URGENTE

Aruba, 1 september 2017

Topico: retiro di minister Paul Croes



Prome minister,
Siman pasa Aruba a wordo conmovi un biaha mas cu e detencion di un minister den funcion, relaciona cu e investigacion penal riba minister Paul Croes cu ta wordo sospecha di ricibi placa bou mesa, pidi placa bou mesa y labamento di placa, acusacionnan hopi grave. Despues di esaki e minister a propone pa e tuma un vacacion cortico, cu pago y kedando cu tur su autoridad, y Conseho di Minister a bai di acuerdo cu esaki.

Mientras tanto e detencion di e minister di AVP a wordo prolonga, y pa prome biaha den historia pais Aruba y Reino ta mira un minister den funcion, cu tur privilegio, ta sera den prison. Esaki ta causa hopi daño na integridad y imagen di pais Aruba.
Den comunidad bo forma di proceder no a wordo acepta. Norma y etica den gobernacion mundialmente ta pone tambe cu den un caso asina e minister ta tuma su retiro, y asina cu tur duda keda aclarea y e wordo declara inocente, Parlamento por bolbe apunt’e como minister.

E “vacacion” duna na minister Paul Croes cu a wordo legalisa pa e fraccion di AVP den Parlamento, no ta cumpli cu e norma y etica aki, y ta manda un señal equiboca na comunidad. Y mi ta reitera, esaki no tin nada di haber cu e persona di Paul Croes, esaki tin di haber cu norma y etica. Awor cu e minister di AVP a wordo deteni, y su detencion a wordo prolonga, y el’a wordo traslada pa KIA, e actuacion di gobierno di Aruba ta causando cada dia mas daño na integridad y imagen di pais Aruba.

Den casonan asina, na nos opinion, dos aspecto ta sumamente importante pa tene na cuenta.
E prome ta e integridad. Un hende di principio ta para pa integridad irespecto di ken ta trata. Un persona no por bisa cu e ta para pa integridad, pero ora ta trata un hende serca di dje, no kier tuma accion. Nos mester duna e ehempel y e señal bon cla cu Parlamento ta para pa integridad den gobernacion, irespecto di ken ta trata.

E di dos ta e señal cu ta wordo manda na nos comunidad. Na e momento aki, e señal cu a wordo manda na comunidad ta cu e detencion di un minister cu ta wordo sospecha di a pidi
placa bou mesa, ricibi placa bou mesa y labamento di placa, ta algo ‘normal’, pasobra tur cos ta sigi su curso regular. E señal aki ta equiboca.
Prome minister, laga nos no lubida cu otro instancianan, entre otro Conseho di Minister di Reino, tambe ta vigilando e desaroyonan aki di serca. Y nan lo no duda den tuma pasonan un biaha mas, y mina nos autonomia mas.

Pesey nos ta hasi un apelacion fuerte riba bo persona pa retira e minister di su funcion, y asina demostra e madurez cu nos pais mester demostra, cu nos mester por atende nos asuntonan, pa evita cu otronan ta bin atende nan pa nos.
En espera di un respuesta positivo, nos ta termina

Atentamente

​Fraccion di MEP

STA CRUZ -- Recientemente, despues cu minister Croes di AVP a wordo deteni, abogado Chris Lejuez a sali cu un declaracion sumamente interesante, den cual segun su opinion "experto" e minister lo ta culpable. Un declaracion cu a hala hopi atencion.

Como reaccion riba esaki, e ruman di e minister deteni, Paul Croes, a saca un relato den cual e ta involucra MEP. Den cual e ta insinua cu abogado Lejuez ta yuda MEP, y mas peor ainda, cu ta MEP a causa problema na su ruman den e caso di corupcion.

MEP a haya ta necesario pa reacciona mesora.
Abogado Lejuez NO ta papia ni traha pa MEP. Cu e tin un subrina riba lista di MEP no ta cambia esey. Tur hende conose e preferencia politico di abogado Lejuez.

Ruman di Paul Croes mester cuminsa realisa cu Paul Croes su mes a hinca su mes den e problema aki, y cu ta Mike Eman y su ministernan a manda hende pa hasi denuncia contra di dje. Varios integrante di MEP a avise, cu AVP lo sacrific'e, y awor e ta bibando esaki den carni bibo. Lider di MEP recientemente tambe a avise, pero toch e minister a sigi. Awe e no mester bin yora tras di MEP.
MEP no tin arte ni parte den e bagamunderianan aki. 

