​Prome Minister Evelyn Wever-Croes a splica siman pasa cu awor Aruba no tin casonan di transmision local. Aruba tin awor 14 caso activo y tur ta importa. Pa e scenario cu tur ta caso importa, e strategia ta funcionando.

Aruba su instruccion ta e distancia di 1,5 meter. Ta solamente caminda cu awor no por tene e distancia ey ta recomenda pa uza “mondkapjes”. Por ehempel, den transporte publico.


“MONDKAPJES” Y CASO DI TRANSMISION LOCAL
Asina cu Aruba conoce casonan di transmision local, e uzo di mondkapjes ta bay wordo exigi den e siguiente casonan:

1) Tur persona vulnerable mester uza ‘mondkapjes’. Pues, esnan riba 60 aña, personanan diabetico, personanan cu ta sufri di problema di curason y presion halto

2) Tur establecimento paden, caminda no por tene distancia di 1,5 meter. Restaurant, supermercado, misa entre otro.

Premier Wever-Croes a enfatisa cu awor ainda esaki no ta obligatorio, pero ta bon pa comunidad sa kico e strategia ta na momento cu tin casonan di transmision local.

“Nos disciplina y nos cordialidad lo ta e yabi pa nos exito. Nos ta bayendo riba e bon caminda. Nos mester sigui ta alerta y cuida nos mes y nos famianan”, Premier Evelyn Wever-Croes a duna di conoce.

Comienso di e luna di juni, Minister President Evelyn Wever-Croes a informa tocante e proceso pa busca un operador nobo pa e referina of inversionista cu kier haci otro inversion. Esaki a cuminsa dia 8 di juni 2020 y tur notificacion publico a wordo publica den corantnan local y internacional, y websitenan na Merca y na Europa na unda cu Gobierno di Aruba y RdA ta stipula e exigencianan claramente pa e REOI-1 y REOI-2.


REOI-1: a pidi interesadonan pa expresa nan interes den reapertura di refineria of industria relaciona cu refineria y energia, por ehempel LNG, facilidadnan petroquimico, energia alternativo.
REOI-2: a pidi interesadonan pa expresa nan interes den cualkier otro tipo di desaroyo (“vervangende industrie”), cu ta genera cupo di empleo y desaroyo economico similar na e refineria.


Na prinicipio tur interesado a haya 6 siman pa reacciona y entrega nan oferta dia 17 di juli 2020. Sinembargo, door di peticionnan ricibi, e fecha a wordo hala pa diabierna juli 31, 2020 pa tanto e REOI-1 como tambe REOI-2.


“E siman aki ta un siman crucial pa Aruba y e refineria. Diabierna awor e Request Expression of Interest REOI 1 y 2 ta cera. REOI 1 ta pa esnan cu ta interesa pa inverti den un refineria moderno. REOI 2 ta pa otro tipo di inversion cu ta genera desaroyo economico y cuponan di trabou. Diabierna notario ta habri e envelopnan digital y ta informa cuanto interesado a expresa interes pa e refineria y pa otro actividad. Cu esaki ta habri un etapa nobo pa Aruba y ta crea mas perspectiva pa nos futuro generacionnan. Dentro di algun siman nos lo haya sa cual ta bay bira e partnernan den desaroyo di nos pais!”, Minister President Evelyn Wever-Croes a duna di conoce.


E proceso aki ta un proceso transparente cu ta garantisa e integridad den e proceso, y ta cumpli cu palabracionnan haci den e acuerdo di coalicion. Gobierno di Aruba tin tur confiansa cu e procedura aki lo brinda e miho alternativa pa Aruba.

Manera ta conoci por medio di e fondonan di Sociaal Crisis Plan y conforme cu e vision di Minister Dangui Oduber un FACT-team Kind en Jeugdzorg a ser estableci na september 2019. FACT-team ta resorta bou di e departamento di Sociaal Psychiatrische Dienst (SPD) di DVG. E Fact-team aki ta un team ambulante cu su meta ta pa trata mucha y hobennan te cu 24 aña di edad cu tin problema mental.

