Nos pueblo y nos Pais ta pasando den un experiencia amargo. Bida di nos conciudadanonan a cambia di un anochi pa mainta. Hopi di nos hendenan a y ta perdiendo trabou. Hotelnan ta na 0% di ocupacion. Si Aruba tabata florece di turistanan, awe nos isla ta riba un descanso cu su playanan completamente bashi.
Den tempestad bo ta siña conoce bo forsa como pueblo y como pais. Den adversidad bo ta conoce e fibra di bo pueblo. Nos conciudadanonan ta pasando den un crisis nunca antes visto. P’esey como Gobierno nos a tuma e decision pa por sali na vanguardia di nos pueblo trahado, pa aporta na existencia di cada famia.
Gobierno a introduci FASE (Fondo Asistencia Social di Emergencia) unda cu si e aplicante ta cumpli cu tur rekisito, e por bin na remarca pa un ayudo di maximo Afl 950 mensual pa maximo 3 luna.


REKISITONAN:
- Carta di notificacion di bo dunado di trabou
- ultimo payslip of ultimo 2 si ta cobra pa quincena
- ID/Paspoort valido
- Permiso valido si ta aplicabel
- Cuenta bancario
- Persoonsnummber
TAXISTA/AUTOBUS/HULPCHAUFFEUR:
- ID/Paspoort valido
- copia di permiso
- ultimo 2 copia di pago di impuesto (BBO etc)
- permiso di hulpchauffeur (si ta aplicabel)


Nos ta haci un apelacion riba cada aplicante: percura pa bo aplicacion ta completo pa evita cualkier retraso. Bo ta facilita e trabou y proceso. Tin MILES di hendenan cu tin mester di e asistencia aki. Pues yuda nos yuda bo.


Despues cu bo registra online via www.fasehelpdesk.com, su aplicacion lo cana e proceso di evaluacion pa un comision cu ta consisti di DPL, DAO, DAS y PNT. E aplicacion cu haya aprobacion, lo haya su carta via email. Prome pago lo ta fin di april y e aplicante lo ricibi esaki riba su cuenta bancario. Mester tin un
cuenta di banco. Pago den efectivo no ta posibel. FASE Helpdesk ta tuma na su encargo pa notifica WEB y ELMAR di e aplicantenan cu a haya aprobacion.


Te cu 31 di maart tabatin alrededor di 5700 aplicacion personal, 744 negoshi cu a registra, mas di 15 mil yamada ricibi.


Minister ta expresa su gratitud na e team di FASE Helpdesk cu ta trahando tur dia, henter dia, hasta diasabra pa por logra termina e trabou pa sigura cu nos hendenan por haya su ayudo fin di april proximo.


"Pa termina mi kier expresa un bes mas mi apoyo incondicional na nos Minister President cu ta manehando e crisis aki como un berdadero lider, cu calma, firmesa y certesa. Den crisis bo ta conoce ken ta lider y Evelyn Wever Croes ta esun di nos. Cu Papa Dios sigui bendicion’e cu pasenshi y sabiduria pa e por sigui guia nos riba e caminda di recuperacion y restructuracion. Nos ta den porta di renacer di un Aruba Nobo", Minister Glenbert Croes a expresa.

Ya desde aña pasa, Citgo a indica cu e no por cumpli cu e compromisonan di e contract mas pa motibo di sancionnan. Desde e momento ey a cuminsa negocia un terminacion. Na mei 2019 Gobierno di Aruba y Citgo a firma un MOU den cual ta delinea cu lo cuminsa negocia un terminacion.
Citgo a informa Gobierno cu nan no tin placa pa inverti, ni pa cumpli cu pagonan di huur ni di empleadonan. Prome Minister Evelyn Wever-Croes a enfatisa cu Gobierno a exigi pa Citgo paga tur e empleadonan tur nan añanan di servicio y tambe pa nan paga e impuesto cu nan debe.


