E di 35 ‘Annual Tourism Conference Aruba’ (ATCA) a inicia oficialmente, unda partnernan di Merca y tambe Canada tabata presente. Minister Dangui Oduber, mandatario encarga cu turismo tambe tabata presente y a hiba un discurso elocuente pa tur esnan presente.

“Mi ta contento pa raporta cu nos industria di turismo ta sigui gosa di exito, den un tempo na unda cu biahamento pa Caribe a bira masha popular, specialmente despues di un temporada di horcan devastador na 2017. Y aunke e competencia ta uno fuerte, Aruba ta sigui mantene su mes como un di e 5 islanan mas bishita den Caribe, sin laga afo di ta number 1 den e aspecto di bishitantenan repetitivo”, Minister Dangui Oduber a cuminsa na expresa.


E mandatario a splica cu e mercado dominante ta sigui di ta esun Mericano, unda na 2018 por a mira un ingreso di 6.7% compara cu aña 2017, cual ta traduci na 750 mil turista, di e total di 1,082,000 di e asina yama ‘stay-over visitor’ (turista cu a keda drumi 1 anochi of mas na Aruba). Pa loke ta añanan 2019 y 2020, tur indicador ta mustra cu e mercado aki lo sigui crece, Minister Dangui Oduber a sigura. Aruba mester ta orguyoso di su mes segun e mandatario ta continua den su discurso, como cu “na 2018, e nivel di satisfacion di nos turistanan tabata na 77%. E indicador aki cu a ser midi pa A.T.A., ta demostra cu nos ta riba un bon ruta cu turismo”.


Minister Dangui Oduber ta bisa cu Aruba su exito den turismo ta ser midi door di e percepcion y felisidad di Aruba su residentenan. Minister Dangui Oduber: “Como e di dos nacion na mundo cu mas ta depende di turismo, nos ta balora masha e felisidad di nos hendenan local. Ta nan ta e e curason y alma di e industria di turismo y ta nan esfuerso ta loke ta garantisa un calidad halto pa loke ta e experencia di e turista aki na Aruba.”


Durante su discurso e mandatario encarga cu turismo a duna di conoce cu lo sigui cu e maneho actual, unda ta inverti pa atrae turistanan di calidad. Minister Dangui Oduber ta splica cu ya caba a tuma pasonan necesario, manera entre otro reapertura di e Visitor Information Center na San Nicolas, desaroyo di Baby Beach, desaroyo di Port of Aruba (waf) den un Port City, e Malmok Boardwalk y mas. Sin laga afo cu danki na e desaroyonan aki, sector priva tambe ta haciendo su parti, invertiendo den productonan nobo y atractivo. Tur esakinan ta loke ya caba ta y lo bay sigui duna su fruto pa loke ta e experencia unico cu Aruba ta ofrece su bishitantenan.
​

Na final di su discurso, e mandatario a gradici cada un socio den e industria di turismo pa e trabou cu nan ta haciendo. “Nos exito nunca lo a wordo logra si no ta pa cada un di e hotelnan, operatornan di tour, A.T.A. y cada un persona of compania cu ya sea di forma directo of indirecto a traha den e industria aki. Nos ta aprecia e contribucion di cada un y lo sigui di ta agradeci na e lealtad y amistad brinda na Aruba”, Minister Dangui Oduber a bisa.

E Plan Nacional pa atende cu cachonan di caya porfin a bira realidad. Despues cu e ley di cacho a wordo introduci 5 aña pasa, awor tin un maneho concreto pa atende cu cachonan di caya. Killcage ta wordo elimina y Dog Act Shelter ta wordo crea. Cu e maneho aki ta bin tambe campañanan di sterilisacion pero principalmente di conscientisacion pa doñonan di cacho sa nan responsabilidad como cuidadonan di cacho.


Prome cu dicidi pa tuma un cacho of un puppy of cualkier animal domestico, mester realisa cu tin hopi responsabilidad cu`ne: cuminda adecuado, cuido veterinario, gasto pa no contribui cu mas cacho riba caya (steriliza of capa) etc. Pero tambe por dicidi cu keda sin tuma un cacho tambe por ta un escogencia responsabel, si di antemano bo sa cu bo no tin tempo p’e, ni e manera di provee un cuido adecuado p’e.


