-Apertura di e tayer di ‘National Risk Asssessment’
Dialuna Minister Ruiz-Maduro a haci apertura di e tayer di 'National Risk Assessment’ cu a wordo organisa pa Banco Central di Aruba y Banco Mundial. Durante e tayer aki expertonan di Banco Mundial a asisti ehecutivonan di nos Pais cu ta traha riba e tereno pa combati labamento di placa y financiamento di terorismo cu un methodo pa compila y procesa informacion necesario pa yega na un mapa di e risico y vulnerabilidanan cu Aruba tin pa wordo malusa pa criminalnan. E 'National Risk Assessment' ta sumamente importante pa nos Pais ya cu Aruba ta wordo evalua pa Caribbean Financial Action Task Force (CFATF) na 2020 y e informacion compila ta yuda na proteha nos Pais contra e menasa di labamento di placa y financiamento di terorismo.


-Apertura di e Curso di Calki
Minister di Cultura a haci apertura di e Curso di Calki cu ta wordo organisa pa Monumentenfonds hunto cu e compania Parvenir Heritage Restoration & Maintenance Company Ltd di Trinidad & Tobago den cooperacion cu Museo Arkeologico y Stichting Rancho. E meta di e curso ta pa brinda educacion riba e ofishi di traha cu calki pa asina e habilidad aki keda conserva y por wordo pasa pa mas generacion. Hopi monumento na nos Pais ta traha di calki y pesey pa por restaura y renoba nan, nos hendenan mester tin e conocemento y e habilidad pa traha cu calki. Bastante persona y instancia a mustra interes den e curso. Esaki ta brinda e speransa cu mas hende ta conciente cu ta
importante pa nos educa nos mes riba e balor historico di nos monumentonan y sitionan di interes y cu nos mester percura pa restaura nan debidamente pa asina nan por keda conserva como nos herencia cultural.


-Entrega di certificado di cursistanan di Empresario Prepara II
Minister Ruiz-Maduro a haci entrega di certificado na e cursistanan di Empresario Prepara II. Durante e curso cu a dura 10 siman, e cursistanan a haya informacion con pa crea un cultura inovativo den nan negoshi, con pa diseña un website, con pa sigui engrandece e nivel di informacion y strategia pa haci nan negoshi exitoso y con pa por cumpli cu nan debernan fiscal pa asina por maneha nan negoshi na un manera mas eficiente.


-Conferencia di Prensa
Minister Ruiz-Maduro a presenta den tres Conferencia di Prensa e siman aki pa splica riba e situacion financiero, BBO den prijs y e dos cartanan di CAFT.
E mandatario a brinda informacion riba e situacion financiero di Pais Aruba y a splica kico, entre otro, Gobierno ta haci pa baha e gastonan di personal y pa stabilisa e crecemento di debe di nos Pais .
Tambe Minister Ruiz-Maduro a anuncia cu BBO/BAZV y BAVP ta keda den e prijs di e producto/servicio y cu ta brinda comercio e opcion pa specifica riba e recibo cual parti di e prijs ta wordo paga na BBO/BAZV y BAVP. Na e manera aki e consumidor por tin e transparencia necesario, ya cu e prijs cu e producto tin riba reki ta e prijs cu e consumidor ta paga na caha.
Minister Ruiz-Maduro a brinda informacion tambe riba e dos cartanan cu a bini di CAFT. Un carta a wordo dirigi na Conseho di Minister di Reino di cual Minister President y su persona a ricibi un copia y un otro carta a wordo dirigi na Parlamento di Aruba.
Den e carta dirigi na Conseho di Minister di Reino, CAFT ta manda pidi un ‘aanwijzing’ pa Gobierno di Aruba pa motibo cu Gobierno
no a cumpli cu e recomendacion di CAFT di integra e Fondo di e Plan di Crisis Social den Presupuesto 2019. Apesar cu Gobierno a brinda informacion varios biaha na CAFT y na Hulanda riba e parti aki, toch CAFT ta keda insisti pa haci cambio pa disolve e Fondo y integra esaki den Presupuesto 2019. E carta aki no ta publico.
E carta cu CAFT a manda pa Parlamento ta pa notifica riba nan conseho pa 'aanwijzing' na Conseho di Minister di Reino. Enves di djies notifica conforme ley, CAFT a opta pa argumenta bisando e mitar berdad, locual ta causa confucion innecesariamente ya cu e carta aki ta publico.
Gobierno lo keda pendiente kico ta e resultado di e carta di CAFT y e opinion di Conseho di Minister di Reino riba esaki.


