 Awe den Parlamento, 5 ley a wordo trata. Entre nan, e Ley cu ta regla pago pa e ex trahadornan di Setar.
Pa mas di 10 aña, e trahadornan a cana un caminda largo di lucha hunto cu Abogado pa nan logra haya e placa cu no a wordo paga na nan desde cu e compania di telefoon a bay over pa bira un NV. Varios biaha e trahadornan a protesta. Hasta cu cruz nan a bay manifesta contra Gobierno di Mike Eman dilanti di Bestuurskantoor y Parlamento pa asina por a haya atencion di Gobierno. Maart aña pasa, despues di a bay corte varios biaha y entama caso contra di gobierno, e ex trahadornan a gana nan caso. Hues a dicta cu gobierno mester paga nan e suma di 2.5 miyon como tambe gobierno mester paga gasto di abogado. Awor porfin Gobierno a dicidi di bin cu e ley pa paga e ex trahadornan e suma di placa cu gobierno debe nan. Y MEP ta sostene e ley aki. “MEP ta para tras di e ley aki. Nos ta sostene e ley aki. Y ta haci un apelacion na e minister pa no tarda di duna e suma aki pa paga e trahadornan. Varios no tin pensioen of entrada.Y a tarda hopi pa regla esaki y e trahadornan tambe ta wardando riba dje pa hopi tempo” Lider di MEP Sra Evelyn Wever-Croes a duna di conoce.
1 Comment
 Diamars ultimo alumnonan di klas 6 di Reina Beatrix School a bishita Parlamento. Nan tabata tin basta pregunta critico pa e Parlamentarionan, entre otro dicon nan scol no tin fin di wordo renoba, pero tin placa si pa otro cos. Tambe tabata tin pregunta dicon politiconan ta discuti asina hopi cu otro. Pa fraccion di MEP tabata presente lider di MEP Evelyn Wever-Croes y Ady Thijsen, cu hunto cu demas Parlamentarionan a contesta e preguntanan. "Mi ta aprecia cu docentenan ta trece alumnonan Parlamento pa nan mes mira y scucha. Asina nos ta trece Parlamento mas cerca di nos hobennan y ohala cu esaki inspira nan pa drenta politca ora nan ta adulto" lider di MEP a duna di conoce.  “Responsabilidad comparti” ta e formula pa mehoracion.
Problemanan social ta manera taboo den nos comunidad. Di un banda e ta asina door cu practicamente tur hende conoce otro y sea ta pa berguensa of simplemente pa motibo cu un persona no sa miho, e ta sconde e realidad y no ta busca ayudo necesario. Tambe den e maneho hiba pa gobierno actual, por mira cu ta ignora y sconde e realidad di e situacion social na Aruba y ta prefera di gasta placa na mercadeo pa pinta e cosnan bunita. Consequentemente awe nos tin un sociedad den un desbalanse social grandi y esaki ta keda refleha entre otro den e ola di criminalidad cu a bin ta suta nos Pais den e ultimo añanan aki. Na e momentonan aki, nos tin diferente instancia esencial pa e aspecto social di nos Pais trahando riba nan mes. A bira tempo pa crea un 'netwerk' unda no solamente gobierno y e instancianan ta involucra, sino tambe profesionalnan specialisa, scolnan, mayornan y rolemodelnan (deportista, artista). Cada un tin un rol clave pa contribui na e ramo social. Un netwerk asina lo percura pa miho comunicacion na un forma mas transparente y lo habri porta pa drenta den un dimension mas completo pa trece posibel solucion. Door di ta transparente bo ta crea espacio pa hunto nos reconoce y comunica e problemanan aki na un forma habri y traha un caminda nobo pa por ataca e rais di e problema. Den un forma sistematico lo tin di reestablece norma y balornan pa finalmente reconstrui nos comunidad completo riba un nivel mas halto. Formacion di e netwerk Pa uza e analogia di un cas unda e mayornan ta responsabel pa entre otro guia nan yiunan, ta e forma con un gobierno