Un otro decision cu a resalta durante e Conferencia di Prensa di Gobierno di Aruba hunto cu Crisis Team ta cu e excepcion pa e Bubble ABC ta stop di existi. Na principio, na momento cu a habri frontera cu Boneiro y Corcou, tawata permiti bishitantenan di e islanan aki drenta nos pais sin tin mester di haci test ni tampoco mester a cumpra e seguro cu ta exigi di tur bishitante.

Gobierno di Aruba hunto cu Crisis Team a tuma e decision cu entrante 31 di augustus, 2020, e acuerdo aki lo termina y tur bishitante di Corsou y Boneiro lo mester haci e test y paga e seguro na momento di yegada na Aruba.
​
“Cu esaki, Aruba lo tin un solo maneho cu tur hende mester haci test y tur hende cu ta drenta y no ta biba na Aruba mester tin un seguro tambe”, Prome Minister Evelyn Wever-Croes a duna di conoce.

Prome Minister Evelyn Wever-Croes durante conferencia di prensa di costumber riba diaranson anochi pa duna informacion di e ultimo desaroyonan di Covid-19, a duna di conoce cu scolnan di kleuter y scolnan di onderbou ta bay habri diaranson dia 3 di september 2020 manera cu a wordo treci dilanti den varios ocacion.


Prome Minister a indica e importantancia pa ur Conseho escolar y cabesantenan informa mayornan den ki formato lesnan ta bay wordo duna. Scol ta responsabel pa e muchanan ta haña enseñansa. Tin scolnan cu klasnan chikito cu por tuma tur mucha den klas y tin scolnan cu klasnan mas grandi cu lo mester bay mira con pa reparti e oranan. E mayornan lo wordo informa ki ora nan yiu ta haña les y con e ta bay haña les.

Pa loke ta scolnan secundario tambe a tuma e decision cu lo habri dia 3 di september ya ta bay duna les 50% den klas y 50% cu tareanan cu e studiante ta haña. Bou di studiantenan aki e riesgo pa contagio ta mas halto y p’esey tin otro palabracionnan haci.

Importante pa señala tambe ta cu e grupo aki mester bisti nan tapaboca constantemente na scol. Esaki no ta conta pa scol basico. Mientrastanto Gobierno di Aruba lo sigui monitoria e situacion di salud y lo tuma otro decisionnan si tin mester.

Prome Minister ta gradici tur esnan cu ta trahando riba e tema aki y cu lo sigui reuni semanalmente, especialmente cu e Conseho escolar y sindicatonan cu a participa activamente akinan y nos clusterteam cu ta trahando riba e tereno aki.
​
“Mester bisa cu scolnan tawata tin nan plannan cla y bon elabora. Nan ta full prepara pa e condicionnan aki y depende claro di cada scol, mi ta haci un apelacion pa por fabor informa cabesantenan y maestranan of/y informa mayornan. Na e mayornan, si bo tin cualkier preocupacion, no ta facebook bo mester bay sino contact e cabesante di e scol y purba yega na un areglo di kico pa haci den cualkier situacion. Ohala cu hunto aisna aki nos por contribui cu e aña escolar 2020/2021 y cu por cuminsa y bira uno hopi exitoso pa nos muchanan e aña aki”, Prome Minister Evelyn Wever-Croes a expresa.

Diaranson anochi Prome Minister Evelyn Wever-Croes a informa durante Conferencia di Prensa di Gobierno di Aruba 3 medida cu Gobierno hunto cu Crisis team a tuma. Toque de Queda ta bin bek entrante diabierna 28 di augustus di 12or pa 5or am.

Otro medida cu a wordo tuma ta pa durante orario di trabou evita aglomeracion. A ripara cu 25% di contagio ta tuma luga na pia di trabou pa cua motibo Gobierno di Aruba ta haci un peticion urgente na tur e doñonan di trabou pa yuda y evita cu tin hopi hende pareu of mucho aglomeracion si no ta necesario. Den e siguiente dianan lo duna recomendacionnan na e doñonan di trabou con lo por purba evita eskai lo mas tanto cu ta posibel. Esaki ta conta pa sector priva y publico.

