 Si nos tuma un poco tempo pa pensa con Aruba ta awe y kico tin pa futuro, nos mester bisa cu nos NO ta den nos mihor añanan.
Nos ta bibando den un Aruba unda tin placa pa tur projecto menos pa scolnan nobo of un bibliotheek na San Nicolas, pa menciona algún ehempel. Pero loke e Gobierno aki si ta bon den dje ta ora di bay hasi política riba medionan di comunicación bisando cu educacion ta importante. Nos ta bibando den un Aruba unda cu aunke tin un leerplicht na vigor, tin hopi mucha den criminalidad y esnan cu juist a kies pa bay den e ámbito di deporte, of ta den cualkier otro organización, tin cu para banda di caminda pidi placa pa nan haya fondo pasobra e Gobierno aki no ta duna nan apoyo financiero. Nos kier yama nos mes un pais desaroya, pero tur dia nos ta haciendo daño na nos medio ambiente door di no respeta areanan verde y rosando cantidad di matanan cu tin añas creciendo, sin papia di e incapacidad enorme pa cu e maneho di dump. Nos ta den un Aruba caminda ta basha asvalt, pone klinkers y yame calidad di bida, sin puntra si e casnan na banda tin awa of coriente, of si e muchanan a come prome cu nan a bay scol. Nos ta bibando den un Aruba caminda ta pone 30 mucha den un klas y riba dje exigi resultado positivo for di meastronan. Nos ta den un Aruba unda maestronan mester ta mama, tata, trahado social y hasta polis pa nan alumnonan. Nos ta den un Aruba cu tin placa pa ruman pusta auto na merca, pero no tin yudansa pa maneha y drecha e pista di careda cu tin aki na Aruba mes. Nos ta bibando den un Aruba unda cu politiconan, na lugar di busca y bin cu solución, nan mes ta e origen di hopi di nos problemanan. Nos Aruba di awor ta sufriendo e consecuencianan di e scandalnan cu cada proyecto di Gobierno ta cun’e, pero asina mes ningun instancia yama pa investiga ta hasi esaki. Pero ta e Aruba aki nos tin e deber di uni y drecha bek. Poniendo e ser humano central y cu un team integro, partido MEP lo traha man den man cu nos pueblo pa asina drecha tur loke mester. Hunto nos por yega na solucionnan duradero y factibel pa asina nos por mira un Aruba prospero un biaha mas.
0 Comments
 Parlamentario mr. Juan Ady Thijsen tin confiansa cu pueblo lo duna partido MEP e mandato pa lidera nos pais den e siguiente temporada di gobernacion.
Despues cu pueblo duna MEP e mandato dia 22 di september 2017 MEP ta sinta cu Gobierno di Reino/Hulanda pa reestablece nos autonomia financiero y recobra nos posicion constitucional pa sigura e bienestar y futuro di nos yiunan. Parlamentario mr. Juan Ady Thijsen a tuma nota di opinion di Ministro demisionario Plasterk tocante e gobierno di AVP na final di Gabinete di Mike Eman y AVP : "Het CAft heeft namelijk nog verschillende vragen, onder meer met betrekking tot het meerjarenbeeld en de onderliggende aannames, zoals de verwachte belastinginkomsten, maar ook over de omvang van het overheidsapparaat. Daar moet nog aan gewerkt worden en daarom wil Nederland nog niet meewerken aan de mogelijkheid voor Aruba om tegen veel lagere rente op de internationale markt te lenen." Segun Parlamentario mr. Juan Ady Thijsen esaki ta opinion di Hulanda devastador pa Mike Eman y su gobierno. Esey kiermen cu Mike Eman despues di firma tanto protocol y acuerdonan, despues di a ricibi un KB, despues di a permiti Hulanda tuma over nos autonomia financiero ainda Aruba ta para na mesun caminda esta no a logra haya e prestamonan na interes abao cu tanto lo a yuda Aruba. Prestamonan na interes abao lo significa un rebaho di gasto di 200 miyon pa aña pa Aruba. Den cuadra aki ta importante pa e siguiente gobierno sinta cu Hulanda despues di eleccion. Segun Parlamentario mr. Juan Ady Thijsen ta claro cu no lo logra den un prome reunion cu Hulanda pero lo dilinea e caminda cu lo cana pa yega. MEP lo presenta su plan economico cu lo ta e base pa recuperacion pero alavez lo indica na Hulanda con lo baha gastonan y asina yega na presupuestonan di surplus. Den un siguiente gobernacion MEP no solamente lo tin cu paga debenan di AVP pero tambe crea espacio pa cumpli cu demanda di pueblo riba enseñansa, husticia, salubridad publico, medio ambiente y otronan. Parlamentario mr. Juan Ady Thijsen ta kere cu solamente cu MEP liderando nos pais Aruba lo ser salba. Hunto p'e cambio sin miedo. Hamas y nunca nos lo acepta e desaster cu Mike Eman su Gobierno y fracion den parlamento a causa nos pais!!!  