-Reunion cu Camara di Comercio
Minister Ruiz-Maduro a reuni cu Camara di Comercio pa asina por keda den contacto y intercambia informacion y opinion riba topiconan cu ta toca comercio. Tabata un bon reunion den cual a trata e tema di BBO riba factura, reforma fiscal y sugerencia pa concretisa e Economic Policy di Aruba.


-Cuenta Anual di Pais Aruba 2018
Director di Departamento di Finansa a haci entrega di e Cuenta Anual di Pais Aruba pa 2018 na Minister di Finansa. Den e Cuenta Anual por mira cu Gobierno a cumpli cu e norma di deficit den 2018, ya cu e deficit a baha compara cu 2017. Den 2018 e crecemento di debe tambe a keda stabilisa. E Cuenta Anual lo wordo manda pa Controlaria General (ARA) pa asina por wordo investiga y CAFT tambe ta ricibi e Cuenta Anual pa asina duna nan opinion. Despues cu e instancianan aki keda cla, e Cuenta Anual por bay Parlamento di Aruba pa su tratamento y pa stipula e saldo pa 2018.

Durante e siman di 23 pa 27 di september, a tuma luga na New York e di 74 Reunion General di Nacionnan Uni (‘General Assembly’). Como parti di Reino Hulandes, Aruba ta forma parti di Nacionnan Uni y a base di esaki ta atende reunionnan aki.


Den e siman cu a pasa, Prome Minister Evelyn Wever-Croes a atende varios reunion riba e tema di Sustainable Development Goals SDG’s, Metanan di Desaroyo Sostenibel. Ta trata di e 17 metanan cu Nacionnan Uni a stipula pa crea un miho mundo pa 2030 cuanan Aruba tambe ta compremeti pa cumpli cu nan. Metanan manera Combati Pobresa y Hamber, Bon Educacion, Awa di calidad pa tur hende, Posicion di Hende Muhe y Oportunidad pa Hende Muhe.


E dos ultimo puntonan Prome Minister a indica cu tawata esunnan di mas importante y a elabora mas hopi riba nan den varios reunion na unda cu a yega na palabracionnan hopi interesante. Nacionnan Uni por yuda Aruba desaroya maneho riba e tereno aki.


E tema di corupcion y bon gobernacion tambe tawata temanan importante di discucion den e reunionnan na Nacionnan Uni incluyendo digitalisacion y e-Government. Banda di varios reunionnan di Nacionnan Uni, Prome Minister a reuni cu World Economic Forum (WEF) y cu e organisacion OECD na unda tambe a toca e temanan menciona y a haci palabracionnan hopi interesante.


Prome Minister, probechando tambe cu presente na e Asemblea General di Nacionnan Uni tawata tin varios lider di diferente pais den region, a tuma e oportunidad pa reuni cu varios pa trata e tema di Venezuela. Prome Minister a reuni cu e Embahado di Reino na Washington na unda Prome Minister a ricibi un ‘update’ amplio riba e ultimo desaroyonan.


Tambe e mandatario prinicipal di nos pais a atende un reunion riba tereno ministerial di Caribe cu Under Secretary of State David Hale. Un reunion hopi importante cu a wordo trata tambe den cuadro di Reino.


Finalmente, un otro reunion di Reino cu a wordo atendi ta un reunion entre Su Mahestad Willem Alexander y Reina Maxima hunto cu e Prome Ministernan di e 4 paisnan di Reino Hulandes na unda a trata e relacion di Reino en general y e cooperacion entre e paisnan den Reino.

Diahuebs a tuma un reunion di caracter di urgencia cu e directornan di tur e stakeholdernan cu tin di haber cu e renobacion/construccion di HOH. Ta conoci caba cu e sistema di afvoer a los y awa a yena gran parti di e piso di Hospital. Esaki a crea asina un situacion peligroso pa e trahadornan y patientnan eyden. No ta di awo cu e proyecto aki tin tanto problema, y p’esey Parlamento a scoge pa scucha di e directornan mes, kico ta e problema mirando cu den prensa a cuminsa ta tira culpa un ariba otro. Hospital di Aruba lo por resulta di ta un di e edificionan cu lo costa mas placa cu cualkier otro edificio na Aruba, y como cu ainda e fecha no a yega pa entrega e proyecto den su parti final, no por bisa ta kico lo ta e calidad di edificio cu lo ricibi na final.