Den 10 luna di tempo e FACT-team aki a conta cu un total di 134 reporte di casonan. E casonan raporta tin di haber na prome lugar cu problemanan di conducta sigui pa diagnostico di depression, problema relaciona cu personalidad y ansiedad. E casonan aki ta bin dilanti mas tanto entre e edad 12-17 aña, sigui pa 7-11 y 18-24. FACT team a crea asina su credibilidad cu nan a caba establece un cooperation cu e Stichting DornaSol pa asina duna guia na e alumnonan di e scol aki.
​
Minister Oduber ta contento y satisfecho cu e FACT-team aki ta logra detecta problemanan serca nos hobennan na un edad jong paso esaki ta e unico manera cu por trata nos hobennan y nan famia na tempo pa asina evita complicacion riba e tereno di salud mental a largo plaso. Minister ta contento di wak su vision cual ta detecta problma mental, trata esaki pa asina duna perspectiva na esnan mas vulnerabel den nos pais especialmente nos muchanan y hobennan.

E asociacion di dokternan di cas HAVA no a keda contento cu e medidanan impone di gobierno Hulandes di corta den cuido medico. Consequentemente AZV mester a tuma accion pa por cumpli cu e instruccion di gobierno Hulandes.


Nos ta compronde e reaccion y preocupacionan di Hava pero segun mi no ta na su lugar pa perhudica comunidad net na e momentonan aki y nan ta na e adres robez. Nan mester ta serca VNO y no serca AZV. Tur hende incluyendo Hava mester ta solidario cu comunidad. Tur hende mester a entrega y nan sa cu e decision tuma NO ta un decision cu gobierno of AZV a tuma pa “bezuinig” sino ta Hulanda ta impone esaki riba nos tur.


Si ta pa nos, NO tin ningun tipo di bezuiniging den cuido medico net na e momentonan aki. Nos NO lo a desea di corta ni 1 florin awor aki!

Nos a bisa Staatssecretaris Blokhuis na mas cu un ocasion cu ta totalmente contradictorio cu nan kier obliga nos bezuinig 5 miyon pa luna net den momentonan di mas dificil y den pleno covid. Tambe nos a puntra na varios ocasion con nan a yega na e suma di 5 miyon. Te dia di awe ni CAFT ni staatssecretaris Blokhuis por a substancia con nan a yega na e suma aki cual sigur ta lamentabel cu nos no a haya un splicacion ainda kiko a conduci pa tuma un decision asina drastico riba nos cuido medico den pleno crisis di e pamdemia aki. E timing ta totalmente robez!

AZV ta mas cu dispuesto pa sinta cu Hava pa yega na un palabracion cu ta acceptabel pa Hava y soluciona e issue aki pa por percura cu tin continuidad den e promer liña di cuido. E ta importante pa tin un solucion pa e preocupacionan di Hava y nos ta consiente di esaki.

E situacion no ta uno saludabel cu pashentnan ta wordo perhudica. Nos ta lamenta e situacion cu Hulanda ta creando na Aruba pa nos cuido y pesey te awe nos NO por compronde di unda Hulanda a yega na e decision pa instrui nos bai corta 5 miyon florin pa luna den cuido medico den pleno crisis di Covid, e ta lamentabel e actitud di Hulanda sabiendo e consequencianan pa continuidad di cuido.

AZV a haci tur posibel pa evita cu e dokternan di cas ta bai den accion y perhudica pashentnan. Awe riba diadomingo AZV sinta varios ora cu HAVA y a ofrece un contra oferta pa por yega na un acuerdo pero lamentablemte nan NO kier a yega na un acuerdo.
​
HAVA no mester lubida cu nan tey pa sirbi pueblo, sirbi pashentnan y nunca placa por ta mas importante cu cuido di nos hendenan. Nos ta spera cu HAVA reconsidera nan accionan y tambe cu nan ta habri pa dialogo y solucion envez di perhudica esnan cu mester di cuido.