Nos a tuma nota di e comunicado di prensa di SKOA den cual ta mustra riba e scarsedad di cupo pa studiante na e scolnan di MAVO na nos Pais. Esaki ta un noticia preocupante pasobra e ta significa cu algun hoben lo wordo limita den e chens pa sigui estudio mas avansa. E scarsedad aki ta e consecuencia directo tambe di e prioridadnan robes y e mal maneho di Gabinete Eman. Pasobra si awe e school di HAVO VWO na Noord tabata un hecho, kizas nos no mester a tende un noticia asina alarmante di SKOA cu no tin cupo na scolnan di MAVO. E mal move di Gabinete Eman pa a sinta gasta e placa na tram ta pone cu awe no tin cupo pa studiante na scolnan di MAVO.
Placa di FDA pa school na Noord Manera cu Gabinete Eman a yega na mando nan a pone man riba e 29 miyon di fondo di FDA cu tabata destina pa traha e scol di HAVO VWO na Noord. Tur cos tabata practicamente cla pa e scol bira un realidad, pero Minister Eman a pidi Hulanda pa bay di acuerdo pa cambia destino di e placa pa e ol pa destine na embeyesimento di Oranjestad. Y pa awor tur hende sa cu nan a uza e placa aki pa cumpra tram. Colegio ta subi drempel y MAVO ta yena Claro na momento cu bo keda sin construi un school mas pa HAVO VWO na nos Pais, bo ta pone un precion mas grandi riba Colegio Arubano cu ta ofrece educacion riba e nivel ey. Colegio su infrastructura tambe ta limita y no ta nada straño cu bou e precion di falta di suficiente cupo ta subi nan drempel pa hoben por drenta nan scol. Esaki ta pone un precion mas grandi riba e scolnan di MAVO cu ta yena tambe cu studiantenan cu no ta logra drenta Colegio. Placa pa scol den saco di sostenedor di AVP Largo tempo Ministernan Eman y Sevinger a sinta gaña cu nan lo construi e MAVO HAVO of HAVO VWO scol na Noord. Pero nan no a cumpli. Nan a usa e fondonan pa paga fabornan na esnan tras di e companianan cu a keda encarga cu e trabounan den Caya Betico Croes. Asina placa di FDA destina pa e scol di HAVO VWO na Noord a bay den saco di sostenedor di AVP perhudicando nos hobennan den nan cupo di estudio. E scol HAVO VWO ta un prioridad Nos di MEP lo percura pa como sea e scol di HAVO VWO na Noord bira un realidad. E scol aki ta un prioridad. Si e gobierno actual a realisa e school aki na 2010 caba, awor aki ya lo tabata tin hoben gradua. Nos no por sigui perde mas tempo y laga nos hobennan wordo perhudica pa falta di cupo na scol. Ban bisa no na e prioridadnan robes y e mal gobernacion di AVP y ban hunto pa logra e cambio cu educacion na nos Pais tambe merece.  Poco dia pasa a tuma lugar e debate organisa pa un grupo di millennials, hobennan entre 25 pa 35 aña, den cual e lidernan di e diferente partido politico di nos Pais a haya oportunidad di duna oido y contesta pregunta riba e preocupacionnan cu ta biba bou di e grupo di votadornan aki di nos Pais. Remarcabel y lamentabel ta e hecho cu e Lider di AVP siendo nos Promer Minister a keda sin presenta na e debate aki. Esaki sigur ta un falta di respet na e grupo hoben cu a organisa e debate aki y mas ainda ta un falta na tur e hobennan di e generacion aki cu ta hustamente esnan cu mas lo wordo afecta pa e saldo di cuenta di e 8 aña di Gabinete Eman. Keda sin presenta na e debate millennial ta ‘not done’ y ta wordo considera cobardia politico.
