di “spaar- en voorzieningsfonds” pa añanan 2020 y 2021.
•  “Investeringsaftrek” a wordo subi cu 10% y ta conta tambe pa producto di inversion cumpra den exterior.
• Anulacion di impuesto riba auto y motorcycle di huur entrante e di cuater kwartaal di aña 2020.
• Un areglo di pago flexibel di 3, 6 y 12 luna cu un minimo di 500 florin pa empresa.
• Esnan cu debe di impuesto, por sanea nan debe di impuesto den un solo pago cu un descuento di 30% te cu 30 di juni 2021. Tur persona cu tin debe bieu di impuesto tin oportunidad di paga esaki den un solo biaha y lo ricibi un descuento di 30% te cu dia 30 di juni 2021.
• Desde 1 di januari 2021 ta reduci tarifa di impuesto pa importacion di material di construccion di 12% pa 10%, 
• Reduccion di tarifa di impuesto riba salario y entrada cu 2%.

 
Minister Xiomara Maduro ta subraya cu apesar di e retonan economico y financiero cu Pais Aruba ta enfrentando, Gobierno ta sigui haci su maximo esfuerso pa brinda un alivio pa por duna un empuhe na nos economia. 

Diahuebs 28 di januari 2021, Prome Minister di Aruba sra. Evelyna Wever-Croes a forma parti di e Agenda di Davos. Esaki tambe a bay den e manera virtual. Premier a hiba palabra na e apertura di e sesion “Restoring Cross-Border Mobility”. Prome Minister a habri su discurso gradiciendo World Economic Forum pa pone atencion riba e tema aki especialmente den e tempo dificil aki cu mundo henter ta pasando aden. 
 
Den su discurso, Prome Minister a enfatisa e importancia di turismo pa Aruba como un isla chikito cu ta un distinacion grandi di turismo den Caribe. Aruba ta brasa tur desaroyo di digitalisacion den e proceso di biahamento. 
 
Desde inauguracion di Aruba Happy Flow na 2015, Aruba su prioridad ta pa percura pa biahenan sigur, sin problema y sin contacto, di tal forma cu e ta promove inter-operabilidad, ta respeta privacidad di datonan y ta brinda e biahero un opcion confiabel pa un experiencia hopi miho. 
 
“Parti di nos plan di recuperacion economico y innovativo ta pa sigui crea un ambiente sigur, saludabel y confiabel na nos bishitantenan”, Prome Minister a accentua. 
 
Aruba por a habri su fronteranan door di a instala e “Health and Happiness code”, lansa e Health app y door di haci e ED card disponibel online. Pronto Aruba lo sigui amplia riba esaki y brinda biaheronan e opcion pa haci uzo di CommonPass pa comparti a base digital, e resultadonan di e testnan di Covid-19 na un manera sigur y facil ora di biaha. 
 
“Aruba ta cla pa sigui innova, pa ta un partner den innovacion, pasobra nos ta habri pa Felicidad”, Prome Minsiter a bisa na final di su discurso.
 
Bishita e website di WEForum pa ricibi mas informacion di The Davos Agenda: 
 
https://www.weforum.org/events/the-davos-agenda-2021

​Prome Minister Evelyn Wever-Croes a participa den e “Climate Adaptation Summit” 2021 cu a wordo organisa pa Premier di Hulanda, Mark Rutte. Esaki, Prome Minister a expresa den su declaracion di inicio na e summit, ta un gran honor p’e. Hunto cu lidernan grandi di mundo, Prome Minister a participa y a enfatisa cu Aruba ta determina pa prepara nos mes miho posibel pa e impacto ta menos y ta enfoca riba e futuro di nos pais, cu mester ta mas resiliente posibel.
 
Como un isla chikito den Caribe e ta un honor pa participa na e “Climate Adaptation Summit”. Aruba ta orguyoso di tin Bucuti and Tara Beach Resort cual aña pasa a bira e prome hotel pa gana e “Global United Nations 2020 Climate Action Award”. E iniciativa di sector priva aki, a set un standard mundial pa e industria di Hospitalidad y Turismo y ta sirbi como un ehempel pa e sector pa yuda adresa cambio di clima. 
 
Gobierno di Aruba ta comprometi pa sigui cu accion pa atende cu e tema di cambio di clima. Aruba su Master Plan di Recuperacion Economico ta dirigi riba impulsa crecemento sostenibel cu ta inclui practicanan y solucionnan sostenibel pa nos clima ya cu esakinan ta cardinal pa nos isla recupera miho y mas fuerte. 
 
