Siman pasa Aruba y specialmente e Pueblo di San Nicolas tabata testigo di e apertura di Principal Theater den Centro di San Nicolas. Un inversion bunita di e compania MetaCorp cu despues di 27 aña a percura pa e reapertura di e teatro como muestra di confiansa den San Nicolas y Aruba su economia.


E mandatario encarga cu economia ta gradici e famia di MetaCorp pa e inversion bunita aki cu ta crea cupo di trabou y ta duna un empuhe na economia di nos Pais, specialmente Pariba di Brug. Minister Ruiz-Maduro ta spera cu e inversion bunita aki por incentiva mas negoshi pa establece nan mes den Centro di San Nicolas.

Apesar cu nos Pais Aruba tin su reto cu nos situacion financiero, Gobierno toch ta haci un esfuerso pa duna nos comunidad un alivio. Den esaki Gobierno a duna varios compensacion na nos pensionadonan.

E grupo di pensionadonan den nos comunidad a conoce e aña ki un rebaho di prima di AZV. E pensionadonan cu tin un pensioen di maximo di Afl. 30.000,- pa aña, nan prima a baha di 10.5% pa 6.5%, pues e pensionadonan a ricibi un rebaho di 4% den nan prima di AZV.

Alabes e pensionadonan a ricibi un compensacion di Afl. 25,- extra den Reparatietoeslag. Esey ta nifica cu tur pensionado ta ricibi tur luna Afl. 125,- di e Reparatietoeslag.
​
Tambe nos pensionadonan a conoce un aumento di pensioen. E pensionadonan cu ta soltera a haya un aumento di Afl. 25,- y e pensionadonan cu ta casa a haya un aumento di Afl 42,-
Na momento cu a introduci e cambio den tarifa di impuesto a tene e grupo di pensionado aki na cuenta. Door di implementa e ‘belastingvrije voet di e Loon y Inkomstenbelasting’ un cantidad grandi di pensionado lo no paga belasting mes of lo paga menos belasting.

Esaki ta algun beneficio cu nos Gobierno a duna na nos pensionadonan pa asina por trece un poco alivio cerca e grupo aki, apesar cu no tin hopi espacio financiero. Minister Ruiz-Maduro a enfatisa cu aunke Gobierno tin desafionan grandi cu nan a haya, Gobierno lo sigui traha duro y diligentemente pa yega na solucionnan pa nos Pais Aruba.

Gabinete Wever-Croes trahando na beneficio di nos grandinan:
E ORGANO OUDERENRAAD LO WORDO INSTITUI PRONTO

Cuido di nos grandinan ta un prioridad halto pa Gabinete Wever-Croes. Gobierno tin preocupacion pa e cuido di nos grandinan y ta trahando na benificio di nos grandinan. Den e programa di Gobernacion tin un maneho pa introduci un ‘Ouderenraad’, un conseho di hendenan mayor. E topico aki ta uno hopi interesante mirando cu e ta traha den beneficio di nos grandinan. Ouderenraad ta un conseho di nos grandinan, un instituto cu Gobierno di Aruba kier crea p’asina constantemente por ricibi consehonan tocante diferente aspecto cu ta afecta nos hendenan di edad.


E miembronan y directiva di e instancia aki no necesariamente mester ta pensionado pero tambe personanan cu tin atencion riba temanan cu ta tene nos pensionadonan ocupa. Tambe por ta geriatrianan cu ta cuida salud di nos grandinan of esnan cu ta cuida nos grandinan sea na cas of na instancianan pa nos grandinan.


Tambe tin e aspecto financiero cu ta afecta nos grandinan pa motibo cu ora nan bay cu pension nan entrada ta bay atras pero nan gastonan ta keda mescos. Ainda Gobierno no a logra tur asunto di impuesto. E Prima di AZV y tarifa di belasting a ser baha caba pa pensionadonan por ta mas alivia.


Infrastructura ta otro punto di enfoke pa motibo cu mester sigura cu tur e edificionan di departamento di Gobierno, banconan y caya grandi etc. ta accesibel pa nos hendenan di edad y nos hendenan cu tin un deficiencia fisico.


E tema di Ouderenraad a ser delibera detayadamente cu representantenan di OPA y aki OPA a bin cu un concepto hopi interesante y asina Gobierno a tuma e decision di “partner” nan mes cu nan pa cu e creacion di e instancia aki. E concepto lo ta uno casi identico na loke SER (Sociaal Economische Raad) ta haciendo aworaki. SER manera ta conoci ta un grupo di persona cu ta wordo apunta pa sector priva y sector publico cu via un secretariado ta duna conseho na Gobierno riba nivel economico y social. Por ehempel e tema di aumento di salario minimo semper mester bay via SER. Mirando e exito di SER, Gobierno kier bin cu Ouderenraad p’asina nos grandinan tambe por haña e atencion necesario.


‘Vergrijzing’ no ta un problema sino mas bien un desaroyo den bida hopi bunita ora cu ciudadanonan yega na un edad halto. Gobierno kier duna mas participacion na tur esnan cu a yega na un edad bunita y cu por y kier contribui na bienestar di nos pais”, Prome Minister Evelyn Wever-Croes a enfatisa.