Premier Evelyn Wever-Croes a duna di conoce cu Gobierno di Aruba ta den deliberacion cu Gobierno di Hulanda. Den esaki Gobierno di Aruba ta trece diferente punto cu a wordo treci padilanti den e consultanan cu gremionan, cu Parlamento y cu politiconan.


Puntonan cu a wordo treci ta entre otro, e edad di pensioen 67 aña, e bendemento di shares den compania estatal sin cu Gobierno wordo consulta, dolarisacion di nos economia, supervision financiero mas estricto, sin cu tin un perspectiva ki tempo lo sali di esaki, poder y autoridad di e entidad, ley di salario maximo den compania estatal, intercambio di informacion riba tereno di husticia, ley di reino vs ley di Aruba mes. Riba cada un di e topiconan aki ta wordo elabora extensamente.


“Nos ta den deliberacion, basa riba e puntonan cu a sali di e consultanan cu gremionan y Parlamento. Deliberacionnan ta bay den forma habri y cu respet. Nos no tin consensus ainda riba e contenido. Asina cu tin mas noticia, mi lo comunica esey. Mi ta mas transparente cu mi por ta aworaki, y p’esey mi no ta compronde e critica di gremionan. Durante un negosacion, sigur di e nivel aki, bo no ta core publica cualkier cos pasobra e por lesiona e negosacionnan. Mi ta sigur cu gremionan ta experiencia esaki ora nan negocia y cu nan ta compronde esaki”, Premier Evelyn Wever-Croes a indica.


GOBIERNO A CUMPLI CU TRAHADORNAN
Gobierno a logra paga Fase, subsidio di salario, salario di ambtenaar y sosten financiero na companianan mediano y chikito. Y tur esaki sin e ayudo di Hulanda ainda. Gobierno a haye obliga di corta mas gasto y pospone mas pagonan pa duna Aruba tempo pa negocia cu Hulanda.


“Esey tabata e peticion principal cu a bin di e consulta cu gremionan: tuma tempo pa negocia bon. Deliberacionnan ta andando keto bay. Nos no a yega ainda caminda cu nos kier yega, pero nos ta riba e bon caminda”, Prome Minister a enfatisa.

Pa surpasa e crisis di COVID19, Gobierno di Aruba ta ofrece yudansa financiero den forma di Sosten Financiero di 4000 florin pa kwartaal na empresanan chikito y mediano cu tin 1 te cu 50 trahador. E meta di e Sosten Financiero ta pa yuda e empresanan cu ta mas afecta pa e crisis di COVID19 cu un fondo cu cual nan por cubri gastonan di operacion di e negoshi.


A reserva 40 miyon florin pa Sosten Financiero
Pa brinda Sosten Financiero na Empresa Chikito y Mediano, Gobierno a reserva 40 miyon florin den Presupuesto di Pais Aruba. Na luna di mei a brinda yudansa financiero na 2515 empresa pa un total di 10 miyon florin. E yudansa financiero aki por wordo duna danki na tur e gastonan cu a logra baha den Presupuesto 2020, specialmente cu e aporte di e empleado publico.


Notificacion di SVB y aplicacion via MiSVB
Tur empresa cu ta bin na remarca pa e yudansa aki, ta haya un email di notificacion di SVB cu ta contene e condicionnan y un link pa por aplica pa e yudansa financiero aki. Desde 23 di juli te cu 26 juli por aplica pa e Sosten Financiero via e portal di MiSVB. Entrante dia 30 di juli e pago lo wordo haci via SVB. Pa pregunta riba Sosten Financiero por contact helpdeskmkb@svbaruba.org of subi www.svbaruba.org.

Un enfasis cu Prome Minister Evelyn Wever-Croes ta keda pone ta e importancia pa keda mantene e disciplina y reglanan di higiena. Ta asina nos lo logra y of evita di wordo contagia cu e virus Corona. No ta e pais mas poderoso of mas rico ta esun cu ta vence e crisis aki, sino e pais cu demostra mas disciplina.

