Pa e comunidad di Republica Dominicana, 27 di februari ta un fecha importante. E fecha cu nan ta celebra e di 176 aniversario di e dia di independencia di Republica Dominicana, of Santo Domingo manera nos na Aruba tin costumber di yama e pais. Awe, den cada rincon remoto di mundo, Dominicanonan ta bin hunto pa celebra cu orguyo nan dia nacional. Na Aruba esaki no ta diferente.


E comunidad di Republica Dominicana, cu un ceremonia protocolar hopi bunita na Plaza Juan Pablo Duarte, a haci apertura na e celebracionnan grandi di e fecha aki na Aruba. Prome Minister Evelyn Wever-Croes, den presencia di Gobernador di Aruba, Presidente di Parlamento, miembronan di Parlamento y coleganan Minister, a duna un bunita discurso dirigi na e lucha cu Republica Dominicana a hiba pa obtene su independencia y e forsa y curashi pa sigui construi un republica fuerte, enfatisando cu e lucha cu ambos pais a hiba pa obtene su libertad, inspira nos pa mantene nos uni pa supera tur reto actual.


Riba e fecha di 27 di februari, ta wordo conmemora e comienso di e guera pa independencia di Republica Dominicana. Forsa, curashi, orguyo y victoria ta wordo celebra. Bida y e sacrificio di tur esnan cu e tempo ey a lucha pa e libertad di nan pais ta wordo celebra.


E pueblo di Republica Dominicana ta recorda e sacrificio maximo di Juan Pablo Duarte kende tawata un tata pa e patria y un fundador di Republica Dominicana. Duarte a supervisa y financia e guera di independencia cu a wordo hiba pa su compañeronan di lucha, cu a resulta den ruina economico di dje y di su famia.


Prome Minister a compara e dos paisnan bisando cu na Aruba nos ta identifica nos mes cu un lucha similar cu esun di Republica Dominicana. Na Aruba tambe a lucha pa obtene su autonomia, e Status Aparte cu orguyosamente nos tin desde 1986. Sr. Betico Croes, dfm, tawata e fundador di Pais Aruba y a perde su bida sin por a wak y gosa di e fruta di su lucha.


“Cu e celebracion aki, ta bin tambe momento di reflexion. Tanto Republica Dominicana como Aruba ta enfrenta retonan grandi. Nos ta den momentonan cu nos mester laga nos mes wordo inspira pa e lucha pa libertad y ohala cu e lucha cu a wordo hiba, inspira ambos pais pa supera e retonan actual.


E lasonan entre Aruba y Republica Dominicana ta hopi estrecho y ta bay hopi tempo atras. Lasonan familiar, cultural y economico. Pa duna un ehempel, simple, pero di hopi significacion, na Republica Dominicana tin un caya dedica na nos Libertador Betico Croes, e prome caya na mundo dedica na betico Croes. Despues a sigui e caya y e plaza aki na Aruba y na Boneiro cu ta carga su nomber. Esaki ta muestra di e respet y e aprecio mutuo cu tabata tin entre lidernan di nos pais y lidernan di Republica Dominicana.


P’esey e hecho cu awor e comunidad Dominicano tambe tin un Plaza pa conmemora e heroe di e pais, ta significativo. Esaki ta estrecha e lasonan mas ainda entre Aruba y Republica Dominicana.


Na Aruba nos tin un comunidad di Republica Dominicana ta biba pa hopi aña caba. Hopi ta esnan cu a laga nan hogar y nan famia atras pa bin yuda nos desaroya nos economia, y a bin haci Aruba nan pais di residencia. Manera cu sr. Betico Croes den feliz memoria a bisa: Arubiano no ta solamente esun cu a nace na Aruba. Si bo a nace na otro pais, y bo a haci Aruba bo hogar, bo tambe ta Arubiano.


