E aña aki a introduci varios cambio riba tereno di impuesto pa trece alivio pa nos pueblo

E aña aki Pais Aruba a conoce varios cambio cu ta beneficioso pa nos pueblo riba tereno di impuesto, specialmente impuesto personal manera loonbelasting, inkomstenbelasting y grondbelasting. Minister Ruiz-Maduro ta bisa cu e meta di esaki ta pa trece un reparticion mas husto den forma di cobra impuesto.


Reduccion di tarifa di Loonbelasting y Inkomstenbelasting
Na januari di 2019 Gobierno a baha e tarifa di Loonbelasting y Inkomstenbelasting. E tarifa cu tabatin 14 ‘brackets’ a cambia esaki pa 5 ‘brackets’. Alabes a baha tur tarifa y e tarifa maximo cu tabata 58.95% a baha te na 52%. Esaki ta nifica cu 25.000 cuidadano ta pagando entre 80 y 400 florin menos na belasting. Tambe a aumenta e ‘belastingvrije voet di loon -en inkomstenbelasting na Afl. 27.751,= pa aña . Esey ta nifica cu 7.000 persona cu tin un sueldo di 2.300 florin pa luna no ta pagando belasting mas. En total Pais Aruba tin 32.000 persona cu no ta pagando impuesto of ta pagando un tarifa di impuesto mas abou.


Cambio den tarifa di Grondbelasting
Un otro cambio riba tereno di impuesto ta e reduccion di e tarifa di Grondbelasting. Antes tabata cobra un tarifa di 0.4% riba tur propiedad. E cambio ta encera cu awor e tarifa ta basa riba e balor di e propiedad. Esaki a trece cune cu 12.000 persona no ta paga grondbelasting mas y 16.000 persona a haya un rebaho den nan cobransa di grondbelasting. Actualmente tin un cantidad di 28.000 persona cu a haya un rebaho den nan cobransa di Grondbelasting.


A baha tarifa di Dividendbelasting pa comerciantenan
A haci un cambio den e tarifa di dividendbelasting pa e comerciantenan y a rebaha esaki di 25% pa 10%. Na e manera aki Gobierno a compensa e comerciantenan. Esaki ta nifica cu companianan cu tin dividend reserva por a paga esaki for di comienso di aña y asina mas placa por circula den nos economia.


Flexibilisacion di cobransa di boet
Na comienso di e luna aki Minister Ruiz-Maduro a anuncia cu ta flexibilisa e maneho di cobransa di boet pa incumplimento di impuesto durante di e periodo di 2015 – 2018. Esaki ta conta pa impuestonan cu ta wordo paga mensualmente, manera Loonbelasting, BBO, BAZV, BAVP, Toeristenheffing etc. Pa aña 2019 tur cuidadano mester sigui cumpli cu nan obligacion fiscal.


E cambionan aki ta pa alivia y beneficia nos pueblo.

Diabierna atardi, Prome Minister tawata tin e honor di ricibi bishita agradabel di e hoben cantantenan Kingston Tromp, Emmanuel Sanchez y Cristopher Croes. Hunto cu Señor Vivio Croes, e hobennan a entrega na Prome Minister letranan y nan potretnan firma. Tambe nan a presenta e video clip di un bunita proyecto den sala di Conseho di Minister.


Señor Vivio Croes a cuminsa cu e proyecto pa fin di aña escolar na unda e tres hobennan tawata e actornan principal. E ta un proyecto cu ta hiba e intencion su tras pa tur aña haci esaki pa diferente scol na Aruba pa asina encurasha nos muchanan cu musica y mantene nan leu for di e mal caminda. E aña aki a cuminsa na Scol Basico Kudawecha cua scol e tres hobennan menciona ta asisti.


E proyecto ta trata di un video clip pa vakantie di scol cu e titulo “Prepara pa Disfruta”. E tres hobennan aki ta tres hoben hopi talentoso den musica cu bosnan hopi bunita. E cantica a wordo composita door di señora Lurena Schwengle y aregla door di Hubert Thiel. E video a wordo filma door di señor Luis Luna y coordina door di señora Stephanie Croes. Rudney Lopez tawata encarga cu e sonido y henter e proyecto a haya conseho di señora Rosemin Croes y Marylou Hermans.