No por cambia regla na antoho Nos Promer Minister tabata sa cu durante e debate aki preguntanan skerpi lo keda lansa y pesey pa no perde mas cara politico despues di e golpinan politico cu ela recibi durante e debate di Camara di Comercio, ela keda sin participa na e debate millennial. Tristo den tur esaki tabata con nos Promer Minister a set up full un scenario pa desacredita e organisadornan. Hasta a pretende di tin e poder tambe pa cambia e reglanan di participacion di e debate na su antoho door di purba convence Pueblo cu ta un hoben di su partido mester bay e debate y no e mes como lider di AVP. E acto aki tabata algo totalmente fo’i sla y muestra di cobardia politico. Bo no por cambia regla di debate na bo antoho djies pa salba di golpi politico. Laga otro wanta golpi Mas tristo den tur esaki ta e hecho cu Promer Minister como Lider di AVP kier a schuif su responsabilidad den scochi di un hoben cu awor numa a subi tarima politico. Ta un politico cobarde of di basta mala fe so lo haci esey, ya cu ta bisto cu e ta willing hasta pa scarifica esun di mas nobato pa wanta golpi politico cu ta dirigi na dje como e Promer Mandatario di e Pais aki. Ora cu bo core pa otro wanta golpi pa bo, esey ta haci bo un gran cobarde. Orguyoso di Evelyn Pesey nos ta orguyoso di Evelyn cu como Lider di MEP si a participa na e debate y a sa di mustra con bo ta contesta pregunta di e grupo di millennials na un manera convinciente y profesional. Evelyn a demostra clase y a mustra e liderasco di berdad cu nos Pais mester. E no a cobardia pa participa, alcontrario Evelyn a demostra cu hunto nos por haci e cambio pa nos Pais, anto sin miedo.  Nos gobernantenan no conoce integridad! E gobierno di Mike Eman y su 9 ministronan ta bibando di un escandalo pa otro y ta parce cu tur e escandalonan aki no ta preocupa nan totalmente. Mientras cu Mike Eman hunto cu su coordinadornan cu AVP-diploma ta campañando tur dia cu placa di pueblo den e barionan rond Aruba, nos pueblo ta bibando den un pobresa nunca visto. A hisa e edad di pensioen te na 65 aña, p’asina exonera 61 miyon florin for di SVB y pa gobierno di AVP por a sigui fiesta cu placa di pueblo. A hisa prima di pensioen pa 15.6 %, a hisa BBO despues cu a gaña cu lo bay bah’e, a introduci prima di BAZV cu 1% y despues a subi’e cu 2%. Mike Eman a permiti Benny inverti placa cu tabata pa e scol HAVO/VWO pa e pueblo di Noord den un proyecto di tram cu no tin niun sentido y cu a mata Caya Betico Croes. Benny su escandalo di negoshi cu Leoncita no tin fin y e subrinonan di Tanchi Leoncita ta sigui fiesta cu terenonan pa nan mes y pa nan compinchinan. Ya no a resta niun tereno mas pa nos yiunan, ya cu mas di 90.000 m2 di tereno a bay pa un solo famia di Protocol. Dowers cu su escandalo a hisa criminalidad na un nivel astronomico. Atraconan ta azota nos pais, mortonan ta cay y segun Dowers ta un percepcion. Criminalnan grandi ta ser permiti airtime na Tele Aruba pa ataca ciudadanonan respeta den nos comunidad. Mike de Meza cu su Hedging di WEB ta mata nos pueblo cu tarifanan de awa y coriente astronomico. Miles di ciudadanonan ta bibando den siglo 21 sin awa y sin coriente y den un pobresa hopi horibel.  Michelle cu su Invest secure a hit nos studiantenan nan placa di studielening y su pleito cu Colegio Arubano y Colegio EPI tin tur cos bruha manera un bol di hilo. Pa colmo ta sali na cla awor cu no tin suficiente cupo pa studiantenan di MAVO.
