 Parlamentario mr. Juan E. Thijsen a tuma nota di un sondeo haci pa Bureau di Arbeidsinspectie, e seccion di inspeccion laboral di Departamento di Labor. E sondeo a ser haci pasobra Departamento di Labor tabata ricibi kehonan riba companianan den nos mercado laboral.
Departamento di Labor a bin ripara cu ta hopi abuso tin ta tumando luga cu uitzending di trahadonan ( ubicacion di un trahado cerca un otro dunador di trabao). Por ehempel ta duna trahadonan ainda un uitzendovereenkomst, loke pa ley no ta permiti. E noticianan aki pa Parlamentario mr. Juan E. Thijsen no ta un sorpresa. Durante e tratamento den Parlamento ya caba Parlamentario mr. Juan E. Thijsen y Fraccion di MEP a spierta ex-Minister di Labor y actual lider di Partido POR Otmar Oduber cu e cambionan haci pa cu e mundo di "uitzending" lo no trece mehoransa sino lo perhudica esnan laborando como uitzendkracht y pio ainda lo daña e mercado laboral. Ta di resalta segun Parlamentario mr. Juan E. Thijsen cu Ministro di Labor non activo ilegalmente y actualmente sospechoso di Ministerio Publico Paul Croes tambe a mira e problemanan causa pa ex-Ministro di Labor Otmar Oduber y Ministro Paul Croes a anuncia di lo a bin cu leynan di corecion (reparatiewet). Sinembargo Ministro di Labor Paul Croes no a bin cu ningun cambio di ley pa remedia e situacion malo riba mercado laboral pero al contrario a yuda dañe mas ainda. Un di e problemanan grandi di e uitzendkracht segun Parlamentario mr. Juan E. Thijsen ta e insiguridad di trabao. E trahado aki por wordo kita for di trabao na cualkier momento y no tin ningun proteccion. E cambionan di Otmar no a yuda y awor Departamento di Labor ta bin confirma esaki. E uitzendkracht na aña 2017 ainda ta biba den un incertidumbre y no por traha un cas ni cumpra auto pasobra prestamo ta wordo duna a base di trabao fiho. Director di Departamento di Labor, Nick Kock ta confirma cu tin hopi cos ainda cu ta pasando cu no ta corecto. Parlamentario mr. Juan E. Thijsen ta sumamente sorprendi cu Departamento di Labor awor numa ta bay exigi cu tur e contractnan di stranheronan tin cu pasa DPL. Esaki ta confirma e rumor den pueblo cu negoshi tabata ser haci cu e permisonan ya cu nan no tabata pasa e control normal. Conclusion di Parlamentario mr. Juan E. Thijsen ta cu aki nan e problema di ontheffing pa cual Ministro di Labor Paul Croes ta ser investiga ta hunga un rol grandi. Ministro di Labor den cuadra di su negoshi cu permiso a facilita e procedura pero den mesun momento a habri e caminda pa dunador di trabao abusa di e trahado. E contractonan di uitzend no ta pa trahadonan di exterior. Segun Parlamentario mr. Juan E. Thijsen ta resalta cu e propio Director di Labor ta confirma cu cosnan por ta bon regla riba papel pero den practica nada no ta cuadra. Nick Kock: "Tin cu bisa si cu ta keda naturalmente e hecho cu companianan por bay DPL y entrega tur documento na ordo, pero cu den practica, cosnan ta bay poco otro. Cosnan no ta bay segun palabracionnan di ley". Conclusion di Parlamentario mr. Juan E. Thijsen ta cu e cambionan di Otmar Oduber y e drumimento di Paul Croes a haci un pio tutu di mercado laboral di loke su persona y Fraccion di MEP a premira. Pa es motibo aki Parlamentario mr. Juan E. Thijsen tin un serie di cambionan pa haci riba mercado laboral den bienestar di e clase trahador y tambe e dunador di trabao. Parlamentario mr. Juan E. Thijsen y partido MEP ta cla pa e reto di mehora e mercado laboral. Hunto p'e cambio.
0 Comments
 Dicon Watty Vos Boulevard ta costa 180 miyon y pueblo mester paga 440 miyon p'e?
