For di oposicion Partido MEP ta goberna!

Partido MEP tin dos aña caba ta trahando riba un proyecto di ley pa haci e repago di e fiansa di estudio deducible di belasting. Gobierno nunca tabata tin un incentivo real pa trece nos studiantenan back despues cu nan termina nan estudio den exterior. gobierno di Mike Eman a bin cu un descuento di 30 prociento riba e fiansa si esaki wordo paga den un solo pago, Locual Partido MEP no ta haya ta logico considerando cu studiantenan ta keda cu un debe di mas di 100 mil florin y no tin e placa pa paga nan fiansa den un solo pago. Si nan tabata tin e cen aki lo nan no a recuri na fiansa mes. E idea aki cu AVP a bin cu ne no a surti ningun efecto. Lider di MEP sra Evelyn Wever-Croes ta elabora mas tocante esaki:
 
 
“Dos aña pasa, nos a bin cu e proyecto di ley pa haci e re-pago di fiansa di estudio completamente deducible di belasting. E proceso aki a tranka cierto momento pa motibo di consehonan cu nos a ricibi y cu mester a tene cuenta cu nan. Den nos proyecto di ley nos tabata falta un paragraf di e consecuencianan financiero cu e cambio lo causa.
 
Ta lamentable cu despues di intentonan, nos no a haya e cooperacion necesario for di gobierno pa asina traha riba e paragraf rekeri pa asina evita cu atrobe un ley di nos bay para den un lachi di Parlamento.
 
Sinembargo, un biaha mas ta keda confirma cu Partido MEP ta gobernando for di oposicion y esaki ta un bon noticia. Gobierno recientemente a entrega un proyecto di ley na Parlamento identico na esun cu nos a traha pa asina haci tur e re-pagonan di fiansa di estudio deducible. Cu practicamente mesun principionan cu loke nos a bin ta anunciando durante dos aña. Sinembargo tin un diferencia entre e proyecto di ley di Gobierno y esun cu Partido MEP a propone.
 
FIANSA PA ESTUDIO SIN INTERES:
MEP no solamente a propone pa haci e re-pago deducible. Esaki sigur lo yuda pa nos studiantenan bin back. Pero nos a bay un paso mas leu cu Gobierno ainda no a tuma. Esaki ta pa duna e studiantenan un fiansa pa estudio sin cobra interes, “Studievrij lenen”, locual na Hulanda ya caba ta asina.
 
Na Aruba porehempel na IPA, un studiante lo no paga interes. Esaki ta locual nos kier pa bira aplicabel na tur fiansa di estudio, considerando cu esaki lo trece alivio grandi pa tur studiante. Esaki lo motiva studiantenan cu ta bay studia den exterior bin back y aplica loke nan a bay siña p’e”. 
 
Sra Wever-Croes ta termina bisando: “Nos ta contento y e pueblo di Aruba mester wordo felicita cu e ley aki a yega Parlamento aunke cu ainda no tin fecha pa e wordo trata. No tin motibo pa tarda pa esaki pasa. Nos di Partido MEP ta ansioso wardando e reunion aki wordo yama pa asina durante e tratamento di e ley nos bin cu e extra paso pa asina nos yega na un “studievrij lening” pa e hobennan sigui studia cu un prestamo sin tin mester paga interes tambe”.

​Den e fin di siman cu a pasa, Partido MEP a bishita varios barionan di Aruba hibando nos campaña y splicando nos mensahe den cada cas cu nos bishita. Pero tambe nos ta scucha tur preocupacion y dolor di cada ciudadano. Y di e manera aki nos ta haya di conoce loke realmente ta bibando den e pueblo y e confiansa cu nan ta deposita den nos. Nos ta scucha te hasta casonan di intimidacion di cierto partidonan politico cu ta tumando luga durante e campaña pa eleccion 2017. Lider di MEP, sra Evelyn Wever-Croes ta elabora riba esaki.
 
“Hunto cu mi team di campañadornan, mi a bishita e bario di Playa den e fin di siman cu a pasa. Y mi mester remarca cu comparando cu cuatro aña pasa, nos ta bayendo den un direccion diferente. E ambiente ta diferente. E energia ta diferente. 
 
Nos ta haya hopi hende cu ta habri nan porta pa nos y ta pidi pa scucha nos vision y nan kier e mensahe di speransa. Mi ta gradici di curazon tur esnan cu ta habri porta pa nos pa scucha e mensahe cu nos ta trece. 
 
Un cos cu a resalta den e fin di siman, y ta algo cu nos ta compronde cu ta pasa mas biaha, ta cu Partido AVP ta hibando un campaña di intimidacion. Na unda cu integrantenan y sostenedornan di AVP ta yega na bosha riba hendenan vulnerable na nan cas y intimida nan. Nan ta pega dos of tres bandera sin permiso di e doño di cas y despues nan ta cana bay. 
 
Nos a haya yamada di varios hende grandi. Un caso special cu a pasa na Noord tabata di un persona di edad cu te hasta tabata yora. E persona a conta nos cu un grupo grandi di AVP a yega di sorpresa su cas y keda pone presion riba dje y cana bay laga tres bandera golga atras. 
E señora no kier e banderanan na su cas y e la yama nos pidi nos pa baha nan. 
 