Riba dia di Independencia di Republica Dominicana, mi ta felicita tur Dominicano residencia na Aruba, y mi kier gradici tur cu a laga nan hogar y bin establece nan mes y nan famia na Aruba, pa yuda nos desaroya nos economia. Hunto cu nos, boso a experiencia bon tempo y menos bon tempo na Aruba y boso a keda, determina den e lucha pa hiba nos pais padilanti.


Nos pais ta enfrentando retonan sumamente grandi. Retonan financiero. Retonan social. Retonan den relacionnan exterior cu nos pais bisiña, retonan economico cu e slow down di e refineria. Nos no mester teme e retonan aki. Den pasado nos pais a pasa den retonan similar.
Mescos cu den pasado, e biaha aki tambe nos lo vence, contal cu nos ta uni. Den union nos lo vence tur e reto y desafionan, y den union nos lo vence tur obstaculo cu crusa den nos caminda. Y ta den union nos lo logra e bienestar pa nos pueblo, cu tanto nos ta anhela. Pabien!”, tawata e palabranan cu Prome Minister Evelyn Wever-Croes a expresa den su discurso na e acto protocolar di celebracion di 176 aña di independencia di Republica Dominicana.

Diaranson mainta tempran, Prome Minister Evelyn Wever-Croes a haci un bishita na e scol basico situa na Santa Cruz, Colegio San Hose.


Bishita di Prome Minister na dicho scol tawata pa haya un miho bista riba e Scol Piloto Multilengual. Colegio San Hose ta sumamente satisfecho cu e resultadonan na comparacion cu scol tradicional, na unda cu e muchanan ta studiando den nan idioma Papiamento cu ta facilita nan mas pa ora nan yega na e idioma di Hulandes den klasnan mas avansa. Despues di a bishita e diferente klasnan y a haya un presentacion di Team di Maneho di Colegio San Hose, hunto cu Directora di Skoa Juffrouw Baly, Prome Minister a keda hopi impresiona y satisfecho cu e desaroyo di e proyecto piloto aki.


Na su yegada na e scol, Prome Minister a wordo ricibi door di cabesante di Colegio San Hose Juffrouw Dyan Caster-Croes, docentenan y tur e muchanan y a ricibi un bunita detaye den forma di flor. Prome Minister a gradici Cabesante, docente y tur alumno pa nan recepcion bunita. E aña aki Colegio San Hose ta celebrando nan di 80 aña di existencia formando miles di mucha cu a contribui grandemente na nos comunidad.

Pa prome biaha den historia gobierno y AZV laga haci un investigacion profundo riba e gastonan di AZV y tambe pa duna un proyeccion pa futuro y kico ta e risico cu esaki ta bin cune.


Director di AZV Sr. Ruben Goedhoop a presenta e resultadonan di e investigacion aki na Minister Dangui Oduber. Tabata tin varios punto cu sigur a hala atencion. Por a nota cu gastonan di cuido medico a subi di 357,3 miyon florin na 2014 pa 425,7 miyon na 2018. Si nos compara y “benchmark” e aumento aki cu otro paisnan rond di mundo, por bisa cu esaki no ta un aumento excesivo compara cu otro paisnan. E gastonan medico di otro pais an ta aumenta na e mesun forma. Na aña 2016 gasto di cuido medico a costa 3576 dollar pa persona cu ta biba na Aruba. Gastonan den cuido medico cu ta relativamente halto ta entre otro Diabetes, Nierdialyse y otro malesanan cronico. Minister su vision ta pa promove un miho cuido medico y un miho calidad di bida pa e poblacion di Aruba. Pa es motibo aki a bin cu un plan nacional di prevencion riba malesanan no contagiabel.


Otro forma di tuma medida pa reduci gasto ta pa e AZV, Hospital y ImSan traha hunto pa hisa calidad di cuido mientras ta baha e gastonan. Un ehempel ta si por utilisa un localidad so pa Dialyse y otro facilidad pa un otro servicio medico, asina balansando e trabou y gastonan enbes di competi cu otro.