DEN E NEGOSACION FINALMENTE A YEGA NA E SIGUIENTE PUNTONAN:
- nan ta paga $16 miyon na impuesto, cu ta Afl 28,800,000.
- Gobierno ta 'waive e environmental claim di Citgo (cu segun contract ta solamente e parti cu Citgo a contamina, cu no ta hopi y si nos cobra Citgo mes, nan no tin placa pa pag’e)
- Gobierno ta waive e claim pa desmantela (un compromiso di Citgo si nos dicidi di desmantela, pero cual tambe ta dificil pa cobra mirando cu Citgo no tin e placa. Tin un parent guarantee si di $150 miyon di PDV Holding cu tampoco tin placa. PDV Holding tin assets si pero e ora nos mester para den rij tras di entre otro, ConocoPhillips, cu mega claims y nos lo mester warda ora tur esey ta gesettled pa e ora nan desmantela pa nos continua).
- RdA Ta waive e huur cu no a wordo paga desde 1-3-2019


Prome Minister a expresa cu esaki ta un prijs hopi caro cu Aruba mester paga. P’esey a tuma 10 luna pa negocia y awor ta momento pa sali di e impase. Pasobra e necesidad pa termina e contract y pa explora tur e oportunidadnan nobo cu e terminacion ta trece cu ne, ta multiple biaha mas grandi.


PARLAMENTO
Sinembargo, Prome Minister a indica, Parlamento mester duna su aprobacion prome. Diabierna siman pasa e ley di Citgo a yega Staten. Ta trata di un machtigingsverordening pa autorisa Gobierno pa termina e contract cu Citgo. Una bes Parlamento aproba e ley aki, Gobierno por termina e contracto cu Citgo.


“E miho cos cu por pasa pa Aruba, ta pa e contract aki wordo termina. Gobierno tin mester di placa y a negocia 10 luna largo. Esaki ta e suma cu a logra pa Citgo paga y lamentablemente no tin mas placa pa saca di Citgo. Awor Parlamento tin e ultimo palabra: si Parlamento aproba e terminacion cu Citgo e ta permiti Gobierno busca otro desaroyo pa San Nicolas”, Prome Minister Evelyn Wever-Croes a expresa.

Durante fin di siman por a constata cu hopi persona na supermercadonan tabata haci nan compras. Minister Maduro ta bolbe enfatisa cu tin suficiente productonan alimenticio na Aruba. E mandatario ta haci un yamada na comunidad pa ban ta solidario specialmente pa cu nos hende grandinan y otro ciudadanonan vulnerabel. Si bo tin cu haci compras corda pa cumpra lo necesario y asina por tin suficiente producto pa nos tur.

Alabes e mandatario ta haci un yamada na tur comerciantenan pa no haci uso di e crisis aki pa subi nan prijs.

​E mandatario ta recorda tur ciudadano pa download e APP ‘Control di Prijs’ riba cual ta haya prijs di productonan den e canasta basico y di e extra productonan cu temporalmente ta wordo regula y tambe e prijs di productonan den Macuto di Compras. Riba e APP aki tambe por manda keho si nota cu tin abuso di prijs na un establecimento. E APP ‘Control di Prijs’ ta gratis y ta obtenibel riba GOOGLE PLAY pa telefon Android y APP STORE pa telefon Apple.

Minister Maduro a nota tambe varios comerciante inovativo cu ta ofrece nan servicio y/of productonan online. E mandatario ta haci un yamada na nos pueblo pa apoya nos comerciantenan local, haci uso di nan servicio/productonan cu nan ta ofrece y asina sostene nos economia.
​
Ban uni den un actitud solidario pa asina Pais Aruba por pasa door di e crisis COVID-19. Cuida nos mes, cuida nos famia y cuida esnan rond di nos. E mandatario ta enfatisa pa sali cas ora ta estrictamente necesario.

Dialuna Minister Maduro a reuni via Zoom cu gremio comercial ATIA, Camara di Comercio y AHATA hunto cu Departamento Economico, Departamento di Estadistica, Departamento di Finanzas y Innovation Officer, riba e yudansa cu Gobierno kier brinda pa e negoshinan chikito y mediano pa enfrenta e crisis cu COVID-19 ta trece cune.