Den conferencia di prensa di Partido MEP dialuna, Lider di MEP sra Evelyn Wever-Croes a indica su preocupacion tocante e desicionnan abnormal cu e gobierno di AVP ta tumando riba inversionnan grandi sin tene cuenta cu naturalesa y nos finansas publico. Sra Croes ta referi aki primordialmente riba construccion di Watty Vos Boulevard y ta bisa lo siguiente: “E tema di Watty Vos Boulevard ta un tema cu ta yena mi cu hopi preocupacion for di diferente angulo. Si nos mira con a rosa naturalesa sin avisa y papia cu ningun hende tocante di dje y sin splica e motibo pa kico mester di mas caminda den e area ey en particular di Dakota, e ora nos tin pa bisa e ora cu e gobierno aki no por ta bon bezig. Ta parce cu gobierno ta hibando un maneho sin plania y cu hopi desesperacion cuasando hopi molester den barionan. Ya caba e barionan di Pos Chikito y Savaneta ta sufri hopi molester di e construccion di Green Coridor. Y awor gobierno ta bay cuminsa cu un otro proyecto grandi mientras cu ainda e Green Coridor no ta ni cerca di keda cla. E sistema di traha 'ad hoc' y mal organisa aki ta causando hopi desgusto den comunidad. No por keda destrui naturalesa di e forma aki unda a rosa naturalesa na varios caminda caba. Nos tin e situacion di e mangrovenan na brug di Pos Chikito como tambe e situacion na Isla di Oro. Nos tin e situacion di e boramento cu recientemente a tuma luga na Colony. E gobierno aki tin 8 aña ta papiando di green y di naturalesa, pero ta haci net lo contrario. Sinembargo no ta e tema di destruccion di naturalesa y e maneho adhoc di e gobierno aki so ta preocupante. Pero e tema mas importante den tur esaki ta e tema financiero cu ta mucho mas alamente ainda. Gobierno ta papia di sostenibilidad y energia cu e pensamento di lo bay na energia alternativo. Pero no ta para keto riba e situacion financiero di nos pais y e mega debe cu Mike Eman y su ministernan mes a crea den 8 aña. Watty Voz Boulevard lo costa e pueblo aki 180 miyon florin. Si gobierno a laga DOW trahe, e lo a costa 180 miyon tambe. Sinembargo Mike Eman a scohe otro y awo nos tin pa bay paga 20 aña largo 22 miyon florin cu lo ta un suma di 440 miyon florin. 260 miyon ta bay na interes y den saco di amigonan. Esaki no ta husto pa nos pueblo. Esaki ta abnormal. Un debe cu nos yiunan y nan yiunan te hasta nan nietonan lo tin pa bay paga pa algo cu no tin splicacion y no tawata necesario. Sinembargo ta cosnan cu ta hinca Aruba den mas problema. Ta basta cu tanto abuso y cos straño di e gobierno aki. Pasobra tanto bal ta papia di energia sostenibel y loke realmente mester ta sostenibel ta nos finansas publico. Y riba esaki gobierno no tin niun sorto di interes. Ta pa e motibo aki mes Pueblo di Aruba ta pidi un cambio. Y tur parti di Aruba cu nos drenta, esaki ta e exprecion di e ciudadanonan. Pueblo ta fada di e maneho abnormalnan aki. A yega ora pa nos bay bek pa normalidad. Pueblo kier un cambio. Y pesey dia 22 september lo bin cambio. MEP ya tin su plan di solucion pa drecha e situacionnan aki tanto pa protehe nos naturalesa como tambe pa aliva nos finansas publico y berdaderamente traha pa e ser humano. Esaki ta loke MEP ta para p’e: 1. Ley di medio ambiente. Partido MEP ta di e pensamento cu mester bin cu e ley di medio ambiente ya cu esaki lo limita e rosamento. Gobierno solamente a papia di ‘green’ pa hopi aña sinembargo no tin interes pa bin cu e ley aki. Pero unabes e ley aki wordo implementa, no por yega rosa y destrui e naturalesa asina sin un castigo manera a sosode na Franse Pas recientemente. 2. Cada proyecto lo wordo dirigi riba e ser humano. Amigonan lo no wordo previlegia manera ta pasando cu Green Coridor y Watty Vos Boulevard ganando asina basta miyon florin na extra comision. Careteranan den bario lo haya pioridad. Camindanan kibra cu a wordo neglisha lo wordo drecha. Algun so a haya klinkers mientras cu mayoria no a haya niun sorto di atencion, mientras si a contrui careteranan grandi costando e pueblo aki bastante placa cu ni sikiera ta yuda na alivia e problema di trafico. Den e ultimo añanan Aruba a mira hopi inversion den infrastructura y embeyecimento pero e ser humano mes a wordo neglisha. Ningun pais por progresa si ta inverti solamente den cosnan bunita of estetico. Progreso di un pais mester bay man den man cu e progreso di e ser humano”. Sra Evelyn Wever-Croes ta termina bisando: “Unabes den gobierno, Partido MEP lo cambia e enfasis y enfoke di gobernacion y enfoca riba e ser humano. Nos lo enfoca pa nos muchanan haya scolnan drechi. E calidad di enseñansa lo wordo drecha pa asina tur hoben sigui nan estudio. Nos lo crea trabounan pa hobennan cu caba scol. Mamanan soltero lo haya sosten. Nos lo enfoka pa famianan no tin mester di traha dos of tres trabou mas pa asina cada famia haya mas tempo pa dedica na nan famia y haci e nucleo familiar fuerte atrobe. Nos grandinan cu a wordo neglisha tambe lo ricibi mas atencion y respet cu nan merece. Pesey 22 di september awo, pueblo lo cambia e rumbo di e pais aki pa miho”.  MEP: Candidata nobo riba lista di MEP