“E maneho y preparacion pa apertura di fronteranan awe ta mustra su fruta cu nos ta bayendo riba e bon caminda. Nos a planifica y prepara pa esaki y a demostra di tawata hopi bon prepara. Pa loke ta e fluho di turista, desde momento cu nan yega y nan bay nan hotel nan ta haña e asistencia y trato profecional y amabel. Nan ta haci nan testnan y haña resultado den 12 ora. Esakinan ta cosnan cu masha poco pais na mundo por haci.

Aruba ta conoci aworaki como un di e paisnan cu tin e reglanan mas estricto pa turistanan por drenta. Esaki nos ta haci pa e siguridad y salud di nos ciudadanonan.

Awe un biaha mas mi ta gradici tur esnan cu ta trahando cu alma y cuerpo pa haci esaki posibel. Esnan cu ta traha den area di salubridad, esnan cu ta traha na aeropuerto y rond di aeropuerto pa transporte, hotel y restaurantnan. Nos turistanan ta contento y esey ta danki na e servicio y amabilidad di nos hendenan local. Di curason hopi danki pa esaki.

Nos ta riba e bon caminda y hunto nos lo keda riba e bon caminda. Loke nos mester sigui mustra ta e disciplina y percura cu den e periodo aki mas cu nunca nos keda mantene nos mes na e reglanan. E regla principal ta higiena, laba man cu habon mas frecuentemente cu ta posibel riba un dia. Mantene distancia di hende. Bo por sali, bay dal drinks pero mantene distancia pasobra bo no sa si e otro persona por tin e virus. Mantene distancia ta yuda protehe abo y bo famia. Y si bo tin sintoma, keda paden, no bay sali pa bo comparti e griep of sintoma cu otro hende y yama bo dokter di cas pa bo por haci e test inmediatamente pa haña sa si ta covid of no. Si ta covid nos lo por trate trempan pa evita transmision local.
​
Laga nos tene semper den mente, cu no ta e pais mas poderoso of mas rico ta esun cu ta vence e crisis aki, sino e pais cu demostra mas disciplina. Nos por y nos lo haci’e tambe”.

Prome Minister Evelyn Wever-Croes, durante conferencia di prensa di Gobierno di Aruba diaranson anochi, a indica cu e maneho di Gobierno pa cu Covid te ainda ta bayendo segun plan y a splica con e plan aki ta hinca den otro y kico ta bay ta e motibonan pa escala. Hopi ta e preguntanan cu ta wordo ricibi for di ciudadanonan preocupa awo cu tin 14 hende positivo caba.


Hopi hende ta puntra si Aruba ta bay den shelter in place of toque de queda of lo cera nos frontera bek. Riba e preguntanan aki, Prome Minister a duna di conoce cu esakinan no ta bay ta e caso pasobra nos ta bon prepara pa e di dos parti di e crisis mescos nos tawata bon prepara den e prome parti.


“Nos a siña hopi den e prome parti y e conocemento aki nos ta aplicando awor den e di dos parti. Tur cos ta bayendo segun plan y nos tin un plan di escala. Esey kiermeen cu ta depende di cierto factornan, nos lo escala y tuma medidanan extra si tin mester”.

Na e momentonan aki tur e 14 caso activo ta importa. Esaki kiermeen cu no tin caso di transmision local. Ora ta caso importa so, ta un indicacion cu nos ta bayendo ok. Na momento cu haña caso di transmision local, cual por bien pasa dentro di e siguiente simannan, Prome Minister a duna di conoce cu lo bay over na escala medidanan obligatorio.

Un ehempel den e caso aki ta cu lo bay pone mas enfasis riba e uzo di ‘mondkapjes’. Awor caba ta recomenda ‘mondkapje’ den transporte publico ya cu ta dificil eynan pa mantene e distancia di 1.5 meter.

Un otro escalacion den e caso cu haya casonan di transmision local, ta pa pone mas atencion na esnan mas vulnerabel pa cu e virus aki. Uzo di ‘mondkapje’ lo bira obligatorio pa asina protaha e ciudadanonan aki mas. Esnan den e grupo vulnerabel ta esnan di edad riba 60 aña y esnan cu tin malesa y problema di salud.