Gobierno ta buscando fondo necesario
Durante e reunion e mandatario a splica cu Gobierno no ta conta cu un buffer financiero pa por yuda comercio enfrenta e crisis di Covid19, pero cu Gobierno ta trahando pa por yega na e fondonan aki via prestamo riba mercado internacional y via peticion conforme articulo 36 di Statuut via Hulanda. Minister Maduro a splica cu tur peticion ta den proceso.


Comison mixto pa stipula criteria y detayes
E mandatario a informa cu den Presupuesto 2020 a reserva e suma di 40 miyon florin pa brinda yudansa. Awor ta necesario pa stipula e criterianan y detaye di con e yudansa aki por wordo brinda bou di negoshi chikito y mediano. Minister Maduro a haci un invitacion na gremio comercial pa hunto cu e departamentonan di Gobierno forma parti di un comision pa presenta un plan con pa ehecuta e yudansa necesario. Di e manera aki preparacion ta wordo haci, pa asina cu Gobierno dispone di e fondonan necesario, por haya brinda e alivio. Diabierna awor Minister Maduro lo reuni cu e comision pa asina por scucha nan sugerencia.

Parlamento di Aruba, Diamars a aproba e presupuesto di crisis pa aña 2020 pa asina gobierno por subi mercado international y busca fondo pa asina yuda esnan cu ta mas afecta pe e crisis di Coronavirus.


Den Parlamento como tambe den rueda di prensa di Gobierno di Aruba diamars, Minister di Finansa a splica e pasonan cu Gobierno ta tumando pa por atende cu e tema aki. Prome cos cu a haci desde 13 di maart cu Aruba a conoce su prome dos casonan ta pa haci e scenarionan visibel pa cu cuanto e impacto financiero ta bay ta pa pais Aruba. E scenarionan of calculacionnan aki a ser haci conhuntamente cu Banco Central, informacionnan di S&P y di IMF.


E di dos paso ta busca fondo necesario urgente pa stabilisa e sistema pa asina como pais nos no kibra y nos por sigiu draai AZV, SVB y Gobierno. Pues na e fase ey nos ta aworaki y a acudi na Parlamento pa haya aprobacion.


Diamars den oranan tempran di anochi, Parlamento a aproba e presupuesto u Gobierno mester cana e caminda normal di pidi e aprobacion na Conseho di Minister di Reino y despues bay busca riba e mercado internacional.


Unabez cu esey ta haci, nos ta bay pa stap 3 cual ta baha e gastonan di gobernacion y adapta esakinan na e realidad nobo cu pais Aruba ta bay haña su mes aden, pasobra e efectonan di e virus no ta cos di awor pero algo cu lo dura hopi aña pa nos por sali di dje.


Presupuesto 2020 ta inclui un pakete cu Gobierno a introduci pa trece alivio temporario riba tres tereno. Un tereno ta e desempleadonan pues personanan cu ta perde trabou a consecuencia di e crisis economico. Den e grupo aki Awg. 214 miyon ta bay wordo inverti. E di dos ta e negoshinan chikito y mediano cu tin menos di 50 trahado. Den e grupo aki ta bay inverti Awg. 40 miyon. Y e di tres area ta pa nos cubri deficit adicional di e sistema di siguridad social di AZV y
SVB cu Awg 429 miyon cu nos ta calcula cu nan ta bay haña menos. Hunto e suma ta yega na Awg. 683 miyon.


Pero, Prome Minister Evelyn Wever-Croes ta indica cu no ta esey so ta e necesidad financiero di Gobierno pasobra den e presupuesto ta inclui e reforma fiscal cu ta trece Awg. 103 myon aden cu no por sigui, e ta wordo para y Gobierno mester busca e placa ey di otro caminda. Tambe nos economia ta bay contrae, ta bay bira mas chikito e aña aki debi na e Coronavirus y p’esey mester bay presta placa pa cubri loke e economia no lo bay genera.


Tambe door di e companianan y pagadonan di impuesto talvez no por bay cumpli cu nan pagonan di impuesto, Gobierno ta tene cuenta tambe cu un Awg. 250 miyon menos. Pues tur esaki ta pone cu si bo conta nan hunto, Aruba tin un necesidad financiero pa bay presta di Awg. 1.3 biyon.