Prepara pa Disfruta a cay den bon tera cu letranan y ritmo facil pa nos muchanan gara durante nan vakantie di scol. E video clip ta pasando na television y Facebook.


Prome Minister a felicita e tres hobennan aki cu nan talento special. Tambe Premier a felicita y gradici Señor Vivio Croes pa su dedicacion y pa bin cu un proyecto asina bunita pa nos muchanan na final di un aña escolar di siñamento. Awo den nan vakantie, nos muchanan por disfruta di e videoclip y cantica aki. Ta tempo pa nan disfruta un temporada di vakantie lagando les afo y haci loke mas nan gusta haci.


Prome Minister ta desea tur mucha na Aruba un dushi vakantie y cu cada mucha ta bon prepara pa disfruta hunto cu nan sernan keri.

Desde e ultimo reunion cu Prome Minister Evelyn Wever-Croes tawata tin cu OFAC na Washington na luna di mei ultimo, e Mandatario principal di nos pais den tur transparencia a bin ta anunciando den tur medio di comunicacion e plan di Gobierno pa cu refineria cu ta consisti den tres fase:
Fase A: PURBA SALI FOR DI E CONTRACT CU CITGO:
Fase B: INTERES DI OTRO OPERADORNAN DEN E REFINERIA:
Fase C: OTRO ALTERNATIVA PA E REFINERIA:


E negosacionnan cu na e momentonan aki ta andando ta di Fase A cu ta pa purba sali for di e contracto cu Citgo. Reunionnan preliminar ta tumando luga pa Gobierno sondia e posibilidad di sali for di e contract aki na un forma mas lihe posibel, ta loke Prome Minister a duna di conoce. Segun e contractnan firma cu Citgo, Gobierno di Aruba mester warda te cu october 2020 pa e ora por pone riba papel cu Citgo no a cumpli cu su palabracion di inverti den rahabilita e refineria.


E contracto cu a wordo firma cu Citgo door di Mike de Meza y e gobierno anterior, ta uno hopi amplio. E partinan di e contracto cu ta deal cu ‘dispute resolution’ ta bastante amplio y ta duna Citgo derecho pa bringa e oponencia di Gobierno di Aruba y nenga di duna Aruba e yabi di e refineria y riba dje hiba Aruba corte pa hopi aña despues di october 2020. Y esaki sigur no ta algo cu ta conbini Pueblo di Aruba por lo tanto Gobierno ta haciendo tur esfuerso pa evita esaki.


Prome Minister Evelyn Wever-Croes a expresa: “Tin espacio pa yega na acuerdo cu Citgo sin cu tin mester 5 pa 6 aña of mas pa asina nos logra haya e yabi di e refineria bek den nos man. Na e momento aki, tur esfuerso ta wordo haci pa yega na acuerdonan concreto. Nos expertonan di RDA, Raad van Commissaris di RDA, ta reuniendo cu esnan di Citgo y ta haciendo nan maximo esfuerso pa trece e yabi bek di Refineria di Aruba, entreg’e den man di Gobierno di Aruba pa asina Gobierno di Aruba por dicidi kico lo bira e futuro di e refineria y no keda rehen mas di un partner instabil manera Citgo ta na e momentonan aki. Un contract cu Mike de Meza y su gobierno hunto cu su gang a firma cu Citgo sin cu Aruba por sali di dje”.


Prome Minister un biaha mas ta enfatisa cu na e momentonan aki, no ta un momento pa hunga politica barata ni infantil manera señor de Meza ta haciendo mientras cu ta e mes ta e culpabel di e situacion di rehen cu nos refineria ta den actualmente.


“Mi ta hopi transparente den esaki dunando informacion tur ora cu mi wordo pidi pa haci esaki, mi ta duna informacion den conferencia di prensa constantemente y den tur media di comunicacion y mi ta duna informacion den Parlamento. Si señor de Meza tin interes di berdad, e por pidi informacion. Of e por acudi na su trabou den Parlamento ora mi trece informacion den Parlamento. Y e mes tambe por yama mi den Parlamento pa duna informacion”, Prome Minister a duna di conoce.


