​Parlamentario Endy Croes ta asegura cu e constelacion nobo di Parlementarionan di Fraccion di MEP indudablemente tin e mesun idealogia pa practica politica nobo den Parlamento. Ta nos deber pa no solamente studia e Staatsregeling sino cumpli cu ne tambe. Den combinacion cu e Reglament van Orden van Staten y e Staatsregeling, ta duna tur Parlamentario e derecho pa haci pregunta por escrito na tur minister. Y esaki ta locual cu e Parlamentario a cuminsa haci tambe.
 
“Mi kier cuminsa indica algun preguntanan cu mi a haci caba riba varios manehonan cu e gobierno anterior tabata tin. Como representante di pueblo, mi a haci algun preguntanan cu a bin for di pueblo mes.
 
Un di e preguntanan aki ta tocante un revista hopi conoci pa tur. E ultimo ainda tin e fecha di 18 di october despues di eleccion. Ta trata aki di e revista Aruba dushi tera cu ta propaganda e gobierno anterior na unda 15 mil exemplar ta wordo imprimi na Hulanda. Den dje ta para cu tin algun hende ta abona riba dje tambe. Como Parlamentario respresentando e pueblo, nos kier sa e costo di e revista aki y kendenan ta esnan cu ta abona na dje. Un calculacion cu nos a haci ta cu e costo lo ta alrededor di 4.5 miyon pa aña. Y si nos calcula esaki na 8 aña, esaki lo ta un suma di alrededor di 30 miyon florin pa haci propaganda. Como Parlamentario y mi tin sigur e pueblo tambe lo prefera pa e placa aki worde uza pa problemanan social den nos pais.
 
Un otro pregunta cu mi tin ta referi na dje ta un auto di dragrace di Team Aruba cu ta pertenece na ruman homber di ex Prome Minister Mike Eman. Tambe nos tin entendi por medio di APA y Triple A ta ricibi entre 200 pa 300 mil florin pa aña. Ta keda mi awor pa uza e medionan legal pa bay puntra y asina duna pueblo un contesta. Mi preocupacion ta cu si esaki ta berdad, con e ora ta posibel cu Palo Marga ta den un mal estado asina? Lo no a uza e placa aki pa drecha Palo Marga?
 
Un otro pregunta cu ta hala mi atencion ta na Monumento 18 di maart tambe tin un “eewige vlam” cu desde 2011 gobierno ta pagando. Cuanto esaki ta costa e pueblo? Unda miho nos por uza e placa aki?
 
Tambe mi por indica cu na Sabana Grandi tin un buraco cu nan tabata cobando cu tabata causa masha hopi molester pa henter e besindario. Riba esaki tambe mi a aloca preguntanan caba y tambe tocante e hermentnan cu Parlamento tin pa yuda e bario di Sabana Grandi cu ta sufriendo di un molester increibel.
 
Tambe mi por menciona Veld di Kudawecha cu ta un di e veldnan mas uza na Aruba. Desde maart di e aña aki a baha su luzanan y ainda nan no a haya ayudo di apenas 20 mil florin pa pone e luznan aki back. Sinembargo otro prioridadnan a tuma luga pa embeyece aki aya. Nos lo bay urgi e Minister di Deporte pa duna un ayudo na un veld cu ta hopi uza pa deporte”, Parlamentario Endy Croes a termina bisando.

Tur departamentonan concerni lo bin cu un plan coherente y integral pa evita situacionnan doloroso di abuso di mucha.

Den conferencia di prensa di diaranson mainta, Prome Minister di Aruba, Evelyn Wever-Croes a duna di conoce cu relaciona cu e caso lamentabel cu a pasa unda dos criatura a sufri y fayece a causa di maltrato severo, Gobierno di Aruba a tuma algun decision imortante.
 
Pa algun tempo caba, e tres partidonan cu ta forma e coalicion aki, a bin ta bisando cu den un pais na unda cu nos ta mira cu inversionnan tabata mas dirigi riba embeyecimento y infrastrura lo resulta den casonan lamentabel asina. Pa e Gobierno aki, e ser humano ta central y nos lo pone esaki den praktica.
 
Prome Minister a indica algun desicionnan cu a wordo tuma den Conseho di Minister pa yega na e plan coherente y integral pa evita situacionnan asina.
Gobierno lo acapara diferente departamento cu ta resorta bou di ministerio di asuntonan social, ministerio di enseñansa, ministerio di salubridad y ministerio di husticia.
 
Un di e desicionnan importante cu nos a tuma ta cu departamentonan cu ta cay bou di ministerio di asuntonan social lo presenta otro siman un plan con pa atende cu e tema di abuso di mucha.
Den e plan aki, nan lo inclui un plan con pa institui un “meldpunt” cu ta un punto central na unda cu experto y profecional, famia y bisiñanan por “meld” ora cu tin preocupacion of sospecho cu un mucha ta wordo abusa.
 