Despues di un parada forma den Paradera te yega Piedra Plat Entertainment Center diabierna 19 di mei ultimo, Partido MEP a lansa dos dama cu a dicidi di subi riba lista di nos prestigioso Partido Movimiento Electoral di Pueblo. Esaki a sosode den forma di un rueda di prensa na unda cu e candidata nobo, Darlaine Guedez Erasmus a introduci su mes dilanti un publico basta anima y grandi. Darlaine a nace dia 26 november 1986 y a crece den Paradera hunto cu su ruman homber, Darall, den un hogar unda e la wordo lanta cu hopi norma y balornan door di su mama Betty y su tata Pablo. E ta casa cu Enrique Guedez y hunto nan tin 2 yiu Betsaida y Isaac. Educacion y trabou: Despues di caba Colegio Arubano, Darlaine a bay studia Social Pedagogische Hulpverlening na Hulanda.. Actualmente e tin 5 aña di experencia trahando den un fundacion na unda e ta deal cu hopi problema di famia y hobennan den adiccion. E ta considera su trabou no solamente su trabou sino su pasion. Meta den politica: Darlaine tin e deseo profundo di ta un sosten y ayudo pa e pueblo di Aruba completo. E focus di Darlaine ta bay ta primordialmente den famia y hubentud cu tin mester hopi amor, cariño, guia y speransa pa tur cos bay bon cu nan. Como trahador social, diaramente e ta pasa den situacionnan hopi alarmante door di problemanan den cas y e famia. Esaki ta loke a motiva Darlaine pa tuma e decision pa drenta politica y postula riba lista di Movimiento Electoral di Pueblo pa di e manera aki yuda na e miho forma cu e por. Darlaine ta cla pa e reto nobo aki den su bida como politico hoben riba lista di MEP. Darlaine tin e siguridad cu tin speransa pa e parti social. E tin speransa den mehoracion di e parti di matrimonio y ta kere den matrimonio feliz. Y e tin speransa den un hubentud motiva pa sigui dilanti. Darlaine ta di creencia tambe mescos cu Partido MEP, cu hunto nos por hiba Aruba dilanti. Y ta basa su lema di campaña riba e pensamento aki: Famia Stabiel, Aruba Stabiel. Pa mas informacion tocante e candidata aki, sigui nos riba nos pagina di facebook. Darlaine Erasmus y MEPofficial. Partido MEP ta yama Darlaine bon bini den nos Partido prestigioso y ta desee tur exito den e campaña electoral aki. Hunto nos ta bay pa e cambio sin miedo!  MEP: Candidata nobo riba lista di MEP
Diabierna 19 di mei ultimo, Partido Movimiento Electoral di Pueblo, den un ambiente grandi cu simpatisadornan y famia, a lansa dos candidata femenino riba nos prestigioso Partido. Un di nan ta e dama hoben, Sharlene Starke. Sharlene Starke tin 40 aña di edad y ta bini di e bario di Paradera. E ta comparti su hogar cu su pareha y su dos yiunan di 13 y 5 aña. Maestra: Sharlene ta dedica na educa nos muchanan pa 12 aña caba cu hopi amor. Banda di su trabou como maestra, el a studia ley pa 3 aña, sinembargo pa motibo di e pasion cu e tin pa cu su profesion pa educa nos muchanan y realisando e trabou inmenso cu tin den nos educacion y enseñansa, el a dicidi di keda como maestra. Pakico drenta politica: Despues di 12 aña den e profesion di maestra, Sharlene ta sinti cu Aruba a yega na un punto culminante y cu nos enseñansa ta profundamente stagna. Nos sistema di enseñansa na e momento aki, no ta cuadra cu e sistema di e mundo moderno cu nos ta bibando den dje. No solamente nos enseñansa ta efrentando problemanan cu diaramente nos ta tende di nan, cualnan ta falta di material, infrastructura y maneho di asuntonan social. Pero tambe falta un vision cu ta indica nos unda nos kier yega y unda nos ta bay den futuro. Su Vision: Establece un sistema di educacion cu ta enfoca pa reeduca y educa un ciudadano global cu ta dispuesto pa sigui siña pa e resto di su bida. Esaki por wordo logra door di crea un ambiente moderno y innovativo den nos enseñansa y crea un “home away from home”. Maestronan ta pasa un gran parti cu nos yiunan y lo tin hopi balor si nos sistema di educacion sinti manera un hogar pa nos muchanan. Lema di Campaña 2017: “Educacion ta e yabi pa un mihor calidad di bida pa cada mucha”. Sharlene ta stima su trabou como maestro, pero ta convenci cu tanto e docentenan y muchanan kendenan ta e futuro merece mucho mas miho. Mester bin un cambio, y pa haci e cambio aki realidad, ta importante pa leynan wordo