Paul Croes y esnan rond di dje a comete actonan sospechoso di labamento di placa, y Mike Eman a denunci'e. Eseynan ta hechos prueba. Asina ta, laga MEP afo di e cos aki. Cada persona adulto cu comete algo malo, mester carga su propio responsabilidad. 

MEP ta consciente cu crecemento economico ta un medio pa realisa metanan y no ta un meta riba su mes.
Na final e meta lo mester ta bienestar di tur habitante caminda mester resalta un enseñansa na nivel, un bon salud publico,
un sentimento di siguridad halto, vivienda na alcance di un y tur y acceso na alimentacion na un prijs rasonabel.


MEP lo diversifica nos economia creando varios pilarnan economico nobo. Esaki lo garantiza un crecemento economico stabil.
MEP lo innova nos economia pa prepara e base pa economianan nobo.
Stimulacion di crecemento economico, cu e meta principal pa crea empleo, lo tin atencion maximo pa partido MEP.

Na prome lugar lo stimula y sostene actividadnan cu ta haci uzo di nos infrastructura turistico presente. Esaki ta encera cu tur desaroyo riba sectornan, por ehempel medico,entretenimento, enseñansa, arte, deporte, economia di conocemento, encuentronan di negoshi internacional, cu ta haci uzo di infrastructura turistico lo ser aplaudi , amplia y encurasha.

Na di dos lugar tur inversion y desaroyo cu e meta pa substitui importacion pa medio di produccion interno tambe lo ser encurasha, sosteni y aplaudi.
Primeramente lo pone atencion na e factornan cu ta strobando un desaroyo economico sano, y mesora despues lo pone atencion na desaroyonan nobo, pa garantisa e crecemento economico stabil.

MEP lo introduci un control mas riguroso y confiabel di prijsnan den supermercadonan, pasobra e diferencia den prijs actualmente ta demasiado y den caso cu ta necesario, introduci leynan special den cuadro di maneho di prijs riba productonan pa asina realisa un poder di compra mas husto.
Nos lo amplia e canasta basico cu mas producto cu locual Gobierno tin control di e prijs na e momento aki. Tambe nos lo explora importacion for di region y Latino America di productonan di calidad y na un miho prijs.

MEP tin un plan extensivo pa apoya y sostene sector priva den establece un Mercado Popular caminda e ciudadano lo por cumpra entre otro berdura y fruta na prijs barata. E mercado popular lo sostene nos pilar economico di agricultura, cria y pesca combina tambe cu benta di artesania y cuminda crioyo. E Mercado Popular aki lo ta accesibel pa nos poblacion local y turistanan caminda lo topa otro den un bon ambiente.

Prioridad grandi pa Partido MEP lo ta tambe pa explora e posibilidad di importa gasolin di paisnan den region, caminda prijs di gasolin ta mucho mas abao cu aki na Aruba.

Esakinan ta algun plannan di vision pa gobernacion 2017 pa 2021 pa e pueblo di Aruba.
Nos meta ta pa crea desaroyo economico pa Aruba y mehora e calidad di bida di cada ciudadano. Vision di MEP ta e solucion. 22 di september benidero, deposita bo confiansa den Lider di MEP y partido MEP y duna nos bo sosten pa realisa e cambionan cu Aruba tin mester. Hunto nos ta logra.

Faltando menos di un luna pa eleccion electoral 2017, unda e pueblo lo bay dicidi e rumbo nobo di e pais aki, Partido MEP ta treciendo e vision di nos solucionnan tur dia sea ta canando y bishitando cas pa cas, bay na radionan y television cu nos plan di vision y tambe uzando medionan social pa asina nos yega mas cerca di henter nos pueblo cu nos plan di solucion.
​
“Nos Vision ta e Solucion”, ta nos programa na social media nobo na unda cada candidato lo haya oportunidad pa trece e vision di MEP dilanti. Nos lo cubri tur area di nos vision den varios programanan durante e ultimo simannan prome cu eleccion 2017.

Sintonisa nos tur Dialuna y Diaranson for di 6or di atardi riba nos pagina di Facebook. Nos lo ta live, y preguntanan ta bon bini.
MEP ta conciente cu e situacion di Aruba no ta bon na e momentonan aki. Prioridadnan a wordo poni robes den varios areanan di gobernacion den e ultimo añanan. Nos pais merece di haya e prioridadnan un bes mas na e bon ordo. MEP su vision ta e solucion. Dia 22 di september awo, brinda Partido MEP bo sosten pa asina nos ehecuta nos plan di solucionnan pa Aruba. Hunto nos lo logra e cambio cu Aruba merece.