Contagionan den famia ta otro preocupacion grandi na unda cu a ripara cu 50% di e contagion ta tuma luga dentro di famia. Gobierno ta haci un apelacion na ciudadanonan di pais Aruba pa den e dianan nos dilanti yuda baha e gradonan di contagio.

“Esaki no ta tempo pa ricibi bishita of haci fiesta. Esaki ta temponan pa hala faha mara”, Prome Minister a enfatisa.

Ta pidi tur famia pa reduci bishitantenan na maximo 4 persona. Esaki ta conta tambe pa fiesta na cas. Prome Minister a remarca cu no ta cuerpo policial ta bin pa conta cuanto cabes tin den cas pero Gobierno ta conta riba sano huicio, sentido civico y responsabilidad di cada ciudadano. Cu excepcion cu si tin mas di 4 hende ta biba den un cas pero si riba esaki ta ricibi bishita no mas di 4 pareu.

Esakinan ta e medidanan cu a wordo introduci diaranson anochi pa purba baha e grado di contagio. Gobierno di Aruba y Crisis Team ta conta cu e cooperacion di cada ciudadano pa logra baha e contagio y asina elimina e medidanan.

Prome Minister ta haci un apelacion na henter comunidad pa durante e temporada dificil aki sigui yuda esnan mas vulnerabel den nos comunidad, esnan di edadnan avansa of esnan cu tin otro problemanan di salud cu ta haci nan vulnerabel.
​
“Nos ta mira cu no ta a nan ta esunnan cu a sali bay clubnan nocturno pero a nan ta esunnan cu ta end up na hospital y den ICU y esaki ta un splicacion so tin ta cu un otro hende a bin y trec’e e virus pa nan. Ban proteha esnan mas vulnerabel pa asina evita cu nan mester di cuido mas intensive”, Prome Minister Evelyn Wever-Croes a enfatisa.

Diaranson anochi durante Conferencia di prensa di Gobierno di Aruba hunto cu Crisis Team pa informa tocante e ultimo desaroyonan pa tur loke ta trata Covid-19, Prome Minister Evelyn Wever-Croes a anuncia medidanan cu Gobierno di Aruba a tuma pa yuda contene corona virus riba.

Premier di nos pais a duna di conoce cu un mayoria di e casonan cu tin aworaki nan origen ta conoci y mas o menos 25% di e casonan tin un origen desconoci. Gobierno di Aruba hunto cu Crisis Team a considera esaki motibo pa introduci medidanan.

Entrante 28 di augustus ta introduci un Toque de Queda for di 12 am -5 am. Durante e orario aki niun hende por ta riba caya mas. E anochi di diahuebs caba si bo ta riba caya despues di 12 am bo ta violando e ley di Toque de Queda. Toque de Queda ta un medida temporal, inicialmente pa dos siman cu e intencion pa purba maneha e contagionan cu nos no conoce e origen.

Alaves e medida aki ta necesario pa nos reserva nos capacidad di cuido intensivo pa casonan di pashentnan di Covid cu mester e asistencia aki. Na final di e dos simannan, lo conclui con esaki a afecta e cantidad di casonan y wak si e ta logra baha na un cantidad cu Aruba por biba cu ne.

Cu e medida aki tambe kier purba evita accidentnan of hincamentonan cu lo por tuma luga den e orario stipula y cu por tuma luga den cuido intensivo cu pashentnan di Covid mester tuma. Ta constata cu hopi biaha ta den oranan di marduga door di abuso di alcohol ta haña e pashentnan di trauma den cuido intensivo cu por wordo evita.
​
“Durante e prome periodo di Covid, Toque de Queda a traha y Gobierno di Aruba ta spera cu e biaha aki tambe e traha”, Prome Minister Evelyn Wever-Croes a duna di conoce.

Prome Minister Evelyn Wever-Croes, diaranson anochi durante Conferencia di prensa di Gobierno di Aruba hunto cu Crisis Team pa informa tocante e ultimo desaroyonan pa tur loke ta trata Covid-19, expresa cu e ta sumamente lamenta di e incidente cu a pasa den fin di siman ultimo na unda un lista di informacionnan confidencial a circula via Whatsapp y medionan social. Esaki ta e informacionnan confidencial di pashentnan cu a test positivo pa Covid-19. A tuma nota cu riba e lista cu tawata den circulacion tawatin nombernan di hendenan cu ta bisa cu nan no a test nunca ni a test positivo.