Prome Minister Evelyn Wever - Croes durante su declaracion di inicio a splica di ta enfoca riba partnerships caminda cu por yuda islanan cu ‘entrada medio’ y Small Island Developing States (SIDS) pa yena e ‘gap’ cu nan ta confronta cu ne relaciona cu financiamento y inversionnan. 
 
“Hunto humanidad ta enfrentando cambio di clima, y mi ta kere firmemente cu humanidad a demostra cu ta atende cu e reto cu mundo ta enfrentando cual ta esencial. Nos ta determina pa reconstrui nos pais miho, mas fuerte y mas resiliente!”, Prome Minister Evelyn Wever-Croes a enfatisa.

​Na ocacion di e Ceremonia Protocolar di Dia di Betico na Plaza Plaza Libertador G.F. Betico Croes, Prome Minister Evelyn Wever-Croes a duna un discurso conmovedor encurashando henter pueblo di Aruba pa den e tempo dificil cu nos ta pasando aden debi na Covid, pa cada un enfrenta e retonan actual cu determinacion, perseverancia y den union.
“Awe nos ta celebra e fecha natalicio di Gilberto François “Betico” Croes, cu si e tabata na bida, e lo a cumpli 83 aña. Sinembargo nos bon Dios tabata tin otro plan cu Betico y el a bay nos dilanti na edad di 48 aña.
 
Riba e dia aki nos ta para keto na e bida y e lucha di Betico Croes, cu danki na su determinacion, perseverancia y danki na e sosten di un pueblo uni, a logra cosnan grandi pa Aruba; a logra cu awe nos ta biba den un pais autonomo den Reino yama Aruba. 
Y e aña aki nos ta celebrando 35 aña di Status Aparte. Ta danki na nos Status Aparte nos por a desaroya nos pais den un di e paisnan lider den nos region, y ta danki na e lucha cu Betico a lidera, otro pueblonan a wordo inspira pa lucha pa nan autonomia tambe.
Un persona cu den un bida corto, a laga un legado grandi, tipifica pa su determinacion, perseverancia y lucha pa union.
 
KEN TA BETICO?
Betico tabata un tata di 4 yiu, un esposo, yiu, ruman, y e tabata mi omo y mi padrino di bautismo. E persona cu un carisma enorme, semper cu atencion pa tur hende, mescos cu ta su mesun yiu. Betico mes a bisa den un di su discursonan cu nos ta considera un di su discursonan di despedida den Ser’i Noka, cu e no ta un tata di un hogar di mama, tata y 4 yiu, sino un tata particular, di henter Aruba. Y esey e yiunan di Aruba cu a conoce tambe a sinti.
 
Como politico Betico Croes a demostra con ta lidera cu curason, poniendo e pueblo, e ser humano na prome luga. Con ta lidera cu respet pa otro, dunando respet y exigiendo respet.
El a mustra nos cu mester duna espacio na hende muhenan den politica, pasobra mas participacion di hende muhe den politica y den puestonan importante den gobiernonan ta trece un miho balance den toma di decisionnan cu ta concerni nos tur, homber y muhe.

​El a mustra nos con, pa bo logra bo meta, bo mester tin biaha dal algun paso chikito atras, pa despues bo sali cu pasonan grandi padilanti. El a siña nos e importancia y e balor di stima nos pais, y nos simbolonan di libertad, nos himno y nos bandera. 
Betico a mustra nos e importancia di union, pasobra un pueblo uni hamas lo ser venci. Union entre famianan, union entre oponentenan politico, union entre esnan cu a nace aki, y esnan cu no a nace aki. E mes a bisa, Arubiano no ta esnan cu a nace aki so, sino tambe esnan cu a haci di Aruba nan hogar.
Awor ta na cada un di nos pa sigui cu e principio y e balornan cu Betico Croes a mustra nos, y cu a conduci na logronan grandi pa nos pais.
 
LUCHA PA STATUS APARTE
Betico Croes no a cuminsa cu e lucha pa Status Aparte di nos pais. Politiconan grandi prome cu su tempo ya a cuminsa expresa e deseo di nos pueblo di ta baas den nos mesun cas. Sinembargo e lucha cu a cuminsa den añanan 40, a wordo bandona, y ta Betico den añanan 70 a gara e bandera di e lucha ey, y a hib’e te na su final.
El a haya e fundeshi di e lucha construi, pero debi na abandono e fundeshi tabata den mal condicion. El a fortifica e fundeshi, el a lanta e murayanan, el a percura pa e dak y asina a construi e pais Aruba cu awe nos ta biba aden. El a entrega nos e yabi di un Pais autonomo, pero lamentablemente e mes no a biba pa por a experienci’e, ni goza di dje. Nos tin e privilegio di biba den e pais autonomo, pa nos lanta nos yiunan den e libertad aki.
 
