Recientemente Hunta di Comisario y Gerencia di ANSA (Air Navigation Services Aruba) NV, a haci entrega oficial di nan cuenta anual 2018 na Minister Chris Romero.
Haciendo entrega di nan cuenta anual 2018 na e titular di e cartera di Transporte, ANSA NV ta cumpli cabalmente cu e statutonan di e compania.


“Mi ta satisfecho di por mira den e cuenta anual aki cu ANSA NV tin cifranan positivo y ta proyectando di keda stabil pa e siguiente añanan. Un otro compania estatal cu ta demostrando di ta cumpli cu e deseo di Gobierno pa cu nan maneho den a area di aviacion”, tabata palabra di Minister Chris Romero na ocacion di e entrega di ANSA NV su cuenta anual 2018.

Despues di un prome edicion sumamente existoso, cu un acogida masal cerca nos turistanan y hendenan local, e di dos edicion di Island Festival ta priminti di ta grandi un biaha mas. Cu mas di 20 tent cu lo ofrece cuminda local y internacional pa satisface e apetit, San Nicolas lo ta un biaha mas e centro di ambiente agradabel dia 26 di juni awo di 7’or pa 10’or di anochi.

Durante e di dos edicion, publico presente ta bay disfruta di entre otro Robin & The Rebels cu Jeremy Bonariba, kendenan lo ta saliendo for di e High Rise Area pa bin toca musica interncional den centro di e actividad. Massive Brass Band lo tey pa tembla tur hende riba e ritmo di asambeo. Tambe lo tey presente Dj Jeimy, kende lo trece e toke di weekend candela candela den e evento. E anochi ta bay wordo cera cu Buleria, pa forma un ambiente Arubiano unico, cu sin duda lo ta bon un experencia pa e turista. Pa entretene tur esnan presente durante e anochi, bo lo haya como maestronan di ceremonia Ruben ‘Scorpio’ Garcia y Maicky ‘Campo’ Oliva.
​
Tur persona ta keda invita pa bin experencia Island Festival un biaha mas. No keda afo di e dushi ambiente, memey di un di Aruba su districtonan cu ta rico na cultura, esta San Nicolas. Tuma nota cu e entrada ta gratis y cu por acepta solamente placa cash. Apart di cuminda, lo tin barnan bon surti cu bebidanan tipico Arubano!

​E siman aki Minister Ruiz-Maduro a reuni cu sr. Pascal Thierry Clivaz, director suplente di Universal Postal Union (UPU) cual ta e agencia intergubernamental specialisa di Nacionnan Uni cu ta percura pa coordina e maneho postal di e Paisnan miembro y tambe pa e sistema di post cu ta wordo usa na henter mundo. 

Tabata un bishita ameno y hopi informativo den cual sr. Thierry Clivaz a splica riba e beneficionan cu UPU ta ofrece na su miembronan, e retonan cu ta vislumbra y e oportunidadnan cu esaki ta trece cune. Sr. Thierry Clivaz a splica cu UPU no solamente ta percura pa e sistema postal por traha eficientemente entre e Paisnan, pero tambe ta concentra riba inclucion financiero brindando acceso financiero na esnan cu dificilmente por tin acceso na servicio financiero. UPU kier yuda 'bank the unbankable.' Hunto cu esaki UPU ta ofrece un sistema automatisa di pago cu por wordo usa ora ta trata di e-commerce. Di e manera aki UPU kier facilita e cuidadano of e companianan chikito y mediano cu no tin acceso na sistema di pago online, manera por ehempel PayPal, cu un sistema di pago universal pa por haci uso di e-commerce. Pa Aruba unda cu 90 % di companianan ta chikito of mediano, un alternativa di pago asina sigur lo ta deseable pa asina por tene gasto di transaccion abou.

Un di e motibonan di UPU su bishita den nos region tin di haber tambe cu e noticia cu Merca lo kier retira su miembrecia for di e union postal cu ta data di aña 1874 y esaki por tin consecuencia serio pa e continuidad di e servicio postal regional ya cu por ehempel Miami ta un hub importante pa post pa nos region. Ta bin aserca cu asina cu un Pais no ta forma parti mas di e union postal, e Pais no lo por usa e sistema universal di post mas y esaki lo trece desavio sigur pa e Paisnan na mundo y sigur den nos region cu ta conta riba e conectividad aki.

Minister Ruiz-Maduro a gradici sr. Thierry Clivaz pa su bishita y e informacion importante cu a ser comparti y a brind'e un recuerdo di Aruba.

Gobierno cu pasonan sigur pa prepara nos muchanan pa trabounan di futuro

E Mo-B Tech Lab ta e bus technico cu Gobierno di Aruba a introduci aña pasa. E prome aña escolar di e Mo-B Bus aki ta yegando su final. Prome Minister Evelyn Wever-Croes, a duna un relato amplio di tur loke a wordo haci cu e Mo-B Lab den e aña escolar aki.