“Lagami ta hopi enfatico, cualkier informacion di pashentnan cu ta informacion confidencial ta algo inaceptabel. Nos ta tuma esaki hopi na serio y mesora a cuminsa un investigacion cu ainda ta andando”, Prome Minister a duna di conoce.

E Mandatario a remarca cu lo sigui un sancion y tene esun of esnan cu a inicia e circulacion di e lista aki wordo teni responsabel pa esaki. Na mes momento tambe Gobierno a tuma tur medida pa algo asina no bolbe pasa nunca mas ni den e cisis aki ni den niun otro forma. Gobierno di Aruba ta tuma informacionnan confidencial y privacidad di pashentnan hopi na serio.
​
“No ta keda mi otro cu ofrece mi disculpa na tur e pashentnan cu por a wordo afecta pa motibo di esaki y na unda cu por nos lo coregi esaki. Pero investigacion ta andando y pronto nos lo haña sa di unda e informacion aki a lek y tene esnan cu a haci esaki responsabel”, Prome Minister Evelyn Wever-Croes a enfatisa.

Relaciona cu lekmento di un lista confidencial di pashentnan cu Covid19 den fin di siman, a cuminsa di biaha cu un investigacion preliminar y a resulta cu tin varios cos no ta klop den e lekmento di informacion. Esaki ta un indicacion con henter e lekmento di informacion a ser orkestra pa AVP, pasobra coincidenca no ta existi (‘Toeval bestaat niet’). Nos na tur momento a tene politica pafor di maneho di crisis.

Partido AVP a organisa un cumbre politico diahuebs ultimo y ya pa diasabra siguiente informacionnan a cuminsa lek. Tin tur indicacion cu politica a infiltra den maneho di e Crisisteam y cu esaki a ser orkestra pa AVP. Ta di spera cu esun cu a lek e informacionnan no a haci esaki pa motibonan politico.

Siguramente esun cu a haci esaki su consenshi lo mester remorde, pasobra no ta gobierno bo ta afecta, pero bo ta afecta imagen di bo pais y bo ta destruyendo bo pais na momento cu bo ta opta pa bay comparti informacionnan medico confidencial di e pashentnan. Investigacion lo demostra y lo haya sa kende a lek e informacionnan y pakico e persona a haci esaki y kico tabata su proposito final.

Minister Oduber ta consciente di tur e weganan politico hunga pa AVP pasobra awo nan ta exigi pa gobierno retira y e minister concerni bay cas, pero ta bon pa refresca AVP su memoria, ya cu den pasado den un reunion publico ex Minister Schwengle a comparti informacion medico confidencial di un ciudadano Robert Paesch sin pidi e pashent aki aprobacion pa comparti informacion di su malesa. E tempo ey Arthur Dowers no a pidi y exigi retiro di ex Minister Schwengle. Hecho ta cu e tempo ey Minister Schwengle a opta pa comparti informacion confidencial di e pashent menciona. Pero den e caso recien no ta Minister Oduber a opta pa comparti informacion ya cu e no ta conoci cu e lista aki. Ta prome biaha cu Minister Oduber a wak e lista aki y ta lamenta profundamente cu un hende por tin un mente asina destructivo pa lek e informacionan aki. Nos a constata tambe con profesionalnan a presta nan mes pa participa na un cumbre politico di partido AVP cu e unico proposisto pa desacredita maneho di crisis team. Na Hulanda bo no ta mira profesionalnan, RIVM of GGD ta duna informacion na partidonan politico. E instancia oficial pa duna informacion ta na Parlamento di Aruba cu porcierto a organiza un bijeenkomst pa duna parlamento informacion relaciona cu Covid. En todo caso na Aruba nos a constata cu profesionalnan cu ta sostenedornan di partido AVP a opta pa participa na un cumbre politico cu motibonan politico.
​
Mucho cos no por bisa ainda di e investigacion ya cu esaki ta un investigacion penal y nos ta spera cu mas pronto posibel lo yega na raiz di kico por a sosode y kico por a bay robes y pakico e persona lo a lek e informacionnan asina confidencial aki di e pashentnan cu tin Covid 19.