E forma con ta mata bestia na e kill cage ta totalmente inaceptable. Y berdad por tin varios persona kendenan lo bisa cu tin hopi otro tema cu mester haya prioridad den nos pais aworaki. Esaki ta berdad, pero nos no por sigui tolera e forma cruel cu e kill cage ta opera.


Prome Minister Evelyn Wever-Croes a cita e dicho di e gran Mahatma Ghandi kende a yega di bisa: “E grandesa di un nacion por wordo husga na e forma cu e animalnan den e nacion ta wordo trata”.


Prome Minister a gradici Irene Croes y Dellanire Maduro kendenan a traha duro pa asina e Plan Nacional keda cla. Tambe Prome Minister a gradici Ministernan Dangui Oduber, Andin Bikker y Otmar Oduber pa e cooperacion den esaki.

Diamars anochi, Prome Minister Evelyn Wever-Croes a atende e charla contra abuso sexual di mucha na Biblioteca Nacional. E charlanan aki ta wordo organisa den serie pa Fundacion Lisette Gomez y APG. Gobierno di Aruba tambe a partner up cu e dos gruponan aki pa asina hunto lucha contra abuso di nos menornan. Prome Minister durante e charla a duna un discurso riba e tema di abuso di mucha.


Pa lucha y stop abuso di mucha, nos no por keda warda riba castigo mas. Mester cuminsa na e comienso. Mester cuminsa na prevencion y educacion. Den esaki, e pakete di material pa scol cu tin awo ta un ayudo grandi na unda cu via e material aki, muchanan di scol ta siña pa bisa ‘NO’ ora cu nan wordo acerca inapropiadamente. Bisa no, core bay y bay keh’e!


Tambe mayornan mester wordo brinda mas informacion sea ta den encuentronan na unda cu ta toca e tema aki ampliamente cu expertonan den e veld aki of den informacionnan cu ta obtenibel online entre otro. Un cos ta sigur cu e informacionnan aki no por keda scondi. E tema aki mester wordo papia, prevencion mester wordo educa tanto pa mayor como pa muchanan.


Mayornan, famia, bisiña, comunidad henter, ora cu a constata cu un abuso di un mucha a tuma luga, mester actua lihe. Apesar pa mayornan, esaki ta un shock indudablemente, y hopi cos por pasa den e cabes pero un hende mester tuma accion. Den tur caso di sospecho, mester tuma accion lihe. Ta conoci cu ta solamente 3 biaha den 16 aña cu a haya caso na unda un mucha a papia den 72 ora. Esaki pa motibo cu no a tuma accion lihe y pruebanan a bay perdi. Pero ora cu tuma accion lihe, investigacionnan por wordo haci lihe y asina lo obtene miho prueba. Despues cu tin prueba di abuso sexual di menor, lo mester tambe duna asistencia na e mayornan y di e muchanan. E parti di investigacion cu lo sigui tambe mester bay lihe pasobra den nos mundo huridico, ora di tarda cu un caso, e castigo ta cuminsa baha, haciendo asina cu e malechornan, segun e sistema, ta haya menos castigo.


Ora cu un caso di abuso di menor yega corte, e hues solamente por yega na castigonan halto ora cu e tin un file riba casonan cu ta bon hinca den otro cu pruebanan despues cu tur procedura wordo cana. Esaki ta un ‘approach’ holistico cu mester tuma. Subiendo castigonan, pero esey no ta tur. Tin hopi cosnan na caminda cu nos mester traha riba dje. Gabinete Wever-Croes ta trahando riba dje y tin e speransa cu pronto esaki por keda cla pasobra, mirando loke ta pasando, cada dia esaki ta bira dimas.


“Nos sa cu e problemanan social den nos comunidad ta grandi, y cu lo tuma tempo prome cu claridad vence scuridad. Sinembargo nos Gobierno kier manda un señal hopi cla y determina na tur esnan concerni; cu e actonan aki ta condenable y ta contra derechonan humano y no ta existi ningun hustificacion pa esaki”.