Esaki no ta e manera pa hiba campaña. Nos sa cu temporada di campaña semper ta un temporada di hopi tension. Pero esaki no ta duna ningun hende derecho pa bay na hende asina aki especialmente nos hendenan grandi of esnan mas vulnerable y intimida nan den e forma aki. 
 
Mi conseho pa tur partido politico, especialmente AVP, ta pa nos tur hiba un campaña di nivel. Hiba e mensahe di solucionnan, di nos visionnan, di nos logronan y loke nos kier pa e pais aki. Laga nos no intimida hende grandi y vulnerable. Pa haci nan intrankil y haya motibo pa yama polis cu ya ta bastante ocupa cu hopi otro problemanan di insiguridad di nos pais. 
 
Cada politico mester comporte na un manera responsabel y adulto sin tin mester di intimida ni un ciudadano. E mentalidad di algun politico cu ta kere cu pa medio di intimidacion nan lo gana e campaña aki, mester comprende cu esaki lo no bay ta e caso. Pasobra nan ta lagando atras hopi hende cu trauma y sigur den e caso aki, e señora aki lo no vota mas pa AVP. 
 
Y mi mensahe ta keda pa tur: Si bo kier yega na e final di e campaña aki manera un pueblo madura cu tin 31 aña di Status Aparte y para den su sapato, nos mester por hiba un campaña miho sin tin mester laga un dolor atras den nos hendenan. 
 
Partico MEP tambe ta lagando banderanan atras pa esnan cu ta pidi nos. Y nos ta pidi pueblo pa tene tiki pasenshi cu nos mientras nos banderanan ta yegando Aruba. Mientras nos ta lantando banderanan na varios casnan”. 
 
Sra Evelyn Wever-Croes ta termina bisando: “Manera nos slogan di campaña ta bisa “Hunto P’e Cambio” #sinmiedo, nos ta realisa cu poco poco e miedo ta desvanece y ya hopi no tin miedo pa mustra nan mal contento y nan 

​Den conferencia di prensa di Partido MEP dialuna mainta, Lider di e partido, sra Evelyn Wever-Croes a duna un resumen di e ley di Integridad cu Fraccion di MEP ta trahando riba dje, considerando falta di esaki den e gobernacion actual. Sra Croes ta bisa lo siguiente:
 
“Den ultimo temponan nos ta tende di hopi dudanan cu ta wordo lansa tocante Integridad. Dialuna mainta tabata tin un reunion publico na Parlamento riba agenda tocante di integridad. Tabata trata aki di un reunion cu ta trata ley di casino, wega di catochi of wega di number cu ta hunga na Aruba. E ley aki tambe ta basa riba integridad. Lamentablemente e reunion a wordo cancela ultimo ora pa motibonan desconoci na nos.
 
Un di e temanan hopi importante cu ta para den e ley aki ta cu pa un casino of un compania of bendedo di catochi haya un permiso, e doño of compania mester ta intachable. Su reputacion mester ta limpi y no por ta sospechoso riba ningun tereno. Esakinan naturalmente ta reglanan aceptabel internacionalmente.
 
Mi no sa e motibo pa cua e reunion di Parlamento a wordo cancela. Pero e pregunta ta keda: Ta cu ki cara Gobierno kier impone e ley aki pa esnan cu ta bende catochi siendo cu den su gobierno mes e ta permiti pa cosnan iregular pasa?
 
Pesey ta importante pa keda consecuente. Integridad ta algo cu sea bo tin’e of bo no tin’e. No por bisa cu bo kier integridad pa e casino si y pa e minister no. Of pa un partido si y pa otro partido no. Integridad mester ta e linia cora di loke bo ta haci.
 
Desde aña 2014, Fraccion di MEP a traha un nota riba e tema di integridad. Aruba ta e unico pais den reino Hulandes cu no tin ley riba e tema di integridad. E notanan aki nos a hiba Hulanda den reunion di IPKO pa trata esakinan den e constelacion di Reino pero tambe nos a trata nan aki na diferente instancianan importante.
 
Den e nota di integridad aki, nos ta describi kico Aruba mester haci pa yega na integridad den gobernacion. Y una bes cu tin integridad den gobernacion, bo ta percura tambe pa esaki tin un efecto den henter e comunidad. Algun di e leynan cu nos ta discribi ta:
 
1. Ley di screening di politiconan: Ningun bendedo di Lotto of catochi por tin investigacion di labamento di placa andando contra nan. E minister tampoco por tin ningun investigacion di labamento di placa riba dje. Un minister of politico cu ta wordo investiga pa labamento di placa no por ta ministeriabel.
 