Durante e conferencia di prensa di Gobierno, Minister Maduro a duna un relato riba algun informacion financiero di e mita aña 2020 di e Presupuesto di Pais Aruba. E mandatario a informa cu e ‘Uitvoerings Rapportage Juni 2020’ ta cla y a wordo manda pa CAFt y na miembronan di Parlamento di Aruba. Pa mas informacion tocante e rapport financiero por lesa esaki riba www.gobierno.aw


Gastonan di operacion
Minister Maduro ta relata cu na comienso di aña 2020, finansa di Pais Aruba tabata bayendo den bon direccion. Durante e prome lunanan di aña e entrada tabata mas halto cu premira. Na momento cu COVID 19 a presenta esaki a debilita e finansa y economia di Pais Aruba. Gobierno a ricibi na entrada te na mita di e aña aki, 518 miyon florin. E gastonan realisa ta 798 miyon florin. Esaki ta nifica cu tin un deficit realisa di 280 miyon florin te na juni 2020. E dignatario ta bisa cu pa resto di e aña aki Gobierno lo genera menos na entrada. Manera proyecta e Presupuesto 2020 lo bay tin un deficit di operacion di aproximadamente 1.3 biyon florin. Minister Maduro a remarca cu na momento cu e crisis di COVID 19 a presenta Gobierno a haci solamente e gastonan necesario, pero den transcurso di aña e gastonan aki lo wordo realisa.


Gastonan di capital
Tocante e gastonan di capital e mandatario a informa cu esaki tin un deficit di 11 miyon florin te cu mita di aña. Minister Maduro a informa cu Gobierno a wanta cu e inversionnan y tambe no a realisa e fondonan di e benta di tereno di e companianan estatal. Esaki lo bay wordo inclui den e presupuesto supletorio.


Necesidad financiero
E necesidad financiero pa aña 2020 na momento cu COVID a presenta a bira 1.6 biyon florin, di cual a cubri 473 miyon florin te na luna di juni 2020. E mandatario a bisa cu e bon noticia ta cu apesar di e situacion financiero precario, Pais Aruba a cumpli cu su debenan local y internacional. Te na mita di aña, Pais Aruba tin un deficit financiero di 269 miyon florin, locual ta nifica cu Pais Aruba mester mas yudansa financiero pa cubri e deficit total di Presupuesto 2020.


Saldo primario
Minister Maduro ta sigui relata cu Gobierno a presupuesta pa aña 2020 un saldo primario di -32.2% y te cu fin di juni 2020 e saldo primario ta -6.7%. E saldo primario ta e parti di locual Gobierno a ricibi na entrada y locual ta su gastonan, excluyendo e parti di interes di e debe.


‘Debt to GDP’
E mandatario ta informa cu e ‘Debt to GDP’ di Pais Aruba na aña 2019 tabata 74.6% y durante di e ultimo dos añanan aki e peso di e debe tabata bahando. Na momento cu e crisis di COVID19 a presenta y cu Pais Aruba mester a bay busca ayudo financiero cerca Hulanda, e debe di Pais Aruba a subi y e ’Debt to GDP’ a bira 116.9%. Minister di Finansa ta premira cu pa fin di aña 2020, Pais Aruba su ‘Debt to GDP’ lo ta na 136%.


Gastonan di Personal
Gobierno tin un montante di 472.8 miyon florin presupuesta pa gastonan di personal. Te na mita aña e gastonan aki ta na 225.7 miyon florin di cual 12.4 miyon florin ta gastonan di overtime. Ta premira cu e gastonan di overtime lo subi mas durante e proximo lunanan. E mandatario a bisa cu Gobierno ta sigui traha pa contene e gastonan di personal y di overtime pa esakinan por keda manehabel.


Credibilidad financiero
Na maart na momento cu e crisis di COVID19 a presenta, e compania internacional di rating Fitch a degrada Pais Aruba su rating na BB y Pais Aruba a logra mantene su rating di BBB+ cerca Standard & Poor’s. E mandatario a subraya cu tin chens cu e panorama aki por cambia debi na e debenan cu ta wordo haci pa surpasa e crisis aki.