1 biyon ta 1000 x miyon
Hopi hende keto bay ta pensa cu loke tin di wordo paga na e edificio aki ta miyones di florin. Absolutamente cu no! Aki nos ta papia rond di mil miyon florin caba. Pa compara, e suma aki ta mas di 300 miyon florin mas caro cu e Hospital na Curaçao. E pregunta ta keda, nos lo ricibi e calidad desea, pa e prijs cu tin di paga bek?
Hopi contesta cu nos tin di haya for di esnan responsabel pa e proyecto aki, y p’esey a wordo invita na Parlamento pa atende entre otro cu e preguntanan aki y mas. Los di e sucedido di awa, tambe a haci pregunta ariba e maneho di camanan di Hospital, mirando cu idea pa pone cambernan modular ariba tereno cu a wordo presenta a trece cu ne cierto inkietud.


Parlamento di Aruba for di 2017 a entrega mocion pa minimalisa y controla aumentonan substancial relaciona cu e proyecto aki, y a pidi pa esakinan bay acompaña cu conseho di Departamento di Finansas.
Pero tambe a entrega un mocion pa e proyecto aki pasa den un investigacion forensico, mirando cu pa un compania renombra manera e compania Bouygues perde e bidding siendo cu nan tin mas experiencia den construi hospitalnan rond mundo, y a entrega un mihor prijs, toch ta perde den e proceso di scoring pa 0.7 punto di diferencia.


E situacion financiero a pisa riba e presupuesto di e minister encarga cu Salubridad, y porfin tin un luz na horizonte cu lo yega na e fondo pa por ehecuta un investigacion di e magnitud aki. Pasobra no por kita afo, cu tin di bin un cambio den e forma con ta anda cu e placa di Pais Aruba y e proyecto tin di bal loke ta bay paga pe. Ni un cen preto mas, Tevreden a remarca.
E reunion no a termina y ta continua diamars awor caminda stakeholdernan a haya tempo pa por contesta tur e preguntanan cu nan a haya for di Parlamento.

Un siman di e di 74 Reunion General di Nacionnan Uni (‘General Assembly’) na New York a yega na su fin. Prome Minister Evelyn Wever-Croes durante e siman di trabou aki, a participa na diferente reunion y evento fuerte y largo pero hopi fructifero pa nos pais. Durante siman, Prome Minister a reuni cu representantenan cu UNDP riba e tema di innovacion, bon gobernaion y integridad.


Cu Secretario General di UNDP, sr. Achim Steiner, Prome Minister a elabora riba posibilidadnan di cooperacion y colaboracion entre Aruba y UNDP riba tereno di innovacion, bon gobernacion y integridad y fortifica posicion di hende muhe y crea mas oportunidad pa nos pais.


Tambe Prome Minister a reuni cu sr. Luis Felipe Lopez Calva di UNDP. Prome Minister a haci un peticion na UNDP pa yuda nos implementa e-Government mas lihe. Y e bon noticia cu Prome Minister a ricibi ta cu UNDP ta bay yuda nos cu esey.


Prome Minister a reuni tambe sr. Fabrizio Hochschild di UNDP. Esaki ta e di dos reunion cu sr.Hochschild, e prome biaha tawata na Estonia na mei, cua reunion tabata instrumental den yuda nos logra e asistencia di UNDP pa implementa nos plannan di e-Government.


“Gobierno di Aruba tin un compromiso pa transforma den un Gobierno pro-activo. “Un e-Government” y un Gobierno mas eficiente y digital lo resulta den menos burocracia, mas transparencia y un miho servicio na nos comunidad. Esaki ta puntonan cu Gobierno a priorisa den e acuerdo di gobernacion ‘Hunto pa Aruba 2017-2021’. Mi ta hopi contento cu UNDP a aproba pa yuda nos den esaki. Esaki ta resultado di trabou duro y di network. Danki na tur cu ta yuda den esaki”, Prome Minister Evelyn Wever-Croes a duna di conoce.

Bou un ambiente festivo y amical, tanto turista y local a disfruta di loke tabata e di 4 edicion di Island Festival. E evento a wordo bishita un biaha mas di forma masal den e curason di San Nicolas.


Cuminda tipico y di diferente otro cultura cu ta habita na nos pais, artesania, musica, shownan festivo y mucho mas ta loke no a haci falta durante e evento aki. Tur esnan presente a haya un variacion total, di tal forma cu por a gosa di e anochi sin ningun problema. Personanan cu tabata presente a comenta cu pa prome biaha nan a experencia pa nan mes kico Island Festival ta encera y no tabata sa ki bon ambiente nan a perde cu e prome 3 edicionnan.