Digitalisacion y innovacion den cuido tambe ta e futuro pa cuido medico. Ideal ta si por haci triage via un app of facetime cu bo dokter di cas y a base di esey elo por consehabo si ta necesario pa acudi personal serca di dje of continua cu “Self Care” na cas.


Un otro punto remarcabel ta cu 4% di e aseguradonan di AZV ta contribui na 40% di gastonan di AZV. E edad promedio di e aseguradonan di AZV na aña 2014 tabata 38.7 y ta proyecto cu esaki lo bira 40.5 den 2020 y cu proyeccion pa aumento continuo den futuro. Esaki gran parti tin di haber cu e “vergrijzing” cu Aruba ta aden actualmente cu tambe lo conoce un aumento continuo.


Abase di e resulatdonan di e investigacion haci na AZV, lo bai over na haci un “plan van aanpak” pa asina garantisa sostenibilidad di e fondonan di AZV pa futuro.

14 di February 2020 ultimo, Parlamentario di MEP Endy Croes, a base di nos constitucion a haci pregunta na Gobierno tocante Parlamentario di AVP Robert Candelaria. Preguntanan ta entre otro; sr. Candelaria a wordo tuma den servicio di gobierno; biahenan di trabou cu sr. Candelaria a tuma prome cu e la drenta den servicio; nombracion di sr. Candelaria como Directeur di Directie Scheepvaart sin cu tawata tin un procedura di solicitud habri.


Den e articulo anterior e prome pregunta a wordo contesta y den e articulo aki ta bay den e di dos parti di pregunta y contestanan.


Den corto e situacion ta lo siguiente: Dia 4 di augustus, 2017 tawata e fecha pa candidatonan postula nan mes y e lista wordo entrega pa eleccion 2017. Sr. Candelaria riba e fecha ey a postula su mes como candidato riba e lista di AVP cu na e momento ey ainda tawata den gobierno. Na e momento aki Sr. Cadelaria tawata biba y traha na Corsou. Algun dia despues, dia 15 di augustus, Sr. Candelaria a wordo tuma den servicio di gobierno anterior pa ta consehero di e ex Minister di Turismo y Transporte Sr. Mike de Meza pa e restante di e temporada di gobernacion di Gabinete Mike Eman II. E gastonan di mudamento di sr. Candelaria y di su famia a wordo paga door di Gobierno di Aruba pa e bin traha como consehero di ex Minister De Meza, faltando solamente 6 siman prome cu e siguiente eleccion.


For di investigacion a sali cu Sr. Candelaria tawata biaha regularmente riba gasto di pais Aruba en conexion cu reunionnan di trabou. Riba esaki Parlamentario Endy Croes a haci varios pregunta cu a wordo wordo elabora y contesta den e prome parti di e articulo aki.


Pa loke ta trata su nombracion como Directeur di Directie Scheepvaart sin cu tawata tin un solicitud habri, Parlamentario Endy Croes a indica cu sr. Candelaria a wordo nombra como Directeur di Directie Scheepvaart prome di october 2017. Na e momento aki, Sr. Mike Eman a laga sa caba cu e no lo bay forma parti di e gobierno nobo pues nan mester a busca algo nobo pa Sr.Candelaria bay haci ya cu ta algun dia prome e la emigra di Corsou bin cu su famia completo Aruba pa hiba campaña pa AVP. AVP a haya un alternativa pa sr. Candelaria den e un bon function como directeur.


Parlamentario Endy Croes kier a sa primeramente si pa e funcion di Directeur di Directie Scheepvaart tawata tin un solicitud habri y si ta asina, si Gobierno por mustra ta cua ta e vacatura cu Sr. Candelaria a solicita riba dje. Minister Presidente a contesta cu pa e funcion
aki no tawata tin un solicitud habri ni un vacatura cu a ser publica pues e nombramento aki di Sr Candelaria no a bay na e forma regular. E procedura corecto lo ta pa tin un vacatura habri y cu lo wordo publica. Despues un comicion di seleccion lo mester dicidi ken nan ta selecta pa e funcion.