cambia, revisa y ahusta. Tambe mester bin un restructuracion den tanto edificionan como den maneho y asina brinda un miho calidad di bida pa cada mucha aki na Aruba. Pakico Movimiento Electoral di Pueblo: Sharlene ta uni su mes na Partido Movimiento Electoral di Pueblo pa motibo cu MEP ta un partido Social Democtrata y ta ser caracterisa pa compromete y dirigi su mes riba un maneho caminda e hende ta central. Pa tur hende haya trato igual sin distincion di religion, color of rasa. Y esaki ta cuadra cu e filosofia y pensamento di Sharlene. MEP tin e ingredientenan pa logra e cambio y reestablece respet, norma y balornan cu mester reina atrobe den nos comunidad. Partido MEP ta yama bon bini na Sharlene Starke y ta desee hopi forsa y exito den su carera como politico. Hunto nos ta trece e cambio pa Aruba sin miedo. Sigui nos riba nos pagina di Facebook: MEPofficial pa haya sa mas di Sharlene Starke.  Compara e maneho economico bao di MEP y di AVP! Durante e ultimo 8 añanan diariamente por a scucha for di boca di Prome Minister Mike Eman con nos economia a desaroya positivamente desde 2009 en adelante y cu ta danki na e maneho ‘dinamico’ aki Aruba ta profilando como e pais ehemplar pa loke ta su crecemento economico. Y tur biaha Mike Eman aki tin cu referi na e periodo di Gabinete Oduber caminda e ta manipula mente di pueblo bisando cu nos pais a deteriora economicamente durante di 2002 pa 2009. Sinembargo un biaha mas partido MEP mester enfatisa cu cifranan economico y financiero di Banco Central no ta gaña y ta pesey MEP ta presenta un tabel adhunto caminda por mira con e GDP nominal a desaroya tanto bao di Gabinete Nelson Oduber (2002-2009) como Gabinete Mike Eman (2010-2016). Aumento drastico di GDP Na final di 2001 Gabinete Oduber a haya e GDP na 3437 miyon florin y na final di su gobernacion na 2009 esaki a yega te na 4473 miyon florin y cual ta significa un crecemento drastico di nos GDP nominal cu 1 biyon florin den 8 aña di tempo. Contrario na esaki, durante Gabinete Eman nos GDP nominal a crece for di 4473 miyon na 2009 te na 4755 miyon florin na 2016. Pues un aumento di solamente 282 miyon den 7 aña di tempo. Asina pues tur hende cu sano huicio mes por mira cu tabata danki na e maneho dinamico di Gabinete Oduber nos pais por a experencia un crecemento di GDP asina drastico durante e periodo di 2002 pa 2009. Alavez te hasta un record di GDP a ser kibra na 2008, esta di 4914 miyon florin y te cu awe esaki no a ser surpasa.  Stagnacion economico
Sinembargo ta increibel con durante e ultimo 8 añanan e gobierno di AVP a ricibi 970 miyon florin extra na entrada y tambe nan a aumenta nos debe nacional cu 2 biyon florin, esta for di 2.2 biyon te cu 4.2 biyon florin y asina mes cu e 3 biyon florin EXTRA aki na entrada nan no a logra aumenta nos GDP nominal durante e periodo di nan gobernacion. Alcontrario, durante e ultimo 2 añanan nos economia a deteriora seriamente caminda a registra un caida na 2015 di -0.5% y na 2016 un otro caida di -0.2%. Y hamas e defensornan di Gabinete Eman por tira culpa riba Merca bisando cu e pais aki a pasa den un recesion economico y cu esaki a afecta Aruba, ya cu e ultimo cifranan ta mustra cu na Merca nan a conoce un crecemento economico di 2.4% na 2014, 2.6% na 2015 y 1.7% na 2016. MEP lo bolbe crece economia Hecho ta cu pais Aruba no por sigui mas den e direccion negativo aki caminda nos ta mira un economia cu a stanca completamente bao di gobernacion di AVP. Sinembargo partido MEP ta cla pa asumi responsabilidad gubernamental despues di September proximo y un biaha mas, mescos cu den pasado, lo percura pa bolbe crece nos economia, crea cuponan di trabao duradero y tambe percura pa maneha nos finansa publico den forma responsabel. MEP a haci esaki semper y e elogionan di instancianan internacional manera di IMF, Standard & Poor’s y Fitch ta papia pa nan mes. Pero primordialmente ta hunto nos lo por logra un cambio drastico y pone nos economia riba e bon caminda atrobe. Cu MEP den gobernacion, nos economia ta sigura atrobe!  Parlamentario mr. Juan E. Thijsen ta kere cu ta importante pa pueblo di Aruba ta consciente con e poder politiconan ta move riba nos isla y den Reino Hulandes. Desde 2009 Aruba a conoce Gabinete Mike Eman cu a cuminsa cu hopi entusiasmo y promesa. AVP a gana eleccion entre otro cu acusacionnan cu Partido MEP lo a traha pa yena saco y hiba un maneho corumpi. Mike Eman a bay asina leu di laga parlamento Hulandes pa medio di WODC haci un rapport referente e acusacionnan aki. Grandi tabata e decepcion pa AVP y Mike Eman cu WODC no a logra nada y ningun hende no a worde investiga ni deteni.
