Durante su bishita na Hulanda Premier Evelyn Wever-Croes a pidi un reunion cu e miembronan di senado Hulandes pasobra ta importante pa nan ta bon informa riba diferente topico door di e Premier mes.

VENEZUELA:

“E crisis di Venezuela no ta un crisis di Venezuela so, e no ta un crisis regional so, e ta un crisis mundial y comunidad mundial mester yuda carga e peso. Aruba y Corsou ta cargando un parti relativamente grandi di e peso, y nos so no por sigi carge. E miembronan di senado Hulandes tabata tin hopi interes pa e topico aki y a hasi hopi pregunta. Nan a keda agradesido di por a haya splicacion detaya” segun Premier Evelyn Wever-Croes.

FINANSAS PUBLICO:

En bista cu finansas publico den pasado a causa bastante friccion entre Hulanda y Aruba, Premier Evelyn Wever-Croes kier a duna Eerste Kamer un update. A splica cu desde cu a firma e protocol nobo cu Hulanda, a bin poco mas trankilidad den e relacion entre Hulanda y Aruba, y cu e confiansa ta wordo reestableci. E protocol ta basa riba e memorandum financiero economico cu Gabinete Wever-Croes mes a prepara. No kiermen cu e problemanan financiero di Aruba a wordo soluciona. Al contrario, e problemanan ainda tey pero awor tin un plan y a base di e plan, Aruba lo sali di e problemanan financiero. Aruba lo cumpli cu palabracionnan haci.

INTEGRIDAD:
​
Ta conoci cu e escandalo di corupcion den cual un ex minister di AVP tabata envolvi, a wordo discuti tambe na Hulanda. P’esey tabata importante pa Premier Evelyn Wever-Croes splica kico Gobierno di Aruba ta haciendo pa evita algo asina bolbe pasa. Premier a elabora riba e Bureau Integriteit, e Integriteitskamer y e Corporate Governance Code pa asina Aruba por ratifica e tratado contra corupcion di Nacionan Uni. E miembronan di senado a keda impresiona cu e plannan ambicioso di Gabinete Wever-Croes.
“Na mi opinion e reunion a bay hopi bon. Mi a duna informacion y nan a haci hopi pregunta. Na final nan a gradici mi pa e informacion y a desea nos hopi exito cu tur e retonan na Aruba. Awor cu nan ta miho informa, nan lo por duna miho sosten na Aruba”, segun Premier Evelyn Wever-Croes.

Diahuebs na Hulanda, Presidente di Eerste Kamer na Hulanda Ankie Broekers-Knol, despues di 6 aña como Presidente di Eerste Kamer, ta bandona e puesto. Señora Broekers-Knol no por wordo re-eligi. Sra. Broekers-Knol semper tabata tin un luga special den su curason pa Aruba y Parlamento di Aruba semper por a conta cu su sosten. Ta pa e motibo ey, Premier Evelyn Wever-Croes a gradici’e personalmente y a entreg’e un regalo, un bunita buki di Aruba.

Den un reunion cu señora Broekers-Knol Premier Wever-Croes a comparti e impacto di e crisis di Venezuela riba nos pais Aruba, riba diferente tereno. Señora Broekers-Knol ta comparti preocupacion di Gabinete Wever-Croes den esaki y sigura cu Eerste Kamer t’ey pa yuda Aruba den esaki.
​
Premier Wever-Croes ta desea señora Ankie Broekers-Knol exito.

Pa Premier Wever-Croes tawata un imenso honor y gran alegria pa trece un poco mas di Aruba cerca di Papa di Roma

​“Awe mi tawata tin e honor pa haya audiencia cu Papa Francisco di Roma”. Tawata un experiencia unico y tabata un honor di por a representa Aruba y ricibi e bendicion pa henter Aruba, Premier Evelyn Wever-Croes a expresa cu gran alegria diaranson mainta.


Awe diaranson ta dia di audiencia general na Plaza San Pedro na Roma. Un multitud grandi a bin na e sirbishi special aki pa ricibi bendicion di Papa Francisco. Premier Wever-Croes y su esposo tawata sinta riba prome fila na banda di e podium. Despues di audiencia general, Premier Wever-Croes a haya un oportunidad pa un audiencia priva cu Papa di Roma.