Pais Aruba a logra di cumpli cu su debenan
Minister Xiomara Maduro ta bisa cu Pais Aruba tabata riba bon caminda te na momento cu COVID19 a presenta. COVID19 a trece cune un crisis di likides cu a debilita Pais Aruba su finansa y economia enormemente.
E dignatario ta expresa cu apesar di e situacion financiero precario Pais Aruba a logra di cumpli cu tur su debenan.
Minister Maduro a finalisa bisando cu Gobierno ta sigui traha diligentemente pa Pais Aruba por surpasa e crisis aki y lo sa di mustra madurez politico pa tuma e miho decisionnan na bienestar di Pais Aruba.

Siman pasa diahuebs Premier Evelyn Wever-Croes a organisa un cumbre y a invita pa esaki specialmente e hobennan profesional. Esaki ta e di 7 cumbre caba cu Premier ta organisa pa trata e tema di negosaciobnnan cu Hulanda.
A organisa 9 encuentro cu gremionan comercial y sindical, y cu lidernan politico. Tambe Premier a bay Parlamento riba su iniciativa, pa duna informacion.


Durante e ultimo 3 encuentronan aki a comparti informacion tocante e draft masterplan “Reposicionando Rumbo di nos Pais”. Varelie Croes cu hunto cu un ekipo di trabou a guia e subcomision di Innovacion y Resilencia a duna un presentacion di e puntonan esencial di e plan. E masterplan ta e resultado di trabounan di 17 taskforce, un ‘program management team’ di mas o menos 10 persona y boluntarionan, un ‘steering committee’ di profesionalnan cu durante 3 luna a traha hunto pa asina por a guia y facilita e proceso di yega na un masterplan pa locual ta Aruba su recuperacion Economico y Innovacion.


E plan cu ta un draft ainda, ta den pleno proceso awor di ricibi feedback di stakeholders y participantenan y lo finalisa esaki den e proximo simannan.


E master plan ta un reflexion di un proceso participatorio unda mas cu 125 persona a participa, gran mayoria a base voluntario cu a bini hunto pa traha riba un vision y un plan pragmatico cu accionnan concreto pa yuda defini e rumbo nobo di nos Pais. Tur participante ta di acuerdo cu “business as usual” no lo por sigui mas. E plan ta uno pragmatico y ta hiba un termino di planificacion di 3 aña (2020-2023), poniendo aspectonan manera desaroyo sostenibel, responsabel y bista riba nos recursonan natural central. E plan mes ta enfoca riba un termino largo pero na mes momento creando beneficionan a corto plaso.


Durante e desaroyo hunto cu e taskforcenan a haci un trabao extenso di defini kico ta e retonan principal cu mester atende cu nan como prioridad. E retonan mas principal ta: estado di nos sector publico, clima di comercio y mercado laboral, e aspecto di inclusividad y e hecho cu nos tin un modelo economico linear


E retonan aki no ta nada nobo, ta cosnan cu nos conoce caba. Prome a cuminsa cu analisa kico ta e problemanan cardinal den nos fundeshi economico. Durante e analisis aki, e taskforcenan a revisa varios estudio y rapportnan existente pa no reinventa e wiel. A valida hunto cu stakeholders kico ta e retonan principal cu mester atende cu ne awor. Den luna di juni a conduci 2 encuesta nacional caminda henter comunidad por a participa, cu a yuda tambe pa valida e puntonan di prioridad.
E aspiracion di e plan ta un transicion exitoso pa un modelo economico nobo cu ta sostenibel, inclusivo y resiliente.
Algun punto di salida cu ta cardinal y ta carga e plan ta e.o.:
- Salubridad
- Bienestar y inclusividad pa tur ciudadano
- Un relacion responsabel y sano cu nos medio ambiente
- Crea e forsa y habilidad pa absorbe e impacto di un crisis
- Crea oportunidad pa adapta y acelera innovacion y progreso
- Crea un mercado laboral cu conocemento y capacidad amplio cu por adapta na cambionan di circumstancia


Total a defini mas di 90 proyecto concreto pa implementa den e proximo 3 añanan y asina por bisa tambe cu e caminda nos dilanti a wordo stipula. E partnernan di implementacion ta sumamente importante y clave den esaki, e.o. departamentonan di Gobierno, gremionan, NGO’s y sigur sector priva tin un rol importante den diferente accion.


