Den fin di siman e team di Bureau MinFEC y Departamento di Finansa a haci un presentacion riba e situacion financiero di Pais Aruba na miembro di Parlamento Hulandes sra. Antje Diertens di e fraccion di D66 den Tweede Kamer. Sra. Diertens ta di bishita na Aruba y a wordo acompaña pa Parlamentarionan Croes, Tjong, Yarzagaraay y Bergen di Fraccion di MEP.


Pa por tin un debate alcaso riba finanzas publico na Aruba pero tambe den Reino, e ta importante pa tur mandatario y Parlamentario di Pais Aruba y esnan di Hulanda cu tin contacto cu y ta interesa den Aruba pa haya un splicacion detaya di kiko ta e situacion real di e finanzas publico di nos Pais, kiko ta e retonan y e posibel solucion pa e problemanan.


Como Minister encarga cu finansa di Pais Aruba tur dia nos ta traha pa por recobra e credibilidad financiero di Aruba na bienestar di full nos Pais. Pa logra stabilidad financiero pa nos Pais, tin decisionnan cu mester wordo tuma cu mester aprobacion di Parlamento di Aruba. Pesey ta importante pa e Parlamentarionan ta na altura di con e situacion financiero di nos Pais ta. Banda di esaki como Pais den Reino bou supervicion financiero ta importante pa esnan cu ta debati riba Aruba den Tweede Kamer tin conocemento tambe di e situacion di Pais Aruba.
​

Minister Ruiz-Maduro ta gradici Parlamentario sra. Antje Diertens pa su interes den e bienestar di Aruba den Reino y ta gradici e Parlamentarionan di Fraccion di MEP y nos team di Bureau MinFEC y Departamento di Finansa pa a brinda e oportunidad na e Parlamentario Hulandes pa ricibi e informacion importante aki di nos Pais.

Dialuna mainta, Prome Minsiter Evelyn Wever-Croes a wordo invita na un celebracion hopi special na Centro Kibrahacha. Hunto cu su famia y e famia grandi di e centro y Prome Minister, Señor Charles Lake a celebra e gran bendicion di a haci 100 aña.


Prome Minister a bishita Centro Kibrahacha algun luna pasa na unda cu el a conbersa cu señor Charles y cu hopi emocion señor Charles a conta Prome Minister cu e ta bay celebra 100 aña, pero bou di un condicion, esta si Dios permiti’e. Señor Charles a haci 100 aña y a celebra esaki rondona di esnan cu ta stim’e y cu tin cariño p’e, mustrando asina tambe e bida cu señor Charles a hiba, ganando afecto, amor y cariño di famia y amigonan.


Tawata pa Prome Minister un honor grandi di a wordo invita na e celebracion di 100 aña di experiencia di señor Charles Lake y a desee pabien y hopi bendicion.


Prome Minister a tuma e oportunidad tambe pa saluda y a gradici nos dushi pensionadonan pa e trabou grandi cu nan a haci pa nos pais.

Siman pasa Minister Ruiz-Maduro tabata presente na e Annual Meetings di IMF y World Bank na Washington. E mandatario a reuni cu e departamento fiscal di IMF riba e analisis cu nan ta bin haci pa Aruba riba gasto di personal di Gobierno. E analisis aki lo tuma lugar entre 6 y 19 di november proximo. Ta importante pa nos por haya un bista concreto di e componentenan di e gastonan relata na personal. Gobierno ta trahando na un manera serio pa baha gasto di personal y e recomendacionnan cu lo surti di e analisis aki por yuda bon den e toma y ehecucion di e decisionnan necesario.


Den e cuadro di fortalese departamentonan vital pa Pais Aruba Minister Ruiz-Maduro a reuni cu e Departamento di Estadistica di IMF pa asina pidi nan asistencia pa e clasificacion di informacion financiero di Pais Aruba por wordo haci conforme e standard internacional di IMF pa cu Government Financial Statistics (GFS). Esaki ta necesario pa asina nos data financiero por wordo compila y tambe compara segun standardnan internacional. Esaki lo facilita e trabou di evaluacion financiero y economico di nos Pais y tambe ta haci cu e cifranan di finansa di Gobierno ta cuadra cu e cifranan produci pa Banco Central. Gobierno lo percura pa empleadonan di Departamento di Finansa haya curso di capacitacion online di IMF. A keda palabra cu
​

e Departamento di Estadistica di IMF lo cuminsa evalua e informacion financiero di Aruba cu ya ta disponibel caba na IMF y pa otro aña lo bin cu un mision Aruba pa asina brinda Aruba recomendacion riba e clasificacion di informacion financiero conforme e sistema di GFS.