Tanto esnan cu ta traha den e area social como esnan cu ta traha den e area di salubridad lo mester traha den e plan aki. Varios dokter y specialistanan ta mira tur dia cu muchanan ta wordo abusa pero nan no tin un caminda cu nan por bay cu nan keho y no ta haya oido na nan keho. Cu e “meldpunt” e situacion aki lo caba pasobra cu e “meldpunt” tur keho lo wordo atendi cu ne.
Un reto adicional cu salubridad lo tuma ta e reto di salud mental den nos comunidad cu pa hopi tempo tabata un tema tabu y cu lo wordo atende cu hopi prioridad.
 
E parti di husticia tambe lo wordo atendi mesora. Hopi biaha ora cu un hende trece un keho dilanti, e departamentonan encarga no por atende cu esaki. Decision cu a wordo tuma ta cu lo inverti den departamentonan pa yuda den casonan asina. Voogdijraad por ehempel lo bay haya e personal necesario cu por atende cu e temanan aki. Polis di bario tambe lo haya personal necesario pa yuda e comunidad miho den casonan asina. Lo bin cu cambionan di ley pa brinda mas proteccion na nos muchanan.
 
Enseñansa tambe lo carga un tarea importante den e plan aki. Enseñansa ta e porta caminda nos por mira hopi problemanan social cu ta socode. E tema di “leerplicht” lo haya mas atencion. Actualmente tin un burocracia cu ta stroba cu docenete y cabesantenan por “meld aan” casonan di abuso cu nan ta wak y cu por a wordo evita. Mas informacion tocante e ley di “leerplicht” y “training” lo wordo duna na cabesante y docentenan pa por detecta abuso di mucha di tempran caba.
 
Di e manera aki, Gobierno di Aruba ta trahando riba un cadena integral cu ta acapara departamentonan di asuntonan social, salubridad, husticia y enseñansa. Pasobra solamente hunto nos lo mester atende cu e problema aki.
 
 
 

​Minister Plenipotenciario Sr. Guillfred Besaril ta back na Aruba despues di a asisti na su prome Ministerraad di Reino na den Haag siman pasa. Minister Besaril a cuminsa atende cu e situacion di Aruba Huis na Hulanda y ta cla na comparti su prome impresionnan cu el a haya di nos cas na Den Haag tanto pa loke ta e estado físico di e edificio como e personal.
 
Den proximo Minister Raad, Minister Besaril lo comparti cu su coleganan entre otro e raport di Cushman & Wakefield den cua ta duna recomendacionnan pa mehora tanto e ambiente di trabou como tambe e edificio di Aruba Huis pa asina por brinda e comunidad Arubano na Hulanda y tur esnan cu ta bula di Aruba pa Hulanda e servicio conforme e metanan di Aruba Huis.
 
Minister Besaril ya ta na Aruba y a cuminsa mescos cu tur otro Ministerio na traha duro pa asina restablece ordo y mehora e funcionamento di e departamentonan cu ta cay bou di cada Ministerio pa asina aki brinda e servicio pa pone e ser humano central manera ta e meta principal di Gobernacion di Gabinete di Prome Minister Evelyn Wever-Croes. 

Como Minister di Asuntonan Social y Labor, mi ta asumi mas cu nunca como mi responsabilidad pa ta e prome trahador social di Aruba. Den un esfuerso conhunto cu tur stakeholders y partners nos ta bai pone man na obra, haci e inversionnan necesario pa mehora nos cuido social, un aspecto cu Gobierno anterior a neglisha completamente e ultimo añanan. E atencion genuino ta necesario pa realmente combati violencia y particularmente cuida y proteha nos muchanan. Nan futuro ta den nos man. E futuro di nos pais ta den nan man. Nos yudanan awor, nos lo ta construyendo un futuro sigur pa nos Pais.
 
Aruba ta un pais chikito cu un pueblo respetuoso. Nos ta un pueblo unda cu bisiña ta famia, no enemigo. Pero situacion na Aruba, den barionan a cambia.
Den e diverso reunionnan sosteni ya caba cu Dirigentenan di Departamento di Asuntonan Social, mi a expresa di no kier warda pa mañan. E futuro di nos Pais ta awor. E futuro di nos Pais ta depende di nos decisionnan, maneho y esfuerso AWO.
​
Facil ta, haci manera e Gobierno anterior, bira ciego, sordo y mudo, bira lomba pa e problema pasobra berdad ta cu ora bo enfrenta e realidad, e ta hopi tristo. Gobierno anterior a opta pa esey. Ami si NO. Y boso tin mi palabra di lo pone man na obra pa cuminsa encamina henter proceso di solucion. Y esey a cuminsa diasabra mainta den un reunion di Conseho di Minister extraordinario pa atende esaki na nivel nacional. Nos muchanan merece un Aruba cu compasion, consciente y husto. Esaki mi ta para p’e como Aruba su Minister di Asuntonan Social y Labor.