“Mi a conta Papa Francisco cu Aruba ta un isla chikito den Caribe cu un poblacion cu ta consisti di 75% catolico, sin laga afo e bendicion cu Aruba tin cu nos Kapel di Alto Vista y e debocion grandi na Mama Maria di Alto Vista. Mi a pidi Papa Francisco pa Bendicion pa Aruba, pa nos famianan na Aruba, pa nos Gobierno. Mi a pidi tambe pa tene Aruba, Boneiro, Corsou y Venezuela den oracion y duna nos bendicion. Venezuela tin mester di bendicion mas cu nunca pa e situacion dificil cu nan ta pasando aden cua situacion ta afectando nos tambe”, Premier Wever-Croes a duna di conoce.


Premier Wever-Croes a haci un invitacion na Papa Francisco pa e bin Aruba. Pa Premier Wever-Croes tawata un momento hopi grandi y emocional ora cu na final Papa Francisco a duna su bendicion pa henter pueblo di Aruba.


Den nomber di pueblo di Aruba, Premier a entrega Papa Francisco un bunita cuadra di Kapel Alto Vista y tambe un buki di historia di Aruba den cua e bunita historia di Kapel di Alto Vista ta wordo splica.


“Papa di Roma ta un persona hopi humilde, cu un curason hopi grandi y hopi amabel. Esaki ta e prome biaha cu mi por a aprecia Papa di cerca asina y mira cu Papa ta genuino den su gestonan cu e ta haci pa cu religion catolico y henter mundo. Aparte di esey, e ta un lider y mi ta confia cu Papa lo logra trece pas caminda cu tin mester. Mi a experencia un dia hopi bunita na unda cu Papa a bendiciona Aruba, Corsou, Boneiro y Venezuela. Y alaves, Papa a gradici Aruba tambe pa ta dispuesto pa yuda y acepta asina tanto pa cu e situacion di Venezuela. Papa Francisco a bisa cu sigur e lo tene nos den oracion. Pa mi esaki ta un dia hopi special y un imenso honor pa representa Aruba na Vaticano y trece un poco mas di Aruba cerca di Papa di Roma”, Premier Wever-Croes a expresa.

Durante conferencia di Prensa e siman aki Minister di Finansa a trece dilanti cu ela ricibi e resultadonan di e promer kwartaal di e ehecucion di Presupuesto 2019. E cifranan ta mustra cu e esfuersonan di Gobierno ta dunando resultado, e deficit ta birando surplus y e tasa di debe ta cuminsa stabilisa.


Durante e conferencia di prensa e mandatario a trece dilanti cu pa e promer 3 lunanan di 2019, Gobierno a ricibi mas entrada y a logra baha su gastonan, e resultadonan aki a produci un surplus di casi 7 miyon florin. Pa locual ta e tasa di debe Minister Ruiz-Maduro a informa cu esaki a baha levemente di 77.8 pa 77.3%.


E mandatario a trece dilanti cu desde e momento cu a asumi responsabilidad a bin ta traha serio y duro pa recupera e credibilidad financiero di Pais Aruba. No por lubida cu e situacion financiero hereda di Gobierno anterior ta uno caminda e gobernacion anterior na un forma iresponsabel redobla e debe di 2 pa 4 biyon den apenas 8 aña di tempo y esaki ta trece cune un situacion financiero precario cu no ta facil pa maneha.


Awe segun e mandatario a splica cu e resultado di e promer kwartaal di 2019 ta uno alentador ya cu e ta mustra cu e sacrificio cu ta wordo pidi y duna door di tur hende ta duna su frutonan den tal forma cu nos ta riba e bon caminda pa por cumpli cu e metanan financiero di e aña aki y por recobra asina e credibilidad financiero tan necesario.


Den apenas dos aña di gobernacion Gabinete Wever-Croes pa medio di Minister Ruiz-Maduro como mandatario responsabel a bin ta demostra karakter y tuma decision y a base di trabaonan duro y dedica ta poniendo nos Pais Aruba riba caminda pa un finansa publico manehabel y duradero, e deficit ta birando surplus y nos tasa di debe ta stabilisando.