Ta increibel tur e malinformacion y manipulacion cu ta ser treci padilanti pa e parlamentario di AVP, Chris Dammers caminda el a declara den un comunicado di prensa emiti e siman aki cu segun cifranan di Banco Central e economia Arubano ta proyecta di expande cu 3.5 % na 2017. Pero den e mesun rosea sr. Dammers no ta cita e mesun Banco Central aki cu ta bisa cu e supuesto crecemento aki pa gran parti ta depende di tur e actividadnan petrolero relaciona cu e reapertura di e refineria (blender).

Sinembargo ya nos a yega caba fin di augustus y faltando solamente 4 luna mas pa aña caba, ningun hende por mira te ainda algun actividad y trabaonan grandi ta tumando lugar den e refineria, corda pa esaki aporta na algo di e crecemento economico.

Un barbaridad completo
Sinembargo locual ta increibel y un barbaridad completo ta e parti den e comunicado di Chris Dammers caminda e ta declara cu “A base di e prome kwartaal di Banco Central e proyeccion sigur pa loke ta economia di pais Aruba, por tuma nota cu esaki compara cu 2016, tin un entrada di 842.5 miyon florin mientras pa loke ta e aña aki, e ta para na 872.5 miyon”.

Riba e declaracion aki partido MEP kier a puntra dirigentenan di AVP si no tin ningun otro hende cu conocemento di finansa y economia den AVP cu lo por a conseha e parlamentario aki prome cu el a skirbi e tipo di barbaridad aki. Alavez e pregunta ta, for di unda Chris Dammers a coba e cifranan fantasma aki?

Uzando telraam Chines
E motibonan pa descualifica e cifranan treci padilanti door di Chris Dammers ta lo siguiente:
1. Sr. Dammers uzando un telraam Chines ta publica cifranan sin sa mes kico esakinan ta contene, ya cu e ta referi na entradanan di gobierno como base pa calcula e crecemento economico den un aña. Esaki pertinentemente no ta berdad ya cu realmente e crecemento economico no ta wordo calcula a base di e entradanan, pero ta wordo midi door di aumento of caida di e GDP real di un pais. Aki partido MEP ta trece un tabel padilanti caminda por mira por ehempel con na 2015 e entradanan di gobierno a crece cu 8.4%, pero e crecemento economico basa riba e GDP real a sufri un caida -0.5% na 2015.

Un otro ehempel ta aña 2014 caminda e entradanan di gobierno a cay cu -2.2%, pero aki si tabata tin un crecemento economico di 0.8%. Pues e locura di Chris Dammers pa relata e crecemento economico na e entradanan di gobierno ta demostra cu e no tin ningun nocion y conocemento riba e materia aki.
2. Si sr. Dammers kier mantene su ponencia cu e entradanan di gobierno so ta instrumental pa cu e crecemento economico, anto partido MEP tin hopi mal noticia pe, ya cu den e promer kwartaal di 2017 nos a conoce un suma na entrada di gobierno di 257 miyon florin y compara cu e prome kwartaal di 2016 (280 miyon florin), esaki ta un caida cu 23 miyon florin.

Pues na filingrana e ponencia ridiculo di sr. Dammers a keda, ya cu ta bisto pa un y tur cu e entradanan di gobierno no ta creciendo.
Pues partido MEP ta recomenda sr. Dammers, awor cu e ta den fase final di su carera politico, pa toch sigui un curso basico di finansa y economia y pone su mes na altura di e desgracia financiero y economico cu su partido AVP a hinca nos pais aden durante e ultimo 8 añanan y pa e proximo 27 añanan.

Un fenomeno cu mas y mas mi ta topa durante mi bishitanan cerca pueblo ta mamanan hoben, y mayoria biaha soltera, cu ta puntra mi kico MEP ta bay haci pa berdaderamente nan ta haña un chens pa un mihor futuro.

Circulo vicioso
Hopi di e hobennan aki ta den un circulo vicioso. Nan no por bay scol of traha pasobra nan no tin hende pa yuda nan cu e yiu(nan). Papiando cu nan, bo ta bin realisa cu nan ta hobennan cu kier un mihor porvenir pa nan mes y pa nan yiu(nan). Lastimamente nan no sa ki caminda pa cana of e caminda cu nan ta cana no ta dunando e sosten/yudansa cu nan tin mester. Alabes tin servicio y posibilidadnan cu lastimamente e hobennan aki no sa di nan. Un ehempel ta e Leer Werk Traject di Reclassering hunto cu Avondleergangen cual sigur por yuda e grupo aki siña un profesion y aumenta nan chens pa nan haya un trabou.
Un campaña di informacion sigur ta na su lugar.