mester ta pa su pueblo. Gobierno por medio di su instancianan mester por ofrece su pueblo e hermentnan necesario, e infrastructura, e prosupuesto y alaves educanan con pa usa esakinan. Un otro aspecto cu ta interesante pa desaroya ta e involucramento di e profesionalnan mas den e comunidad, concentra pa traha den un forma mas preventivo. Kedando den e analogia di un famia, esaki ta manera e rumannan grandi cu tin e experencia y abilidad pa reconoce loke ta o ta premira pa bay robes. E lo sirbi como ehempel, rolemodel y tambe lo consehanan y duna guia pa tuma mihor decisionnan den bida. Den e netwerk tambe mester por involucra otro instancianan di nos comunidad y crea un meldpunt unda e barionan por señala unda tin problemanan prome cu esaki sali for di man. Esaki ta esencial pa motibo cu esnan den bario tin un miho contacto y mas confiansa cu otro. Tambe por cera aliansanan strategico cu partnernan den Reino y otro Paisnan cu ya ta avansa den esaki cu lo eherce e rol di contribui den e discusion y evalua decisionnan pa tin un mihor resultado. Den maneho di e gobierno actual nos a mira cu a corta den gastonan y personal specialisa entre otro na Departamento di Asuntonan Social pa menciona uno. Esaki ta algo inaceptabel y den e proximo gobierno mester evalua pa pone e profesionalnan aki bek den servicio y den nos barionan unda nan por sirbi e pueblo di berdad. Libertad den expresa Si nos kier progresa, mester kita e censura cu tin riba e Departamentonan y elimina e maneho di ‘mercadeo’ di gobierno. E realidad mester sali na cla pa con amargo cu esaki por ta. Cu e gobierno actual tin un cantidad di rapport cu sea ta keda scondi of mester cana via oficina di Minister prome cu haya aprobacion pa por wordo publica pa no perhudica imagen di e Minister. E forma aki tin di pasa pa pasado y mester duna tur Departamento cu ta envolvi, e libertad pa por splica kico e realidad di e situacion ta na Aruba. Como comunidad den su totalidad a yega ora pa nos ta transparente di nos problemanan, naturalmente respetando e privacidad di cada cuidadano envolvi y carga conhuntamente e responsabilidadnan pa mehora esaki. E problema di un, por bira e problema di nos tur y cu e mentalidad aki nos ta pone Aruba realmente Prome!  Diabierna 23, Partido MEP a drenta Dakota cu nos evento ‘Dakota P’e Cambio’ cu a resulta hopi exitoso cu respaldo di un publico grandi y bon anima. Esaki a sosode na CEDE di MEP na Dakota na unda e caminda principal a wordo cera pa trafico pa asina nos brinda e publico un celebracion unico. Candidatonan hunto cu nan ekipo di campaña y siguidornan di MEP, a reuni na diferente CEDE di MEP of na otro puntonan di encuentro pa asina yega Dakota den paradanan bon anima cu musica y pitro. E anochi a cuminsa un biaha mas cu reconocimento di baluartenan cu durante hopi aña a dedica nan tempo pa engrandece e partido. Homber y muhernan cu yen di balentia a yuda hiba e lucha hunto cu nos Libertador Betico Croes y Partido MEP. Nos graditud y aprecio ta bay na cada un di nan. John Francis Jacobs a habri e anochi bou di ritmo di steelband cu a cay na agrado di tur presente. Gruponan di baile folklorico a brinda e publico un bunita presentacion. Tambe nos tabatin un grupo di hoben cu a sorpresa e publico cu un bayle cu un cancion cu actualmente a pega hopi “Ban P’e Cambio”. Presente pa anima e anochi, nos tabatin ‘N Fuxion y Buleria. Dj Robert Yeah a entretene e publico cu su bon musica. Y candidatonan a bayla rond di pista bou di e tocamento di Massive Brassband. Nos a presenta tambe e 5 candidato nobo cu a wordo lansa unda nan a presenta nan prome discurso politico. Por spera mas di e actividadnan aki cu lo uni nos pueblo mas cu e Partido MEP. Nos ta e partido di solucion pa e pueblo aki. Aruba ta duna e señal cu nos kier cambio. Y hunto nos ta bay pa e cambio, sin miedo!  