Prome Minister a splica cu ta obvio cu e decision di e gobierno anterior pa fix sr. Candelaria como Director di Directie Scheepvaart tawata loke nan ta yama ‘afscheidsbeleid’ di gobierno anterior, pues un fabor cu e gobierno anterior kier a haci pa Sr. Candelaria. E decision di e gobierno anterior nunca a wordo ehecuta y ora e gobierno actual, Gabinete Wever-Croes a sinta, a revoca e decision aki.


Parlamentario Endy Croes tambe kier a sa si prome cu e decision aki a wordo tuma, si a pidi conseho na Departamento di Recurso Humano. Y si e conseho aki tawata positivo of negativo.
Riba e pregunta aki, Minister President a laga sa cu niun momento a pidi conseho na e Departamento di Recurso Humano pa cu nombracion di Sr. Candelaria y cu e procedura aki tampoco ta corecto.


Parlamentario Endy Croes kier a sa si Sr Candelaria a traha den e period cu e la ser nombra como Directeur di Directie Scheepvaart na october 2017 dus si e la aparece na trabou. Aki tambe e contesta ta cu e no a aparece niun dia na trabou na Directie Scheepvaart.


Riba e pregunta cu si Sr. Candelaria a haña e salario di Directeur di Directie Scheepvaart, Minister President a contesta cu Sr. Candelaria no a haña esaki pasobra e decision nunca a wordo ehecuta. Pero sr. Candelaria a keda cobra su salario como consehero di Minister te dia cu el a bira Parlamentario na fin di october. E salario di consehero no ta mucho diferente cu esun di Director y Minister President a laga sa cu si en caso Sr. Candelaria a haña mas salario lo bay cobr’e bek loke el a haña dimas.


Finalmente, Parlamentario Endy Croes ta puntra si un funcionario halto di Polis cu hopi experiencia mester por conoce e proceduranan dentro di gobierno. Den e caso aki Sr. Candelaria tawata Hoofdinspecteur di Polis y lo mester tawata sa cu e proceduranan aki ta contra ley di gobierno.


Minister President a contesta cu e no ta altanto si Sr. Candelaria tawata sa of no di e proceduranan aki pero e ta di acuerdo si cu un funcionario di gobierno den un rango asina halto mester por sa cu e practicanan aki ta contra tur regla y no mester a duna su cooperacion pa cu esaki.


‘Sinembargo mescos cu hopi decision cu a ser tuma door di Gabinete Mike Eman II riba e tereno di personal, mi ta di opinion cu esun cu mester wordo teni responsabel ta e Minister encarga. Pa nos di Gabinete Wever-Croes integridad ta un punto hopi importante den nos maneho pa evita cu e tipo di abusonan aki bolbe sucede den futuro’, Premier Evelyn Wever-Croes a duna di conoce.

Parlamentario di MEP Endy Croes a base di nos constitucion, dia 14 di february 2020, a haci pregunta na Gobierno riba e hecho cu Robert Candelaria a wordo tuma den servicio di Gobierno, riba e biahenan di trabou cu el a tuma prome cu e la drenta den servicio di Gobierno y riba su nombracion como Directeur di Directie Scheepvaart sin cu tawata tin un procedura di solicitud habri pa esaki.


Den e articulo aki, e prome parti di e pregunta y contestanan ta wordo elabora riba dje anto den e siguiente articulo ta bay den e di dos parti di pregunta y contestanan.


SEÑOR CANDELARIA A DRENTA SERVICIO DI GOBIERNO COMO CONSEHERO:
Den su carta dirigi na Gobierno, Parlamentario Endy Croes ta skirbi cu Sr. Candelaria a drenta den servicio di e gobierno anterior dia 15 di augustus 2017 como consehero serca e ex Minister encarga cu turismo y transporte Sr. Mike de Meza. Banda di esey, e gastonan di mudansa di dje y di su famia a wordo paga pa pais Aruba pa asina e por a bin traha pa algun siman pa Gabinete Mike Eman II. Prome cu esey, Sr. Cnadelaria tawata biba y traha na Corsou.