E siman aki, Fundacion Anti Droga Aruba (FADA) conhuntamente cu Mental Health Caribbean tabata den un training intensivo pa loke ta bay bira e programa di B-Smart. Cu sosten di Ministerio di Turismo, Salud Publico y Deporte, e programa aki, cual ta uno di conscientisacion riba salud mental ta enfoca riba e parti preventivo di salud mental, lo wordo brinda na muchanan di klas 5 y 6.

Minister Dangui Oduber, como mandatario encarga cu Salubridad Publico, a splica cu despues di 8 aña cu FADA no a ricibi nada extra pa traha den e parti preventivo, awo porfin ta alocando e fondonan necesario pa haci esaki. E mandatario ta sigui splica cu e parti preventivo di salud mental ta parti integral di e maneho cu e ta hibando y pesey a aloca placa for di e Sociaal Crisisplan pa FADA por opera manera mester ta. “Si nos no inverti den e muchanan awe, e lo por tin consecuencia grave pa futuro. Na tur manera cu por inverti den e desaroyo di nos muchanan, ya sea fisico of mental, nos lo haci esaki sin duda”, Minister Dangui Oduber a expresa.

Programa B-Smart E
programma B-Smart, ta un programma cu a ser desaroya pa Novadic-Kentron, pero a ser completamente adapta pa FADA y Mental Health Caribbean pa asina e por cuadra cu e situacion di Caribe Hulandes (Aruba). E adaptacion ta uno situational caminda nos muchanan por reconoce nan mes den e situacionnan cu ta ser presenta den e programma aki.

E programa riba su mes ta basa riba cuater (4) aspecto: Alcohol, humamento, droga y gaming & internet. E enfoke pues ta riba e parti di adiccion, principalmente di forma preventivo. Esakinan ta ser duna durante cuater (4) siman consecutivo na e muchanan. E idea di e programa ta, pa e ta uno interactivo, den cual lo toca diferente topico manera peerpressure, uzo di substancianan y mas. Di e forma aki kier logra prepara e muchanan pa tuma decisionnan responsabel y di forma consciente pa situacionnan cu ta bay presenta den nan bida diario ora cu nan yega scol avansa.

Durante 45 minuut di les, e muchanan lo pasa cada siman riba un topico. Cu cada siman nobo, nan lo inicia ta repasa locual a ser papia e siman prome, pa asina controla si nan a compronde e materia of si nan a logra papia di e temanan cu nan mayornan. Hopi bes e metodo aki ta trece cu ne reaccionnan sorprendente cu ne.
​
Cu e programa di B-Smart, kier haci e mucha ta consciente di e situacion di cual e ta ser rondona. E presion di grupo ta algo cu nan lo confronta tur dia, ya sea na scol, ,den amigonan y te hasta na cas den famia. Pa medio di ta consciente di esaki, ta haci cu finalmente nan lo por tuma un miho decision pa nan mes.

Dialuna tempran mi por a tuma nota cu parlamentario Arthur Dowers a habri siman cu mi nomber den su boca y unda su persona a referi cu mi persona a pidi un bijeenkomst pa protega Minister di Enseñansa Rudy Lampe. Mi ta lamenta cu un parlamentario y alabes un ex minister no por bin dilanti y papia e berdad ta con a logra yega na e bijeenkomst aki.


Reunion di comision central
Dia 14 di juni 2019 a drenta un manifiesto di Traimerdia. Mi persona cu tabata na pia di trabao a baha y ricibi esaki y unda cu mesun dia den comision central di enseñansa, mi persona como vice voorzitter a dirigi un reunion unda cu nos tabatin docentenan di SPO na parlamento y den mesun reunion como di dos punto di agenda nos a atende
e manifiesto di Traimerdia. Den e reunion aki e comision a dicidi cu nos lo kier un Openbare Vergadering pa asina aclaria e situacion actual cu Traimerdia y SPO ta pasando aden. Pero lamentable ta si cu Dowers manera semper no a show up pa trabao y mucho menos ta busca pa informa su mes y un biaha mas ta demostra su incapacidad.


