“Ningun hende tin derecho di mishi cu partinan intimo di un mucha. Abo tampoco” Diabierna Parlamento unanimamente a aproba e ley cu a aumenta e castigonan maximo pa abusadonan sexual. Prome Minister Evelyn Wever-Croes a duna di conoce cu desde comienso di e gobernacion aki a bin ta trahando constantemente riba leynan y proceduranan pa percura pa castigonan hopi mas severo pa abusadonan. Pero tambe riba prevencion, cu ta hopi importante. Enfaticamente Prome Minister a expresa di ta condena abuso sexual di mucha y desde su entrada den politica na 2009, el a uni na e causa aki participando na tur marcha pacifico cu tabata tin desde e tempo ey pa e tema aki. Na e comienso di Gabinete Wever-Croes, mesora a nota cu mester a pone prioridad na e veld social, pa cua motibo tambe mesora a cuminsa traha riba e problematica aki.

CRISIS PLAN SOCIAL
Gobierno a introduci e Crisis Plan Social pa traha riba prevencion. Esaki a encera campaña di conscientisacion, sistema digital pa sigui tur mucha pa detecta abuso trempan, fortifica e sistemanan social y di enseñansa pa yuda e victimanan, y hopi mas. UNICEF tambe a asisti den esaki. Gobierno no solamente a prepara plan, Crisis Plan Social, pero Gobierno a pone mesora 34 miyon florin disponibel pa ehecuta e plan aki, entre otro pa combati abuso sexual.

CASTIGONAN MAS HALTO
Siman pasa diabierna Parlamento unanimamente a cambia e leynan di abuso sexual y tur castigo a bira mas halto, mescos cu Corsou, St Maarten y Hulanda. Algun a redoble, otronan a triplifica. Gobierno anterior a tene e castigonan mas abou na Aruba, locual ta incomprendible. Pero awor Parlamento a coregi esaki. Minister President tabata tin palabranan di elogio na tur 21 Parlamentario di nos pais cu a uni pa e causa importante aki.

Tambe ta alarga e periodo cu e delito ta caduca. Esaki pasobra sa pasa cu muchanan no ta durf papia te ora nan ta adulto, pero e ora e delito a caduca. Cu e cambio awor den Parlamento e periodo ta wordo alarga y na adulto si tin prueba bo por cera e abusado.


99% DI ABUSO SEXUAL DI MUCHA, E ABUSADO TA FAMIA OF CONOCI!
Gabinete Wever-Croes ta haciendo tur posibel pa atende cu e problema delicado aki. Sinembargo, ta alarmante e cifra y informacionnan obteni di casonan di abuso di mucha. 99% di casonan na unda muchanan ta wordo abusa sexualmente, ta wordo abusa door di personanan cu e victima conoce. E por ta un amigo di cas, of amiga of amigo di mama y tata, pareha nobo, door di omo, door di welo, of padrastro. Esakinan ta personanan cu ta cerca di e
​
muchanan y kendenan e muchanan ta confia. Personanan kendenan a mayornan a confia pa laga nan yiunan den nan cuido. Esaki ta un indicacion fuerte cu e problema mas serio no ta ley, Gobierno of hues.

​ E problema mas serio ta den famia. Eynan nos mester enfoca. Eynan Gobierno no por drenta facilmente. Esey ta responabilidad di cada famia. Por cambia tur ley pero si den famia e abuso sigui te hasta wordo permiti y tolera, nos ta sigui faya nos muchanan. Prome Minister Evelyn Wever-Croes: “E problematica aki no ta facil sino mas bien hopi delicado. Pa nos combati e fenomeno aki cu ta un crueldad enorme contra un mucha, nos tur mester haci’e. Nos por cuminsa pa evita 99% di e casonan aki door di wak miho cu kende nos ta laga nos yiunan y reconoce señalnan den e mucha of den esnan cu ta wak pa e mucha. E resto, lag’e den man di Gobierno.

​Cu e ley cu a pasa den Parlamento, lo percura pa castigonan hopi mas severo pa abusadonan. E periodo pa e delito caduca a wordo cambia pa asina no ta importa cuanto tempo pasa, si tin prueba, e abusado lo haya su castigo. Y ni un abusado mas lo por sali liber prome cu su tempo. Nos ta haci nos parti, awor abo mester haci di bo. Y mi tin un mensahe pa e abusadonan: Ningun hende tin derecho di mishi cu partinan intimo di un mucha. Abo tampoco! Y si bo haci’e toch, conta cu nos ta bin pa bo, sin miedo, y sin piedad”.