KICO BETICO LO A HACI?
Den e ultimo tempo nos pais y nos autonomia tabata bou presion. Y durante e temponan aki varios biaha mi tabata pensa, kico Betico Croes lo a haci, si e tabata den e posicion aki. Ki decision e lo a tuma. Con e lo a atende cu e situacion. E tambe lo a scoge pa acepta e ayudo di Hulanda, bou condicionnan, contal cu nos pais no kibra? 
 
Mi no tin contesta riba e preguntanan aki, pero un cos si mi sa. Betico Croes lo ta hopi orguyoso di su pueblo, e pueblo cu e a sa di uni den un solo ideal: haci di Aruba un pais, y cu awor ta uni pa saca nos pais di e abismo cu e pandemia Covid a hinca nos aden. 
Orguyoso di nos frontliners cu ta haciendo un trabou grandi den cuido di nos pashentnan y nos grandinan, y den mantene orden publico. 
 
Orguyoso di nos ciudadanonan cu boluntariamente ta saca man pa yuda otronan, trahando un te di moringa of un sopi pa nan bisiña y conocir. Orguyoso di e trahadonan, cu boluntariamente a entrega parti di nan entrada pa yuda otronan cu a perde nan entrada a consecuencia di e pandemia. Orguyoso di tur e boluntarionan cu ta yuda esnan mas vulnerable di nos pais. Mescos cu mi, mi ta sigur cu e tambe lo ta hopi orguyoso di tur esaki.
 
Covid a dal nos duro, pero mi tin tur confiansa cu nos lo enfrenta y surpasa e reto aki tambe. Sigur inspira pa e lucha pa Status Aparte di nos pais cu Betico Croes a realisa, e biaha aki tambe, nos tin e mesun determinacion, y perseverancia y uni den amor pa nos pais, pa lanta, gara e bandera y sigui cu e lucha. Talves nos tin cu dal algun paso chikito atras, pa despues sali dilanti cu pasonan grandi, pa un economia mas fuerte, cu un autonomia mas fuerte, pa un Aruba mas fuerte.
 
Y nos a yega di pasa den esaki caba. Prome cu nos a drenta nos Status Aparte dia 1 di januari 1986 Lago a cera su porta. Cu esaki e tempo ey gobierno a perde gran parti di su entrada, mescos cu awor. E tempo ey nos a wordo inspira pa Betico, cu determinacion, perseverancia y union, nos a enfrenta e retonan y surpasa nan. Mescos nos lo haci awor. E unico diferencia ta cu Betico Croes no ta fisicamente cu nos mas awor.
 
ENCONTRA E BETICO DEN BO
Sinembargo nos cada un tin un Betico den nos. P’esey awor, den e retonan grandi aki cu nos pais ta aden, y cu nos cada un ta enfrenta den nos hogar, nos cada un mester busca pa encontra e Betico den nos. Busca e balornan, principionan cu Betico a siña nos, cu el a mustra nos. Pa asina enfrenta e retonan actual cu determinacion, perseverancia y den union. Lucha pa bo soñonan. Nunca rindi. Si bo soño ta bo destino, no ta importa cuanto obstaculo crusa bo caminda, nos bon Dios ta yuda bo logr’e. Mi tin tur confiansa cu nos lo ta exitoso e biaha aki tambe.
 
DANKI
Mi kier finalisa cu palabranan di agradecimento. Na prome luga na colega Minister Xiomara Maduro y Comision Celebracion Dianan Nacional cu pa di 4 aña ta organisa e dia nacional aki hopi bunita y significativo. Danki colega.
 
Mi kier gradici tambe tur esnan cu a lucha hunto cu Betico, y henter nos comunidad cu awe ainda tin un cariño grandi pa Betico. Danki pa sigui mantene su memoria bibo memey di nos.
 
Mi kier gradici tambe su famia, tur esnan cu a sacrifica pa Betico Croes por a dedica su bida na e lucha pa nos Status Aparte. Especialmente su yiunan Guisette, Glenbert, Junior, Glendeline. Awe indudablemente boso lo kier a lanta y dun’e un serenata pa su cumpleaños. Y apesar cu nada por yena e bashi cu el a laga, sa cu henter nos pueblo ta sumamente agradecido na cada un di boso pa e sacrificio cu boso a haci, y ohala cu e cariño y respet cu nos pueblo tin pa boso tata Betico, por duna boso poco consuelo e dia aki.
 