Segun Parlamentario mr. Juan E. Thijsen WODC si a laga hopi recomendacion atras pa e gobierno di Mike Eman bay cumpli cu n'e. Despues di 8 aña di gobernacion sinembargo cu e gobernacionnan di Mike Eman a resulta e pio den e historia di nos Status Aparte. Tur sorto di violacion nos a conoce di fayo den maneho, fayo den ley, fayo den principionan di bon gobernacion y den esaki corupcion a haya un rol central. E corupcion no a keda na un Minister pero a plama den Ministernan manera un malesa contagioso. Un di e Ministernan sigur cu a resalta tabata Otmar Oduber y su fechorianan ta bon conoci cerca Mike Eman pero Mike Eman a scoge pa wanta su hendenan hunto y hasta a logra gana un eleccion mas. Sinembargo e situacion politico a cambia y Otmar na final di tempo a scoge pa bandona e barco cu ta hundiendo. Segun Parlamentario mr. Juan E. Thijsen ta worde papia hopi cu Otmar no lo wak eleccion ya cu Mike Eman lo laga investiga Otmar. Pa cu esaki tin Mike Eman parse tin varios pos hundo y stinki cu Otmar a laga atras. Ta ser menciona cu tin filenan di e proyecto di Linear Park cu acusacionnan serio contra Otmar di a ricibi placa. Un otro pos cu ta ser menciona ta e hacking di Arubus. Akinan un suma basta grandi a desaparece cu despues a bin e storia e hacking di banco door di un grupo Chinees. Aparentemente e suma di placa a desaparece pa casualidad net un dia despues cu e edificio pabao di Royal Plaza cu segun contract a bira propiedad di Arubus a worde bendi mesora sin ningun procedura legal di oferta publico manera ley ta prescribi. E storia cu ta core ta cu e placa cu a desaparece a bay pa accidente riba cuenta di Arubus y lo ta suma di e deal pa e edificio. Asina tin mas acusacionnan cu Mike Eman tin cla pa uza contra Otmar Oduber. Tambe ta ser menciona cu "ontheffingen" no a cuminsa cu Paul Croes sino cu Otmar Oduber. Parlamentario mr. Juan E. Thijsen ta kere sinembargo cu Mike nunca lo haci un keho oficial ya cu Mike Eman ta warda resultado di eleccion pa uza e acusacionnan contra Otmar Oduber pa forsa un coalision AVP POR y asina logra prolonga un tercer Gabinete Mike Eman. Parlamentario mr. Juan E. Thijsen y partido MEP lo sigui e desaroyonan politico aki di cerca y ta pidi pueblo pa ta alerta. Parlamentario mr. Juan E. Thijsen ta kere cu Otmar Oduber mester enfrenta Mike Eman y kita tur duda cu su persona y partido ta liber di cualkier acusacion y no ta mara ni tampoco por ser chantagia pa cera un coalision AVP-POR.  E resultadonan di educacion na Aruba a bay hopi atras y na e mesun momento e cifranan di criminalidad a subi. No ta hende di afo so ta haci actonan criminal, sino ta nos mesun hendenan tambe. Con nos por bolter e situacion aki? Aruba por scapa miyones pa aña, door di inverti den educacion enbes di inverti den gastonan pa un prison. Si nos percura pa e mucha hombernan den scol secundario keda na scol y cu e porcentahe di graduacion di nos hobennan subi cu solamente 5%, ya caba nos por wak un diferencia grandi. Mi ta sigur, cu cada hende cu ta paga impuesto aki na Aruba lo prefera pa e placa aki wordo inverti den educacion enbes di un prison! Sea abo mes tin yiu si of no, e efecto di NO inverti den enseñansa por toca cada un di nos.