E Proyecto di Mo-B tech Lab a wordo introduci den october 2018 cu e intencion pa crea un metodo nobo pa siña muchanan cera conoci cu ciencia y tecnologia y kico tur nan por haci den forma mas den wega y creativo. Mo-B Lab tawata antes un bus di Bibliobus cu a wordo transforma den un bus innovativo y educativo cu ta haci’e sumamente interesante cu ta hala atencion di nos muchanan.

Mo-B Tech Lab ta un Proyecto di innovacion di Futura cu ta e Lab di innovacion cu ta encarga pa ehecuta e vision di Gobierno di Aruba y ta bou di encargo di Prome Minister. Futura den colaboracion cu Metabolic Foundation; fondonan di OCTA (Union Europeo) cu a contribui cu 75%; Biblioteca Nacional di Aruba; y e aporte di e Ministerio di Educacion, Ciencia y Sostenibilidad.
Mo-B Tech Lab a bay na diferente centro di Traimerdia. Un total di 6,000 persona incluyendo muchanan, profesornan, mayornan, y administradornan, a participa den e programa di Mobile Tech Lab (Mo-B bus).

Na prome instante e proyecto piloto aki mester a tuma luga na Traimerdianan so, pero ora cu e scolnan a realisa cu e bus tawata un exito, nan mes a cuminsa pidi si Mo-B Bus por pasa bishita nan. Studiantenan aki na Aruba tin e oportunidad pa bishita e Mo-B lab y siña con leuk y satisfactorio lo por ta pa crea un prototipo, desaroya, explora, siña y experimenta cu ciencia y tecnologia. E proposito di Mo-B lab tambe ta pa atrae nos futuro generacion di profesornan pa explora diferente manera di siña les. A traves di e Bus, Gobierno ta spera di lanta e interes den e muchanan pa traha cu technologia y tambe pa e docentenan mira con facil muchanan ta siña a traves di tehnologia enbes di e sistemanan convencional di duna les.

Durante e proximo simanan, e Mo-B lab lo participa den varios actividad y kamp pa mucha den e vakantie benidero. E obhetivo di e programa aki durante vakantie ta pa entre otro:

1. Sigui traha riba e fundeshi pa e diversificacion di Aruba su economia door di pone muchanan bira mas interesa den ciencia, tecnologia, ingenieria, y matematica, y

2. Prepara studiantenan pa e habilidadnan di e siglo 21 cu por influencia e sistema di educacion si tin interes di e studiante y profesornan.

Como parti di e Mo-B Lab, tambe tin un trailer cu a wordo transforma den un ‘Mobile Makerspace’ completamente sostenibel cu ta situa na Biblioteca Nacional na Oranjestad. E trailer ta yena cu ekipo cu lo incentiva exploracion y trece ideanan na bida. Pronto tambe lo tin un ‘Mobile Makerspace’ na San Nicolas.
​
“Mi ta hopi contento cu esaki ta un proyecto cu nos a finalisa y cu ya caba ta cumpliendo un aña. Esakinan ta e pasonan chikito, pero cu impacto hopi grandi treciendo nos muchanan den contacto cu ciencia y tehnologia. Esaki ta e caminda pa futuro. E metodonan cu ta wordo aplica tur dia ta cambiando constantemente. Tehnologia ta transformando hopi lihe. Nos no sa ki tipo di trabounan lo existi den algun aña, pero si nos sa cu mas di mita di muchanan cu awo ta den scol basico lo bay traha den trabounan cu ainda no ta existi. Pa e motibo aki, Gobierno ta buscando e manera pa prepara nan. A traves di Mo-B Tech Lab lo haci esaki posibel”, Prome Minister Evelyn Wever-Croes a duna di conoce.

Diahuebs atardi, e scol pa muchanan special Scol Dunun Man a bishita Bestuurskantoor. E muchanan contento y yen di entusiasmo a wordo ricibi pa Prome Minister Evelyn Wever-Croes y Minister Xiomara Ruiz-Maduro. Ambos mandatario a hiba palabranan pa e muchanan y a contanan den manera simpel kico tur ta encera e trabou di Gobierno.


Mayornan y leidsternan di e scol a trece nan preocupacion dilanti di e mandatarionan. Un preocupacion grandi di e mayornan ta cu e muchanan special cu ta cabando e temporada di scol na Scol Dunun Man no tin luga pa sigui siña despues. Gobierno di Aruba tin un comision cu ta enventarisando con miho por asisti nos muchanan special. Un stap importante ta pa inclui e muchanan aki na scolnan adecua y ekipa pa cuida muchanan special. Tambe mester bin un bon plan pa despues di scol e muchanan aki tin un luga bon pa keda mientras nan mayornan ta traha. Ora nan drenta e edad hoben, mester percura tambe pa despues cu nan caba scol, nan por wordo inclui den un scol di ofishi. Tambe mester studia e posibilidad pa nan drenta scolnan regular. Y di e manera aki, tambe por asegura un futuro trabou pa nan.