Diadomingo ultimo Premier Evelyn Wever-Croes a asisti na un santo sacrificio di misa na Dakota pa asina celebra hunto cu e comunidad Colombiano e di 209 aña di independencia di Colombia. Pa nos Prome Minister esaki tawata un ocasion hopi special pa motibo cu Aruba y Colombia ta dos pais hopi liga na otro ya cu e cantidad di Colombianonan cu ta residencia riba nos isla ta grandi y pa es motibo aki tawata un honor pa nos Prome Minister por a celebra e dia special aki cu nan.


Segun Premier Wever -Croes, Colombia ta hunga un papel hopi importante den nos economia y salud y Gobierno di Aruba kier sigui desaroya y mantene e lasonan ak. Ta un catidad grandi di e Colombianonan aki a laga nan famianan atras pa bin biba na Aruba y asina yuda desaroya nos economia y nan a keda den tempo bon y den tempo menos bon.


“Aruba ta enfrentando retonan na e momentonan aki. Ta necesario pa nos keda uni pa asina hunto nos logra vence cada reto nos dilanti den bienestar y progreso di e comunidad di Aruba y di Colombia. Pabien na e comunidad Colombia residencia na Aruba y danki pa boso contribucion na economia di nos pais”, Prome Minister Evelyn Wever-Croes a expresa.

Drs. Shailiny Tromp-Lee (MEP): contento cu su peticion na Gobierno durante tratamento di presupuesto 2018 ta bira realidad

Peticion special pa asfalta e ‘zij-wegennan’ cu ta conduci pa e Scolnan na Washington kedando realisa



Parlamentario Tromp-Lee ta menciona cu durante tratamento di presupuesto di DOW pa aña 2018 el a indica di ta contento cu Gobierno mediante di DOW lo sigui poco poco cambia su funcionamento di uno corectivo pa uno preventivo pa loke ta trata e area di mantencion. Algo cu Tromp-Lee ta convenci cu a largo plazo lo beneficia nos pais.

Otro punto cu Parlamentario Tromp-Lee a enfatisa e tempo ey ta, cu ta importante cu e placa cu Parlamento ta pone disponibel lo sigui keda inverti den reconstruccion y mantencion di nos infrastructura di caminda.

E tempo ey ya caba Parlamentario Tromp-Lee a indica di ta super contento cu trabounan di mantencion a cuminsa ariba e careteranan principal den Noord. Un necesidad cu e tin hopi aña ta bin ta indica. Ta di aplaudi cu Minister di Infrastructura sr. Otmar Oduber, mediante DOW, ultimo aña y mei a cuminsa duna atencion na e adernan principal di Noord cu pa hopi tempo ta den un mal estado. Recientemente a traha ariba e caminda di Fermins Bar pa misa di Noord. Y actualmente ta trahando ariba e rotonde na Misa di Noord.

Alabes durante tratamento di presupuesto 2018 Parlamentario Tromp-Lee a enfatisa e deseo y necesidad cu tin pa demas camindanan principal den Noord haya nan mantencion necesario. Banda di e camindanan principal Parlamentario Tromp-lee a haci un peticion special na Minister Otmar Oduber, esta pa asfalta e caminda patras di Sint Anna School y Sint Aloysius school y rond di e veld di UNITED. Esaki parcialmente a keda finalisa caba.
​
Otro situacion di urgencia cu Parlamentario Shailiny Tromp-Lee a indica durante tratamento di presupuesto 2018 ta e camindanan cu ta concentra rond di scol preparatorio y basico na Washington. Akinan tin diferente ‘zij-wegen- cu tur ta conduci na e caminda pa e scol y aki e cas y famianan ta sufri hopi di stof door di e drukte y traficacion di auto. Pa e motibo aki mes Tromp-Lee ta contento cu su peticion na gobierno durante tratamento di presupuesto 2018 ta bira realidad y cu e alivio anhela pa e casnan rond di e scolnan na Washinton ta keda cristalisa.

Minister Plenipotenciario Guillfred Besaril a ricibi na Arubahuis e douaneronan cu e aña aki un biaha mas a participa na e di 103 edicion di e 4-daagse di Nijmegen. Nan ta Marlon Ruiz, Giovanni Davelaar y Jerrold Tromp. Oliver Wever cu tambe ta forma parti di e grupo no por tabata presente


Minister Besaril a felicita e douaneronan cu e gran logro aki. Tambe e mandatario a gradici e cuater Arubianonan pa nan promocion grandi pa nan isla natal durante di e cuater dianan di e Vierdaagse.


Diabierna siman pasa e douaneronan a ricibi nan medaya durante un ceremonia na Fletcher Hotel na Berg en Dal. Relacionista Publico di Arubahuis Sidney Kock den nomber di Minister Plenipo-tenciario Guillfred Besaril a presencia e entrega di medayanan na e participantenan di Douane.