For di aña pasa December 2016 mi persona a cuminsa e proceso pa trece cambio den e kiesverordening (ley electoral). Dia 28 maart 2017 e ley di iniciativa a wordo entrega cu e cambionan di e kiesverordening. E ley cu a wordo entrega lo a haci posibel pa e candidato/politico cu mas voto drenta Parlamento di Aruba. Cu esaki nos ta kibra e tradicion cu ta a base di numeracion of sequencia di number bo ta drenta Parlamento. E deseo di pueblo ta pa mira cual ta e Parlamentario cu ta bay CONTRA nan deseo. E cambionan cu a wordo haci ta lo mas husto cu un politico por haci y esaki ta e fundeshi di un democracia. Un democracia ta funciona a base di mayoria y di mesun manera un miembro di parlamento mester wordo escohi. No por ta asina cu tin miembro di parlamento tin 47 voto y ta yama su mes representante di pueblo. Ora bo ta yama bo mes representante di pueblo ta pasobra realmente bo ta representa voz di pueblo den Parlamento. E cambionan aki ta elimina por completo e fenomeno di politiconan sin voto cu ta drenta Parlamento. E momento di berdad a yega pa parlamentarionan di AVP pa wak si nan ta para pa cambionan progresivo cu ta na biniestar di nos democracia of ta para pa haya lift pa drenta den Parlamento. E proceso aki a tuma hopi tempo y nos a yega den e etapa culminante. Lamentablemente nos tin cu informa comunidad di Aruba cu durante un reunion di comision central di Parlamento, fraccion di AVP a TRANCA e proceso di ley aki y dicidi di wanta e ley aki y hink'e den lachi pa asina e no wordo trata promer cu eleccion. Sin por a argumenta y sin ningun rason a pone un paro na deseo di pueblo. Durante e reunion di comision central mi persona a propone pa pone fecha 28 juni 2017 pa miembronan di parlamento por haci pregunta riba e ley y asina e ley lo ta cla pa wordo trata den un reunion publico. Fraccion di AVP NO a bay di acuerdo cu esaki y a bisa cu nan kier scucha opinion di gobierno y nan kier conseho di SER. Fraccion di AVP sea no ta presenta na trabou of no ta haci nan trabou pasobra for di aña pasa 19 december 2017 un carta a wordo manda pa Promer Minister Mike Eman pa puntra gobierno riba su sentimentonan y opinion referente e ley aki. Pa e ultimo 4 añanan aki ningun ley cu wordo trata den Parlamento un conseho a wordo puntra na SER. Simplemente Mike Eman a instrui su parlamentarionan pa tranca e proceso aki y pone un paro na dje pa asina e ley aki no bira un realidad. Tur 12 Parlamentario di AVP tin miedo di e ley aki pasobra nan sa cu si e ley aki bira un realidad ningun di nan lo por regresa den Parlamento. Pueblo lo sa di huzga e partido AVP durante eleccion 22 september pasobra ora como partido bo ta bay liña recta contra deseo di pueblo, bo lo wordo huzga! Esaki ta un otro motibo valido pakico NO mester vota pa partido AVP!    Ora nos ta papia di e balor di arte pa nos comunidad, ta bon pa defini kico exactamente por wordo considera como ‘arte’. Arte ta e concepto cu ta incera tur creacion traha pa un persona por medio di imaginacion y abilidad pa por expresa beyeza of poder emocional. Actividadnan creativo manera entre otro pintamento, obra di man, baile, musica, arte di palabra, fotografia y tambe actuacion.