2. Ley di financiamento pa partidonan politico: Hopi biaha nos ta wak hopi placa ta draai rond den campaña pero nos no sa di unda e placa ey ta bin. Porta e ta bin di fuentenan cu e dia di mañan por bin exigi fabornan di Gobierno. Esaki ta e manera con e baho mundo ta bin ariba den gobernacion. “Onderwereld” ta bin den e “bovenwereld”. Apesar cu e ley di financiamento ainda no ta existi, nos di Partido MEP si ta aplica esaki. Nos bukinan ta na ordo, specialmente despues di e caso di ladronicia den nos partido aña pasa, y ta cla pa wordo habri prome of despues di campaña. Esaki ta pa mustra cu nos ta para pa e principionan di e ley di financiamento di partidonan politico.
 
Conforme e prinicipionan di e ley di financiamento di partido politico, e ta tene cuenta cu loke e partido ta haci pero tambe loke e candidatonan ta haci. Den e caso aki, lo registra donacionnan cu e partido of e candidato ta haya cu ta surpasa 3000 florin. Esaki ta algo similar na loke cu ta existi na Hulanda y na Sint Maarten.
 
Loke cu si Partido MEP no kier ta pa gobierno subsidia partidonan politico mescos cu e ley di financiamento di partidonan politico ta stipula na Hulanda. Aruba tin basta problema financiero. Cu dificultad ta paga e mega debe di cua 83 cen di nos florin ta bay na paga debe. Partido MEP ta traha hopi duro pa yega na fondo pa campaña organisando rifanan y eventonan di fundraising.
 
Lider di MEP ta termina enfatisando: “MEP kier un gobierno integro di gobernantenan cu ta bisa loke nan ta haci y haci loke nan ta bisa. Hendenan cu nos por confia cu e futuro di nos muchanan den nan man”.
 

​Den conferencia di prensa di Partido MEP na comienso di siman, Lider di MEP, sra Evelyn Wever-Croes a presenta cu un Corant den cua a wordo publica un combersacion di email entre un tal Leoncita y un tal Aldrick. Sra Wever-Croes a reacciona riba e publicacion aki y a indica cu mester bin cu un investigacion profundo riba e caso aki y varios otronan cu ta andando pa un tempo caba.
 
“For di un publicacion cu a sali den un corant, mi a tuma nota di un caso di corupcion di otorgamento di tereno. Esaki ta algo hopi serio cu mester haya debido atencion. Den e relato aki, a wordo publica un conbersacion di email entre sra Leoncita y un meneer Eldrick. Den cual e meneer ta bisa:
 
Leoncita bon tardi, Esaki ta e compania cu ta interesa pa cumpra na Barcadera. Mi ta wardando riba e draft contract di compra pa bo firma ora bo haya e prome downpayment di 100 mil florin”.
 
Aki nos por mira un prueba contundente di tur e corupcion cu ta tumando luga pa loke ta trata tereno. E sra aki ta haya un opcion di gobierno pagando masha poco cen. Y prome cu gobierno pasa e tereno na su nomber, e ta bende. E cumprando ta paga 100 mil florin downpayment. Y unabes a haya e placa di downpayment, e ta laga pasa e tereno riba nomber di e cumprado pa despues e cumprado paga e restante.
 
Esaki ta casonan di speculacionnan di tereno di gobierno cu no ta permitebel. Esaki ta contra nos reglanan y claramente bo ta mira e negoshi di tereno cu ta andando entre un tal Eldrick y un Leoncita.
 
E email aki ta menciona solamente e dos personanan aki. Niun caminda ta menciona nomber di Benny Sevinger of di Mike Eman. Esey no kiermeen cu nan lo no ta involucra. Di esey mi no tin prueba. Loke si mi sa ta cu Benny Sevinger sa di e asunta aki. Pasobra e cosnan aki ta pasa bou di su nanishi por lo menos 1000 biaha y e sa masha bon tur locual e ta firma.    
 
Aki ta unda nos tin pa para keto pa loke ta pasando na e pais aki. Y bayendo bek na e reunion cu a tuma luga den Parlamento siman pasa, na unda cu Fraccion di AVP a duna “green light” pa su ministernan sigui cu corupcion y cu placa bou di mesa regalando patrimonio di pueblo, pasobra e 12 parlamentarionan di AVP tey toch pa protege y defende nan.          
 
E caso di corupcionnan aki di tereno ta algo hopi serio. Ta absurdo caba cu un hende ta paga 100 mil florin solamente pa downpayment pa un tereno di gobierno cu solamente ta supose di paga canon y gastonan di notario. E suma completo cu a cobra pa e tereno specifico aki ainda ta desconoci. Pero claramente nos por mira cu aki tin un hende cu ta enrikeciendo su mes.
 
Y esaki ta un ehempel so. Nos tin mas di 100 ehempel di e casonan aki den un file. Y si nos conta e suma aki, 100 x 100 mil florin, nos ta ripara cu aki ta trata di basta placa cu ta somenta den saco di hendenan liga na e ministernan di AVP. Y awo e minister no por bisa cu e no tabata sa di esaki pasobra esaki a wordo publica den corant hunto cu prueba di e conbersacion entre un tal Eldrick y Leoncita negociando tereno”.
 
Sra Evelyn Wever-Croes ta termina bisando: “Mester bin un investigacion profundo riba e casonan di otorgamento di tereno y castiga tambe esnan responsabel pa tur e iligalidad cu ta tumando luga cu patrimonio di pueblo”.