Locual a resalta mas segun Parlamentario Endy Croes ta cu Sr. Candelaria algun dia prome esta 4 di augustus 2017 a postula su mes como candidato riba lista di AVP cu na e momento ey ainda e tawata den gobierno. E pregunta cu Parlamentario Endy Croes tin ta cu si e gobierno anterior por prueba cu si enberdad Sr. Candelaria a traha como consehero di Minister den e periodo di 15 di Augustus te cu 1 di october 2017 y si tin consehonan of pruebanan cu en realidad el a traha pa un salario di Awg 7,385.00.


E contesta di Gobierno riba e preguntnan di Parlamentario Croes, lamentablemente ta no. Minister President a confirma cu tawata tin un contrato di trabou cu Candelaria desde 15 di augustus 2017 como consehero di Minister pero pa asina leu cu Gobierno por a busca y informa, no tin niun prueba tampoco niun consheho cu ta confirma cu Sr. Candelaria en realidad a traha como consehero durante e periodo aki.


Un otro punto cu Parlamentario Endy Croes a cuestiona severamente ta tocante e gastonan di biahenan cu Sr. Candelaria tawata haci pa Aruba durante e periodo di juni-augustus 2017. Sr
Cnadelaria, cu e tempo ey tawata biba na Corsou, a biaha bin Aruba varios biaha riba gastonan di pais Aruba pa e asina yama ‘dienstreizen voor werk besprekingen’.


Parlamentario Croes a pidi Gobierno pa duna un aclaracion di con por ta cu un hende cu no ta den servicio di gobierno por haña compensacion pa biahenan en conexion cu reunionnan di trabou. Parlamentario Croes ta cuestiona tambe e cantidad di biaha cu Sr. Candelaria a biaha bin Aruba riba costo di pais Aruba sin cu ta den servicio di gobierno y si e placa aki por wordo cobra bek.


Riba e ultimo pregunta aki, Minister President a contesta cu no tin ningun splicacion posibel dicon un hende cu no ta den servicio di pais Aruba por haña compensacion di gastonan di biahenan di trabou pa bin reuni na Aruba.


Loke si ta un realidad ta cu Minister President a obtene informacion cu e cosnan aki tawata pasa mas biaha door di gobierno anterior y esaki ta wordo investiga awo. Loke si sa pasa ta cu gobierno ta invita un persona bin Aruba pa ta un orador na un conferencia y gobierno ta paga e gastonan di biahe. Den casonan asina, Conseho di Minister ta pone cu e persona aki ta bin pa ta un orador pa conferencia y no pa reunionnan di trabou.


Riba e pregunta di cuanto placa Sr. Candelaria a haña, Minister President a duna e siguiente comentario: “No ta posibel pa duna informacion personal di Candelaria cu ta den administracion di pais Aruba sin e permiso di Candelaria prome. Esaki a base di e ley ‘persoonsregistratie’”.


Pa e motibo aki, Minister President a pidi Parlamentario Endy Croes pa pidi Parlamentario Candelaria pa duna e permiso aki prome pa asina por duna e informacion tocante esaki. Segun Minister President: “Sr Candelaria mester por tawata sa cu loke el a haci no ta corecto”.


Den e siguiente articulo ta elabora mas casonan remarcable en torno di Parlamentario di AVP sr. Candelaria.

Recientemente Minister di Finansa a brinda un splicacion tocante di peso di e Proyectonan Public Private Partnership (PPP) riba e presupuesto di Pais Aruba.