Diferencia den e situacion socio-economico Durante e ultimo 8 añanan, nos por a mira e situacion socio-economico riba nos isla deteriora. Mirando cu e costo di bida a aumenta drasticamente mientras cu e salario den averahe a keda igual, e structura familiar a conoce cambionan grandi. Mientras cu den pasado un mayor por a keda cas cu e muchanan pa fungi como guia y sosten, awor hopi famia no por disfruta di e luho aki mas. Cu tur dos mayornan trahando, hopi biaha e yiu lo mester siña e responsabilidad y madurez na un edad mucho jong pa asina e por cuida su mes. Cu e extra presion y expectativa poni riba e mucha, ta bira dificil pa e por continua cu su desaroyo psicologico y emocional. Muchanan cu ta biba den situacionnan asina por bira vulnerabel pa adopta comportacion negativo y arte por fungi como un forma pa saca e tension aki mientras ta crea algo special. Arte como e idioma di mucha y hoben Muchanan cu ta pasando den dificultad no tur ora ta posee e capacidad pa expresa nan mes verbalmente. No lo ta facil pa un mucha expresa cu palabra cu e no ta sinti’e bon, ni tampoco lo e ta dispuesto pa bisa directamente cu un persona a caus’e dolor. Arte ta habri un linea di conversacion cu solamente door di haci pregunta, bo no lo logra. Arte no ta solamente un forma di expresion, pero por fungi como e canal pa por yega na haci un topico cu normalmente ta dificil, pa uno mas accesibel y confortabel pa un mucha. Door di crea e espacio aki pa por expresa nan mes, e mucha lo sinti alivio y trankilidad. Pa percura pa e bienestar di nos muchanan y hobennan den futuro, mester crea un plataforma di arte den nos scolnan, na tra’i merdia y den nos barionan. Como candidato hoben riba lista di MEP, lo mi para tras di e tantisimo beneficionan cu arte por tin pa nos comunidad. Lo mi percura pa semper sostene proyectonan artistico y presenta diferente plannan realistico cu por haci’e accesibel pa mas mucha y hoben por desaroya nan talentonan artistico.  Aruba den gara di manipulacion di AVP! Cu AVP ta bay den historia como e partido cu mas ta fomenta mentira y manipulacion den e pais aki, esey ta un realidad cu nos tur ta experencia cada dia mas y mas. Un di nan mentiranan di mas grandi ta cu ta nan a logra Status Aparte pa Aruba, siendo cu tur hende sa cu ta e partido aki a pone trampanan den caminda di nos Libertador pa logra esaki. Algun otro mentira ta cu nan lo elimina e Impuesto di Solidaridad di 8.2%, cu nan lo elimina e BBO di 3%, cu nan lo baha e prijs di awa y coriente cu 51% etc. Y awor ya ta algun siman caba cu nan a bin cu e mentira cu durante e ultimo 8 añanan Gabinete Eman a renoba 80 scol den tur districto di Aruba. Figurabo, 80 scol! Renobacionnan ficticio Ta pesey partido MEP a bay analisa cuanto scol di SKOA, SPCOA y di gobierno nos tin actualmente den e pais aki y nos a yega na e siguiente cifranan: 25 scol preparatorio, 36 scol basico, 5 scol pa enseñansa special, 14 scol secundario y 3 scol pa enseñansa mas avansa (EPI, IPA y Universidad). Den total nos tin 83 scol na Aruba. Pues ta increibel con un partido politico por trata di manipula mente di pueblo cu practicamente tur scol, esta 80 scol a wordo renoba durante e ultimo 8 añanan. Ta ken ainda por kere e set di mentirosonan aki? Y pa comproba e mentira flagrante aki di AVP, siman pasa nos por a tende e directora di SKOA declara cu ta solamente 2 scol di SKOA a wordo renoba durante e ultimo añanan, esta Colegio San Antonio y Rosa College y cual scol ainda ta bao renobacion.  Estado deplorabel di scolnan
Alavez e directora aki a declara cu varios ta e scolnan di SKOA cu a haya solamente un man di verf, un cura construi y algun tambe a haya un capa di asfalt riba speelplaats. Awor si esaki partido AVP kier cualifica como renobacion di scolnan, anto tur hende por mira un biaha mas nan alto grado di manipulacion y trocemento di realidad. Echo ta cu mayoria di scolnan ta den un estado deplorabel, e.o. Colegio Frere Bonifacius “Car Wash” ta pesta di adictonan ambulante y ta den cay den otro. Y recientemente Colegio Pius X na Dakota a bay den welga mirando e situacion cu e alumno y maestronan mester traha aden. Pero manera semper e gobierno di AVP tin su prioridadnan completamente robez y ta prefera di hinca placa y haci debe den ponemento di klinker pa yuda sponsor grandi di campaña. Y te ainda nan no por splica pueblo kico nan a haci cu e 2.7 biyon florin extra cu nan a haya y ranca malamente for di pueblo durante e ultimo 7 añanan. Renobacionnan real Realidad ta cu durante 2001 pa 2009 (Gabinete Oduber) un y tur por mira e siguiente renobacion di scolnan na Aruba: Paulusschool, Commandeur Pieter Boerschool, Graf van Zinzendorfschool, Maria Regina school, Colegio Sagrado Corason, Colegio Laura Wernet, Sint Jan kleuterschool, Sint Aloysiusschool, ex-Mater Dei school, Maria College, Rosario College. Y pa no papia mes di tur e scolnan cu gobierno di MEP a construi, locual Gabinete Eman no a haci durante e ultimo 8 añanan. Finalmente, lo ta bon pa e manipuladornan di AVP bin padilanti y indica nomber di tur e scolnan cu berdaderamente a haya un renobacion completo durante e ultimo 8 añanan, pero pa nan no inclui den e lista e scolnan cu a haya solamente un cura construi, un man di verf of un capa di asfalt. Nos pueblo ya ta suficiente inteligente pa compronde tur e manipulacionnan aki di AVP.  Bienestar di Aruba ta nos prioridad. Diabierna 23di juni, durante nos gran evento di Dakota P’e Cambio, MEP a prensenta e ultimo 5 candidatonan nobo cu a wordo lansa riba nos lista victorioso pa eleccion 2017.