Inversionistanan ta demostra nan confiansa Maneho exitoso di turismo di Aruba ta keda refleha den e 900 miyon dollar di inversion comercial
E no ta un secreto cu Aruba su pilar economico mas fuerte ta turismo y cu sin e pilar aki, Aruba su economia no lo por draai como debe ser. No obstante cu Aruba ta ser considera como e perla di Caribe, pa por mantene e pilar economico aki bibo, ta rekeri un maneho structural cu ta enfoca riba e asina yama ‘turista di calidad’. E turista di calidad ta esun cu ademas di bin relaha na nos isla, ta laga atras un bon cantidad di placa den nos economia. Na su turno, door di ta un isla atractivo pa e turista di calidad, ta haci cu e ta atrae inversionistanan cu tambe ta engrandece nos economia.

“Ya caba for di tempo di ta den oposicion, mi persona a bin ta papia riba e enfoke pa e turista di calidad. Awor cu pueblo di Aruba a duna e confiansa pa ta den gobernacion, nos a sali crea un maneho structural cu ta percura pa eleva e calidad di turismo cu Aruba ta ricibi. Awe nos ta mira e fruto di e maneho aki ta ser refleha den e mas cu 900 miyon dollar di inversion comercial cu turismo ta trece cu ne”, Minister Dangui Oduber a expresa. E mandatario ta splica cu e inversionnan aki ta na beneficio di henter pueblo y como mandatario encarga, lo sigui haci tur cos posibel continua den e rumbo aki.

Inversionnan
E 900 miyon dollar aki cu ta ser papia di dje, ta reparti den un total di 5 proyecto. Esakinan ta encera e proyecto ‘Gateway 2030’ di aeropuerto di Aruba, balora na 275 miyon dollar. Transformacion di e area di waf actual na Oranjestad den un ‘Port City’, balora na 500 miyon dollar. Inversion di 35 miyon dollar pa renobacion y expansion di ImSan, unda lo ta enfocando riba turismo medico. Renobacion di Ex Aqua condominiums , cual ta un proyecto cu pa hopi aña a keda para. Awor a bin un inversionista nobo, kende lo inyecta 30 miyon di dollar den e proyecto aki. No por laga afo un otro 60 miyon di dollar cu lo keda inverti pa construccion di Xavier University School of Medicine, cual lo bira e cas di hopi studiante internacional aki na Aruba.
Minister Dangui Oduber: “Cada un di e inversionnan aki nifica mas empleo, mas estimulo den nos economia y tambe un entrada stabiel pa Gobierno di Aruba.”
​
Como e mandatario encarga cu turismo, Minister Dangui Oduber ta bisa di lo sigui firme cu e maneho actual pa turismo. “Lo sigui enfoca riba e turista di calidad. Nos lo inverti na unda mester pa asina atrae mas di e turistanan aki, como tambe haci Aruba un luga atractivo pa inversionista. Ta danki na turismo nos economia ta draai y di forma responsabel nos lo sigui engrandece esaki”, e mandatario a expresa den un tono firme.

​Dialuna mainta Parlamento di Aruba a trata e Ley di Destaho caminda cu ta regla e proceduranan pa destaho publico, priva y otorgacion directo. E ley actual a conoce cambionan pa asina por cumpli cu e principionan di bon gobernacion na momento di un destaho. Den e ley a regla, entre otro, e mandato di e directornan ora di destaho y a crea e posibilidad pa haci un destaho priva (onderhandse aanbesteding) via medio electronico.

E cambionan ta cuadra cu e maneho di Gabinete Wever-Croes pa modernisa nos leynan, demostra transparencia y integridad den gobernacion, como tambe cumpli cu e protocol firma dia 30 di maart 2012 na Geneve den cual e punto di salida ta bon gobernacion y e enfoke riba transparencia den maneho di fondonan publico di Pais Aruba. Pa por cumpli cu esakinan tabata necesario bin cu cambio den nos leynan referente e diferente forma di destaho, suministro di producto y prestacion di servicionan cu mester wordo realiza den proyectonan di Gobierno di nos Pais, como tambe e proceduranan corespondiente cu mester wordo aplica y sigui. 