Diabierna mainta durante conseho di minister a ser aproba e ley “Landsverordening beperking tabaksprodukten”. Den pasado Sr. Marlon Sneek di AVP a entrega e ley aki pero e no tabata completo. Minister Oduber kier a gradici sr Sneek pa presenta e concepto di ley aki cual sigur tawata na su lugar.

E ley cu ser presenta no tawata uno completo y nos a trek in e ley cu Sr. Sneek a entrega y a haci e cambionan debido y a presenta un concepto nobo.

E ley ta ensera lo siguiente:
• Prohibicion general pa huma den areanan publico pa proteha salud di hende y descurasha humamento.

• A percura pa tur e definicionnan necesario a wordo duna locual ta haci e implementacion mas eficiente.

• A aumenta e edad pa por cumpra sigaria di 18 pa 21 aña.

• Mayornan cu ta huma den compania di un menor di edad ta core riesgo pa haña multa. Esaki ta pa proteha e salud di menornan di edad contra e huma di sigaria.

• Companianan mester percura pa proteha e salud di su trahadornan tambe.

• Lo ser prohibo pa parti sigaria por nada y pa bende sigaria los.

E ley aki a wordo amplia y adapta di un manera cu e ta contene tur e elementonan necesario pa por logra e meta di proteha salud di e pueblo en general (secondhand smokers) y pa descurasha humamento na Aruba. Di e manera aki tambe nos como pais lo cumpli cu e exigencianan di e Framework Convention on Tobacco Control di Organizacion Mundial di Salud (WHO) y cu nos Plan Nacional di Action riba Prevencion di Non-Communicable Diseases (NCDs). Asina Ministerio di Salud ta sigui traha pa salvaguardia e salud di nos hendenan.

Minister Oduber a splica cu si un persona kier stop di huma e por acudi na su dokter di cas cu por dune tratamiento pa esaki, si ta necesario. Cerca e POH (praktijk ondersteunende huisarts) e por haya conseho y un “motiverende gesprek”. E persona por haya guia tambe cerca Consultorio pa Asuntonan di Adiccion (CAA). Como alternativa tin dos otro instancianan na Aruba cual ta Aruba Hypnosis Center y tambe Agencia Adventista di Desaroyo y Recurso Asistencial) cu ta un organisacion humanitario. Si bo ta huma mas cu 10 biaha pa dia of bo ta huma dentro di e prome 30 minuutnan despues cu bo a caba di lanta for di soño, tin hopi chens cu bo lo cai den remarce pa medicamente por medio di bo dokter di cas.
​
Minister Dangui Oduber ta conseha pa esnan cu no ta huma, no cuminsa. Pa esnan cu ta huma, pa acudi nan a dokter di cas. Door di stop di huma, bo ta reduciendo e riesgo pa un evento vascular cu 70%. Tambe Minister kier recorda cu tur persona tin e derecho di ta “SHS – Free” den areanan publico. E ley aki a wordo aproba pa conseho di minister y a bay pa raad van advies pa despues bay Parlamento pa por wordo ehecuta. Pidi esnan cu ta huma rond dibo pa por fabor no huma den sercania di bo yiunan y/o di bo mes. Proteha bo mes di no bira victima di humado pasivo asina Minister Oduber a expresa.

Diahuebs Minister di Turismo, Salubridad Publico y Deporte Sr. Dangui Oduber a reuni cu Sr. Michel Lopez y Sr. Walter Maduro di Stichting Centro di Bario Santa Cruz. Den e reunion aki e fundadornan di e stichting a presenta un bunita proyecto na Gobierno. Stichting Centro di Bario Santa Cruz a wordo funda na aña 2017 cu e meta pa realisa un Centro di Bario den Santa Cruz.