“Pa Gabinete Wever-Croes inclusion tin prioridad. Pa cua motibo tambe e comision ta avansando cu pasonan sigur cu e proyectonan di inclusion y ta inventarisando loke ta e necesidadnan y prioridadnan cu Gobierno mester haci den termino corto, mediano y largo pa asina yena tur buraco cu tin habri ainda. Y ora cu ta asina leu, lo ancra e derechonan di nos hendenan special den un ley pa den futuro gobiernonan tene nan mes na e compromisonan cu nos hendenan special. Esaki ta un paso hopi importante den e direccion pa brinda un miho calidad di bida na esnan mas vulnerable den nos comunidad”, Prome Minister Evelyn Wever-Croes a enfatisa.

E siman aki Minister Ruiz-Maduro a ricibi bishita sr. Ramon Koffijberg di Curaçao Investment and Export Development Foundation (CINEX).

Motibo di e bishita ta cu Sr. Koffijberg a bin informa y extende na Minister Ruiz-Maduro un invitacion pa e Smart Investment Summit cu ta wordo organisa pa CINEX dianan 28 y 29 di augustus proximo na Santa Barbara Resort na Corsou. Lo tin 14 orador internacional cu ta expertonan cu lo bay elabora riba con inovacion y tecnologia ta e futuro y asina crea un strategia pa ‘smart investment’. Durante di e Summit aki tambe lo ta un excelente oportunidad pa intercambia di idea y ‘matchmaking’ cu varios expertonan internacional.

Minister Ruiz-Maduro a haci uso di e oportunidad tambe pa ofrece informacion riba Aruba su Maneho Economico, di cual parti di su vision ta pa stimula inversion local y di exterior pa logra un economico sostenibel y balansa. Alabes Minister Ruiz-Maduro a elabora riba e 6 Sectornan Prometedor pa diversifica economia di Pais Aruba.
​
Na final di e bishita ameno aki, e mandatario a gradici Sr. Koffijberg pa e invitacion y a desea CINEX hopi exito cu nan di cuater edicion di Smart Investment Summit.

Parlamentario Endy Croes recientemente por a tuma nota di un articulo unda Parlamentario Hulandes Andre Bosman awor kier yora pa decision cu Parlamento di Aruba a tuma riba Ley di LAFT. Unico cos cu a pasa ta cu a corigi e ley di acuerdo cu conseho di Hoge College Raad van Advies. Mi pregunta na e mucha homber di Middelburg esta Andre Bosman ta cu si Hulanda tabata den un posicion igual y cu Raad van State a duna boso cierto consehonan constitucionalmente cu mester wordo corigi na cual banda bo lo a para cu bo consenshi? Pa haci lo corecto toch?


Unda Bosman tabata desde 2010?
Segun Bosman cu despues cu Tweede Kamer a reuni cu Knops den un “kamercommissie” ta ilustra cu ta anticipa cu e decision di Parlamento (pa haci lo corecto constitucionalmente) esta a “schakel uit” mediante Ley LAFT e cuestion cu CAFT no ta raporta mas na Rijksministerraad pero awor na Parlamento di Aruba, como cu e ta un Landsorgaan, esaki lo trece consecuencia negativo riba reputacion di Aruba. Parlamentario Endy Croes ta puntra e Bosmannetje unda bo tabata ta desde 2010 momento cu AVP a cuminsa destrui y torno na nos finansas publico? Unda bo tabata ta ora cu MEP a entrega e rapport Feestvierend ten ondergaan? Kico bo a haci como Parlamentario di Tweede Kamer alrespecto e rapport aki? Bo tabata sa bon bon kico tabata pasando toch? Bosman ta compronde si cu ta debi na e tolerancia di Hulanda AVP a desgracia e pais aki? Unda Bosman tabata ta na 2014 momento cu AVP a ricibi un KB? Dicon Bosman no tabata brabo suficiente pa cuestiona CAFT desde 2015 y cu bou di supervision di CAFT (Rijksministerraad) a laga Mike Eman baila boso y tuma henter Rijksministerraad haci redoblandondo e debe unda awe Aruba ta pega den su strop cu un interes di 232 Miyon pa aña? Bosman ta kere cu esaki ta husto?