Diabierna ultimo Minister Glenbert Croes a haci un bishita na Refineria di Aruba durante cual e mandatario a tene un encuentro cu Aruba Vocational Education & Training Institute (A-VET).


A-VET a keda institui den colaboracion estrecho cu Techniek College Rotterdam. E instituto educacional aki di RDA ta ofrece curso y estudionan cu ta completamente reconoci pa Enseñansa di Hulanda. E punto di salida di A-VET ta: OWN PACE - OWN CHOICE - OWN WAY.


Minister di Asunto Social y Labor a bin ta enfocando hopi riba hobennan y nan oportunidadnan laboral. Tin diferente proyecto andando simultaneamente pa por acapara structuralmente e desempleo actual bou di hobennan.


Na Departamento di Labor y Investigacion tin e plan nacional di accion andando cu ta investigando con pa incentiva y crea cuponan laboral pa hobennan.
Na Departamento di Asunto Social tin e proyecto "Riba Caminda pa Trabou" cu ta enfoca specialmente riba mamanan hoben soltera. Meta ta pa mediante curso y workshops nan por integra den Aruba su mercado laboral.
Awor via A-VET, ta presenta otro oportunidad cu enfasis riba hobennan cu ta carga e nomber di BRISA - Brinda Respaldo Innovativo y Sostenibel pa Aruba. Un gran oportunidad pa hobennan riba asistencia social (bijstand) como tambe pa esunnan cu na e momento aki ta sin trabou of cu a stop di bay scol cu ta desea di por haya un oportunidad riba mercado laboral.


E programa di BRISA lo tin un duracion di total 2 aña. E ta wordo dividi den fasenen cu ta cuminsa na Departamento di Asuntonan Social y cu ta termina cu un contract laboral pa e cursista.


Pa mita di December e comision encarga cu ta consisti di DPL, DAS, DAO y A-VET lo presenta e plan di implementacion na Gabinete Wever Croes.


Pa e tempo ey lo duna informacion extenso riba e tremendo proyecto aki pa nos hobennan, brindando nan un di dos oportunidad den nan bida.

Diadomingo ultimo, Sra. Antje Diertens kende ta miembro di Tweede Kamer pa D66, a haya un presentacion amplio di Sociaal Crisisplan.

Un programa social cu ta wordo carga pa Gobierno den su totalidad, cu ta multi ministerial consistiendo di ministerionan di Husticia, Enseñansa, Salubridad y Social.

Un programa amplio cu tin como meta pa crea e base solido cu Aruba mester pa por sigui atende structuralmente cu e problemanan social cu ta afectando nos hendenan.

Parti di e team di SCP tabata presente diadomingo pa por a elabora ampliamente riba e plan, su meta, su logronan te cu awo y unda ta premira cu lo yega.

Splicando algun proyecto cu ta cay den e programa di Sociaal Crisisplan, a elabora riba e proyecto "Riba Caminda pa Trabou" cu ta enfoca specificamente riba mamanan soltera kendenan ta pasa den un proceso di transformacion personal, hayando diferente curso y workshops, pa finalmente cu intermediacion di DPL, yudanan drenta e mercado laboral.

Tambe CASA CUNA a duna un presentacion di nan proyecto "Tienermoeder huis" cu ta pa yuda y guia mamanan hoben con pa anda cu e responsabilidad nobo aki den nan bida y crea un relacion cu nan baby creando e oportunidad pa finalmente e mama hoben aki por keda cu su yiu. Un bunita proyecto cu recientemente a wordo inaugura.

Mester remarca cu Sra. Diertens a keda impresiona cu Aruba su Sociaal Crisisplan. Minister Glenbert Croes y Sr. Rocco Tjon a expresa su gratitud na e team cu tabata mas cu dispuesto pa riba un diadomingo haci e presentacion aki demostrando nan pasion social cu ta locual cu Aruba mester di dje.
​
Na mes momento e mandatario a expresa su gratitud na Sra. Diertens pa su disponibilidad y interes den SCP. Sra. Diertens recientemente den un debate na Hulanda a expresa di ta considera su mes un representante pa Caribe Hulandes tambe.