Minister Oduber ta aplaudi e idea di e proyecto pa bin cu un centro di bario den Santa Cruz. Den e proyecto ta menciona cu e meta ta pa e centro di bario wordo uza pa muchanan entre 8 pa 18 aña di edad. Nan lo por kies pa haci entre 2 pa 3 deporte cu ta promove pa nos hobennan hiba un bida saludabel. Apart di esaki e stichting su plan tambe ta pa por brinda brinda huiswerkbegeleiding na e studiantenan, duna nan un sandwich despues di scol y duna cursonan pa adulto. Pa haci esaki posibel e stichting tin mester di lokalnan di klas estilo prefab, pa es motibo e stichting a acudi serca Minister Oduber pa mira con por yuda cu esaki.
​
Minister Dangui Oduber ta apoya proyecto caminda ta promove nos hobennan pa hiba un bida saludabel door di practica deporte.

Prome Minister Evelyn Wever-Croes, Minister Dangui Oduber y Sra Ronella Tijn a Sjoe-Croes, CEO ATA durante e conferencia di prensa di Gobierno di Aruba diaranson anochi a enfoca riba e preparacionnan cu a y ta tumando luga pa e siguiente fase cu nos ta bay drenta aden, esta apertura di fronteranan. Prome Minister a enfatisa cu den e normal nobo, Gobierno di Aruba ta haci tur esfuerso pa nos comunidad ta sigur y ta pidi tres cos di cada un di nos.


“Nos tawata prepara caba ora e crisis a dal nos dia 13 di Maart y nos tawata tin un strategia di test agresivo y tawata tin tur cos in place pa asina nos a evita cu e virus a sigui plama. Aworaki nos ta miho prepara pa e siguiente parti cu ta bin nos dilanti. Practicamente casi tur sector di nos economia ta habri, tur hende tin e movecion liber riba nos pais, nos tin mas di un luna cu nos ta COVID free pues nos ta prepara pe siguiente fase cu ta habri nos frontera.


Manera Minister Dangui a bisa, nos a tuma na cuenta tur e recomendacionnan cu nos a haña di instancianan y nos ta cla pa bay na normalidad bek. Mi ta ripiti nos no ta bay nunca mas na e normalidad bek sino na e normalidad nobo. Den e normalidad nobo nos ta haciendo tur di nos parti pa abo ta sigur pero di bo nos mester di tres cos.


E prome ta pa bo atene bo mes na e regla di distanciamento, no yega cerca di hende, ni brasa, sunchi of duna man. Tene distancia pasobra bo no sa si e por tin e virus y si bo ta cerca lo bo por haña hopi facil e infeccion of virus.


E di dos ta pa bo mantene e reglanan di hygiena. Laba man frecuentemente of uza handsanitizer. E metodo aki a prueba di ta sumamente efectivo pasobra ultimo lunanan mayoria di nos masha poco a bira malo.


E di tres ta si bo tin un sintoma porfabor yama bo dokter di cas pa bo haci un cita pa haci e test. Asina nos por detecta na tempo si bo tin e virus pa asina por isola e virus y evita cu e ta plama.


Esaki ta e tres cosnan cu nos ta pidi dibo pa drenta e siguiente fase cu ta bay habri otro siman”, Prome Minister a termina ta bisa.

Durante e conferencia di prensa di Gobierno di Aruba diaranson anochi, Prome Minister Evelyn Wever-Croes a anuncia e decision cu lo habri dos sector mas di nos economia, cual ta casino y deporte. Entrante Diasabra 27 di juni tur deporte ta bay wordo permiti incluyendo deporte di contacto y competencianan di deporte. En conexion cu reapertura di nos fronteranan, Casinonan tambe lo wordo permiti pa cuminsa opera manteniendo si na e orario di ciere cu ta 11’or pm.

Premier Wever-Croes ta haci un apelacion na tur ciudadano pa por favor mirando cu placa ta hopi schaars y cu hopi famia ta depende di subsidio di salario, di FASE of di pensioen, pa no bay haci tanto uzo manera antes di casinonan caminda hopi placa ta wordo gasta. Gobierno lo ta mas estricto tambe den loke ta control di personanan local cu ta bishita casino y lo limita esaki ehecutando un control mas estricto.
​
“E ta di suma importancia pa enfatisa cu e ta den nos man pa hunto nos sigui trata na evita cu e virus aki ta lanta cabes bek cu e consecuencia cu e lo plama”, Prome Minister a termina bisando.