Pa Partido MEP cada candidato riba nos lista ta un lider berdadero. Cu hopi entusiasmo MEP ta completa su ekipo cu lidernan nobo pa e lista victorioso pa eleccion 2017 dia 22 di september. Cada un di nan lo enfoca riba e mehoracion di nos pais den diferente areanan. JEREHM CAMPBELL TERENO DI ENFOKE: SOCIAL Trahado Social den e area di salubridad publico y cuido mental y adiccion Jerehm tin educacion y experiencia amplio riba e tereno di salubridad publico y principalmente riba tereno di cuido mental y adiccion. E la studia enfermeria na Aruba y a termina su estudio na Hulanda den enfermeria social psychiatrico. E trabou cu Jerehm ta desplega diariamente aki na Aruba, a pone realisa cu tin hopi problemanan social y hopi hobennan den adiccion cu ta bayendo den mal direccion. E nececidad pa un mehoracion den nos sistema y ta parti di e cambio pa miho a dun’e e empuhe pa e subi riba lista di Partido Movimiento Electoral di Pueblo y traha pa e pais aki riba e tereno social principalmente. DARLAINE GUEDEZ-ERASMUS: TERENO DI ENFOKE: FAMIA Trahado Social den e area di combatimento di adiccion Darlaine tin 5 aña di experencia trahando den un fundacion na unda e ta deal cu hopi problema di famia y hobennan den adiccion. E ta considera su trabou no solamente su trabou sino su pasion. Su vision ta pa enfoca primordialmente den e famia y hubentud. E situacionnan alarmante cu Darlaine ta experencia diaramente door di problemanan den cas y e famia, a motiva Darlaine pa tuma e decision pa drenta politica y postula riba lista di Movimiento Electoral di Pueblo pa di e manera aki yuda na e miho forma cu e por. SHARLENE STARKE: TERENO DI ENFOKE: ENSEÑANSA 12 aña ta dedica na educa nos muchanan di scol basico. Vision di Sharlene ta pa establece un sistema di educacion moderno y innovativo den nos enseñansa y crea un “home away from home”. Maestronan ta pasa un gran parti di nan bida cu nos yiunan y lo tin hopi balor si nos sistema di educacion sinti manera un hogar pa nos muchanan y docentenan. Sharlene a subi riba lista di MEP pa contribui na e cambio. Pa haci e cambio aki realidad, ta importante pa leynan wordo cambia, revisa y ahusta. Tambe mester bin un restructuracion den tanto edificionan como den maneho y asina brinda un miho calidad di bida pa cada mucha aki na Aruba. DAPHNE LEJUEZ: TERENO DI ENFOKE: ECONOMIA 20 aña doño di un compania di mercadeo exitoso y ex Presidente di Camara di Comercio. Daphne ta uni su mes na e fila di MEP pa contribui cu su conocemento y experiencia na un vision innovativo pa e desaroyo economico di nos pais. Su deseo ta pa Aruba conoce un economia productivo cu ta den balansa di e bienester general di nos tur y lo logra esaki a base di innovacion, educacion y un maneho profecional objetivo. Su vision ta pa desaroya Aruba su potencial economico creando un fundeshi solido pa un economia sostenibel pa awe y mañan. Plan di desaroyo socio economico pa esnan mas vulnerabel den nos comunidad y desaroyo y modernisacion di educacion y infrastructura tecnologico. HENDRIK TEVREDEN: TERENO DI ENFOKE: SOCIAL Hoben cu ta dedica na contribui na cambia bida di hobennan cu a cay den adiccion Hendrik a inicia su carera politico na 2005 ora e la subi riba lista di Partido MEP. Despues di a bay dos eleccion, el a tuma un break pa asina dedica tempo na su famia y estudio. Awor e ta cla pa tuma e reto un bes mas y lo