Problema laboral
Ta trata hobennan di 16-21 aña cu ta desea di por ehempel bay traha pa por tin un entrada pa por mantene nan famia, pero mirando cu nan no a termina nan scol secundario ta encontra hopi dificultad pa haña trabou. Orario di trabou tambe ta hunga un rol, mirando cu nan no tin hende pa laganan yiu(nan) durante anochi. Ademas cu mantene e trabou ta un problema, e pago cu nan ta ricibi tambe! Dicon? Mayoria biaha e hobennan aki ta gana salario minimo. Esaki ta yega net net pa paga gastonan mensual di utilidad, huur y cuminda. Porta ta resta net pa paga e cresh cu e mester paga pa laga su yiu(nan).
Esaki hopi biaha ta conduci na e realidad cu nan ta prefera pa keda cobra bijstand.

Bon noticia
Pero tin bon noticia tambe, esta cu hopi di nan ta indica cu nan lo desea di sigui studia, cual sigur ta algo cu mesora mi ta conseha nan. Pero aki tambe ta surgi e realidad cu nan no tin e espacio financiero pa paga, banda di nan gastonan mensual e inscripcion di scol, buki etc. y alabes paga cresh pa e yiu(nan) bay keda. Ambos scenario ta cual ta crea un obstaculo pa e hobennan por tin un posibilidad real pa bay dilanti.

Plan integral y alocacion di fondo
Mester bin cu un plan integral caminda ta combina diferente instancia y organisacion pa crea posibilidadnan real pa e grupo aki. Por pensa riba instancia/organisacion manera:
• Wit Gele Kruis: pa sigui traha riba prevencion y guia, pa preveni cu e famia ta sigui crece;
• Directie Onderwijs/SKOA/SMOA etc.: pa nan incorpora e.o. exoneracion di pago di schoolgeld/boekgeld pa e grupo specifico aki y alabes enseñansa ahusta y dirigi riba e necesidad specifico di e grupo aki;
• FCCA: pa casnan social dirigi special riba e grupo aki y cu nan por keda poni riba lista di urgencia. E proceso mester ta uno transparente y husto y mester traha hunto cu Sociale Zaken(SOZA). Mirando cu tin scarsedad di casnan social mester percura pa construccion di mas cas door di FCCA;
• Departamento Progreso Laboral (DPL)/Dept. di Labor (DAO): pa duna guia y sosten pa nan por subi mercado laboral. Por pensa riba proyectonan piloto manera crea un trayecto pa e grupo aki usando e metodo di ‘on the job training’;
• Enseñansa pa Empleo/Trampolin pa Trabou/Avondleergangen: pa percura pa e bin cu cursonan dirigi riba e necesidadnan riba nos mercado laboral, p’asina por amplia e posibilidad pa e grupo aki por haña un trabou;
• DIMAS: pa loke ta trata maneho di inmigracion. Concurencia mas grandi di e grupo aki ta e importacion di ‘lage kader personeel’. Mester por tene un bista mas di cerca ariba e grupo aki;
• Servicio di Impuesto: pa crea maneho dirigi pa crea incentivonan fiscal pa doñonan di trabou cu participa na e proyectonan piloto di DPL/DAO;
• Sociale Zaken: mester crea un maneho dirigi riba e famia. E famia mester bira fuerte bek caminda mayornan tin tur e instrumentonan necesario pa lanta nan yiunan. Sigur mester pensa riba un maneho/proceso transparente y husto pa loke ta trata subsidio pa yuda paga huur, casnan social, bijstand etc. Alabes ta di suma importancia pa Departamento di Asunto Social SOZA duna servicio mas directo por ehempel na scolnan. Pa den un fase hopi trempan por duna e guía y sosten necesario pa por preveni cierto situacionnan.
E punto clave cu un proyecto piloto pa mama soltero mester tin ta cu e medionan financiero ta keda aloca specificamente pa cubri e gasto di e cuido di e yiunan pa e periodo te ora cu nan haya un trabou. Tambe e proyecto lo mester traduci su mes despues den algo structural pa por sigui brinda e sosten na otro mama hoben tambe y no solamente e grupo cu a participa na e proyecto piloto.