Despues cu e investigacion di caso “Flamingo” a wordo publica, Premier Evelyn Wever-Croes a duna su prome reaccion.


“Nos Gobierno ta para pa integridad y den esaki Ministerio Publico tin un papel hopi importante. Ministerio Publico ta un instituto autonomo cu tin e responsabilidad di investiga casonan penal.


Den e caso aki nos lo duna Ministerio Publico espacio pa investiga y pues lo no duna comentario awor. Importante ta pa investigacion sigui su rumbo y pa trece claridad den e acusacionnan.
Y si despues resulta cu esnan cu ta wordo investiga a comete actonan contra ley, nan mester carga nan responsabilidad.


Mas y mas ta keda demostra cu na Aruba nos institutonan ta para pa integridad y pa combati corupcion, cu ta e maneho di Gabinete Wever-Croes. Den un pais caminda integridad y bon gobernacion ta prioridad nos institutonan ta esnan pa yuda garantisa esaki.

Den cooperacion cu gobierno di Hulanda, St Maarten y Curacao ta trahando riba un plan structural pa reduci gastonan di medisch uitzending. Manera ta conoci e gastonan di AZV pa manda pashentnan afor pa cuido medico ta core entre 50 pa 60 miyon florin pa aña. E deseo di gobierno hulandes ta pa e placa aki keda circula den economianan di reino en bes cu gran parti ta bai Colombia y cirucla den economia eynan.

Cada pais den reino lo mester indica cua ta e pashentnan cu por wordo trata localmente y cua ta e specialismonan cu cada pais tin. Di e forma aki Aruba lo por ricibi pashentnan di Curacao y vice versa. Tambe lo busca posibilidad pa busca dokternan di afor bin Aruba en bes cu ta keda manda patientnan afor cu ta hopi mas costoso.

Banda di esaki lo mester tin acuerdo pa compra di remedinan hunto y tambe mihor cooperacion entre laboratorionan.

Tur e esfuersonan aki ta wordo haci pa mas placa keda circula den nos propio economia. Mas pashent nos trata na Aruba, menos hende nos mester manda afor y menos e gastonan pa AZV. Pa luna AZV ta manda entre 40-50 patient afor y a yega e momento pa nos mes inverti aki na Aruba mes, busca e ekiponan, busca e dokternan y trata nos hendenan aki nan mes.
​
ImSan ta un bon ehempel con bon servicio ta wordo duna y con pashentnan por wordo trata aki nan na Aruba mes sin cu mester haya tratamento afor. Di e forma aki nos kier sigui expande pa nos por baha e gastonan tambe.

Ta baha prijs di awa pa cunukero na 5.50 pa kub


Diamars atardi a tuma luga un conferencia di prensa special na Ser’i Noka na unda cu Prome Minsiter a expresa e prioridadnan cu Gobierno di Aruba ta pone pa nos cunukeronan y e desicionnan importante pa agricutura como un pilar economico pa nos pais. Minister Marisol Lopez-Tromp y Minister Chris Romero a elabora tambe riba e maneho pa agricultura na Aruba.


Gabinete Wever-Croes a pone desaroyo di nos economia como un prioridad y den esaki pa desaroya e pilar di agricultura. Un di e retonan mas grandi pa nos cunukeronan ta e prijs di awa. Awe Gobierno a dicidi cu cunukeronan ta haya awa na prijs reduci di 5,50 pa kub. Esaki ta un estimulo grandi pa nos cunukeronan.

TERENO: Un otro reto ta tereno pa planta. Gobierno lo otorga varios tereno den e dianan nos dilanti na cunukeronan. Tin un area prepara caba na Catashi y na Savaneta cu pronto lo wordo reparti.

SANTA ROSA: Santa Rosa lo sigui den contacto cu cunukeronan pa por agilisa e procesonan y asisti cunukero den e procesonan aki.
​
AGRICULTURA NA SCOL: Premier Evelyn Wever-Croes a pidi Minister di Sector Primario y Minister di Enseñansa pa inclui mas agricultura na scolnan. Mirando e esfuersonan cu varios scol a haci caba riba e tereno aki, awor cu lo stimula e sector aki por mira mas envolvimento di nos hobennan den e sector aki. Premier Evelyn Wever-Croes ta hopi satisfecho cu esaki. “Nos a priminti y nos ta cumpli”.