Prome Minister Evelyn Wever-Croes ta invita opositornan y specialmente señor Mike de Meza cu ta e causante principal di e situacion desastroso di refineria, pa para banda di pueblo di Aruba, y na banda di e interes di pueblo di Aruba. Na e momentonan aki cu Aruba ta pasando den e situacion penoso aki cu nos refineria, Prome Minister Evelyn Wever-Croes ta enfatisa cu awo no ta tempo pa pensa riba privilegio y beneficio di Mike de Meza y su gang sino riba e beniestar y beneficio di pueblo di Aruba. Y esaki lo pasa ora cu Aruba sali for di e contract cu Citgo.

Minister Plenipotenciario Guillfred Besaril a presencia recientemente un encuentro special pa Nito Paesch pa celebra e hecho cu sr. Paesch a cumpli 40 aña di labor na Golden Tulip Hotel Central na Den Bosch.


Na e ocacion aki manager di Golden Tulip Hotel Central Karin Rademaker a entrega un acta oficial di Koninklijke Horeca Nederland na Nito Paesch y un “Gouden Speld” pa su cuarenta aña di relacion laboral excepcional. Sr. Rademaker den su discurso tabata tin hopi elogio pa Nito Paesch cu semper a duna 100 porciento di su mes den su trabao. Tambe ela siña hopi hoben e ofishi di traha den bar y con pa duna bon servicio na e huespednan y bishitantenan di Golden Tulip Hotel Central.


Minister Besaril a bisa di ta contento pa mira y experencia con Arubianonan na Hulanda ta haci un bon trabao den diferente ramo di profesion. ‘Arubiano ta conoci pa nan cordialidad y Nito Paesch ta un ehempel grandi di esaki. Nos mester ta orguyoso di e logronan di nos hendenan na Madre Patria.’


Nito Paesch y su señora Marian Paesch a gradici Minister Besaril pa su presencia na e recepcion y a bisa di ta hopi contento y honra cu e atencion special aki di e mandatario.


Nota pa redacion: Publicacion di e potret ta unicamente posibel cu mencion di e nomber di e fotografo Henk van Esch.

Den aña 2018 Departamento di Labor y Investigacion conhuntamente cu Banco Central di Aruba y Departamento di Estadistica (CBS), a haci investigacion laboral, AKO (Arbeidskrachtenonderzoek). E ta un metodo di investigacion unda cu ta bishita casnan na Aruba cu e intencion di midi e ultimo desaroyonan bou di e pueblo trahado. E indicadornan di mas importante cu AKO ta investiga ta:
· cifra di desempleo
· embergadura y desaroyo di e sector cu ta trahando,
· embergadura y desaroyo di e sector cu ta buscando trabou
· e grado di participacion.
E periodo di investigacion tabata di entre 19 di october te cu 15 di november 2018 y a entrevista un total di 4274 persona di 15 aña ariba. Den aña 2018 tabatin un total di 4068 persona cu tabata buscando trabou. Esaki ta 1048 persona menos compara cu 2017. Na aña 2011 desempleo tabata 8.9%, 2012 9.6%, 2013 7.6%, 2014 7.5%, 2015 7.3% y 2016 7.7%. Na 2017 desempleo a subi te cu 8.9% pa den 2018 e baha te na 7.3%. Minister Glenbert Croes ta bisa cu tur certesa cu esaki ta danki na e maneho anti-ontheffing pro-trahado local.


Compara cu paisnan den region Aruba, hunto cu Bermuda, Cayman Islands, Trinidad en Tobago tin e desempleonan di mas abou. Locual cu tambe a logra constata den e AKO 2018 ta cu un total di 51777 persona aki na Aruba ta activo den e sector laboral.


Resultado di un investigacion asina importante y di e embergadura aki ta un forma pa como mandatario, midi e efectividad y exito di bo maneho. Y pa Minister Glenbert Croes esaki ta un empuhe pa por sigui cu su maneho di proteccion pa e trahado local den combinacion cu e esfuerso di henter Gabinete Wever Croes unda cu cada Minister riba su mes ta haciendo lo maximo pa por inverti y incentiva nos economia cu lo resulta den un spin off positivo.


Aruba ta pasando den momentonan dificil. Pero si bo intencion ta bon y corecto, lo yega momento cu lo basha e muraya di estorbo y obstaculo abou, pa Aruba cuminsa draai manera mester ta.


Gabinete Wever Croes ta sigui pusha!