E cambionan den ley a wordo aproba unanimamente pa Parlamento di Aruba y ta un trabou cu a wordo haci principalmente pa e 'Werkgroep Arubaans Comptabel Bestel' pa cual Minister Ruiz-Maduro ta expresa palabra di gratitud pa nan trabou y ta gradici tambe tur otro persona cu a traha riba e cambionan den e Ley aki.

Nos a ricibi e noticia positivo cu FMAA porfin a conoce cambio den e directiva. Esaki ta nifica cu di awor pa dilanti nos tin di cuminsa mira e cambionan necesario pa e maneho di adiccion na Aruba. Mi kier felicita e minister en cuestion sr. Dangui Oduber cu e logro aki, pasobra a tarda hopi luna pa por a yega na e punto aki. A yega e momento pa gobierno revisa atraves di e personanan cu nan ta pone den cualkier directiva di nan fundacionnan pa e statuto no por permiti pa hendenan keda stroba un maneho nobo cu kisas ta diferente na e gabinete anterior. E departamentonan ta keda perhudica pa motibo cu e cooperacion no ta cana manera ta wordo desea pa cu e maneho nobo.


Problema financiero
FMAA ta den un problema financiero hopi grandi. Tin hasta companianan cu tin beslag poni ariba e fundacion pa debe atrasa cu e fundacion no a cumpli cu ne. Y despues di par di aña a yega na un acuerdo hunto cu sindicatonan pa soluciona e pensioenregeling di varios trahador cu no a wordo paga y pa asina cumpli cu nan pago atrasa. Sigur esaki ta un noticia positivo pa e trahadornan cu merece tur atencion pa e trabou cu nan ta haci.


Futuro y maneho
Segun e preguntanan cu nos a haci na minister di Salubridad tocante e futuro di maneho di adiccion na Aruba y e preocupacion cu nos tin, mirando cu gobierno anterior no a laga un programa intacto, no tin e cantidad di suficiente trahador pa e maneho structural di adiccion. Minister actual na su turno a splica nos di parlamento e siguiente. El a percura pa un directiva nobo y ya caba a inventarisa e edificio y minister lo presupuesta e placa pa e infrastructura necesario tambe.
Tambe lo cuminsa cu e proceso pa sondea un director nobo pa FMAA cu lo tin un responsabilidad hopi grandi mirando e buraco cu tin awor aki den e departamento.


Algo hopi importante ta cu den colaboracion cu instancianan internacional lo cuminsa na implementa programanan cu lo beneficia esnan cu kier recupera. Programanan manera e famoso Minnesota Model pa menciona uno pero tambe ‘after care programs’ pa clientenan ora nan termina e programa. Tur esaki pa e cliente por tin mas ‘tools’ den su proceso di recuperacion. Naturalmente un persona ta recupera solamente si e dicidi cu e kier recupera. E ayudo cu e ta ricibi ta pa complimenta y apoya su decision.


Como parlamentario den e prome presupuesto cu nos a trata den parlamento mi a entrega un mocion pa construi na e centro un detox ruimte, esaki ta un camber cu por wordo usa entre otro den casonan di emergencia cu si un cliente tin di wordo interna, sin cu e ta stroba otro clientenan. Aki e ta wordo monitor 24 ora pa profesionalnan y lo ricibi tur tratamento necesario pa e por stabilisa pa despues continua cu tratamento di rehabilitacion. Esakinan ta puntonan chikito pero crucial pa e ayudo cu por wordo brinda na clientenan y nos ta positivo cu gobierno di awor padilanti lo acelera e ayudo cu e departamento, su trahadornan y tur cliente na Aruba ta sperando ariba dje.

Parlamentario Setty Yarzagaray ta aplaudi cu Prome Minister ta kere den y ta dispuesto pa innova aparato Gubernamental


Parlamentario Setty Christiaans-Yarzagaray tumando nota di e bishita di Prome Minister Evelyn Wever-Croes na Estonia pa participa den e e-Governance Conference, a expresa cu un e-Government na Aruba ta sumamente importante pa facilita y agilisa e proceduranan den aparato Gubernamental na Aruba. Siendo un pais chikito, e pensamento di hopi ta cu e proceduranan aki ta hopi mas facil compara cu pa paisnan grandi, sinembargo, e Parlamentario ta indica cu esaki no ta asina. Pa bin cu un idea por ta facil, pero transforme den realidad ta bira dificil mirando especialmente cu finansas pa un idea of procedura aki no ta facil pa yega na dj’e. Ademas, pa haci esaki un realidad, mester tin un Gobierno cu ta para y ta kere den sistemanan y proceduranan moderno asina y dimes ta dispuesto pa pone e placa disponibel.