 Proyectonan PPP 
Actualmente Pais Aruba conoce 8 proyecto di PPP, cualnan ta e edificio di Belfin cu ta hospeda Departamento di Impuesto y Departamento di Finansa, e edificio di Infra cu ta hospeda DOW, DIP y Kadaster, e Centro di Husticia na Macuarima, e edificio di Polis na Shaba, e edificionan di MFA na Noord, na Savaneta y na Sta. Cruz, e edificio di Hospital, Green Corridor y Watty Vos Boulevard. Di tur e proyectonan PPP, Hospital, Green Corridor y Watty Vos Boulevard ta e tres proyectonan cu mas ta costa y ta pisa riba presupuesto di Pais Aruba. Den aña 2020 nos lo mester paga 82 miyon na e proyectonan PPP, cual ta 20 miyon mas cu a ser paga den aña 2019. Di e 82 miyon florin aki di gasto di PPP, 70 miyon ta bay pa paga pa e proyectonan di Hospital, Green Corridor y Watty Vos Boulevard.


Watty Vos Boulevard tin mas risico financiero
Recientemente Controlaria General di Aruba (ARA) a haci un investigacion riba e proyectonan PPP y a resalta e hecho cu e proyecto di Watty Vos Boulevard tin mas risico financiero compara cu otro proyecto PPP. Den e contrato a wordo concorda cu asina Pais Aruba perde credibilidad financiero, pues si e rating di Pais Aruba baha, Gobierno lo mester paga esnan cu a desaroya e proyecto aki na un forma mas acelera. Esaki lo crea un peso financiero aun mas grandi pa Pueblo di Aruba y ta debilita e situacion financiero di Aruba. Tipo di contratonan asina ta trece mas risico financiero pa nos Pais y pesey ta di lamenta cu te awor e risiconan aki ta bira conoci.


Maneho financiero prudente pa maneha gasto di PPP
E gasto di e proyectonan PPP lo keda pisa riba Presupuesto di Pais Aruba te cu aña 2044. Mirando e risico financiero di algun PPP, ta importante pa Gabinete Wever-Croes y tur otro Gobierno di turno hiba un maneho financiero prudente pa evita perde credibilidad financiero y pone mas peso financiero riba presupuesto y Pueblo di Aruba.

Den e ultimo dianan aki tin hopi comentario den comunidad tocante e topico di e proyectonan PPP (Private Public Partnership). E motibo pa cu esaki ta cu Aruba ta yegando na e punto culminante di e suma cu Aruba mester paga bek na e proyectonan PPP. E proyectonan aki a ser realisa pa e gobierno anterior cu no tawata tin e fondo pa construi edificionan gubernamental y a tuma e decision descabeya pa bay den un acuerdo di PPP. E acuerdo aki ta stipula cu un otro persona lo construi e edificionan aki, duna gobierno e yabi y gobierno lo cuminsa paga despues cada aña un suma pa haci uzo di e edificionan aki sin cu e edificio ta bira propiedad di gobierno.


Prome cu gobierno anterior a tuma over na aña 2009, ya caba tawata tin proyectonan PPP entre otro; Belfin gebouw, e edificio di Financien y Belasting; e edificio di Infra; edificio di Centro di Husticia; y e oficina di Polis na Shaba. Pa aña Aruba tawata paga 7.9 miyon florin pa tur e 4 edificionan aki hunto, cu ta edificionan relativamente grandi. Esaki, ta un bon prijs compara cu e total di gasto cu gobierno tawata paga na huur pa e departamentonan aki.


E aña aki, aña 2020, Aruba ta bay paga 82.4 miyon florin na proyectonan PPP, cu ta un aumento drastico. E acuerdonan di proyectonan PPP cu AVP a cera durante nan gobernacion, ta encera e 4 edificionan di MFA, Watty Vos Boulevard, Hospital y Green Corridor. E debe gigantesco aki ta core te cu aña 2044 y lo mester wordo paga door di nos yiunan, nan yiunan y e futuro generacion.


E suma di e MFAnan ta costa Aruba 2.7 miyon florin pa aña na huur cu ta un suma hopi halto compara cu e huur pa e hulpbestuurskantoornan cu no tawata yega ni 100 mil florin. Hospital ta costa 30.6 miyon florin pa aña, Green corridor ta costa 17 miyon florin pa aña y na Watty Vos Boulevard Aruba ta paga 22.9 miyon florin pa aña pa un total di 82.4 miyon florin pa aña.