Fundacion Kids Rights Empowerment a bishita Prome Minister

Diahuebs mainta, Prome Minister Evelyn Wever-Croes tawatin e grato bishita di representantenan di Kids Rights Empowerment hunto cu nan yiunan. Sr. Edmar Gietel, Sr. Jeremy Carty y Srta. Janine Wever ta representantenan e fundacion pa derecho di mucha aki.
Motibo di e bishita aki di e fundacion ta pa haci un obsekio na Prome Minister cu ta un detaye di nan fundacion pa e oido y tur atencion cu nan fundaccion a ricibi cerca Prome Minister.


Prome Minister Evelyn Wever-Croes a reuni dos siman pasa cu e representantenan di Kids Rights Empowerment. Kids Rights Empowerment ta un organisacion cu ta traha riba conscientisacion contra secuestro di un mucha door di un di e mayornan. Lamentablemente sa pasa hopi cu un di e mayornan ta bay cu e mucha sin laga manera pa e otro mayor por tuma contact cu ne. Mirando e problematica aki a dicidi di lanta un organisacion pa conscientisa e tatanan riba nan derecho como mayor.


Hopi biaha sa pasa cu ora un yiu nace e mayornan ta bay Censo pa asina e tata por reconoce e yiu y dun'e su fam. Lamentablemente esaki no ta suficiente pa duna e tata loke nos ta yama “ouderlijk gezag”. Pa un tata por haña derecho riba “ouderlijk gezag” e lo mester aplica p'e. Specialmente den e temporada di vakantie ora cu mayornan ta biaha cu e muchanan, Gobierno ta exigi imigracion pa pidi e mayor biahando cu e mucha un carta firma pa e otro mayor cu e ta duna permiso pa su yiu sali di Aruba. Aunke cu esaki ta un procedura poco fastioso, mester enforsa esaki pa proteccion di e mucha pasobra lamentablemente na Aruba tin casonan di mamanan cu ta bay vakantie cu nan yiu y no ta bolbe bek y vice versa. E lucha pa un mama y/of tata por haña wak nan yiunan bek ta uno hopi largo y dificil. Specialmente pa e tatanan haya e “ouderlijk gezag” ta hopi importante pasobra ta di e manera aki so nan por legalmente exigi pa e mama trece e yiu bek Aruba.


Premier Wever-Croes ta enfatisa riba e importancia pa cada tata busca nan derecho, pa asina nos muchanan por ta mas protehi, ya cu un di e metanan pa Aruba ta pa pone e muchanan central. Pa e motibo aki Premier Wever-Croes ta compromete su mes cu e organisacion di Kids Rights Empowerment pa traha hunto y asina conscientisa e tatanan y cambia e leynan necesario pa protehe nos muchanan.


Premier Wever -Croes: “Cada mucha tin derecho di tin su mama y tata den nan bida y no mester wordo perhudica den caso cu e relacion entre e mayornan no ta bon mas”.


Prome Minister a gradici e fundacion pa nan bishita y obsekio y tambe pa tur e trabounan cu nan ta haciendo na beneficio di muchanan cu ta haya nan mes involucra den situacion asina fastioso.

Apesar di tur e retonan cu nos Pais Aruba ta pasando aden, nos Gobierno a demostra cu trahando hunto nos por a logra cu desempleo a baha. Minister Xiomara Ruiz-Maduro a enfatisa cu a logra baha desempleo mas tanto bou di nos hobennan.


For di un investigacion di mercado laboral cu Departamento di Labor y Investigacion, Oficina di Estadistica y Banco Central di Aruba a haci, a duna como resultado cu desempleo a baha di 8.9% na aña 2018 pa 7.3% na 2018. E cifranan ta indica cu bou di hobennan desempleo a baha mas, si bo compara cu na 2011 e cifra di desempleo bou di hobennan tabata 23.6% y na 2018 ta 16.2%. Pues esaki a conoce un reducccion di 7.4%.


Minister Ruiz - Maduro a bisa cu esaki ta un noticia alentador pa economía di Pais Aruba ya cu esaki ta nifica cu nos hobennan desemplea poco poco ta drentado mercado laboral.