“E participantenan na e cumbre a keda satisfecho cu e informacion di e Masterplan y a indica cu ta cla pa yuda reconstrui nos pais”, Premier Evelyn Wever-Croes a duna di conoce.

Diahuebs ultimo Premier Evelyn Wever-Croes a organisa un cumbre virtual cu hobennan profesional, relaciona cu e negosacionnan cu Hulanda. E interes pa e cumbre aki tabata hopi grandi y e participantenan a haya hopi informacion. E cumbre a wordo televisa y a wordo sigui pa miles di persona. A describi e problemanan financiero cu Covid a causa pa Aruba. Pa prome biaha den historia Gobierno a mira su entradanan baha cu 80% y mes momento a haya ta cubri hopi mas gasto pa yuda sector priva. Hopi ta e companianan cu tabata core e riesgo di kibra y p’esey mesora Gobierno a prepara tres proyecto pa yuda nos comerciantenan pa evita consecuencianan mas serio pa tur. E ayudo di Gobierno tabata e subsidio di salario di 60% na tur doño di trabou cu wordo afecta pa e crisis, pa asina nan por paga salario di trahadonan, e asistencia financiero FASE na esnan cu perde nan trabou y e ayudo financiero di Afl. 4.000 na empresanan chikito y mediano. Director di Finansas sr. Derrick Werleman a indica cu e problemanan financiero debi na Covid lo no ta e aña aki so, sino otro aña tambe. E aña aki nos lo mester a marca un surplus di 40 miyon florin, pero awor debi na Covid nos ta premira un deficit 1.100 miyon florin debi cu entradanan a cay afo. Gobierno a dicidi di no solamente yuda comerciantenan di sector priva, manera menciona ariba, pero ademas di carga e deficit di AZV y SVB. Tur esaki ta montantenan hopi grandi, y p’esey ta causa e deficit asina grandi. E deficit aki mester wordo cubri door di busca fiansa. Gobierno a cuminsa busca e fiansa riba mercado internacional pero e mercado a cuminsa cera mesora cu Covid a bira un pandemia local. Asina mes Gobierno di Aruba a logra presta un parti di mercado internacional y mercado local y tambe un parti di Hulanda. Awor falta 682,4 miyon florin ainda y pa esaki mester acudi un biaha mas na Hulanda. Pa otro aña, 2021, ta premira cu mester di 579 miyon florin pa financia. E fiansa aki por wordo haci normalmente na diferente forma. Aruba por purba busca financiamento na mercado internacional. Esaki no ta solamente hopi dificil, casi imposibel, pero tambe lo ta contra un interes hopi mas halto. Hulanda ta ofrece e fiansa aki na 0%. Si Gobierno di Aruba haya un banco cu kier financia mes, mester pidi aprobacion na RijksMinisterraad segun Statuut y no ta sigur cu Hulanda lo duna e aprobacion aki. Tin hende a sugeri pa Aruba presta placa na IMF of Worldbank, pero esaki no ta posibel pasobra IMF ni Worldbank ta presta Aruba placa door cu nos ta parti di Reino Hulandes. Premier a segura e participantenan cu Gobierno ta sigui den negosacion pa asina yega na un formula cu Hulanda cu ta den beneficio di tur ciudadano di nos pais. E hobennan a keda sumamente agradecido cu nan a wordo envolvi y por a participa y duna nan opinion. Ta
obvio cu nos hobennan ta hopi interesa den e topico aki y ta consciente di e problemanan serio cu nos pais ta pasando aden.


“Hunto nos lo enfrenta e retonan y nos lo surpasa nan”, Premier Evelyn Wever-Croes a duna di conoce.