Den un mundo den transformacion y digitalisacion, ta totalmente logico pa Aruba tambe para keto na esaki y sigur Gobierno pa cu su funcionamento mirando e hecho cu esaki tin su efecto pero tambe ta den cooperacion entre Gobierno, sector priva, NGO’s, etc. Mas agilisa y digitalisa e procesonan di e diferente departamentonan gubernamental, mas eficiente y efectivo e servicio ta bira y tambe mas transparente.


Biniendo for di mundo di data, e Parlamentario ta bisa cu un sistema digitalisa ta brinda mas informacion tambe cu ta hopi importante. Varios departamento, incluyendo e departamentonan bou di cuanan e Metanan di Desaroyo Sostenibel (SDGs) ta biba, tambe ta indica cu hopi biaha pa logra yega na e indicadornan y targetnan di SDGs, ta necesario pa tin mucho mas Data obtenibel. Aruba tambe ta un di e 193 paisnan cu a firma pa e metanan di SDGs di Nacionnan Uni pa logra e metanan aki pa 2030. E sistima di midi cu ta cumpli cu metanan di SDGs ta na un forma standarisa y ta un set di target y indicadornan pre determina pa Nacionnan Uni. Pa Aruba tambe cumpli, mester tin mas Data disponibel y obtenibel. Sistemanan di introduccion di e-Government y digitalisacion di procesonan den e sector gubernamental, unda cu hopi mas informacion por bira disponibel den sentido di estadisticamente, lo yuda agilisa e servicionan pero tambe ta brinda informacion cu tambe ta un plus.


“Mi ta felicita Prome Minister pa e echo cu el a wordo invita pa e conferencia importante aki di e-Government na Estonia. Como e persona cu e ta, mi sa cu Prome Minister lo trece pa Aruba e informacion y conocemento y lo purba transforma esaki den innovacion den sector gubernamental. Ohala cu e proyecto di e-Government aki por wordo ehecuta pa asina den un
termino corto y a largo plaso trece agilisacion y eficiencia den e sistema di trabou di e sector gubernamental. E mundo comercial tambe ta pidi pa esaki mirando e echo cu tin hopi ‘redtape’, hopi retraso door di diferente procedura. e-Government lo yuda agilisa esaki tambe. Di mi banda mi ta hopi positivo riba e echo cu Prome Minister no solamente a wordo invita na e Conferencia na Estonia sino tambe e tin e vision y determinacion pa yuda agilisa e sistema den e aparato gubernamental y haci e dunamento di servicio mas eficiente y transparante”, Parlamentario Setty Christiaans-Yarzagaray a duna di conoce.

​Diamars atardi, director di Banco di Seguro Social, ir. Edwin Jacobs, den presencia di hefe di Departamento di Finansas di SVb, sr. Javier Rasmijn, a haci entrega di e cuentanan anual di e fondonan administra pa SVb y e relato anual di e banco den un forma particular na Minister Dangui Oduber. Director di SVb a entrega e documentonan riba un usb stick, simbolisando asina e transformacion cu SVb ta haciendo di un organisacion burocratico tradicional pa uno moderno y digital.

Cu e entrega di e relatonan, SVb ta cumpli cu articulo 16 inciso 2 di e ley di e Banco di Seguro Social, cual ta prescribi cu prome cu dia 31 di mei SVb mester entrega esaki nan.
Director di SVb a informa Minister Dangui Oduber, cu durante 2018 e fondonan di mas importante cu SVb ta administra, esta e fondo di pension di behes y di vuides, a sigui den e proceso di recuperacion. E fondonan di e seguronan general conhuntamente a conoce un surplus di un 22 miyon florin. Cu e surplus aki, e e reserva di e fondonan ta keda fortifica. E director a mustra cu e reservanan aki ta inmensamente importante pa cubri e deficitnan cu ta premira den e di dos mitar di e siguiente decada.