Recientemente Minister Glenbert Croes a reuni cu Luitenant Kolonel Sr. van Beekhuizen riba entre otro e continuacion di SVT - Formacion Social specialmente pa nos hobennan. E proximo trayecto ta continua februari 2020 y por cuminsa inscribi di awor caba.


Inicialmente Formacion Social tabata concentra solamente riba hobennan cu no a termina un scol secundario y cu ta desea un di dos oportunidad real den bida. Den transcurso di tempo e mandatario a encontra cu tin basta hoben cu por ehempel tin diploma di MAVO pero cu asina mes no por haya trabou. Pues riba iniciativa di e mandatario y cu aprobacion di Luitenant Kolonel Sr. van Beekhuizen y Luitenant Sr. Kelly di Marina y Arumil respectivamente, pa 2020 e hobennan aki tambe por inscribi y pasa e proceso di transformacion personal den SVT. Y e hobennan cu tin un diploma secundario tin e oportunidad di por uni nan mes na Arumil asina cu nan caba cu e trayecto, semper y cuando ta cumpli cu tur e exigencia- y rekisitonan.


Conhuntamente cu Marina y Arumil ta trahando riba un trayecto di formacion social similar pero cu enfoke riba mucha muhe. Ora cu esaki ta asina leu lo haci e anuncio oficial den prensa.


Di awor caba por inscribi. Cantidad di participante ta limita. Acerca Jessica Ras di awor caba na number di telefon 522.5352 of via email info.formacionsocial@gmail.com.

Durante rueda di prensa di diahuebs 17 di October minister Dangui Oduber a anuncia cu e proyecto di Hoben Activo, Hoben Feliz lo bay continua e siman aki cuminsando dialuna 21 di October na Sport Centrum San Nicolas y lo expande tambe pa e bario di Dakota na YMCA. Meta di e programa aki ta pa motiva y promove hobennan pa hiba un bida activo y saludabel door di involucra e hobennan cu actividadnan deportivo caminda nan abilidadnan social y emocional ta wordo mehora y caminda tambe e balornan humano mas importante ta wordo estableci. E proyecto aki ta bou encargo di IBiSA den bon cooperacion cu Ministerio di Salubridad Publico y Deporte.


E mandatario a conta cu e programa a cuminsa como un proyecto piloto den e bario di San Nicolas y a resulta di ta uno sumamente exitoso. Pa e motibo aki a expande e proyecto aki den e bario di Dakota, e idea ta pa tur bario conoce e programa di Hoben Activo, Hoben Feliz. Tur esaki ta wordo haci den cuadro di e plan nacional di prevencion di salud. Esaki ta un plan cu ta trahando riba dje den bon cooperacion cu PAHO. Minister Dangui Oduber a menciona cu e ta di sumamente importancia pa garantisa un fondo sostenibel di AZV. Segun cifranan, 80% di nos comunidad ta sobre peso di cual 30% ta obeso, cifranan di personanan diabetico tambe ta halto.


Anualmente AZV tin un gasto di 20 miyon florin door di dialyse solamente, esaki ta procedente di pashentnan cu ta sufri di sucu. Pesey mes ta bay bin cu mas campañanan di conscientisacion pa haci ehercicio y asina cambia nos estilo di biba. Pesei e programa di Hoben Activo, Hoben Feliz ta invulcra den e mucha di un edad hoben pa haci deporte, movecion pa asina hiba un bida saludabel.


E programa Hoben Activo, Hoben Feliz lo ta 2 biaha pa siman y lo continua dialuna 21 di oktober 2019 na Sport Centrum San Nicolas y diamars 22 di oktober na YMCA Dakota. Muchanan entre 8 pa 13 aña por pasa libremente pa registracion cual ta completamente gratis na Sport Centrum San Nicolas Y muchanan di 8 pa 10 aña por registra na YMCA Dakota. E programa lo cuminsa 3’or di atardi y lo termina 4:30 y lo tuma lugar riba tur dialuna, diaranson na San Nicolas y diamars y diahuebs na Dakota. E siman binidero lo toca e deportenan di ping pong, beisball, softball, atletiek y karate.


Minister Dangui Oduber ta sumamente contento y satisfecho cu e proyecto aki y un bes mas ta demostra cu e gobierno aki ta pone e ser humano central caminda por medio di deporte ta aporta na reduci futuro gastonan di AZV y tambe problemanan social.Minister Dangui Oduber kier crea un “movement” di prevencion. Un movement di come saludabel y haci ehericicio. E no lo ta facil pero nos ta comprometi pa logra esaki.