Pa varios aña caba, mi ta bishita scolnan prome cu Dia di Betico, pa admira con nan ta preparando pa e dia aki. Semper mi ta haya sorpresanan agradabel con nos maestronan y alumnonan ta esforsa nan mes pa celebra e dia aki. E aña aki, lamentablemente door di e protocolnan di Covid, mi no por a bishita scolnan, pero mi ta contento di mira cu scolnan a prepara cu entusiasmo. Y mi ta corda dos aña pasa, durante mi bishita na Scol Paso pa Futuro, un alumno a puntrami : si Betico lo tabata na bida, kico ami lo kier bis’e?
 
Si Betico lo tabata na bida lo mi kier bise DANKI.
DANKI pa duna nos un pais autonomo pa biba den dje, pa lanta nos yiunan den libertad y 
DANKI pa siña y mustra nos kico tur nos mester haci pa mantene e libertad aki.
 
Ohala cu e dia aki por inspira cada un di nos pa por enfrenta e retonan den nos bida, y con pa surpasa nan. Y cu determinacion, perseverancia y den union.
 
Cu Dios bendiciona nos dushi pais Aruba”.

​“Riba 25 di januari, nos dia nacional, nos ta conmemora fecha natalicio di Betico Croes. Riba e dia aki nos ta para keto na e bida y e lucha di Betico Croes, cu danki na su determinacion y principalmente su amor pa Aruba, y danki na e sosten di un pueblo uni, awe nos ta biba den un pais autonomo den Reino.
Ta danki na e lucha cu Betico a lidera, otro pueblonan a wordo inspira pa lucha pa nan autonomia tambe.

Betico tabata un tata di 4 yiu, un esposo, yiu, ruman, y e tabata mi omo y mi padrino di bautismo. E persona cu un carisma enorme, semper cu atencion pa tur hende, mescos cu ta su mesun yiu. E atencion cu e tabata dedica na cada un di nos como su subrino y subrina, tabata mescos cu esun dedica na su yiunan. Ami tabata tin 20 aña dia mi a combersa cu n’e ultimo biaha prome cu e accidente fatal dia 31 di december 1985, y tabata pa stimula mi pa sigui cu mi estudio. Y asina e tabata cu cada un di nos. Betico mes a bisa den un di su discursonan cu nos ta considera un di su discursonan di despedida den Seri Noka, “Mi no ta un tata di un famia di mama, tata y 4 yiu. Mi ta un tata particular, di henter Aruba. Y esey e yiunan di Aruba cu a conoce tambe a sinti.

Como politico Betico Croes a demostra con ta lidera cu curason, poniendo e pueblo, e ser humano na prome luga. Con ta lidera cu respet pa otro, dunando respet y exigiendo respet.
El a mustra nos cu mester duna espacio na hende muhe den politica, pasobra mas participacion di hende muhe den politica y den puestonan importante den gobiernonan ta trece un miho balance den toma di decisionnan cu ta concerni nos tur, homber y muhe.

El a mustra nos con pa bo logra bo meta, bo mester tin biaha dal algun paso chikito atras, pa despues bo sali cu pasonan grandi padilanti. El a siña nos e importancia y e balor di stima nos pais, y nos simbolonan di libertad, nos himno y nos bandera. Betico a mustra nos e importancia di union, pasobra un pueblo uni hamas lo ser venci. Union entre famianan, union entre ideologianan politico, union entre esnan cu a nace aki, y esnan cu no a nace aki. Betico su palabranan tabata Arubiano no ta esnan cu a nace aki so, sino tambe esnan cu a haci di Aruba nan pais. Awor ta na cada un di nos pa sigui cu e balornan cu Betico Croes a mustra nos, y cu a conduci na logronan grandi pa nos pais.

Betico Croes no a cuminsa cu e lucha pa autonomia di nos pais. Politiconan grandi prome cu su tempo ya a cuminsa expresa e deseo di nos pueblo di ta baas den nos mesun cas. Sinembargo e lucha cu a cuminsa den añanan 40, di cual mi abuelo Panchico Croes tambe a forma parti cu accion di firma, a wordo bandona, y ta Betico a gara e bandera di e lucha ey, y a hib’e te na su final.