Durante e conferencia di prensa di Gobierno, Minister Maduro a lansa
oficialmente e buki digital informativo di COVID 19 ‘Di un dia pa otro tur cos ta diferente’
specialmente pa nos muchanan.


Di un dia pa otro tur cos ta diferente
E mandatario ta bisa cu den un habri y cera di wowo, COVID-19 a cambia nos bida. Di un dia pa otro tur cos a bira diferente. Hendenan grandi y tambe e muchanan diripiente a wordo confronta cu diferente cambio cu ta trece insiguridad y confusion. Pa nos muchanan por compronde kico ta pasando, dicon cosnan a cambia y dicon nos mester haci cosnan na un manera diferente, Edselyn Figaroa a bin cu un bunita iniciativa di e buki digital informativo titula ‘Di un dia pa otro tur cos ta diferente.’
E buki digital aki ta un excelente instrumento pa mayornan por splica nan yiu(nan) tocante e virus Corona. E buki tambe ta contene tipnan valioso con mayornan por duna nan yiunan sosten emocional durante di e periodo di COVID-19, pa asina e muchanan por sinti nan mes mas sigur.


Buki ta obtenibel digital
Minister di Cultura ta informa cu pronto tur scol preparatorio y basico lo ricibi e buki ‘Di un dia pa
otro tur cos ta diferente’ via email. Tur esnan interesa por subi riba e pagina di Facebook di
Gabinete Wever-Croes y primi e link. Tin un version cu e mucha mes por lesa e buki y tambe tin un
version caminda e mucha por scucha e storia, cual a wordo conta pa e hoben Maria Wouter.


Gradicimento
Minister Xiomara Maduro ta gradici sra. Edselyn Figaroa pa e bunita iniciativa aki y tambe ta yama danki na tur otro persona cu a contribui cu e buki informativo tocante COVID19 pa mucha.

Prome Minister Evelyn Wever-Croes, durante e Conferenia di Prensa di Gobierno di Aruba dialuna anochi, a expresa palabranan di gratitud na tur esnan cu incansablemente a duna di nan parti durante a prome fase di Covid-19 y su recuperacion.
​
“Mirando cu nos ta mei mei di e prome fase preparando p’e di dos fase, un biaha mas expresando den nomber di Gobierno di Aruba mi ta duna danki na tur esnan cu a yuda nos pa nos a yega asina leu”.

Prome Minister ta referi na e frontliners. Tur esnan cu a lucha tur dia cu alma y cuerpo pa e resto di comunidad por ta salud y sigur. Tambe ta gradici tur profecional cu ta trahando den tur area pa yuda prepara tambe pa e siguiente parti cu ta bay bin. Sigur tambe, Prome Minister ta gradici pueblo di Aruba completo, na e comunidad en general pa e actitud civico y responsabel cu a demostra den e prome parti di e crisis aki.

“Y manera mi a bisa poco dia pasa, mi ta considera cu nos ta mey mey den e tempestad, den e wowo di horcan aworaki preparando p’e di dos parti y ohala cu nos conta riba e mesun actitud civico y responsabilidad di cada persona den e di dos parti”.

Prome Minister a dirigi tambe palabranan na esnan cu no ta realisa e seriedad di e situacion. Ora nos mira wak bek den fin di siman y cuanto aglomeracion tawata tin riba caya, esaki ta produci preocupacionnan apesar cu nos a haña nos libertad. Nos no tin samenscholigsverbod, toque de queda ni shelter in place aworaki, kiermeen tur esaki ta posibel pero ta keda consehabel y responsabel pa ta cauteloo y haci’e na midi.
​
“Ban keda aplica reglanan di hygiene, laba man frecuentemente pa si bo bin den contacto mes cu un hende cu tin e virus, bo no trece na bo cara y pega cu n’e. Tambe sigui regla di distanciamento, tene distancia di otronan ora bo ta combersa cu otro hende pasobra bo no sa si e por tin e virus. Si nos keda atene nos mes na e reglanan aki, mi tin tur confiansa cu e di dos parti tambe nos lo bay bon”, Prome Minister Evelyn Wever-Croes a enfatisa.