Sr. Jacobs a expresa tambe su preocupacion pa loke ta e fondonan di e seguronan di trahador. E resultado di e fondonan di malesa y accidente hunto ta mustra un deficit. Sr. Jacobs a informa cu SVb ta studiando kico ta ocasionando esaki y proximamente, si ta necesario, lo presenta proposicionnan pa sanea e fondonan aki.

Sr. Jacobs a finalisa pidiendo atencion di gobierno pa maneho di absentismo den e sector publico. E absentismo den sector publico ta keda hopi halto y di parti di gobierno no tin mucho movicion pa atende cu esaki, mientras cu un parti grandi di absentismo ta comportacion. Asina sr. Jacobs a informa cu tin empleado publico cu ta notifica mas di 50 biaha den un aña y masha poco ta keda haci pa atende e comportacion aki. Ademas sa constata cu empleado publico ta notifica AO y no ta presenta pa control y departamento no ta al tanto mes.

Sr. Jacobs a informa Minister Dangui Oduber, cu SVb a calcula cu na 2011 absentismo den sector publico a costa gobierno y comunidad 28 miyon florin. Sr. Jacobs na e ocasion aki a pidi atencion di gobierno pa e asunto aki.
​
Minister Dangui Oduber na su turno a expresa su gratitud na henter e team di SVb y nan Conseho di Supervision pa a cumpli cu e ley di SVb. Minister Dangui Oduber a mustra su satisfaccion pa loke ta e resultadonan den e fondonan y ta comparti e preocupacionnan tambe. Minister tin pleno confiansa cu e preocupacionnan lo keda atendi debidamente y lo sigui percura pa fortifica e fondonan bao administracion di SVb, ya cu e fondonan aki ta contribui grandemente na bienestar di nos comunidad.

Finalisando, Minister Dangui Oduber a desea SVb hopi exito den e transformacion di nan organisacion pa uno digital.

Prome Minister Evelyn Wever-Croes ta na Hulanda den un biahe di trabou hopi cortico cu diferente reunionnan riba agenda. Pa Prome Minister, ta importante probecha di cada biahe mas tanto posibel y plania un bon agenda di trabou pa asina logra mas. Cu su biahe cortico na Hulanda, Premier Wever-Croes ta sigui pone e ehempel cu no mester tuma hopi dia afo pa logra metanan importante pa nos pais.


Durante su biahe cortico na Estonia, Prome Minister a reuni cu diferente mandatario y persona importante den e mundo di e-Governance. Y dialuna, diferente reunion cu Prome Minister tin riba su agenda durante su estadia cortico na Hulanda, a cuminsa na Den Haag.


Premier Wever-Croes a reuni entre otro cu premier Mark Rutte y cu Secretario di Estado Raymond Knops riba e tema VENEZUELA. Den nomber di Aruba, Prome Minister a entrega un peticion den man di Premier Rutte, den cual tin describi tur e retonan y riesgonan pa cu Aruba debi na e crisis di Venezuela. Tambe Prome Minister a splica con grandi e impacto di e crisis ta riba Aruba. Premier Rutte a keda impresiona cu esaki. Prome Minister a enfatisa cu e crisis di Venezuela no ta solamente di Venezuela, ni tampoco solamente di e region. E ta un crisis mundial y comunidad mundial mester ‘step up to the plate’.


“Mi a splica con serio e impacto ta riba nos pais y a splica unda Aruba mester di ayudo”.


Hulanda ta pone 23.8 miyon Euro disponible pa e islanan Hulandes den Caribe pa atende cu e impacto di e crisis. Aki mester pensa riba entre otro mas control di frontera, mas capacidad y expertisio pa atende tur e peticionnan di asilo, mas asistencia den mantene orden den nos pais, y gastonan relaciona cu e fluho grandi di migracion cu nos ta mira na nos isla.


Den nomber di Aruba y Corsou, Prome Minister Evelyn Wever-Croes a gradici Hulanda pa nan comprension y yudansa encuanto e impacto grandi cu e crisis di Venezuela tin riba e islanan menciona especialmente.