Un otro ehempel na unda uzo di ‘mondkapje’ lo wordo recomenda den caso di transmision local, lo ta den luganan cera, por ehempel na trabou, supermercado, tiendanan, iglesianan entre otro.

Un otro aspecto cu lo tene cuenta cu ne prome cu dicidi si lo escala, ta e capacidad di e unidad di cuido intensivo pa motibo cu tin capacidad limita y nos tin cu atende cu nos propio hendenan cu pa otro motibo mester haña atencion den cuido intensivo.
​
“Mi ta enfatisa cu na e momento aki nos no ta ey ainda ya cu ta caso importa so tin. Y ta bayendo bon den e maneho cu tin pa casonan importa. Pero na momento cu yega na transmision local, e ora lo pone atencion na e tema di ‘mondkapjes’. Te ainda basa riba e dos elementonan aki, nos ta bayendo bon”, Prome Minister a duna di conoce.

E proceso di subsidio ta wordo controla pa CAD, ARA y CAFT
ORANJESTAD - Minister Maduro ta informa cu tur dunador di trabou cu a haya notificacion di SVB, por aplica pa subsidio di salario desde 20 di juli te cu dia 26 di juli. E pago lo wordo haci entrante 29 di juli. Pa e transparencia necesario di parti di Gobierno, e proceso di Subsidio di Salario cu ta wordo ehecuta pa SVB, ta wordo controla pa CAD, ARA y CAFT.


A reserva fondo pa cumpli cu subsidio di juli 2020
Gobierno di Aruba ainda ta den deliberacion cu Hulanda riba e condicionnan pa por sigui haya yudansa financiero pa surpasa e crisis di likidez cu COVID19 ta trece cune. Aruba na promer instante tabata cumpli cu tur condicion pa por a ricibi e fiansanan di e tercer tranche, pero Conseho di Minister di Reino a bin cu condicionnan extra pa cual tabata necesario pa drenta den deliberacion. Debi cu Aruba no a acepta e condicionnan manera proponi, e fondonan di e tercer tranche pa por cumpli cu e pago di, entre otro, e subsidio di salario pa luna di juli 2020, no a wordo manda ainda pa Aruba. Ma pa no perhudica e companianan cu ta depende di e yudansa aki pa tene trahador na trabou, Gobierno a reserva e fondonan necesario pa por cumpli cu e subsidio di salario pa e luna di juli 2020.


Te cu awor a brinda 85 miyon na Subsidio di Salario
Desde luna di mei 2020, Gobierno a cuminsa brinda Subsidio di Salario na companianan cu a keda afecta pa COVID19. Den luna di mei, un total di 1658 compania a ricibi e yudansa aki pa por a yuda paga salario di 26067 trahador pa
un suma di 45 miyon florin na Subsidio di Salario. Den luna di juni, un total di 1621 compania a ricibi yudansa pa cubri salario di 22125 trahador pa un suma di 40 miyon na Subsidio di Salario. Di e manera aki te cu awor Gobierno por medio di e fiansanan haci cu Hulanda por a brinda un total di 85 miyon di sosten financiero den forma di Subsidio di Salario.


Subsidio di Salario ta wordo controla
Minister Xiomara Maduro ta informa cu e otorgacion di Subsidio di Salario ta wordo haci via SVB cu ta e instancia cu ta ricibi y procesa e aplicacionnan y ta haci e pago corespondiente di Subsidio di Salario. Na e momentonan aki caba full e proceso ta someti na controlnan di auditoria di Centraal Accountantsdienst CAD y tambe ta wordo scrutina door di Controlaria General ARA. Di parti di CAFT tambe tin un compania local di auditoria cu ta encarga pa controla e proceso. Esaki ta pa Gobierno por sigura cu full e proceso rond di Subsidio di Salario bay na un forma transparente y responsabel.
Pa pregunta riba Subsidio di Salario por manda un mail via loonsubsidie@svbaruba.org. Pa raporta cualkier abuso cu Subsidio di Salario por manda un mail na supervision@svbaruba.org.