Presente na e evento tabata tey tambe Minister Dangui Oduber, kende a comenta di ta contento pa mira con turistanan por gosa di un experencia unico aki na Aruba. “Prome cu tur cos un pabien ta bay pa tur esnan encarga cu e organisacion di e evento, e trabou cu boso ta desplegando ta demostra su fruto ora bo mira e multitud di hende cu ta presente”, e mandatario a expresa.


El a sigui splica cu contrario na eventonan anterior, na unda cu tabata trece un division entre e turista y e local, Island Festival ta ofrece un momento na unda cu netamente e local por demostra na e turista kico nos cultura ta encera. Minister Dangui Oduber: “E formula aki ta un exito, bo por mira cu tur hende ta sinti nan mes bon y ta pasando un momento ameno. E mix di turista y local gosando manera un famia grandi, ta loke ta haci Island Festival diferente. San Nicolas ta hayando e atencion cu e merece cu un festival auper exitoso. Esaki sigur ta danki na nos localnan y e gran cantidad di turista cu ta atende Island Fest. Sigur esaki ta wordo considera e festival di Aruba.


Tur persona ta keda cordialmente invita pa forma parti di e proximo edicion di Island Festival, pa asina experencia personalmente e dushi ambiente cu e evento ta ofrece. Fecha di e proximo edicion lo wordo anuncia pronto y lo ta fin di october 2019.

27 di september mundo henter ta celebra Dia Internacional di Turismo, unda cu principalmente paisnan cu ta depende di turismo ta para keto pa refleha riba kico turismo ta nifica pa e desaroyo di e pais. Na Aruba esaki no ta un excepcion, tumando na cuenta cu nos pilar economico di mas fuerte ta esun di turismo. Segun Minister Dangui Oduber, mandatario encarga cu e cartera di turismo, Aruba ta un isla bendiciona y lo sigui crece den e industria di turismo.

“Diversificacion y cordialidad, esaki ta e ingredientenan principal cu ta haci cu Aruba ta exitoso den e ramo di turismo”, Minister Dangui Oduber a duna di conoce. E mandatario ta splica cu ambos palabra ta un refleho di e comunidad Arubiano. Minister Dangui Oduber: “E ta den nos cultura, e ta den nos himno, e ta algo cu ta biba den nos tur. For di nos antepasadonan pa awo, e Arubiano a ser forma door di culturanan diverso, haciendo nos unico. E cordialidad ta algo cu ta bin di su mes, e ta den nos himno y nos ta demostre tambe cada biaha na nos bishitantenan. E combinacion di ambos ta haci cu Aruba, maske ta un pida baranca chikito den un mundo gigantesco, e ta un di e luganan di mas bishita.

Nos tin cu percura pa nos tin un desaroyo turistico sostenibel pero na mes momento percura pa nos crea empleo pa nos propio muchanan cu studiando na EPI y Universidad di Aruba. Nos mester percura pa garantiza cu nan tambe por tin un trabou mayan ora nan termina nan estudio.
Minister a pone enfasis riba e desaroyo turistico na San Nicolas. Di e forma aki a bin cu cu e san Nicolas visitor center cu lo fungi como e centro di informacion pa turistanan. Tambe a introduci e Island Fest cu a converti su mes den e festival mas exitoso na Aruba. E ta wordo considera e festival mas grandi di nos isla. E calidad di festival, e experiencia pa e turista ta algo unico. E embeyecimiemnto y upgrading diu baby beach ta,be lo bai incia. Minister Dangui Oduber ta preparando San Nicolas pa e desaroyo turistico cu ta na caminda y pa tur e empleonan cu lo wordo crea.

E mandatario ta bisa cu palabra di danki no ta suficiente pa tur persona cu ta traha directamente den e industria. “Boso ta e cara cu ta representa Aruba y ta merece tur elogio cu por tin pa e trabou cu boso ta desplega diariamente”, Minister Dangui Oduber a expresa.
​
Finalmente e mandatario a splica cu tur esfuerso ta ser haci pa sigui desaroya e industria di turismo. E ta remarca cu e ta un tarea cu ta wordo carga no solamente pa Gobierno, sino tambe pa sector priva. “Nos cada un tin un responsabilidad pa loke ta turismo y sin duda, bo por wak e bek den e cifranan y tambe merito cu Aruba ta haya internacionalmente, cu nos tur ta cumpliendo cu e responsabilidad aki como un gran nacion. Pabien Aruba!”, e mandatario a expresa cu un sonrisa na su cara.