participa den eleccion 2017! Hendrik ta un hoben studia den e ramo di enfermeria. Den e ramo di trabou aki e la concentra riba e tereno di adiccion. Hendrik tin un afinidad remarcabel pa e ramo aki y tin un curason grandi pa sirbi su prohimo. Den transcurso di tempo Hendrik a haci un estudio biblico na Hulanda y a continua cu su dedicacion na contribui na cambia bidanan perdi den e abismo di droga y adiccion. Cu e candidatonan aki Partido MEP ta sigui demostra liderazgo cu vision y ta ofrese un lista cu e liderazgo nobo cu Aruba merece. Lidernan inspira, motiva y cu amor pa nan patria Hunto nos lo bay pa e cambio cu Aruba ta pidi pe. 22 di september, deposita bo confiansa den Partido MEP y permiti e ekipo aki traha na bienestar di e comunidad.  Na un gran forma den presencia di famianan, candidatonan y prensa, Lider di Partido MEP, sra Evelyn Wever-Croes a introduci un candidato nobo riba nos lista victorioso pa eleccion 2017. Ta trata aki di un candidato cu ya ta halando masha hopi atencion especialmente den e bario di Dakota, y cu sigur lo duna un realse na e lista di partido MEP. Ta trata aki di Hendrik Tevreden. Hendrik no ta un desconoci riba e arena politico y professional. El a inicia su carera politico na 2005 ora e la subi riba lista di Partido MEP. Despues di a bay dos eleccion, el a tuma un break pa asina dedica tempo na su famia y estudio. Awor e ta cla pa tuma e reto un bes mas y lo participa den eleccion 2017! Hendrik Wensley Gregory Tevreden ta naci na Aruba na aña1979. E ta yiu homber di Humphrey Tevreden (qepd) y Reina Toppenberg for di cual e ta esun menor despues di su ruman muhe. Hendrik a lanta cu su famia den bario di Tarabana y despues a biba na Dakota pabou. Un persona hopi special tambe pa Hendrik ta Sra. Mirtha Maduro kende e ta considera di ta manera famia y ta masha stima p’e y su yiunan. Awe Hendrik ta casa cu Vanessa Tevreden-Rumnit y hunto nan ta mayornan di dos yiu muhe. Despues di a termina MAVO, Hendrik a scoge pa drenta e ramo di enfermeria danki na conseho di un docente. Den e ramo di trabou aki e la concentra riba e tereno di adiccion. Hendrik tin un afinidad remarcabel pa e ramo aki y tin un curason grandi pa sirbi su prohimo. Den transcurso di tempo Hendrik a haci un estudio biblico na Hulanda y a continua cu su dedicacion na contribui na cambia bidanan perdi den e abismo di droga y adiccion. Adiccion no ta algo desconoci p’e, el a biba di cerca e consecuencia di a lanta den un famia cu problema di adiccion. Sinembargo cu e ayudo di Dios el a sa di supera e retonan cu un infancia asina ta trece cu ne. Finalmente como profesional Hendrik a termina e estudio 'Maatschappelijk Gezondheidszorg' riba nivel HBO y ainda tin ambicion pa sigui amplia su conocemento. “Partido MEP ta demostra liderazgo cu vision y ta sigui expande su ekipo cu lidernan nobo cu experticio den diferente areanan. Lidernan inspira, motiva y cu amor pa nan patria, e liderazgo nobo cu Aruba merece. Partido MEP ta yama bonbini na Hendrik. Hunto Aruba henter ta bay p’e cambio": tabata palabranan di Evelyn Wever-Croes na e ocasion aki. Aruba ta e unico pais den Reino cu ta canando atras considerablemente riba e tema di integridad16/6/2017  Ayera e reunionnan interparlamentario a continua na Den Haag. Un di e puntonan poni riba agenda tabata e tema di integridad. Esaki ta di dos dia cu e tema aki ta wordo trata.