Schwengle a traha un Hospital di 250 miyon florin sin Operatiekamer y finalmente e hospital renoba aki lo bay costa den total casi 1 biyon florin. Ciudadanonan ta warda lunanan largo pa haya un cita na cierto specialistanan y pa no papia mes di un cita cu un oculista. Nos yiunan di tera cu a studia pa dokter den region no ta ser pemiti pa traha na nan propio pais. Irausquin cu tur su curashi a haya exilio pa Merca cu un overbruggingstoelage cu pueblo a paga y despues el a wordo nombra como Minister Plenipotenciario na Hulanda. Sin duda cu e ta cla pa bolbe cobra un overbruggingstoelage despues di september proximo. Pa pone e cherry riba e bolo di escandalonan, ata Paul Croes bao sospecho di labamento di placa y soborno pa permiso gate. Ministerio Publico te ainda no kier deten’e pa su delitonan cometi, mientras su complicenan si ta cera den KIA. Finansa di Aruba bao Bermudez ta di Guatemala pa Guatepeor, mientras ta matando nos ciudadanonan en especial nos pensionadonan cu cobransanan halto di belasting y awo ni vakantie e pueblo aki no por bay mas, pasobra na aeropuerto ta para nan pa paga un boet insignificante. Anto Mike Eman si por viaha rond mundo cu su MEGA DEBE. AVP tin nos pueblo hinca den un abismo total y no ta importa nan kico lo para di e pais aki. Si nos Ministerio Publico e biaha aki haci su trabao bon y van Dam pone orden op zaken, tur e gobernantenan cu a malversa y comete corupcion lo bay conoce e caminda pa KIA.  EVELYN WEVER-CROES RELACIONA CU NOS LEYNAN CUI TA HOPI ANTICUA
Lider di MEP Evelyn Wever-Croes durante e debate siman pasa a menciona algo interesante: e leynan cu nos tin cu ta hopi anticua, y cu ta permiti abuso tuma lugar. Na Aruba hopi di nos leynan ta anticua, algun ta data di 1908! E consecuencia ta cu e leynan ta outdated. Hopi di e castigonan ta hopi abou, hopi biaha e victimanan mester cana un caminda di crus, mientras e abusador mes ta keda liber of ta haya menos castigo. MEP lo institui un grupo pa 'disrupt' e sistema, pa mesora inventarisa cual ta e leynan cu mester wordo actualisa. "Nos lo bin cu leynan mas actual y especialmente pa caba cu abusonan. Por ehempel cuanto consehero un minister por tin. Kico ta pasa ora un minister wordo sospecha di corupcion. Ora tin pruebanan riba mesa di abuso sexual di muchanan. Tur caminda den ley cu tin espacio pa abuso, nos mester cambia. Pasobra nos leynan ta nos instrumentonan pa caba cu abuso. Nos leynan mester percura pa tur procedura den gobierno ta transparente y asina tin mas control. Eynan tin un trabou grandi pa haci", segun lider di MEP Evelyn Wever-Croes.  Durante e debate 'millennial edition' cu a tuma luga siman pasa, e tema di insiguridad riba nos pais a bolbe bin padilanti. E pregunta cu e lidernan politico mester a contesta, ta con bo partido lo haci Aruba mas sigur atrobe.