E ultimo añanan nos a wak con Gobierno a haciele hopi mas dificil pa nos hobennan por tin un miho perspectiva academico. Caminda na Hulanda 60% di e hobennan ta studia na un nivel di HAVO y mas halto y cu na Corsou 40% ta logra e nivel di HAVO y mas, na Aruba pa 7 aña largo e cantidad di muchanan cu ta bay Colegio despues di klas 6 a wordo wanta na 15%!! Esey kiermen cu mayoria di nos muchanan ta bay MAVO y EPB despues di 6e klas. Esey riba su mes no ta crea e problema, ta e situacion, cu muchanan no ta haya e oportunidad pa haya un educacion cu ta pas cu nan manera di siña. Si e nivel di educacion no ta un reto pa nan, nan ta perde interes y motivacion cu e consecuencia cu nan lo no duna ningun resultado mes ni riba e nivel abou. Un hoben cu ta convenci cu su comunidad a lagu'e na caya, lo no respeta e mesun comunidad. E ta cientificamente prueba, cu criminalnan mayoria biaha no tin un EDUCACION hopi halto. Mi ta pone enfasis riba educacion, pasobra esey no kiermen cu nan no ta inteligente! Si nos percura pa hisa e nivel di educacion di tur mucha, percura pa tur hoben logra gradua cu un diploma, nos por baha e cifra di criminalidad! Pa casi un decada largo, Gobierno di AVP a wanta pueblo abou, p'esey ami no ta sorprendi cu awor e cifra di criminalidad a subi: Bo ta cosecha locual bo ta sembra. AMI ta di opinion, cu nos lo mester hinca hopi mas energia y placa pa mehora e clima na scol. Crea scolnan cu ta duna nos hobennan mas guia y structura, siña nan pa ta mas disciplina, creativo y desaroya nan habilidadnan social. Diversificacion di e curiculo cu mas tareanan practico, lo haciele hopi mas atractivo pa cualkier mucha pa participa activamente pero tambe pa nan compronde e teoria mas miho. Cu e ta posibel, esey a wordo prueba caba na diferente pais. Amplia e dia di scol, crea scolnan cu un caracter y meta specifico, no ta un idea nobo, pero si nos no cuminsa ehecuta e ideanan aki, nos lo haya nos mes den mas problema den futuro aki na Aruba. E cifra di criminalidad lo no baha! Nos mester involucra mas variacion den e forma di educa nos muchanan y hobennan. E tarea aki no por ta den man di nos maestronan so. Lo mester amplia e team cu ta traha na un scol pa asina e trabou duro di un maestro por wordo comparti cu mas hende y cada mucha haya mas atencion. Pasobra locual falta mas cu tur, ta atencion. Den un klas cu mas cu 24 mucha, e muchanan no por haya debido atencion di e maestro. Pio ainda, si ta trata muchanan cu tin problema cu e idioma di instruccion, manera ta e caso cu casi tur mucha na Aruba!! P'esey, na varios pais, pero tambe na algun scol na Aruba, tin mayornan cu ta yuda cu tareanan voluntariamente. Na Aruba nos tin pensionadonan cu kier yuda part-time. Nos lo mester pensa den e direccion di traha cu klassenassistent pa scol primario y secundario structuralmente. Tin hopi solucion... awor falta e dedicacion pa cuminsa crea e scol di futuro, awe mes.  Parlamentario mr. Juan E. Thijsen ta kere ta importante pa pueblo ta na altura di informacion corecto. Esaki ta conta tambe segun Parlamentario mr. Juan E. Thijsen pa loke ta trata e asunto di Citgo.
Su persona a vota na fabor di contracto di Citgo pasobra e proyecto ta bon pa Aruba den cuadra di e situacion social economico financiero cu e pais ta aden. Manera conoci durante e tratamento di e proyecto di Citgo den Parlamento Presidente di Parlamento bao instruccion di Mike Eman Promer Ministro di Aruba y lider di AVP a hiba un procedura no democratico. Oposicion a ser nenga di haya e documentonan y solamente a worde permiti pa mira e documentonan bao seguridad extricto. Parlamentario mr. Juan E. Thijsen bao protesta a tuma tempo y a studia e documentonan. Akinan e experiencia como abogado sigur a yuda Parlamentario mr. Juan E. Thijsen ya cu e ta custumbra di pasa den documentonan den un periode cortico. Den su pasamento den documentonan Parlamentario mr. Juan E. Thijsen a tuma nota di e quickscan cu Hulanda a laga haci riba PDVSA, Citgo pero loke ta importante Hulanda a laga investiga si e proyecto di Citgo ta cuadra cu plannan y compromisonan cu ya Hulanda tabatin cu Venezuela. Hulanda su interes ta bay hopi mas leu cu esun di Aruba. Hulanda tin hopi interes den e gas Venezolano. Parlamentario mr. Juan E. Thijsen a haci Ministronan preguntanan tocante e quickscan pero gobierno a keda masha misterioso tocante e quickscan. Segun Parlamentario mr. Juan E. Thijsen su persona si a compronde a base di su experticio huridico cu e quickscan a mara Hulanda na cualkier consecuencia negativo di e proyecto di Citgo. Aruba na e momento ey y te ainda ta bao curatela. Mescos cu den sector priva e curator ta bira responsabel y tin cu tuma decision pa e debedor, Hulanda como curator di Aruba, mester a aproba pa negociacion cu Citgo cuminsa. Manera conoci tambe parlamentarionan di Hulanda preocupa pa e compromiso aki a exigi di Ministro demissionario Plasterk pa nan haya e quickscan. Finalmente e parlamentarionan di Hulanda no a haya e quickscan pero si pa mira. Parlamentario mr. Juan E. Thijsen no sa si ta cu yen di seguridad manera a pasa cu e documentonan di Citgo na Aruba. Parlamentario mr. Juan E. Thijsen a constata cu di eynan e Hulandesnan a keda keto keto y segun Parlamentario mr. Juan E. Thijsen nan lo a compronde cu Hulanda ta responsabel y miho no lanta esnan cu por ta drumi. Parlamentario mr. Juan E. Thijsen ta lamenta cu ainda despues di varios appel ainda Parlamento di Aruba no a haya e quickscan pa wak pa locual segun Parlamentario mr. Juan E. Thijsen Aruba ta den un crisis constitucional. Parlamentario mr. Juan E. Thijsen y partido MEP ta bay para duro pa resolve e problema aki y ta pidi pueblo pa ta alerta.  Nos ta pidi pueblo duna nos e oportunidad pa haci esaki.