Escogencia di bijeenkomst
Mi preferencia tabata un reunion publico pero den bista cu e tempo transcuri cu a yega e fecha di 18 augustus 2019 y cu e agenda yen cu bishita na parlamento di scolnan y tambe cu tin parlamentarionan cu lo mester bay IPKO dia 19 y 20 di juni, riba mi insistencia na presidente di Parlamento Ady Thijsen y sigur gradiciendo su persona, por a bin cu un bijeenkomst den oranan di merdia riba diaranson 19 di juni. Por medio di e bijeenkomst aki e minister por a duna contesta y tambe su maneho p’asina esnan cu ta traha na Traimerdia y SPO por sa con cos ta para y sa si nan por ta conforme of nan no ta conforme y por sa kico nan lo haci.


No tin seriedad ni compromiso
E seriedad y wega politico a resalta na comienso di e reunion unda cu partido di oposicion AVP a sali pidi pa cambia e reunion pa uno publico, cu mas bien tabata un blof pasobra si nan tabata serio den esaki Dowers mester a pidi tur su 4 coleganan cu pa su mayan ta biahando pa IPKO, pa cancela nan buelo manera diferente colega di fraccion di MEP a haci dia 19 pa por ta presente na e bijeenkomst cu pa nos si tabata algo importante. Pasobra pa por a cambia e bijeenkomst pa un reunion publico mester tabatin e compromiso cu por tabatin quorum, no e merdia ey so pero tambe mester por tabatin e quorum pa e siguiente dia pasobra e reunion aki lo a bira uno maratonico y cu su mayan mester a sigui. Pero no lo tabatin quorum debi cu mayoria lo tabata biahando pa Hulanda y no a bin ningun peticion di fraccion di AVP pa cancela nan biahe pa Hulanda si enberdad nan tabata kier un reunion publico, pero mas bien nan tabata tin e maleta den auto cla pa biaha su mayan.


Pa termina, mi no ta hunga wega infantil y populista manera Dowers y AVP y ta p’esey e pais aki ta asina na werki. A yega ora si pa madura pasobra si bo tabata kier un reunion publico y cu enseñansa ta asina importante mester a pidi pa cancela e biahe di IPKO pa nos atende e reunion publico.

Parlamentario Endy Croes ta expresa su opinion fuerte contra e actitud di Hulanda y CAFT. Desde 6 di juni Parlamento di Aruba a trata Ley di LAFT nobo cual lo rigi desde 1 di januari 2019 te cu 2021. E ley aki lo drenta na vigor momento gobierno present’e na Gobernador y Gobernador firm’e y asina ratifica e Ley aki pa e bira uno valido. Esaki ainda ta den proceso. E Ley anterior di LAFT cual AVP a aproba dia 27 di augustus 2015 contra conseho di Raad van Advies cual a splica hopi cla cu e ley di LAFT ta uno anti constitucional, pues contra nos constitucion y a termina december 2018 y pues no ta valido mas.


CAFT roncando morto na soño
Por tuma nota den e Protocol nobo di november 2018 na punto wijziging di LAFT art 2 tambe a duna atencion na e parti aki stipulando: “Uiterlijk 31 December 2018 wordt door Land Aruba een ontwerp Landsverordening tot wijziging van de LAFT aan de Staten aangekondigd.” Pues ilustrando e preocupacion di Hulanda pa e ley cu a termina na 2018 cual ta ancra den dicho protocol y kier mira un LAFT nobo pa asina nan por tin un base legal na momento di toets Aruba. Parlamentario Endy Croes pa su asombro a tuma nota di un carta di CAFT na Minister Xiomara Ruiz Maduro data 20 di juni 2019 unda CAFT awor ta menasa cu CAFT lo conseha Hulanda pa duna Aruba un aanwijzing. Hustamente CAFT kendenan tabata “ronca” morto na soño desde 2015 bin ariba unda e piratanan di AVP bou nan nanishi di CAFT y cu nan supervision di panlefi a percura pa nos finansas publico bay den su patarata. Bou supervision di CAFT nos debe a redobla y nos GDP a alcansa 93%. Bou supervision di CAFT Aruba awe mester paga 232 miyon florin solamente na interes en ‘U zat erbij te kijken’.