Prome Minister Evelyn Wever-Croes, dunando un toke diferente na su biahe di trabou pa asisti na e Reunion General di Nacionnan Uni na New York, a organisa, hunto cu Embahada di Reino, un “Lunch Meeting” riba e SDG#16 cu representantenan di diferente otro pais den nos region. Su Mahestad Rey Willem Alexander tawata e invitado special y hunto cu Presidente y Ministernan di paisnan chikito similar na Aruba, a delibera con pa logra metanan existente y proponi.


E tema principal di e evento aki ta integridad y bon gobernacion; ‘Con pa combati corupcion’, Con pa crea institutonan fuerte y transparente riba tur nivel’ y ‘Con pa crea plataforma pa mas cooperacion pa logra e metanan aki. Aruba ta lidera internacionalmente como isla chikito, den e rumbo pa bon gobernacion y integridad. Prome Minister durante e almuerso aki a trece padilanti su pensamento y conviccion pakico integridad y bon gobernacion ta asina importante.


“Corupcion ta perpetua inigualdad y pobresa. Nos ciudadanonan a perde confiansa den nos gobiernonan, y ta door di inspira confiansa a traves di bon gobernacion, nos por gana nan confiansa bek. Aruba ta liderando den e ‘Small Islands Development States’ (SIDS) riba e tereno di integridad y bon gobernacion”, Prome Minister a enfatisa.


Ta importante pa menciona cu Rey Willem Alexander tambe a expresa con importante e meta aki ta pa logra integridad y bon gobernacion. Y ta hunto como paisnan chikito, e posibilidadnan pa logra ta bira mas grandi. Y demas paisnan ta mira riba Aruba como ehempel pasobra Aruba ta liderando riba e tereno aki.

E siman aki Minister di Finansa a ricibi e Cuenta Anual di Pais Aruba pa 2018 for di Director di Departamento di Finansa.


A cumpli cu norma di LAFT
Den e Cuenta Anual por mira cu e deficit pa 2018 a keda na 2,1% cual ta 119,4 miyon florin. Cu e resultado aki Gobierno a cumpli cu e norma di deficit pa 2018, den sentido cu a keda bou di e deficit di 2,4% realisa den 2017. Na momento cu a bira bisto cu Aruba, pa motibo fuera di alcanse di e Gobierno nobo, no lo por bay cumpli cu e norma di deficit di 0,5% pa 2018 manera stipula den Ley di LAFT, a keda acorda cu lo keda na un deficit mas abou cu esun di 2017. Gobierno a percura pa baha su deficit y a keda na 2,1% pa 2018, cumpliendo asina cu e acuerdo.


Crecemento di debe ta menos
Den 2018 e debe a keda na 4299,3 miyon florin cu ta un subida di 102,1 miyon florin compara cu e 4197,2 miyon florin den 2017. E subida den debe ta conoce un stabilisacion ya cu e debt/gdp den 2018 a keda na 75% compara cu 76,7% den 2017. Un trend cu a sigui tambe den 2019.


ARA y CAFT mester duna nan opinion
Awor e Cuenta Anual lo wordo manda pa Controlaria General (ARA) pa asina nan por haci nan investigacion. CAFT tambe ta ricibi e Cuenta Anual pa asina duna nan opinion. Asina cu e instancianan aki keda cla, e Cuenta Anual por bay Parlamento di Aruba pa su tratamento y pa stipula e saldo pa 2018.

Un evento, cu Prome Minister a expresa di tawata sumamente ameno y interesante durante e di 74 Reunion General di Nacionnan Uni (‘General Assembly’) na New York, tawata e evento organisa pa Reina Maxima na unda cu Reina Maxima a duna un raportahe hopi amplio di su trabounan como e “Special Advocate” di Nacionnan Uni.


Reina Maxima, 10 aña pasa a wordo apunta como “Special Advocate” di Nacionan Uni cu e mision pa logra inclusion financiero. Su meta ta pa mas y mas hende na mundo tin acceso na cuentanan bancario. Esaki ta duna e hende e caminda pa independencia. Reina Maxima a presenta un reportahe di su trabounan impresionante den varios parti di mundo. Melinda Gates tambe a conta di su expereincia cu Reina Maxima.


“Esaki tawata un presentacion hopi impresionante. E trabounan cu Reina Maxima ta desplega ta hopi importante y necesario pa e ser humano haya su luga central den nos mundo”, Prome Minister Evelyn Wever-Croes a duna di conoce.


Riba e potret ta mustra cu Prome Minister tabata sinta banda di su Mahestad Willem Alexander kende atentamente tawata atende e presentacion di Reina Maxima. “Un Rey hopi orguyoso di su casa”, Prome Minister a expresa.