Recientemente a tuma luga e entrega di e edificio monumental di Bestuurskantoor cu a wordo restaura. E oficina di Gobierno ta estableci den e edificio aki for di añanan 50. Hunto cu e edificio di Corte ta e unico edificionan cu pa mas di 50 aña a keda wordo usa pa mesun destinacion


Historia di e edificio di Bestuurskantoor
E edificio di Bestuurskantoor a wordo traha na comienso di Segunda Guera Mundial, entre 1942-1943 y e tawata fungi como kazerne militar y hospedahe di e oficialnan. E edificio ta rondona dor di Zoutmanstraat na banda pa nort, A.M. Schultestraat na banda oost y L.G. Smith Boulevard na banda pazuid. Apesar cu a traha e edificio pa kazerne, ya tabata dicidi caba cu asina cu guera caba e lo fungi como edificio gubernamental. E diseño ta di DOW-Curaçao y ta ilustra e caracteristicanan tipico di arkitectura di DOW di e añanan cuarenta y comienzo di añanan cincuenta di siglo pasa. Aki ta trata di un arkitectura specialmente traha pa e clima tropical, reconocibel pa e fachadanan aclimatisa, esta veranda cubri, rondona cu galeria, portal di beton, leishi pa porta y bentana cu ta sali afo, jalusi di palo. Tambe e edificio ta traha den e direccion di biento y rondona pa un espacio habri. A traha e edificio aki den mesun temporada cu a traha un otro edificio na L.G. Smith Boulevard destina pa defensa. Den e edificio aki tabata ubica Teatro de Veer despues, pero a basha esaki abou pa por traha un ‘shopping mall’ moderno. Esaki ta encera cu e Bestuurskantoor actual ta e ultimo construccion riba e boulevard cu ta recuerdo di e periodo di Segunda Guera Mundial.


E restauracion a cumpli cu e reglanan di edificio monumental
E mandatario ta informa cu e restauracion di e edificio di Gobierno a wordo ehecuta riba un nivel hopi halto y a cumpli cu e reglanan pa edificionan monumental. E funcionarionan di Monumentenbureau a haci un tremendo trabou pa asina por a restaura e edificio y conserva partinan original di e edificio.

Gradicimento
Minister Ruiz-Maduro ta sumamente contento di por a logra restaura y conserva gran parti di e edificio di Bestuurskantoor cu tin un gran balor historico. E

mandatario ta gradici su colega Minister di Infrastructura, Otmar Oduber, Conseho di Minister, Van Kessel & Havenbouw y tambe DOW pa nan bunita trabou. Un danki special ta bay na e funcionarionan di Monumentenbureau pa nan trabou valioso di conserva e patrimonio aki especialmente pa e generacionnan cu ta sigui nos tambe por admira y disfruta di nos herencia.

Diabierna atardi, Prome Minister Evelyn Wever-Croes a ribici for di man di Parlamentarionan Edgard Vrolijk, Rocco Tjon y Endy Croes un copia di e Ley di Iniciativa pa regla integridad di mandatarionan. E Parlamentarionan di Fraccion di MEP a traha riba e ley di screening di mandatarionan y a entrega esaki algun luna pasa. Despues di a haci e cambionan sugeri pa Raad van Advies, e Ley di Iniciativa a wordo entrega na Presidente di Parlamento pa e por wordo trata den Parlamento. Diabierna merdia, e Parlamantarionan a entrega un copia di e Ley di Iniciativa na Prome Minister.


Ley di Screening di mandatarionan ta un di e pilarnan pa construi e fundeshi di Integridad den gobernacion cu regla y codigo di conducta na cual mandatarionan mester atene nan mes na dje. Den e ley ta stipula ki consecuencia tin ora viola reglanan di integridad. Manera Prome Minister a anuncia anteriormente, e ley a keda cla den e di dos mita di aña pa asina e por wordo trata den Parlamento.


“Gabinete Wever-Croes lo logra e meta di trece integridad, transparencia y bon gobernacion den Gobierno. Pabien na e Parlamentarionan cu a traha riba e ley di iniciativa aki y danki pa boso dedicacion y compromiso pa crea un miho Aruba’, Prome Minister Evelyn Wever-Croes a expresa.