Partido MEP a presenta un nota cu MEP a presenta ya desde aña 2014 y a adapta na aña 2015. Lider di MEP, Evelyn Wever-Croes ta elabora riba esaki: “Den e nota aki, mi a splica cu Aruba ta e unico pais cu ainda ta canando atras considerablemente riba e tema di integridad. Nos no tin un ley di financiamento pa partidonan politico. Consecuentemente tin placa ta drenta campaña politico especialmente den e partido na mando. Nos sa cu e hendenan cu ta financia gobierno no solamente ta hinca hopi placa sino nan ta pidi fabornan a cambio. Lamentablemente no tin un ley pa frena esaki. Nos no tin un ley drechi di “screening”. Aunke cu dos siman pasa un ley a wordo aproba den Parlamento, pero esey tabata mas bien pa acomoda e minister cu actualmente ta wordo sospecha di corupcion. Basicamente no por bisa cu esaki ta un ley di screening drechi sino un berguensa pa Aruba cu nos tin dicho ley. Tampoco nos tin un codigo di conducta di minister y parlamentarionan cu ta instrui of dedica na elimina cualkier impresion y percepcion cu un minister of parlamentario ta wordo cumpra pa esnan di baho mundo. Den e codigo di conducta mester wordo inclui kico ta e sosten financiero cu e politiconan ta haya y con e placa aki ta wordo registra. Tambe si e politico tin otro trabou of otro entradanan. Aruba ainda no conoce e leynan aki. Tampoco nos tin leynan cu ta proteha ciudadanonan cu kier denuncia actonan di corupcion. Un ambtenaar cu tin prueba di corupcion di un minister, no por haci un denuncia pa motibo di miedo pa wordo persigui y perde nan trabou. Ta pa e motibo aki nos kier bin cu leynan manera e Klokkenluidersregeling y Ombudsman pa duna proteccion na ciudadanonan cu kier bin dilanti cu kehonan of cu ta victima di corupcion of ladronicia. Ta di lamenta profundamente, cu tabatin un conferencia tocante Ombudsman di e islanan di Caribe na unda Aruba tabata ausente. Y ya a wordo demostra caba cu Aruba lo no cumpli cu e plazo di 1 di juli pa por tin un defensor di pueblo, un Ombudsman. E gobierno na mando claramente no tin niun interes den e leynan aki. Pesey pa Partido MEP, ta di gran importancia cu nos a haya e oportunidad den constelacion di Reino den e reunion di IPKO pa trece e temanan aki padilanti. Y un bes mas, a keda prueba cu Aruba ta e isla cu ta cana mas atras den e demas paisnan di Reino. Especialmente cu awo cu nos ta pasando e berguensa grandi di e caso di un minister cu ta bou investigacion. Y esaki mester cuminsa pone e presion riba AVP pa nan cuminsa actua. Sint Maarten, Corsow y Hulanda si tin e asuntonan aki regla. Hunto nos a palabra cu nos lo sigui intercambia di opinion y traha riba e puntonan aki cu mi a menciona. E tema di robo di asiento ta bin acerca. Ora cu un parlamentario declara su mes independiente, tambe ta wordo considera pa paisnan den Reino como algo contra integridad. Medidanan mester wordo tuma riba esaki tambe”. Sra Wever-Croes ta termina bisando: “Ainda tin hopi trabounan cu mester wordo haci. Sinembargo, mi ta contento cu e presion ta keda riba Partido AVP pa sigui traha riba e temanan aki. Mi no ta perde speransa cu pronto nos lo bay haya e leynan aki pa garnatisa cu nos pais tambe ta bay haya gobernantenan integro. Si no logra prome cu cambio di gobernacion, despues di 22 di september cu MEP drenta den gobierno, nos lo percura pa tur e leynan aki wordo introduci y asina nos brinda e pueblo gobernantenan integro. Hendenan cu ta bisa loke nan ta haci y haci loke nan ta bisa”. |
Archivo
October 2020
|
RSS Feed