Actualmente nos Pais ta pasando den su retonan economico y financiero. Den tur e retonan aki a ser demostra cu sacrificio, esfuerso, trabou duro cu nos Gobierno, Parlamento, nos pueblo y cada un di nos cu tin cu carga cu desicionnan cu ta wordo tuma, ta dunando su fruta. Nos no ta caminda nos mester ta ainda, pero nos esfuerso ta dunando resultado y apesar di tur e retonan, nos ta logrando e cambionan cu nos Pais mester, e dignatario a subraya.


E mandatario ta felicita su colega Minister di Labor y Asuntonan Social, sr. Glenbert Croes cu e logro aki y tambe a gradici personal di Departamento di Labor y Investigacion, Oficina di Estadistica y Banco Central Aruba pa e trabou haci riba e investigacion laboral.

Parlamentario Shailiny Tromp-Lee conhuntamente cu algun colega di Fraccion di MEP a bishita Departamento di Labor y Investigacion pa trata e area di inspeccion. Ta necesario y sumamente importante pa Aruba tin un seccion di inspeccion cu ta traha dirigi y ta funciona optimalmente.


Mas y mas como representante di pueblo bo ta keda acerca en conexion cu conflicto of problema cu nos hendenan tin na pia di trabou. Hopi biaha e cultura di miedo cu ta reina pa basta aña caba, ta haci cu nos hendenan no ta bay Departamento di Labor y Investigacion pa conseho of pa entrega keho. Miedo pa keda persigui na trabou of keda kita for di trabou ta hunga un rol hopi grandi. E situacion aki sigur ta haci e necesidad di inspeccion di parti Departamento di Labor y Investigacion mas grandi ainda.


Actualmente e seccion di Inspeccion conoce diferente reto. Esaki sigur a keda atendi durante e reunion di awe mainta. Pa menciona algun: percura pa tur inspector haya nan ‘toezichthoudende rechten’, e seccion conoce un absentismo pa motibo di enfermedad di 37,5% cu ta un preocupacion, baloracion maximo di e funcion di inspector di labor ta den discusion y por ultimo tin necesidad pa adapta cierto ley cu ta obstaculisa ehecucion di nan trabou. Ariba e delaster punto menciona parlamento por aporta y esaki sigur a keda palabra cu Departamento di Labor y Investigacion. Parlamentario Tromp-Lee a palabra cu Departamento di Labor y Investigacion cu hunto lo bay percura pa prepara e cambionan necesario y cu Fraccion di MEP mediante su persona lo presenta esaki na Presidente di Parlamento pa e por encamina su proceso. Alabes ya a tuma contacto cu Minister di Labor pa trata e resto di puntonan menciona.


Un cambio di ley necesario cu a keda trata, tin di haber cu e Ley Bestuurlijke Handhaving Arbeidswetgeving cu a keda aproba na aña 2013. E ley aki ta encera entre otro e posibilidad pa inspectornan por duna boet ora cu tin infraccion ta keda constata y cu e doño di trabou no ta percura pa corigi esaki den un tempo indica. Despues cu e ley aki a keda aproba Departamento di Labor y Investigacion a encamina un proceso basta largo y extenso pa por a formula e ‘handhavingsbeleid’ pa cu ehecucion di e ley aki. E ‘handhavingsbeleid’ a keda presenta na Gobierno di AVP pero e no a keda aproba y tampoco nan a duna feedback al respecto. Asina cu Minister Glenbert Croes a sinta como Minister di Labor esaki a keda presenta na su persona y aña pasa el a presenta esaki na Conseho di Minister cu a aproba e maneho cu algun puntonan di cambio. Esakinan a tuma lugar y dentro di poco por sigui cu implementacion di e ley. Pero ya caba Departamento di Labor y Investigacion ta indica cu un cambio den e ley ta necesario pa por garantisa cu e inspeccionnan por ta efectivo.

E maneho laboral di Minister Glenbert Croes ta dunando resultado. Recientemente Gobierno di Aruba a anuncia e cifranan nobo di desempleo. Aunke ainda e cifranan ta preocupante, e solo hecho cu e ta bahando, ta duna Gobierno di Aruba e confirmacion cu e maneho anti-ontheffing pro-trahadornan local, ta funcionando y ta dunando su fruto.