El a haya e fundeshi construi, pero debi na abandono e fundeshi tabata den mal condicion. El a fortifica e fundeshi, el a lanta e murayanan, yega ringbalk, el a pone e dak y asina a construi e pais Aruba cu awe nos ta biba aden. El a entrega nos e yabi di un Pais autonomo, pero lamentablemente e mes no a biba pa por a experienci’e, gosa di dje. Nos tin e privilegio ey di biba den e pais autonomo, pa nos lanta nos yiunan den e libertad aki.

Den e ultimo tempo varios biaha mi tabata pensa, kico Betico Croes lo a haci, si e tabata den e posicion aki. Ki decision e lo a tuma. Con e lo a atende cu e situacion. E tambe lo a scoge pa acepta e ayudo di Hulanda, bou condicionnan, contal cu nos pais no kibra? Mi no tin contesta riba e preguntanan aki, pero un cos si mi sa. Betico Croes lo ta hopi orguyoso di su pueblo, e pueblo cu e a sa di uni den un solo ideal: haci di Aruba un pais.

Desde di e pandemia di Covid, nos pais y nos autonomia ta bou di presion. Covid a dal nos duro, pero inspira pa e lucha pa Status Aparte di nos pais cu Betico Croes a realisa, e biaha aki tambe, nos tin e mesun determinacion y amor pa nos pais, pa lanta, gara e bandera y sigui cu e lucha. talves nos tin cu dal algun paso chikito atras, pa despues sali dilanti cu pasonan grandi, pa un economia mas fuerte, cu un autonomia mas fuerta, pa un Aruba mas fuerte.


E aña aki nos no por celebra manera nos ta custumbra, pero nos por conmemora e fecha aki si. Hisa bo bandera di Aruba, pa demostra e orguyo cu bo tambe ta sinti di ta Arubiano. Conta bo yiunan, nan yiunan e storia di Betico. Y ohala cu e dia aki por inspira nos y duna nos e fortalesa cu nos cada un tin mester pa sigui enfrenta e retonan nos dilanti, y sali for di e crisis aki como un pais mas fuerte cu nos tabata”.

​Diahuebs Minister di Salubridad Publico Sr. Dangui Oduber a duna un conferencia di prensa tocante e ultimo desaroyonan pa cu cannabis medicinal. E mandatario a anuncia cu dia 22 di januari e proceso di destaho publico ta cuminsa pa otorgacion di permisonan na negoshinan (local y internacional). Esaki ta pa tur negoshinan cu ta interesa pa cultiva y/of procesa cannabis cu e proposito final pa yega na un producto medicinal. Esaki ta bay ta un proceso serio cu ta cumpli cu tratadonan internacional, asina e mandatario a duna di conoce.
E mandatario a menciona cu na momento cu cannabis medicinal a bira parti di e acuerdo di gobernacion na aña 2017. Mesora a cuminsa explora e posibilidanan pa legalisa e uzo di cannabis medicinal y tambe e parti di cultiva y procesa. Prome cu a yega na e parti di otorga permiso pa haci pa cultivacion di cannabis Gobierno a haci un estudio di kiko e industria aki lo por nifica pa e economia di Aruba. Kiko e industria aki lo por crea na cuponan di trabou y tambe entradanan pa Gobierno. E industria di cannabis ta algo nobo ainda na mundo, un estudio na aña 2018 a mustra cu na aña 2018 e idustria di cannabis medicinal a produci 12.5 biyon dollar mundialmente y pa aña 2024 esaki lo bira 63 biyon dollar pa aña segun pronosticonan. E mandatario a expresa cu Aruba ta un di e poco paisnan na mundo y den caribe cu tin un vision progresivo pa cu cannabis medicinal.
Na Aruba tambe a haci un un estudio, e estudio a yega na un conclucion cu si 35 mil metro cuadra (m2) wordo uza aki na Aruba pa cultivacion. Aruba lo genera 100 miyon florin na entrada, e lo crea 200 cupo di trabou y e salario averahe di e trabounan aki lo ta entre 3600 pa 4000 florin bruto. Di e 100 miyon florin cu e industria aki lo genera 12 miyon florin ta bay den caha di Gobierno atraves di e impuestonan y prima, asina Minister Oduber a trece dilanti.
 