Partido MEP ta drentando den hogarnan di ciudadanonan di nos pais no solamente pa entrega nos plan di gobernacion pa e proximo periodo sino tambe pa scucha cada preocupacion cu ta bibando den e pueblo. Un di e preocupacionnan cu nos ta encontra durante nos bishita den pueblo y especialmente den esnan cu ainda no a tuma un decision tocante e eleccion venidero, ta tocante e nivel den Parlamento y con Partido MEP lo soluciona e problematica aki. Lider di MEP, sra Evelyn Wever-Croes ta elabora riba esaki: “Den un gobierno di Movimiento Electoral di Pueblo, despues di september 22, nos lo percura pa e nivel den Parlamento hisa. Esaki nos ta logra den tres accion cu nos lo tuma. 1. UN PRESIDENTE DI PARLAMENTO FIRME Y INDEPENDIENTE. Nos tin mester un Presidente di Parlamento cu sa di scucha e dolor y preocupacionnan di oponentenan. No un Presidente di Parlamento cu ta core yama reunion manera cu e haya tende cu mi ta ausente. Of cu ta busca e manera pa pone cara di oponentenan na berguensa. Y ta busca cualkier manera pa stroba e bon marcha di Parlamento. Un Presidente di Parlamento cu ta presidi e organo di mas halto di e constitucion di nos pais lo percura cu e ta presidente di ambos banda, di e fraccion cu ta sostene gobierno y di oposicion. Un presidente firme cu lo mantene ordo. No un cu ta permiti esnan di su partido ofende otronan di oposicion pero di otro banda ta pone menasa di saca opositornan cu Polis for di sala di Parlamento. Nos tin mester un Presidente di Parlamento cu lo hiba un papel totalmente diferente di e Presidente actual y esun prome, kende lo pone ordo di berdad den sala di Parlamento na un forma indipendiente. Sea ta su colega di partido of un di oposicion ta comporta su mes na mal manera, igual e ta hala atencion di ambos. 2. FRACCION DI MEP DEN PARLAMENTO LO HIBA DEBATE SEGUN PUNTO DI AGENDA. MEP lo bay ta e fraccion mayoritario den Parlamento. Y nos lo trece ordo bek den e reunionnan den Parlamento hibando debatenan al caso y riba e puntonan di agenda. Sin bin cu ofensanan den direccion di mama of tata of demas famia di ningun politico di oposicion manera cu AVP ta haciendo den ocho aña den Parlamento. Esaki lo no ta bay wordo permiti cu MEP como mayoria representando e pueblo den Parlamento. 3. MINISTERNAN TA HIBA NAN DEBATENAN NA UN NIVEL RESPONSABEL Y MADURA. Un bon ehempel di esaki den mesun Gobierno di AVP ta e diferencia entre Minister Bermudez y Minister Benny Sevinger ora nan ta den sala di Parlamento. Minister Bermudez ta atende cu e topico cu Parlamento ta tratando y ta duna un contesta si e tin un contesta y si e no tin e ta bisa bo tambe cu e no tin un contesta. Pero e ta keda na un nivel madura y responsabel ora di contesta su preguntanan. Contrario na Minister Benny Sevinger cu cierto momento a te hasta ofende tur hende muher door di bin zwaai cu maandverband den Parlamento. Na e momento cu e ministernan di Gabinete di Movimiento Electoral di Pueblo hiba debatenan den Parlamento, lo ta al caso contestando preguntanan sin ofende ningun oponente y nan famia. Cu e tres accionnan aki, nos lo percura pa e nivel di Parlamento mehora. E unico factor cu nos lo no por influencia ta e fraccion di AVP cu lo bay ta den oposicion. Pero nan mes lo ripara cu no lo tin sentido di sigui cu e nivel baho cu nan ta hiba debatenan den Parlamento pasobra Partido MEP cu lo ta e mayoritario den Parlamento lo no sigui tras nan wega”. Sra Wever-Croes ta termina bisando: “Apesar cu politiconan actual di MEP nunca a haya oportunidad pa goberna of sinta riba e stoel di Presidente di Parlamento, nos ta bibando cu tur critica di esaki. Unico cos cu nos ta pidi e pueblo di Aruba ta pa duna nos un chens pa nos demostra y realisa nos plan cu nos tin pa hisa e nivel den Parlamento. MEP por trece ordo den Parlamento sin cambia e sistema. Presidente di