GOBIERNO DI ARUBA A ORGANISA CUMBRE CU YOUNG PROFESSIONALS ARUBA TIN ROSEA FINANCIERO TE MEDIO SEPTEMBER Durante e cumbre virtual cu Gobierno a organisa cu hobennan profesional, Premier Evelyn Wever-Croes a splica con fuerte Covid a dal Aruba su economia y su finansas. Prome cu Covid Aruba tabata bayendo pa un surplus di 40 miyon florin e aña aki. Sinembargo momento cu turismo a cay mesora cu 80%, e surplus aki a cambia den un deficit.

Hopi ta e companianan cu tabata core e riesgo di kibra, y p’esey mesora Gobierno a prepara tres proyecto pa yuda nos comerciantenan pa evita consecuencianan mas serio pa tur. E ayudo di Gobierno tabata: 1. subsidio di salario di 60% na tur doño di trabou cu wordo afecta pa e crisis pa asina nan por paga salario di trahadonan. 2. asistencia financiero FASE na esnan cu perde nan trabou. 3. ayudo financiero di Afl. 4.000 na empresanan chikito y mediano. KICO TA E NECESIDAD FINANCIERO? Director di Finansas sr. Derrick Werleman a indica cu e problemanan financiero debi na Covid lo no ta e aña aki so, sino otro aña tambe. E aña aki nos lo mester a marca un surplus di 40 miyon florin pero awor debi na Covid nos ta premira un deficit 1.100 miyon florin debi cu entradanan a cay afo. Gobierno a dicidi di no solamente yuda comerciantenan, manera menciona ariba, pero ademas di carga e deficit di AZV y SVB. Tur esaki ta montantenan hopi grandi y p’esey ta causa e deficit asina grandi. E deficit aki mester wordo cubri door di busca fiansa. Gobierno a cuminsa busca e fiansa riba mercado internacional pero e mercado a cuminsa cera mesora cu Covid a bira un pandemia local y ta Hulanda so a keda mustra interes pa presta Aruba e placa. Asina mes Gobierno di Aruba a logra presta un parti di mercado internacional y mercado local y tambe un parti di Hulanda. Awor falta 682,4 miyon florin ainda y pa esaki mester acudi un biaha mas na Hulanda. Pa otro aña, 2021, ta premira cu mester di 579 miyon florin pa financia. OFERTA DI HULANDA PA YUDA REFINANCIA NOS DEBE Hulanda den e pakete di condicion, ta ofrece tambe pa refinancia nos debe externo den añanan 2021 y 2022, cu ta 523 miyon florin. Esaki ta duna nos un beneficio di 82 miyon florin riba e debenan aki over di e periodo di 8 aña.

Ademas e ta duna nos como beneficio, cu pa e dos añanan aki, 2021 y 2022, Aruba no mester preocupa pa bay mercado internacional pa presta e placa. Mirando cu e agencianan di rating financiero a downgrade Aruba, e fiansa riba mercado internacional lo no ta facil pa haya. Pues pa dos aña, e ta duna nos un espacio pa reactiva nos economia sin mester preocupa cu mercado internacional. Esaki ta un beneficio grandi di e pakete di ayudo cu Hulanda ta ofrece nos. CUANTO ROSEA FINANCIERO ARUBA TIN? Segun e directo di finansas, Aruba tin rosea financiero te mediano di september y despues di esey cosnan lo bay hopi mas malo na Aruba y lo continua den e aña siguiente, te ora turismo ta riba e nivel
​
pre-Covid y esaki lo tuma algun aña. Den e simannan nos dilanti nos mester finalisa e negosacionnan pa asina yega na e fondonan necesario. Nos economia a cuminsa mehora poco poco, pero no na e nivel cu nos ta custuma cu ne. Y e fondonan ta hopi importante pa cubri e gastonan di Gobierno, pa garantisa cuido di salud, siguridad, enseñansa, AZV, AOV, salario den sector publico y asistencia na sector priva. Participantenan tabata hopi interesa den e topico aki y tabata tin bastante pregunta. Na final Premier Evelyn Wever-Croes a splica cu ta hopi importante pa nan ta bon informa y a segura nan cu Gobierno di Aruba ta haciendo tur lo posibel pa finalisa e negosacionnan yegando na un formula cu ta den bienestar di tur ciudadano di nos pais.