Lider di MEP Evelyn Wever-Croes a duna un bon splicacion riba esaki. SIGURA NOS COSTANAN Nos mester cuminsa cu sigura nos costanan pa stop importacion ilegal di hende, arma y droga. Pasobra tanten cu nos no sigura nos costanan, nos no por pone orden paden den cas. Con nos ta haci nos costanan mas sigur? Bin bek cu e radarnan pa vigila e costa manera e radanan chikito tabata funciona. Bin bek cu e helicopter, pasobra awor ora un preso hui, no tin ni helicopter pa buske. Regla e posicion di Warda Nos Costa, duna nan e autoridad y especialmente material pa nan por traha, pa asina nos por controla nos costanan miho y sigura nan. PONE ORDEN PADEN DEN CAS Combati criminalidad cu man duro, sino criminalnan ta tuma over. Nos mester mas polis riba caya, y mester duna departamentonan di husticia material y ekipo pa nan funciona. Mester percura pa formacion di agentenan policial nobo, y percura pa e placa ta disponibel pa cumpli cu esaki. Pasobra e forma con empleadonan di KIA, KPA, Imigracion, CEA, Warda Nos Costa, Brandweer mester eherce nan trabou, ta bergonsoso, y no ta digno di un pais cu ta pretende di ta 5 strea. Pa trece mas siguridad y trankilidad den e area turistico, mester introduci ‘tourism police’ specialisa pa opera na un forma cu no ta intimida turista, pero manteniendo orden den area turistico. REVISA TUR LEY PA CABA CU ABUSO Pa por pone orden bek den nos pais ta importante pa revisa tur e leynan pa mira cual mester cambia. Leynan cu ta protehe esun cu ta haci malo, mester wordo cambia. Castigonan mas severo mester wordo implementa. Ta asina so nos lo logra haci Aruba un lugar sigur atrobe. Mester remarca cu lider di MEP Evelyn Wever-Croes tabata esun cu a resalta den su contestanan, cu na un forma hopi profesional y determina a splica con lo atende cu e problemanan serio di nos pais.  E siman nobo a habri y ya caba Aruba ta den shock y susto pa motibo di un otro atraco. Dialuna mainta trempan e noticia a drenta cu antisocialnan a atraca un persona drentando su luga di trabou, poniendo un arma di candela na su cabes.
Segun fuentenan oficial, esaki ta e di 55 atraco cu ta tuma luga aña 2017. E cantidad di atraconan ta den surpasa e cifra final di 2016 caminda cu ainda tin mas di 5 luna pa bay di e aña aki! E situacion actual ta sumamente alarmante y doloroso pa henter e Pueblo di Aruba. Desde inicio di campaña na Januari, caminda sr. Besaril ta haci su bishitanan di cas pa cas, a tuma nota cu den practicamente tur cas ta existi un preocupacion enorme pa e falta cronico di siguridad. "Esaki ta e situacion real cu e ciudadania di Aruba tin cu biba cune pa loke ta trata siguridad. Banda di educacion, cuido medico y costo di bida, siguridad ta e preocupacion di mas grandi den tur cas. Y na final di dia aunke mandatarionan den e gobernacion actual ta bisa cu den nan opinion nan a haci nan best, loke cu e cuidadano ta sinti ta loke ta conta. Ta p'esey mes e unico berdad ta e realidad cu pueblo ta biba aden! Ta ora pa introduci solucionnan concreto pa tur e problemanan di insiguridad riba nos isla. Por ehempel e re-introduccion di un departamento cu e tarea specifico di controla nos costanan cu e autoridad necesario pa haci controlnan como debe ser. Den cuadro di e intencion di nos partido e departamento di Grenspolitie lo conoce un dinamica totalmente diferente den cual lo mester establece un cooperacion cu entre otro Douane y Marechaussee. Den e futuro gobernacion di MEP nos costanan lo ricibi hopi atencion y personal cu keda asigna pa e tarea lo ricibi e material y preparacion necesario pa e reto cu ta spera nan. E ta obvio cu e cantidad di arma cu tin riba nos isla ta drenta via nos costa pues un control mucho mas severo di nos costanan ta mas cu logico". Sr. Besaril ta enfatisa un bes mas cu si e radar situa na base Perreira no por brinda e servicionan manera Aruba ta spera di dje, una bes den gobierno partido MEP lo re-introduci e radar manera Aruba tabata tin na 2009. Hunto cu esaki tambe lo re-introduci e uzo di helicopter pa asina intensiva e control na nos frontera. Por ultimo Parlamentario Besaril a menciona cu ta importante pa mehora y aumenta e presencia di autoridad den nos comunidad. Cu esaki e Parlamentario ta referi no solamente na e servicio necesario cu polis mester duna, pero tambe otro instancianan manera por ehempel Douane, Brandweer y DTI. "Ta importante na momento di introduci ley pa percura tambe pa tin e departamentonan y nan personal prepara cu e autoridad necesario pa ehecuta e controlnan, sino tur e leynan pa bunita cu nan por ta, lo para caba na iniciativanan envano". Parlamentario Besaril a termina.  Diaranzon 12 juli, durante conferencia di prensa, Partido MEP a lansa un candidato nobo riba e lista prestigioso di Movimiento Electoral di Pueblo. Ta trata aki di Carlos Jacobs kende a yena nos CEDE cu un grupo grandi di sostenedor.