Solucion trahando hunto
Trahando hunto nos por bin cu un solucion y bin cu posibilidadnan real pa e grupo meta aki y otronan mas vulnerabel den nos comunidad. No mester perde di bista cu e meta semper mester ta pa siña un hende pisca y no necesariamente keda dun’e pisca.

​Aña escolar a inicia y sigur nos tin varios reto cu mester atende cu caracter di urgencia, mirando cu e uniconan perhudica, ta nos hobennan, cu tur hende ta encanta vocifera: “Nos muchanan, nos hobennan TA nos futuro!” Con nos por pensa riba prosperidad, si nos no ta dicidi pa actua di un manera dicido pa mehora calidad educativo pa tur hoben?
​
SMOA a publica un articulo tocante Colegio Arubano, unda ta indica cu nan kier cuminsa cu un aña escolar den un esfera positivo, mientras un biaha mas, e pregunta cardinal ta bira: dicon ta exclui hopi alumno pa haya e oportunidad igual pa un educacion riba e trayecto largo di Havo?
Djis pa refresca memoria di nos pueblo. Desde 1999 E-afdeling ta existi den nos leynan y ta papia di ‘het driejarige traject’ y SMOA no tin esaki disponibel mas na Colegio Arubano, siendo cu hopi di nos hendenan den pasado a termina exitosamente y actualmente tin puesto prominente den nos sociedad. Kiermen kico ta pasando na SMOA cu no ta cumpli cu e ley di E-afdeling, cu a cambia na 2015 den ‘het driejarige leertraject’? Esaki mester ta asunto cu Departamento di Enseñansa, Minister di Enseñansa y Dienst Inspectie Aruba mester percura pa e maneho y ley tuma luga. Colegio San Nicolas si a aplica e ley y a habri su ‘het driejarige leertraject’, unda ta brinda e alumnonan oportunidad pa obtene nan diploma di HAVO den 3 aña despues di MAVO. Sinembargo e situacion aki ta poniendo un presion masha grandi mes riba e populacion y calidad di enseñansa na Colegio San Nicolas.
E aña escolar aki un biaha mas Colegio San Nicolas ta encontra su mes cu un cantidad grandi di alumno, cu ta biba Pabou di brug y ta aplica pa drenta cerca nan den e ‘het driejarige leertraject’. Actualmente mayoria di e klasnan di examen, esta H5, ta consisti di mas di 30 alumno, cu sigur ta hacie hopi dificil mes pa crea un ambiente positivo y ideal tanto pa e alumnonan como e docentenan.
Manera sra. Uka Wernet di SMOA ta menciona den e articulo: “… hopi biaha ta pasa cosnan chikito y e tendencia di comunidad ta, pa critica etc. Wernet a splica cu ta bon pa traha hunto, ta bin di nan banda y di mayornan tambe”. Kiermen dicon no cuminsa na busca motibo cu no ta aplica e ley aki y brinda nos hobennan e oportunidad di haya nan enseñansa secundario den un ambiente mas positivo y productivo, cu e klasnan mas chikito y den nan cercania. Klas di examen tin su exigencia cu ne y sigur nos mester percura pa haci tur loke ta na nos alcance, pa garantisa y brinda un bon educacion na nos hobennan. E alumnonan mester di mas atencion y concentracion y den un klas, unda tin mas di 30 alumno, ta sumamente dificil pa esaki sosode. E consecuencia final ta, cu e porcentahe di graduado ta abou y mesora comunidad y tur departamento relaciona cu enseñansa, ta cuestiona e resultado, sin cu a haci algo pa preveni of evita esaki.
Finalmente ami y partido MEP ta haci un apelacion urgente na tur esunnan concerni, pa nan analisa e situacion aki y sostene SMOA pa habri ‘het driejarige leertraject’ na Colegio Arubano y realmente genera oportunidad legitimo di progreso y prosperidad pa tur nos hobennan, cu realmente ta futuro di nos pais.