“E presupuesto a wordo aproba unanimamente. Mi tin cu gradici nos partnernan den coalicion cu a sostene esaki. Parlamentario independiente Sra. Daphne Lejuez tambe a sostene e presupuesto, fraccion di AVP a abstene di vota p’e presupuesto. Mi ta kere cu esakinan ta gestonan cu ta mustra e union cu nos mester tin pa combati e efectonan critico cu e virus aki ta bay ocasiona.


Lamentablemente nos no ta logra e surplus cu tanto nos a desea, lamentablemente destino a dicidi diferente y aworaki mester bay presta Awg. 1300 miyon pa nos por cubri e efectonan di e crisis di Coronavirus.


Pa pone den perspectiva, ya un par di aña pasa, Gobierno anterior a presta mas cu esaki pa construi careteranan etc, pero nos a logra bin bek y casi pa yega un aña completo cu un surplus. Mi tin confiansa cu di esaki tambe nos lo bounce bek pasobra nos ta un pueblo fuerte y resiliente. E bon ta cu e aprobacion di Parlamento nos por cuminsa busca fondo pa yuda tur esnan cu ta afecta pa e crisis aki”, Prome Minister a duna di conoce.

“E crisis cu Aruba ta enfrentando ta un crisis sin precedencia y e unico forma pa nos sali di e crisis aki ta pa nos tur haci sacrificio”, esaki ta e mesahe cu Prome Minister Evelyn Wever-Croes a duna Parlamento durante tratamento di presupuesto diamars ultimo.


Prome Minister a informa Parlamento cu e necesidad financiero pa por bringa e efectonan di e crisis aki ta enormemente di grandi y pa cu esaki Gobierno di Aruba mester bay presta Awg. 1300 million.


Sinembargo, Prome Minsiter a indica, e placa aki no ta suficiente y ta bay rekeri sacrificio di e sector publico. Ya ta bisto cu sector priva ta sacrificando. Miles di mama y tata di famia ta perdiendo trabou. Varios compania no lo wanta e sla aki nan y keda opera. Kiermeen sector priva ta haciendo di su parti y aworaki Gobierno ta bay traha riba e parti di sector publico.


Minister di Finanasa a duna un splicacion amplio di e manera con Gobierno ta atendiendo cu e crisis aki. Esaki ta bay den 3 fase. E prome fase ta cu hunto cu profesionalnan, institucionnan manera Banco Central, Central Bureau Statistiek y Directie Economische Zaken, asisti pa IMF y S&P, a yega na calculacion di e impacto aki. Basa riba e esfuerso conhunto y inmediato aki, a yega na e suma di Awg 1300 miyon.


“Nos ta gradici Dios cu nos tin profesionalnan y nos sistemanan ‘in place’ pa por a calcula esaki mesora, algo cu otro paisnan den region ainda no sa con pa cuminsa calcula”, Prome Minister a duna di conoce.


Fase 2 ta pa busca e fondonan pa asina stabilisa e fondonan di AZV y SVB y tambe percura cu Gobierno tin fondo pa por sigui funciona. Esaki a haña aprobacion diamars 24 di maart di Parlamento. Gobierno di Aruba awor por cuminsa busca e fondonan aki. Unavez cu tin e fondonan aki y cuminsa yuda esnan afecta, Gobierno lo bay pa fase 3.


Fase 3 kiermeen baha gastonan di Gobierno. Corta drasticamente den gastonan di Gobierno y ahusta e patronchi di gasto na e realidad nobo pasobra e realidad ta cu e virus aki lo cambia tur cos pa nos. Nada lo keda mescos. Den e caso aki Gobierno mester ahusta den e presupuesto tambe di acuerdo cu e situacionan nobo.


Den esaki, Prome Minister a enfatisa cu si kier bay sigui funciona como Gobierno, Minister, Parlamentario y empleadonan publico mester bay entrega parti di nan salarionan y beneficionan. Pasobra Gobierno no ta bay tin placa pa por paga tur e gastonan. Esnan cu ta interesa pa sigui traha den servicio di Gobierno lo tin cu entrega pa por keda cu e trabou. Ta bay tin otronan cu talves no lo kier entrega y lo bandona servicionan di Gobierno talves pa busca otro oportunidad.