A midi desempleo en general na 2016 na 7.7%, na 2017 na 8.9% y na 2018 na 7.3% pues mas abou cu hasta 2016. Den comparacion cu otro paisnan den region manera Corsou cu ta conta cu un desempleo di 13.4% (oct 2018), na Jamaica di 8.7% (oct 2018), Bahamas 10.7% (nov 2018), Aruba tin un di e porcentahenan di desempleo mas abou hunto cu Bermuda cu ta na 6% (mei 2018), Cayman Islands 2.8% (sept 2018) y Trinidad & Tobago na 4.4% di desempleo.
E cifranan cu ta preocupa e mandatario hopi apesar di e hecho cu el a baha, ta e porcentahe di desempleo bou di e hobennan. Na 2018 e porcentahe baha te na 16.2% compara cu 2017 cu a conta cu un porcentahe di 19.4%.


Pa e sector aki Minister di Asunto Social y Labor tin diferente proyecto andando conhuntamente cu Departamento di Asunto Social, cu ta concentrando e aña aki specificamente riba mamanan hoben y soltera. Via un proceso di educacion, re-educacion, cursonan y entrenamento, e meta ta pa na final saca nan for di bijstand y pone e hobennan aki riba e mercado laboral. Durante e prome luna di trabou, e mamanan ta keda haya ayudo y asistencia for di Departamento di Asunto Social te ora nan cobra nan prome salario. Na mes momento lo ubica e yiunan chikito den un crèche subsidia pa e programa aki di DAS, pa cumpli tambe cu e deseo di staatscrèche di Parlamento di Aruba pa asina no stroba ningun mama of tata di por bay traha. E proyecto aki ta carga e nomber di "Riba Caminda pa Trabou" cu a cuminsa cu 22 mama. Dos di nan ya a haya trabou y ta sumamente contento cu e decision aki cu nan a tuma di transforma nan bida pa miho. E otro 20 nan ta kedando cla pa pronto tambe drenta mercado laboral. Pa loke ta hobennan masculino, mediante Formacion Social, mientras tanto 13 hoben ta pasando nan pasantia pa despues sea sigui den e mercado laboral of drenta AruMil si nan logra cumpli cu e rekisitonan.


Esaki ta dos di e proyectonan pa yuda hobennan yega na un trabou pa por duna nan mes y nan yiu(nan) un miho porvenir.


En todo caso ta comproba cu e maneho anti-ontheffing y pro-local, awe ta dunando su fruto cu e prome indicadornan di aña 2018.

Minister di Turismo sr. Dangui Oduber na aña 2018 a introduci un masterplan pa San Nicolas na pueblo di Aruba. Un plan cu a enfoca na desaroya e turismo di San Nicolas drechando e aspecto infrastructural, pero tambe activando y modernisa e oficina di turismo na San Nicolas. E vision tras di esaki ta pa incentiva turistanan bai San Nicolas. Na e momentonan aki e destaho publico ta tumando lugar pa despues bai over na gunning y asina e proyecto por cuminsa. Si tur cos cana segun planning den luna di augustus lo tin groundbreaking di e proyecto di Baby Beach segun e mandatario.


Minister Oduber a splica cu e proyecto di Baby Beach ta un bunita proyecto pa San Nicolas. Lo bay amolia e beach, crea parking spaces, crea un boardwalk y drecha henter e infrastructura. Henter e area lo haya iluminacion y e landscape tambe lo haya un mehoracion, e proyecto aki lo bay ta den dos fase. Pronto e piernan y e infrastructura na Rodgers Beach tambe lo wordo drecha, tur cos ta bay den fase segun e mandatario. Tur esaki ta bay trece mas actividad pa San Nicolas pa asina percura cu e turista ta bin San Nicolas pa crea mas actividadnan economico. Hunto cu e proyecto hotelero cu a wordo anuncia, San Nicolas ta haya e atencion cu e merece.
​

E proyecto di Baby Beach ta e proximo proyecto pa wordo inicia bou di e plan integral cu Gobierno tin pa San Nicolas. Minister Oduber a menciona cu e ta lamenta cu tin NGO’s cu tin agenda politico ta haci campaña negativo pa boycot e proyectonan cu ta beneficia San Nicolas. E mandatario a trece dilanti cu a logra gana e confiansa di e comerciantenan y e pueblo di San Nicolas, nan ta kere den e plan integral di Gobierno. E Minister a termina bisando cu “Keda sin haci nada pa San Nicolas NO ta un opcion mas. San Nicolas tin tur e potencial pa haya su fair share den e desaroyo di nos pais”.