MEP ta e unico partido cu segun su statutonan cada cuater aña ta eligi su lider. Esaki a sosode tanto durante e 15 aña di nos lider inmortal Betico Croes como durante e 25 aña di nos lider honorario sr. Nelson Oduber. Asina pues despues di e periodo di Nelson Oduber, un lider nobo mester a wordo eligi. Y esaki a tuma lugar dia 28 di augustus 2011. Pues awe nos ta recorda cu 6 aña pasa den un Congreso extra-ordinario a ser eligi un lider nobo, esta Sra. Evelyn Wever-Croes. Riba e dia aki tabata tin 3 candidato cu a postula nan mes pa e eleccion di lider y den un forma democratico Sra. Wever-Croes a logra haya e gran mayoria di voto di e lidernan di bario pa ocupa e funcion tan importante aki.
Sra. Evelyn Wever-Croes a haci su debut riba lista di MEP pa e eleccion di September 2009 y a ricibi 1621 voto. Den e siguiente eleccion na September 2013 nos lider a redobla su cantidad di votonan y a ricibi 3396 voto, cual ta muestra di un confiansa solido duna na su persona. Y awe na September 2017 nos lider tin e tarea importante atrobe pa lidera e lista prestigioso di MEP cu lo mester trece un cambio den e henter e panorama politico y trece ordo, respet, integridad y trankilidad den e pais aki.
Sin duda cu Sra. Evelyn Wever-Croes durante e ultimo 6 añanan a haci un tremendo trabao como lider di MEP. Pabien, lider y sigui cu bo excelente trabao na bienestar di henter nos comunidad.

E fecha di 27 di augustus 2017 ta un dia riba cual nos ta recorda con dos aña pasa den Parlamento nos autonomia financiero a ser traiciona door di AVP. E origen di henter e entregamento di nos autonomia financiero a origina ora cu Gabinete Eman a haci un desaster cu nos finansa publico caminda nan a crea deficitnan di mas cu 440 miyon florin pa aña y un redoblacion di nos debe nacional yegando te na 86% di nos GDP. Consecuencia di esaki ta cu e gobierno di AVP a haya un Aanwijzing y despues un KB for di Hulanda y cual finalmente a desemboca den institucion di un Comision Supervision Financiero, esta CAFT pa Aruba.

Provocacion y intimidacion
Echo ta cu e politiconan di AVP no tabata tin y te ainda no tin ningun tiki balor pa nos autonomia financiero ya cu nunca nan a lucha pa Aruba por a haya su Status Aparte. Riba e dia di votacion pa cu e ley di CAFT, nos por a mira un organisacion completo bon hinca den otro pa silencia voz di esnan cu si realmente ta para na vanguardia di nos autonomia. E gobernantenan cobarde a pone yen di coordinador cu ta cobra sin traha for di tempran blokia entrada di e tribuna di Parlamento pa laga nan hendenan so drenta. Tambe nan a laga nan hendenan arma cana rond den gang pa provoca, intimida y menasa e parlamentarionan di MEP.

Victimanan di opresion
Tabata for di oranan tempran di mainta di e dia ey cu sindicatonan a pidi pa nan wordo scucha den Parlamento. Sinembargo Presidente di Parlamento Marisol Lopez-Tromp a keda tene nan na liña y despues a dal porta cera den nan cara cu consecuencia cu e atakenan riba parlamento a cuminsa.

Fraccion di MEP a pidi pa schors e reunion un rato y scucha e sindicatonan pa asina baha e tension cu tabata creciendo pafo di edificio di parlamento, pero e presidente a nenga y ta te despues cu reunion a caba den cual 13 parlamentario di AVP a vota na fabor di e ley di CAFT, el’a invita nan pa papia pero e ora ey e baca a hoga caba.

Net ora cu e reunion a termina e coordinadornan a cuminsa tira boter riba e multitud y como consecuencia cu cosnan a sali for di man. Gabinete Eman a manda Riot Comando contra e manifestantenan y varios tabata e manifestantenan cu a bira victima di opresion y dictadura despues cu nan a haci uso di nan derecho fundamental di manifesta y mustra nan repudio pa e forma con nos autonomia financiero a ser traiciona. Tambe un cantidad di manifestante a wordo aresta y benta den prison pasobra nan tabata lucha pa un causa noble. Pueblo a manifesta na dos ocasion tambe contra e detencion di e prisoneronan politico aki.
​
A manipula tur evidencia Ta di lamenta cu tur evidencia pa loke tabata e provocacion cu a sali di e coordinador y siguidornan di AVP for di edificio di Parlamento contra e manifestantenan a wordo manipula y kita, ya cu su dia siguiente caba Minister President Mike Eman hunto cu su siguidornan a laga bari, limpia y verf e edificio di Parlamento y asina logra na kita tur evidencia di tiro for di armanan di candela di nan propio siguidornan.