Ilegal den CAFT
Locual ta indigna Parlamentario Croes mas ainda ta cu hustamente Henk Kamp kende te cu dia di awe ta ILEGAL den CAFT - contra Ley y contra nos constitucion! - ta forma parti di esnan cu kier conseha Rijksministerraad pa duna Aruba un aanwijzing. Het kan verkeren! Henk Kamp tabata un minister di VVD na Hulanda pa hopi aña y Henk Kamp mester por sa mucho mas mihor. Henk Kamp ta keda ilegal te dia e Ley nobo wordo firma cual awor ainda no ta e caso. Parlamentario Croes ta pidi pa ban trata otro cu respet si. Con CAFT por tribi di skirbi den su contesta fecha 20 di juni 2019 na Minister Ruiz Maduro na toelichting punto 5: “De Minister handelt hiermee in strijd met art 14 lid 3 van de LAFT.” Pues CAFT ta referi na un ley cu e mes a bulldoze cu Henk Kamp. Abo kier referi na artikel den ley? Croes ta puntra CAFT: “Que hubo di Henk Kamp y art 4 lid d di e mesun ley aki?” Henk Kamp ta en pugna cu e artikel aki?


Tono di carta di CAFT inaceptabel
CAFT lo por duna su recomendacionnan alrespecto esaki den su proximo carta? Art 4 lid d di LAFT ta prohibi te ainda pa un ex politico forma parti di CAFT. Cual midi Hulanda ta usa ora di lesa un ley? Pa ‘spek en boon’ ta traha ley na Aruba? Of Hulanda por trapa riba ley manera nan haya ta bon? Parlamentario Croes ta bisa cu e carta di CAFT di 20 di juni 2019 ta uno inaceptabel primordialmente e tono cual el a bin skirbi apodera pa un ilegal den CAFT. Aruba a corigi algo constitucionalmente siguiendo conseho di Hoge College Raad van Advies y esaki tin Hulanda awor rabia y ta usa CAFT pa haci e trabou sushi?
Croes ta termina cu un mensahe pa CAFT y Hulanda: Boso drecha den boso propio cas promer cu boso kier drecha cas di otro. Nos ta di acuerdo cu e supervision den cuadro di ley manera el a wordo corigi awor y ta di pensamento cu respet mutuo nos por traha cu otro. Ban laga sano huicio prevalece!

Recientemente e titular di e cartera di Transporte, Minister Chris Romero, a reuni cu e management di Arubiana Fun Toys, kendenan ta representa un asociacion di huurdonan di vehiculonan tipo UTV cu a lanta no mucho tempo atras. Intencion di e reunion aki tabata pa hunto cu e companianan cu ta huur vehiculonan UTV, purba yega na un maneho integral pa loke ta huurmento di e vehiculonan aki.


“Mi por bisa cu tabata un combersacion sigur hopi positivo. Nos sa cu den e ultimo temponan tin cierto noticianan menos positivo ta sali afor cu ta involucra e vehiculonan UTV specificamente. Pa cu esaki nos a dicidi di reuni cu e asociacion di UTV aki, cu por cierto a lanta 1 luna y mei atras, pa asina hunto nos delinia un maneho poco mas consciente pa loke ta uzo di UTV den nos zonanan turistico pero cu ta zonanan di naturalesa cu ta protehi tambe”, tabata palabranan di Minister Romero na final di e reunion aki.


Minister Romero a keda satisfecho di mira e iniciativa di parti diferente compania cu ta huur vehiculo UTV pa lanta un asociacion pa asina hunto busca maneranan pa soluciona e accionnan negativo cu ta bin ta saliendo den medionan di comunicacion ultimamente. “Mi a keda contento di mira nan iniciativa pa lanta un asociacion pa purba yega na solucionnan pa cu e problematica cu ta presentando ultimamente pa cu e UTV’s, pero tambe hopi agradecido di a wordo invita pa sinta cu nan pa haya splicacion di nan plannan y con nan ta funcionando actualmente”, Minister Romero a sigui bisa.