Parlamento lo sali for di Fraccion di MEP kende lo atende cu Parlamento na un manera madura y responsabel cu lo tene cuenta cu interes di tur 21 Parlamentario”. SEMPER GOBIERNO DI MEP A HEREDA FOR DI AVP UN CAHA DI GOBIERNO BASHI Y DEBENAN BIYONARIO PA PAGA!25/5/2017  Caha di gobierno lo ta bashi bashi atrobe na 2017! Siman pasa pueblo por a tuma nota di un declaracion di e economista local, sr. Ben Marapin, caminda el a trece padilanti su preocupacion pa loke ta e situacion financiero di pais Aruba. Entre otro, el a declara cu e proximo gobierno lo no tin e luho pa gasta placa ya cu no tin mas placa pa gasta y alavez cu no a resta mucho placa pa inverti den enseñanza, salubridad, seguridad etc. Sinembargo pa partido MEP e declaracion aki no a cay como un sorpresa, ya cu durante e ultimo 8 añanan e gobierno di AVP no a crea solamente debenan biyonario, pero riba dje nan a malgasta y derocha placa na nan antoho y pa finalmente e cuenta wordo presenta pa pueblo paga. Debenan di proyectonan PPP Y e cuenta pa paga a desemboca awor cu sr. Marapin a bati e bel, pero tambe Banco Central cu den su ultimo relato a trece padilanti cu te cu fin di September 2016 e debe di gobierno a crece te na 4172 miyon florin of 87.3% di e GDP y esaki sin conta acerca e debenan di e proyectonan PPP, esta e Hospital, Green Corridor, Watty Vos boulevard y e 5 MFA-nan. Si conta e debenan di PPP acerca, e ora ey e debenan total lo resulta den un porcentahe di 135%, esta cu di cada florin (100 cent) cu pais Aruba genera na entrada, 135 cent ta bay pa paga debe! Esaki si ta un situacion desastroso y penoso cu Gabinete Eman lo bay laga atras na September proximo y cu no ta di compara cu locual e mesun gobierno di AVP aki a hereda for di Gabinete Oduber na final di 2009 ora cu nan a drenta gobierno. Herencia di 970 miyon florin Na 2009 nan a haya un situacion financiero sano y manehabel cu un deficit y debe nacional cu tabata cumpli cu e normanan internacional. No ta pornada cu na 2009 pais Aruba tabata goza di un Credit Rating di A- y un Outlook Stable di parti di Fitch y Standard & Poor’s. Pero no solamente esey, ya cu Gabinete Mike Eman a hereda tambe un suma cuantioso di 970 miyon florin cu a ser laga atras pa e gobierno di MEP (mira tabel adhunto). Pues un y tur por imagina nan mes kico tur lo por a wordo haci cu e 970 miyon aki pa desaroya nos pais positivamente y sin cu e gobierno di AVP mester a fia y aumenta nos debe nacional for di 2.2 biyon florin te cu 4.2 biyon florin den apenas 7 aña di tempo. Ruim op de boel Pero historia a demostra cu no ta e aña aki so gobierno di AVP lo laga un desaster financiero atras, ya cu esaki a sosode tambe na cuminsamento di 1989 durante Gabinete Henny Eman 1 y tambe na 2001 durante Gabinete Henny Eman 3, caminda gobierno di MEP mester a ‘ruim op de boel’ pa paga tur e debenan di e garantianan hotelero di SACE, Race Track, Radar, Radisson, Winston & Strawn, Fondo Desaroyo San Nicolas etc. Anto riba dje a hereda un turismo na werki y un caha di gobierno Bashi Bashi. Y awor na 2017 tur cos ta mustra cu e caha di gobierno lo keda Bashi Bashi atrobe. MEP lo sana finansa publico Sinembargo den un nota mas positivo, MEP lo no sinta yora pero un biaha mas ta cla pa asumi su responsabilidad y una vez den gobierno lo sa di bolbe remedia e situacion financiero y pone pais Aruba riba e caminda corecto atrobe, manera cu MEP semper a haci den pasado. Ningun reto lo ta imposibel pa MEP ya cu nos partido tin e politiconan responsabel, integro y capacita cu lo bolbe crece nos economia y asina yuda crece e entradanan di gobierno. Y mas cu tur, un gobierno di MEP lo reduci e gastonan innecesario cu Gabinete Eman a crea durante e ultimo 8 añanan. Finalmente pais Aruba lo bolbe na un situacion financiero sano y manehabel na beneficio di henter comunidad.   |
RSS Feed