Pa hopi aña, Carlos a traha den ambos e mundo politico y esun gubernamental y a apoya otronan den haci e trabou vigente. Awo, Carlos a dicidi di uni su mes na Partido MEP pa asina yuda delinea y ehecuta proyectonan importante cu tin prepara pa nos isla. E motibo pa cua Carlos a dicidi di uni su mes riba lista di MEP ta pasobra e ta convenci cu Partido MEP lo haci e diferencia den e bida di tur cu ta biba na Aruba cu plannan innovativo, productivo y sin propio interes. Tin hopi desicionnan cu mester wordo tuma pa resolve y pone nos isla den e caminda corecto pa e proximo añanan di gobernacion di nos isla. Y Movimiento Electoral di Pueblo tin tur capacidad pa haci esaki. “Cada biaha cu Partido MEP lansa un candidato nobo, nos ta lansa un lider nobo riba su mes. Cada candidato riba lista di MEP ta un lider riba su mes. Esaki ta e cualidad primordial cu partido MEP ta busca cada biaha cu nos busca un candidato nobo cu lo lidera e movimiento di cambio pa nos pueblo. Pasobra esaki ta loke cu Aruba merece. Hunto cu coleganan Hendrik Tevreden y Glenbert Croes, Carlos lo percura pa haci Dakota geel! Partido MEP ta yama bonbini na Carlos. Hunto Aruba henter ta bay p’e cambio", tabata palabranan di Evelyn Wever-Croes na e ocasion aki.  Diamars 11 juli, na cas di su mayornan, Sue Ann Ras a wordo lansa riba e lista prestigioso di Movimiento Electoral di Pueblo.
Lider di Partido MEP, sra Evelyn Wever-Croes durante un conferencia di prensa a introduci e candidato nobo riba nos lista victorioso pa eleccion 2017, kende tambe lo representa e pueblo di Savaneta. Sue-Ann Ras, ta yiu mayor di Ronny y Brenda Ras y ta docente di papiamento y ta mama di 3 yiu: Sue-Gin, Ginayla y Leandro. Sue Ann a realisa su estudio di Associate of Arts den Fashion Merchandising & Marketing y despues el a termina dos estudio na IPA; docente di dos grado Papiamento y docente di scol basico. For di 2005 el a cuminsa traha na Filomena College mavo y San Augustin y aña escolar 2006 – 2007, el a bira fiho na Filomena College mavo, unda cu te awe e ta eherce su funcion como docente cu hopi pasion y dedicacion, unda e ta eherce varios funcion. Aña pasa tambe el a haya e reto pa fungi como TDC-er di Papiamento (Toets Deskundige Controle) na Examenbureau, pa e scolnan mavo y EPI, sector H&T y Economia. Passion Sue Ann su pasion ta den enseñansa y den nos idioma Papiamento. Enseñansa tin diferente retonan y mester bin cambio pa mehoracion rapido, p’asina por desaroya cada un su potencial. Pa e motivo aki Sue Ann ta cla y a tuma e reto di forma parti di e partido MEP, partido cu tin un historia impactante. Mision Mision di Sue Ann como politico ta pa hunto mantene un rol di liderazgo den e generacion aki, unda nos ta sostene y promove desaroyo academico, economico y social, mediante un enseñansa mas efectivo. Hunto cu sosten y confianza di partido y pueblo, Sue Ann kier promove logro exitoso di cada studiante y brinda nan un preparacion di competencia global, door di fomenta excelencia den educacion. “Partido MEP ta demostra liderazgo cu vision y ta sigui expande su ekipo cu lidernan nobo cu experticio den diferente areanan. Lidernan inspira, motiva y cu amor pa nan patria, e liderazgo nobo cu Aruba merece. Partido MEP ta yama bonbini na Sue Ann. Hunto Aruba henter ta bay p’e cambio": tabata palabranan di Evelyn Wever-Croes na e ocasion aki. |
Archivo
January 2021
|
RSS Feed