Ta di lamenta cu e forma di financia e proyectonan cu gobierno anterior a haci ta bay pisa te na aña 2044 riba e presupuesto di Aruba. Gobierno actual a hereda e situacion aki sin por a cambia nada mas ya cu tur e 4 proyectonan aki tawata comprometi caba y Aruba ta obliga pa paga e suma di 82.4 miyon florin. Pio di e proyectonan aki ta, cu e gobierno anterior no a presupuesta esaki den presupuestonan y e unico opcion cu a keda ta pa e gobierno actual percura pa tin fondo disponibel pa por paga e proyectonan aki.


Gobierno a percura pa esakinan wordo paga no solamente door di e entrada di impuesto cu gobierno a bin cu nan, cu no ta suficiente pa paga e 82.4 miyon florin plus tur otro debe, pero Gobierno a bin cu un combinacion di aumento di impuesto y otro fuente di entrada pa asina no tin e peso riba e comunidad di Aruba.


“E realidad ta cu debi na e mal maneho iresponsabel di Gabinete Mike Eman, nos generacion, nos yiunan y nan yiunan, te na aña 2044 mester bay paga e debe aki di 82.4 miyon florin pa aña. Pero un cos ta sigur tambe, Gabinete Wever-Croes no ta esun cu a causa e problemanan financiero aki, pero nos ta soluciona nan si. Y nos ta buscando solucionnan cu no ta pisa asina tanto riba nos pueblo, pero ta buscando otro fuente di entrada pa paga e debenan halto aki cu e gobierno di Mike Eman a ocaciona”, Prome Minister Evelyn Wever-Croes a expresa.

Recientemente Parlamentario di AVP Arthur Dowers a cuestiona decision di 6 luna pasa di Gobierno pa Aruba pa bay over na votacion digital ya pa e siguiente eleccion. Gobierno a anuncia esaki na augustus aña pasa. Mes momento Gobierno a informa Parlamento y a invita Parlamento pa duna su pensamento riba esaki. Sinembargo oposicion a keda 6 luna keto y awor kier bruha tera y sembra panico.


“Piensa el ladron que todos son de su condicion”, ta un dicho na spaño cu ta pas net bon pa Parlamento Dowers cu su bruhamento di tera atrobe.


Riba esaki Premier Evelyn Wever-Croes a reacciona breve y a bisa cu e ta bay pidi expertonan pa duna mas informacion riba e tema, pasobra e mes no ta envolvi den esaki. E ta den man di expertonan cu ta traha na forma transparente y integro.


Premier a recorda si cu e decision pa bay over na votacion digital ta pa garantisa transparencia y pa evita cualkier tipo di fraude, pues si tin un duda den e sistema, e no lo bay door.


Tambe Premier a recorda tur hende cu locual a conduci na e proposicion aki ta hustamente e metemento politico pa partido AVP den eleccion 2017. Tempo cu Dowers tabata Minister, e tabata menasa autoridadnan electoral cu e lo prohibi Polis mantene orden si nan no haci locual partido AVP kier.


Tambe ta importante pa recorda tur hende cu partido AVP a haci maluo di informacion priva di ambtenaar pa manda carta politico di e partido, violando asina un cantidad di ley. Esaki y mas ta expone den un rapport cu Premier a entrega na Parlamento na augustus di aña pasa, informando Parlamento di e cambionan proponi.


“Nos lo no bay over na ningun sistema cu por duna espacio pa fraude, ni hacking. Pero nos lo no sigui cu e sistema tampoco cu partido AVP a abusa y maluza durante cu nan tabata den Gobierno. Pueblo di Aruba merece un procedura electoral transparente y integro y nos lo brinda pueblo esey, sea ta digital of manual of un combinacion di ambos”, Premier Evelyn Wever-Croes a duna di conoce.