Marlon Ruiz a haya su medaya pa a participa e aña aki pa di 15 biaha y na Giovanni Davelaar cu a cana e aña aki pa di 13 biaha ta cana e Vierdaagse. Oliver Wever a haya un medaya pa su parti-cipacion pa di 5 biaha. Finalmente Jerrold Tromp cu a participa e aña aki pa di tres biaha.


Despues di e ceremonia a sigi un encuentro informal unda por a sigui papia cu e douaneronan tocante di nan experencia cu e caminata aki.


Arubahuis tambe kier a felicita tur e Arubianonan sea individual of den grupo cu a cana e Vier-daagse di Nijmegen 2019.


Nota pa redacion: E potretnan ta cortesia di Cas di Aruba

Minister Dangui Oduber ta contento di tende cu porfin lo tin un sentencia den e caso asina anticipa di retiro di e hunta di supervision di Lotto. Despues cu 8 vez huez a postpone e sentencia den e caso aki diaranson awor 24 juli 2019 lo tin e sentencia y minister Dangui Oduber tin e pleno confianza cu husticia lo prevalence y gobierno lo haya rason den e caso aki. Ta lamentabel con deporte a wordo perhudica pa casi 2 aña caba caminda por nota con e miembronan di hunta di supervision ta abusa di fondonan, cumpra camera di siguridad, tin credit card na balor di $10,000, tin telefon paga, cellular paga, cable paga mientras deportistanan ta sufri y deporte no papia mes.
Den un estado di derecho cu tanto fechoria cu ta wordo cometi pa miembronan di hunta di supervision minister Dangui Oduber no por pensa mes cu e sentencia no lo ta na fabor di gobierno. Awor a bin resulta cu e miembronan kier colga y culpa e director saliente Sr Wernet pa tur loke a bai robez. E simple hecho cu a kita sr Wernet ta confirma cu nunca tawata tin control y nunca tawata niun supervision di parti e miembronan di hunta di supervision di Lotto.
Cu e sentencia di diaranson awor deporte lo wordo libera di e cartel cu a haci deporte hopi daño!

Como gradicimento pa pone nomber di Aruba briya den exterior.

E hoben deportista su dedicacion na deporte ta un bon ehempel pa nos muchanan y hobennan

Tawata un honor pa Prome Minister Evelyn Wever-Croes ricibi e hoben deportista Arubiano Rygell Boyé na Bestuurskantoor. Recientemente Rygell a competi na Monterey Mexico den e campionato di W.M.F. (World Muay Thai Federation). Rygell a bin cas cu e titulo di Middle Weight Champion.


Rygell a cuminsa e deporte di Muay Thai tempo e tawatin apenas 6 aña di edad. Un deporte den cua el a crece teniendo un record di un total di 62 pelea. Cu su 26 aña, Rygell tin su mesun scol cu ta yama Never Doubt Muay Thai.
Rygell a representa Aruba na diferente pais: Corsou, Surinam, Trinidad, Thailand, Republica Dominicana y Venezuela.


Den su empeño pa mira e deporte di Muay Thai crece, Rygell a di duna seminarionan na Aruba, Corsou, Venezuela y Hulanda. Rygell a obtene su Diploma Internacional di Muay Thai Trainer na 2011 na Aruba. Na aña 2012 na Aruba y na aña 2015 na Surinam, Rygell a obtene su Diploma internacional di Muay Thai Instructor. Y na aña 2017 Rygell a obtene su Diploma Professional & Amateur Boxing Instructor.


Na ocacion di su bishita cerca Prome Minister Evelyn Wever-Croes, e mandatario a entrega un reconocimento na Rygell como un hoben deportista di excelencia. Prome Minister a gradici Rygell pa pone Aruba su nomber briya den exterior como tambe pa su dedicacion na deporte sirbiendo como un bon ehempel pa nos muchanan y hobennan.

Recientemente e titular di e cartera di Transporte, Minister Chris Romero, a reuni cu e grupo Aruba Car Rental Group, cu ta representa 20 compania cu ta huur auto na Aruba. Intencion di e reunion aki tabata pa Minister Romero scucha e preocupacionnan di e grupo aki pa asina purba yega na solucionnan fructifero pa ambos partido.


Un di e puntonan di relevancia cu e grupo di Car Rentals a trece na atencion di Minister Romero tabata e asina yama ‘Invironmental Tax’. Pero tambe puntonan manera keuring di nan vehiculonan y ki posibilidad tin pa haci e proceso cana mas liher. Un otro preocupacion cu e Aruba Car Rental Group a trece dilanti tabata accion cu por tuma ora cu un turista accidenta cu un auto di huur y con lo por sigura cu nan lo paga e daño causa na e propiedad di e compania. Y asina tabatin diferente otro puntonan cu a wordo treci na atencion di Minister Romero.


Tabata un reunion cu a bay den un ambiente bastante ameno y Minister Romero a compromete su mes di traha diligentemente pa por yega na solucionnan factibel pa ambos banda. Lo bay tin un siguiente reunion cu Aruba Car Rental Group pa asina tanto e titular di e cartera di Transporte, como tambe e grupo representando e companianan di huur vehiculo, yega na otro cu resultadonan positivo pa cu e ponencianan cu a bin ariba mesa.