Pronto economia lo cuminsa florece
Bosman sa cuanto school nos por a drecha cu e placa cu mester bay solamente na interes esta 232 MIYON pa aña? Bosman sa con nos por a inverti den e parti social cu tambe AVP a destrosa lagando atras un crisis? Bosman no ta sinti pena con su amigonan di AVP a destrui e isla chikito aki? Je zat erbij te kijken. Awe bo kier ta de braafste jongen in de klas. Aruba a hiba un lucha pa Status Aparte pa su autonomia. MEP a mustra di por a atende na un manera responsabel cu entre otro finansas publico. Den 2018 den tur dificultad a cera aña cumpliendo cu e begroting sin mester a presta placa extra manera AVP tur aña tabata haci. Si Hulanda kier a yuda di berdad tin otro manera cu nan por a yuda y no hunga pa watchman of watchdog cu un zweep para cla pa suta un pueblo. Nos tin e fe y confiansa di lo sali for di locual nos a hereda, no mas esaki lo tuma su tempo. Pronto economia lo cuminsa florece y nos entradanan lo aumenta unda finalmente lo cuminsa paga e debe di Mike Eman y AVP. Esaki ta e motibo primordial. Mike a grita cu e ta orguyoso di e debe y e debe t’ey pa futuro generacionnan bay pag’e.


Parlamentario Endy Croes ta termina bisando, Andre Bosman pa e siña duna respet y bo lo haya respet y asina nos por traha manera hende grandi cu otro. No kere lanta mainta grita y kere cu nos lo spanta aki banda. Laga esaki ta bon cla.

Den cuadro di e decision tuma na fin di 2018 pa locual ta e transicion pa kita BBO for di e recibo, parlamentario Daphne Lejuez a enfatisa cu su persona fungiendo su trabao como parlamentario y despues di a comunica cu stakeholders, a entrega un ley di iniciativa pa debolbe transparencia di BBO y prijs den e recibo te ora cu tin claridad riba kico ta bay pasa cu e segundo parti di e reforma fiscal, cu e BBO actual, pero tambe despues cu mas sondeo keda efectua riba e posibel efectonan di e decision pa kita e BBO for di e recibo.


“E hecho cu a kita e BBO for di recibo y ley awo ta exigi pa inclui esaki den prijs di articulo of servicio, ta conduciendo awor aki na un percepcion cu e BBO ta wordo scondi y por conduci na incrementonan di prijsnan di benta den articulonan y servicio, y di e forma aki aumenta costo di bida y di haci negoshi innecesariamente tambe,” e parlamentario ta comenta. Parlamentario Lejuez ta haya e situacion aki uno hopi indeseabel, particularmente si considera cu e segundo fase di e reforma fiscal cu mester a keda introduci aki un siman, esta 1 juli 2019, te ainda no a wordo anuncia. E incertidumbre aki tambe ta crea falta di confiansa cerca e consumidor, manera por a constata den comunicado di Banco Central cu a señala un caida di confiansa pa e prome kwartaal di 2019. E ultimo 12 añanan e consumidor a custumbra di wak e BBO riba su recibo, y awor no sa kico e cambionan proponi lo nifica pa su situacion financiero te cu fin di aña, pero tambe pa e comerciante esaki ta preocupante, ya cu e no por planifica kico su gastonan di negoshi lo bay ta.


Ley di iniciativa pa debolbe transparencia riba BBO y prijs
Mirando tur e confusion, falta di transparencia y aumento di prijs cu kita e BBO for di recibo y pone riba e prijs di producto ta trece cu ne, cu a opta pa por medio di un ley di iniciativa, por lo pronto, draai bek e decision tuma na december pa kita e BBO for di recibo y pone den prijs. Esaki te ora cu tin mas claridad tocante e reforma fiscal den su totalidad, pero tambe despues cu un analisis wordo haci di e efectonan di e decision aki y su posibel consecuencianan pa nos economia y pa e consumidor. Pa loke ta trata e consecuencianan pa esnan cu ya caba a haci e cambio, esakinan lo ta minimo, mirando cu prome cu e ley pa kita BBO for di recibo a keda introduci, antes semper e empresario tawata tin e opcion di pone e BBO den e prijs of riba recibo. Pues esnan cu a haci cambio caba, no mester bolbe haci cambio.


E ley aki a keda entrega diaranson 20 di juni na Parlamento pa e cuminsa cana e trayecto consultativo y por spera di por ricibi esaki bek aki 6-8 siman pa e por wordo trata segun parlamentario Lejuez. Claro cu semper e opcion ta keda na e mandatario pa tuma un decision pa di su banda tambe suspende e ehecucion di e ley aki te na un otro aviso.
Na final di dia e intencion di e iniciativa di ley ta pa trece transparencia y claridad bek y sigura cu ni e consumidor, ni e sector priva sinti su mes perhudica.