Pero e realidad cu e crisis aki ta laga nos cu n’e ta cu nos tur mester bay sacrifica. Prome Minister a indica cu ainda no sa e cantidad di loke mester sacrifica pasobra esey ainda mester wordo calcula. Pero aworaki e urgencia ta pa yega na e fondonan pa stabilisa fondo di AZV y SVB pa asina Gobierno por funciona y yuda esnan cu mas mester aworaki door di e crisis.


Prome Minister riba e sugerencia di Parlamentario Allan Howell pa Parlamentario y Ministernan entrega Awg 1000 pa luna pa 3 luna, a duna di conoce cu aunke esaki ta un gesto noble, e no ta loke nos tin mester aworaki pasobra ta premira cu Minister y Parlamentarionan lo mester bay corta y entrega hopi mas cu Awg 1000 y hopi mas cu 3 luna. Pa esaki Gobierno mester di tempo y espacio pa haci e calculacionnan drechi y real pa no core haci cosnan adhoc cu no lo yuda mucho.


“Lamentablemente e crisis aki ta forsa cu nos tur mester bay entrega. Gremionan ta reclama cu Gobierno no a haci e ahustenan y no a entrega. Pero nos no ta asina leu ainda. Tin demasiado aspecto di e crisis aki cu mester atende pareu cu nos no a logra yega aki nan ainda. Gobierno mester bay papia cu e sindicatonan prome y lo haci esey den e proximo dianan. Pero lamentablemente e crisis aki ta bay pone cu nos tur mester haci sacrificio pa nos sali fuerte bek como pais”, Prome Minister a enfatisa.

Despues di conferencia di prensa di Minister Presidente diasabra anochi, algun miembro di prensa a causa un incidente cu Minister Presidente dilanti di Bestuurskantoor.
Mientras Minister Presidente tabata duna conferencia di prensa y contesta pregunta, miembronan di prensa a algomera y tabata haci desordo stroba e conferencia di prensa.


Nan kier a entrega Minister Presidente un carta den cual nan ta informa Gobierno cu nan lo no participa na ningun conferencia di prensa mas di Gobierno.


Minister Presidente a sali pa acepta e carta y Sharina Henriquez di Caribisch Netwerk a informa Minister Presidente cu prensa lo sali riba caya toch durante e toque de queda.


Minister Presidente a expresa su desapunto den e miembronan ey y a recorda prensa cu tin 8 caso caba confirma na Aruba y prensa mas cu tur hende sa cuanto dolor y sufrimento e virus aki a causa den exterior.


Despues Minister Presidente a bisa nan cu e ta cansa y lo no sigui papia e momento ey. A palabra cu lo reuni diadomingo.


Loque tabata mas lamentable ta cu momento cu Minister Presidente a bira su lomba, prensa a cuminsa grita y insulta Minister Presidente. Gobierno di Aruba ta lamenta e actitud aki di prensa y ta bolbe haci un apelacion na henter comunidad, tambe na prensa, pa coopera.

Prome Minister Evelyn Wever-Croes ta haci un apelacion na comunidad di Aruba pa haci caso di yamada di Gobierno pa loke ta trata precuacionnan cu mester tuma pa cu Corona Virus. “E virus aki y su efecto ta devastador pero e ta den nos man pa pone di nos parti pa evita cu e ta plama”.


Durante ultimo dianan aki a nota liñanan grandi di personanan incluyendo mama cu yiu y hende grandi na supermercado. E ta hopi importante pa enfatisa cu nos grandinan y esnan cu ta delicado di salud ta un grupo di riesgo pa cu e virus aki. Pa ser mas exacto e virus aki por tin un final fatal pa esnan di edad mas halto y cu ta sufri di cualkier enfermedad. Ta hopi importante pa nos uza nos tino y cuida nos grandinan. Ban yuda nan haciendo compras pa nan evitando asina cu nan lo mester sali di nan cas.


Ta di suma importancia tambe pa nos cuida esnan delicado di salud especialmente esnan cu ta luchando cu cancer, pashent di dialise, of cu ta sufri di precion halto ya cu e virus aki cu ta un simple griep pa nos pa nan por ta devastador.