Roadmap
Na oktober aña 2017 coalicion a sera e acuerdo di gobernacion unda ta bay legalisa cannabis pa uzo medicinal.
2019-2020 a lanta un comicion special (Commissie Legalisering van Medicinale Cannabis) pa explora ki paso mester tuma pa legalisa uzo di cannabis medicinal y tambe pa bin cu un “startnota” cu a keda present ana Conseho di Minister.
Entre lunanan di maart - juli aña 2020 tur companianan por a manda un carta pa asina mustra nan interes den e industria di cannabis medicinal. Expresa nan interes sea ta den cultivacion of procesamento di producto di cannabis medicinal. Esaki a sosode den e “Request for Expression of Interest” (REOI) den e proceso aki Gobierno a ricibi un total di 25 reaccion di tanto companianan local como internacional.
Na juli aña 2020 Bureau Medicinal Cannabis Aruba (BMCA) a keda estableci. BMCA a keda lanta segun e tratado di e convencion na New York di aña 1961 riba “Verdovende middelen enkelvoudig verdrag”. E tratado aki ta describi cu pa cultivacion di cannabis mester tin un departamento di Gobierno pa controla e esaki di momento di cultivacion te na e producto final.
Den lunanan di februari y maart 2021 lo bay trata e ley den parlamento "LV houdende wijziging van LV verdovende middelen". E cambio di ley aki ta bay haci posibel cu e Minister encarga cu Salubridad Publico por duna un dispensacion (ontheffing) na cierto companianan pa por cultiva y/of procesa cannabis pa uzo medicinal.
Ontheffing
Entrante februari lo bay trata e cambio den e ley di “LV houdende wijziging van de Landsverordeing verdovende middelen (AB 1990 n0. GT 7)” den Parlamento di Aruba.
E cambio den e ley aki ta bay haci posibel cu e Minister di Salubridad Publico por duna un dispensacion (ontheffing) di e  prohibicion di cultivacion, procesamento, transportacion di cannabis, azeta di cannabis y tincturen di e cannabis pa por haci investigacion cientifico riba e parti medicinal of pa por haci produccion di e producto medicinal.
E dispensacion aki di e prohibicion por wordo duna na solamente esnan cu tin un acuerdo firma cu e Minister pa realiza e trabounan encuestion.
 
Commissie Gunning Ontheffing Medicinale Cannabis
E comicion aki a keda estableci dia 12 di januari 2021 y e ta consisti di 6 miembro, nan tin e proposito pa conseha Minister di Salubridad Publico cua companianan ta bin na remarke pa haya e dispensacion (ontheffing). E comicion aki ta uno hopi imparcial cu e meta pa scohe e compania mas capacita posibel.
Meta di e comicion ta pa stipula e condicionnan cu e companianan mester cumpli cune na momento nan ta bay registra pa bin na remarke pa haya un dispensacion, un licencia di cultivacion y procesamento di cannabis pa uzo medicinal.
Tin 3 condicion hopi estricto cu ya caba a wordo palabra entre e comicion y Minister Dangui Oduber. E demas condicionnan lo wordo stipula pa e comicion mes, e comicion ya caba a pasa den Conseho di Minister y tin 2 reunion caba tras di lomba asina Minister Oduber a expresa.
E siguiente tarea di e comicion ta cu nan lo bay evalua tur e companianan cu a registra y inscribe pa participa oficialmente. Despues di nan evaluacion y a base di e criterianan cu nan a stipula, den un forma di puntuacion lo scohe e 5 companianan cu a score mas halto. E comicion lo duna un conseho final na Ministerio di Salubridad Publico cu e 5 companianan aki den nan opinion ta esnan mas capacita pa bin na remarke pa haya e licencia, asina e mandatario a trece dilanti.

1. E licencia cu wordo duna no ta transferibel, E compania cu haya esaki ta e mes mester uze.
2. E licencia ta mara na un periodo cu lo wordo determina pa e comicion cuanto luna esaki lo ta, e por ta di 6 luna, 9 luna of 12 luna. Den e periodo aki e compania mester cumpli cu e acuerdo cu e tin firma. Si no cumpli cu e acuerdo dentro di e periodo stipula, e compania ta perde e licencia.
3. E producto final cu a wordo cultiva y procesa mester ta un producto medicinal y no recreacional. 

E 6 miembronan di e comicion ta representa diferente Ministerio y departamento di Gobierno.

1. Un miembro apunta pa Minister di Turismo, Salubridad Publico y Deporte.
2. Director di DEZHI of un colaborado di su escogencia.
3. E Inspecteur der Geneesmiddelen of colaborado di su escogencia.
4. Un miembro apunta pa e Minister encarga cu Ifrastructura.
5. Un miembro apunta pa e Minister encarga cu Husticia.
6. Un miembro apunta pa e Minister encarga cu Sector Primaria.