Minister Chris Romero a haya un splicacion amplio di e diferente tecnologianan cu e companianan cu ta forma parti di e asociacion aki ta uzando y con nan ta instrui e turistanan prome cu nan bay over na huur cualkier vehiculo nan nan. “Mi tabatin e oportunidad di mira con algun di e companianan aki ta funcionando. Cierto di e companianan aki ta operando na un manera sumamente responsabel y e ta algo di aplaudi y di aprecia. Mi por a mira con nan ta haci uzo, por ehempel, di GPS pa asina mantene e vehiculonan na bista tur momento. Esaki ta wordo haci pa seguridad di e mesun manehador y paseheronan, pero tambe pa sigura cu nan no ta bay core den areanan di naturalesa cu ta prohibi pasada di cualkier vehiculo”, Minister Romero a sigui bisa.


Hunto cu Ministernan di Turismo, Husticia, Infrastructura y Medio Ambiente, Minister Romero ta sondeando tur posibilidad pa por bin cu cierto cambionan y regulacionnan den ley cu lo sirbi como herment pa tanto e autoridadnan competente y e companianan cu ta brinda e servicion aki, evita mas posibel pa destruccionan na nos naturalesa di e indole aki sigui tuma lugar. “Nos ta biba den un pais cu ta depende di turismo como prome pilar economico. Nos mester por mantene producto Aruba atractivo pa nos bishitantenan, pero esaki no por lubida cu nos mester proteha nos medio ambiente pasobra nos mesun turistanan ta gosa di esaki tambe”, e responsabel di e cartera di Transporte a finalisa bisando.

Minister di Deporte sr. Dangui Oduber ta elabora riba su maneho di deporte cu ta regarda e facilidadnan deportivo na Aruba. E mandatario a trece dilanti cu tin un proyecto pa mehora e facilidadnan deportivo, no solamente esnan cu ta resorta bou di FFD. E idea ta pa tur deporte na Aruba tin minimo un facilidad deportivo cu ta cumpli cu e exigencia internacional. Locual a sosode cu Centro Deportivo Fans Figaroa y Centro Deportivo Guillermo Trinidad unda CONCACAF a desaproba e stadionnan aki pa tene weganan internacional, pa motibo cu no ta cumpli cu e normanan internacional. E mandatario a expresa cu esaki no por sosode mas referiendo na e 2 stadionnan.


E facilidadnan deportivo lo bay wordo categorisa den 10 categoria pa e deportenan cu ta wordo practica na Aruba, despues cu e inventarisacion di e deportenan tuma lugar lo por adapta e categorianan. Un otro cos hopi importante ta pa separa e facilidadnan den nan situacion legal. Por ehempel cua facilidadnan ta cay ta resorta bou di FFD, sportvereniging, Centronan di Bario, stichting of persona/instancia priva. Tur esaki ta pa trece transparencia y pa garantisa cu e fondonan ta ser uza pa deporte, asina e mandatario a trece dilanti. Cada deporte tin su criterianan pa tene cuenta cune pa cumpli cu e norma internacional.
​

Minister Dangui Oduber a splica cu si logra haya tur e fondonan necesario lo bin cu un proyecto extra cu ta incera cu lo bay pone cancha syntetico na e clubnan cu bin na remarke. Actualmente Gobierno di Aruba ta conta cu financiamento di Fundacion Lotto Pa Deporte, Federacion internacional, NGO’s y Gobierno mes. Den maneho di e Gobierno anterior nunca a zorg pa mantene facilidadnan deportivo cual a haci cu awor esakinan ta den un mal estado. Minister Oduber su maneho ta pa promove participacion den deporte y pa haci esaki mester percura pa nos facilidadnan ta den bon estado. Deporte mester ta accesibel pa un y tur na Aruba especialmente pa nos ser femeninonan, hoben, handicap y nos grandinan asina e mandatario a expresa.