E situacion aki ta uno hopi serio y ta importante pa cada ciudadano duna e atencion necesario na esnan mas vulnerabel pa asina nan no expone nan mes sin cu ta necesario.


Premier Wever-Croes ta pidi comunidad di Aruba pa porfavor no sali si no tin mester. Entrante diasabra dia 21 di Maart lo tin un toque de queda cuminsando di 9 pm te cu 6 am y tambe ta restringi entrada di tur bishitante y residente di pais Aruba. E medidanan aki lo ta valido te cu 31 di Maart. Dependiendo di e situacion lo evalua si mester prolonga esaki.

Gobierno lo introduci un pakete di alivio pa duna sosten na trahado y comerciante




Prome Minister Evelyn Wever-Croes den un yamada di conferencia hunto cu Minister Knops, Premier di Corsou Eugene Rhuggenaath, Premier di St Maarten Silveria Jacobs a discuti e desaroyonan cu Hulanda y e tema financiero y con lo bay financia e efectonan pa loke ta trata Corona Virus. Como paisnan den Reino, cada un ta pasando den reto y dificultadnan cu e crisis actual ta treciendo cu ne. E efectonan di e crisis di Corona Virus ta mes cruel pa Hulanda como pais grandi y pa e islanan den Reino como paisnan chikito.


A yega na cierto palabracionnan y Hulanda a ofrece su disponibilidad pa yuda busca fondonan financiero a traves di Union Europeo como tambe yuda busca fiansa na interesnan faborabel riba mercado internacional pa asina no solamente nos cubri e gastonan cu e virus mes ta ocacionana sino pa brinda asistencia na esnan cu tin mester.


Prome Minister a enfatisa cu ta hopi importante pa Aruba pasa e Presupuesto 2020 prome pasobra sin e presupuesto, no lo por bay presta placa riba mercado internecional. Presupuesto 2020 ta na Parlamento.


Den e Presupuesto 2020 Gobierno lo inclui un pakete di alivio basa riba dos aspecto cualnan ta e sosten pa e trahado y e sosten na e comerciantenan cu lo wordo afecta pa e crisis aki.


Prome Minister a duna di conoce cu pa motibo di e circumstancia nobo di e crisis di Corona Virus, Gobierno di Aruba a tuma e decision pa elimina henter e pakete di Reforma Fiscal for di Presupuesto 2020. Por lo pronto, tur e cambionan cu Reforma Fiscal lo mester a bin cu ne, lo no sigui mientras cu Gobierno aworaki lo pone atencion na e crisis y enfoca riba con lo bay yuda comercio y ciudadanonan.


Prome Minister a enfatisa cu lo mester bay corta gasto tambe den e presupuesto. “Pasobra nos ta den tempo di crisis y tur hende mester hala faha mara. Lo bay tuma sacrificio di tur ciudadano di nos pais pa nos pasa door di e crisis aki y surpas’e”.

Durante un Conferencia di Prensa Minister Maduro a haci un apelacion na e consumidornan pa haci compras den cantidad normal. E peticion aki a bin di e grupo di mayorista na Aruba cu a sigura e mandatario di economia cu nan tin suficiente producto den stock pa por abastece e demanda di e mercado local. Si ta asina, cu si cuminsa cumpra na cantidad grandi, esaki ta pone cu ta crea un escases innecesario. E apelacion na nos comunidad ta pa limita nan compra y corda tambe riba esnan mas vulnerabel den nos comunidad. No tin mester di cumpra un gran cantidad di producto si ta uno of dos so tin mester.


Minister Maduro ta recorda cu ta sumamente necesario pa nos evita aglomeracion di publico mas tanto cu ta posibel. Pesey ta importante pa evita tambe e reinan largo na supermercado. E situacion di COVID-19 ta uno hopi serio y ta nos comportacion como ciudadano di e Pais aki ta locual ta bay defini con Pais Aruba ta bay logra surpasa e crisis.


E mandatario a haci un yamada na nos pueblo pa ban ta solidario, awor mas cu nunca y ban yuda otro, especialmente esnan mas vulnerabel pa hunto nos por surpasa e crisis.