 
Request for Proposal (RFP)
E otro proceso cu mester wordo encamina ta esun di RFP, ‘Commissie Gunning Ontheffing Medicinale Cannabis’ ta esun cu ta encarga pa apoya Gobierno di Aruba den e proceso aki. Tur compania cu ta desea por manda nan proposicion y registra pa bin na remarke pa haya e licencia. 
Gobierno di Aruba tin e intencion di solicita e proposicionnan di e companianan cu ta interesa den sea cultivacion y/of procesamento di cannabis medicinal na Aruba. A traves di 3 procesonan pa cu tin pa adkiri e RFP.
 

1. RFP pa e cultivacion di  cannabis pa proposito medicinal na Aruba
2. RFP pa e procesamento di cannabis pa proposito medicinal na Aruba
3. RFP pa e cultivacion y procesamento di cannabis pa proposito medicinal na Aruba

 
E registracion pa participa na e RFP ta cuminsa dia 22 di januari 2021 pa 6:00 PM. Pa mas informacion di con pa registra por subi e pagina web di BMCA cu ta www.bmca.aw
Dia 19 di februari 2021 pa 6:00 PM (UTC-4) lo publica e documentonan di e RFP na e participantenan.
Dia 22 di maart 2021 pa 10:00 AM (UTC-4) ta e ultimo ora pa manda e propuesta nan di e RFP.
Dia 22 di maart 2021 pa 10:01 AM (UTC-4) e propuestanan ta wordo habri den presencia di un notario.
E periodo entre 22 di maart 2021 y 6 di april 2021 ta e periodo di evaluacion y dia 12 di april 2021 lo duna un notificacion ken ta esnan cu a wordo selecta pa e comicion.

​Diaranson ultimo nos a presencia inauguracion di e Presidente nobo di Merca Joe Biden y su Vice Presidente Kamala Harris. Den nomber di Gobierno di Aruba ta extende felicitacion na e Presidente nobo y na e Vice Presidente nobo. 
 
Prome Minister di Aruba Evelyn Wever - Croes a expresa cu e relacion entre Merca y Aruba semper tabata un hopi bon y ta considera Merca como un di e partnernan strategico di mas importante cu Aruba tin den region. Tanto riba tereno di comercio, siguridad, cuido y enseñansa. Merca ta un Pais cu Aruba tin hopi laso cu ne. 
 
“Nos por a mira dos aña pasa ora cu mi tabata na Washington, cu ora cu a pidi pa ayudo cu e problema cu nos tabatin cu e refineria e tempo ey, esey a desenvoca cu nos a sali for di e contract di Citgo. Y cu awor ta contemplando cu inversionistanan Mericano cu sosten di Gobierno Mericano, pa yuda cu inversion den nos economia”, Prome Minister a duna di conoce.
 
Pues esaki ta ilustra cu e relacion entre Gobierno di Aruba y Merca ta bon y tin tur confiansa cu esaki ta bay sigui den e tempo nos dilanti. Kisas hasta e relacion por bira miho si logra cu partnernan strategico importante cu por yuda nos desaroya nos economia. 
 
Como hende muhe Premier Wever - Croes a expresa e tabata un momento unico pa mira cu pa prome biaha un hende muhe ta wordo huramenta como un Vice Presidente na Merca. Sigur un momento di orguyo pa mira cu e limitenan pa hende muhe logra locual cu nan ta desea casi no tey mas. 
 
“Esaki ta un señal pa tur hende muhe, no permiti ningun hende bisa bo cu bo no por logra algo, pasobra nos ta demostrando cu nos por logra yega den posicionnan clave. Den Gobiernonan, e ta hopi importante pa tin un balanse entre hende homber y hende muhe. Mas hende muhe den politica y posicionnan clave di gobernacion ta yuda trece mas balanse den e decisionnan y esey lo tin su beneficio pa e progreso y bienestar di tur ciudadano”, Prome Minister Wever - Croes a expresa. 
 
Pues naturalmente esaki ta algo hopi importante y e manera cu Kamala Harris mes a bisa den su discurso, e ta e prome hende muhe cu a bira Vice Presidente di Merca pero sigur no e ultimo. Terminando Premier Wever - Croes a bisa cu ohala tur mucha, special mucha muhenan cu ta mira tur esaki ta sosode, por wordo inspira pa duna e miho cu nan por duna di nan mes. 

Dialuna den conferencia di prensa Minister di Salubridad Publico Sr. Dangui Oduber a trece diferente informacion importante dilanti. E mandatario a papia entre otro riba e strategia cu lo wordo uza pa administra e vacuna na Aruba.
Minister Oduber a splica cu pa vacuna pueblo e di Aruba a parti e poblacion den 7 Grupo di enfoke.

E gruponan ta:
A. TRAHADORNAN DI CUIDO DEN EMERGENCIA; ER, ICU, Covid unit, AMBULANCE, DOCTERNAN DI CAS, POH’ers Y PERSONAL DI ASISTENCIA. PERSONAL DI DVG Y DEN “BRON ONDERZOEK”.
B. RESIDENTENAN Y PERSONAL DI CASNAN DI CUIDO DI NOS GRANDIN Y CENTRONAN DI CUIDO DI ESNAN CU LIMITACION.
C. GRANDINAN 60+ CU CONDICION DI SALUD COMPROMETI, ESNAN CU TIN MALESANAN CRONICO SEGUN NAN GRAVEDAD INDICA PA HAVA.
D. TUR HENDE DI 18 – 60 CU MALESA CRONICO Y SEGUN GRAVEDAD INDICA PA HAVA.
E. TUR OTRO MIEMBRO DI PERSONAL DEN CUIDO.
F. ADULTONAN 60+ INDEPENDIENTE Y ESNAN CU NO POR MOVE.
G. TUR HENDE 18 PA 60 SIN PRE - CONDICION DI COMPLICACION DI SALUD.

E prome grupo cu lo wordo vacuna na momento cu e vacunanan yega Aruba dia 15 di februari ta grupo A, si tur cos cana segun e plan esaki lo sosode den luna di februari mes. Grupo A lo haya nan vacuna na HOH, ImSan y oficina di docternan di cas. Grupo B ta e di dos grupo cu lo bin na remarke pa haya e vacuna y segun e plan nan lo vacuna entre lunanan di februari y maart. Grupo B lo wordo administra na e lugar cu nan ta biba of labora, por ehempel na un cas di cuido mes. Minister a enfoka riba e importancia cu tin pa e dos gruponan aki vacuna prome. Den e prome lote di vacunanan lo yega e vacunanan di Pfizer y esun di Moderna, asina e mandatario a trece dilanti. Den e siguiente lotenan di vacuna Aruba lo por ricibi tambe e vacuna di Astra Zeneca como cu esaki ta den su etapa final pa wordo aproba door di Union Europeo.  

Tambe Minister Oduber a menciona cu lo bay reparti Aruba den 4 zona strategico pa administra e vacuna, e zona nan aki lo ta centronan rond Aruba den diferente districto caminda pueblo por acudi pa tuma nan vacuna na momento cu nan grupo yega na turno. Den e centro nan aki lo vacuna e 5 gruponan cu a resta (C, D, E, F y G). Tur vacuna lo keda administra pa personal di Departamento di Salud y Malesanan Contagioso (DBZ) segun e mandatario. Segun e plan den luna di juni tur e gruponan lo mester a haya oportunidad pa ricibi nan vacuna, asina Minister Oduber a trece dilanti.
Minister Dangui Oduber a enfatisa cu ta hopi importante pa menciona cu tur personanan di grupo C y D prome cu bin na remarke pa haya nan vacuna mester haya aprobacion di HAVA cu nan ta ok pa ricibi e vacuna.
1. Oranjestad: EPI Zaal
2. Noord: Don Bosco
3. Santa Cruz: Centro Deportivo Libertador Betico Croes
4. San Nicolas: Santa Theresita Center

Minister Oduber a mustra pueblo di Aruba riba locual ta e efectividad y efecto di e dos vacunanan cu tin riba mercado.
Ambos vacuna tin un efectividad halto, Pfizer ta 95 porciento y Moderna ta 94 porciento di efectividad.
Tur dos vacuna despues di uzo por lagabo sinti sea un poco dolor den braza, un poco cansancio y un poco di keintura.
Tur dos vacuna, Pfizer y Moderna ta cubri personanan di edad y personanan cu un malesa cronico contra Covid-19.
Tur dos vacuna mester wordo uza 2 biaha pa nan ta efectivo. Esun di Pfizer e persona mester bolbe haya un di dos prik despues di 21 dia y esun di Moderna e mester ricibi un di dos prik despues di 28 dia. Ambos ta ser bisa cu proteha e persona contra COVID-19 pa un duracion di 1 aña segun e mandatario.

​Finalmente e Mandatario kier a haci un apelacion na pueblo di Aruba pa vacuna nan mes, proteha nan mes pa asina Aruba por progresa. Ban yuda den e recuperacion di nos turismo y recuperacion di nos economia pa asina Aruba por bolbe bek na normalidad, asina Minister Oduber a expresa.