Un estadista cu a duna su bida pa awe nos por biba den tur libertad
 
Cada pais tin den tur ramo su hendenan cu nos mester mira como ehempel pa otronan y mira den nan un guia pa trata na sigui nan vision y metanan. Cada pueblo ta haña den 100 aña un lider grandi. Nos Creador a bendiciona nos pais cu Gilberto François ‘Betico’ Croes, nos Libertador, un estadista, un gran Arubiano y un politico di taya.
 
Strategia politico
Betico tabatin donnan special y un curashi grandi, fe y determinacion pa ora e pone un lucha su dilanti, e ta bay p’e y realiza esaki. Betico a traha un strategia politico, unda promer a percura pa e balornan spiritual, himno, bandera y ortografia. Esakinan ta reflehonan di union y libertad di un pueblo. Despues el a busca mayoria di pueblo pa sostene pa mediante un strategia di reconocemento di e derecho di autodeterminacion, pasa den un fase transitorio di un pais autonomo pa haya e tempo necesario pa prepara nos pais y laga e posibilidad pa bolbe mesa di negosacion y kita e fecha di independencia, pero manteniendo e derecho pa na un manera ordena, organiza y responsabel, mediante un referendum y ⅔ parti di sosten den Parlamento por bira independiente un dia.
 
Record di 10506 voto
Betico a traha cu vision, fe y determinacion. No mester lubida cu e tambe a ser stroba pa varios politico den oposicion y tambe pa cierto politiconan na Antiyas y Hulanda. E no a demoraliza, ni cuanto cu el a ser critica y semper el a continua cu e lucha cu curashi y determinacion. Su palabranan tabata: ‘los perros ladran y la caravana pasa’.
Betico ta e politico cu a kibra tur record di cantidad di voto na Aruba, caminda den e eleccion di 1983 el a obtene 10.506 voto riba su nomber so y esaki riba un cantidad total di 36.360 voto deposita den henter Aruba.
 
Reconocemento na Betico Croes
Pa duna reconocemento pa tur e trabaonan desplega pa Betico Croes a bin cu celebracion di su fecha natalicio, esta Dia di Betico, pa nos tur celebra y reflexiona riba su bida, su logronan y nos pais su futuro. A cambia nomber di e caya principal pa Caya Gilberto François ‘Betico’ Croes. E sporthal na Santa Cruz a bira Compleho Deportivo Libertador Betico Croes. Alabez tras di nos carchi di identidad tambe tin potret di nos estadista Arubano. Y pa no lubida e Plaza Libertador Betico Croes na Oranjestad, Plaza Status Aparte Betico Croes y Sede Libertador Betico Croes (Sede di MEP) na Santa Cruz. Nos di MEP tur aña riba dia 25 di januari, 18 di maart, y 26 di november ta recorda na un forma digno nos gran lider y gran personahe Arubano.
Laga nos duna danki na nos Creador di a duna nos pueblo un gran yiu di tera. Historia politico di nos pais no por lubida nunca tur e trabaonan valioso cu a wordo desplega door di e arkitecto, constructor y realizador di nos Status Aparte.

​

​Ta increibel con e gobierno di AVP ta sigui manipula mente di pueblo treciendo mentiranan padilanti y p’asina desacredita e gobierno nobo y en especial partido MEP. Asina por a scucha declaracion di ex-Minister Richard Arends cu den su ansha pa defende su partido AVP ciegamente a lansa mentiranan flagrante relaciona cu e estado di e edificio di Bestuurskantoor, esta na momento cu su partido AVP a asumi gobernacion na 2009. Segun sr. Arends nan a ricibi e edificio aki den un situacion precario y deplorabel, entre otro sin computer y sin waya di telefoon.
 
Estado di Bestuurskantoor
Pero den su ignorancia sr. Arends no a realisa cu na 2009 den e Bestuurskantoor aki no tabata tin ningun minister y nan personal ta traha mas, ya cu den un carta di 30 di augustus 2007 DOW a keur af e edificio aki, entre otro a declara cu e Bestuurskantoor no ta cumpli cu e normanan di siguridad y higiena. E dak ta den masha mal estado mes, ta hopi putri y yena di buraco. Tambe e instalacion electrico ta hopi bieu y constantemente tin kortsluiting y interupcion di coriente. Mas aleu den e carta DOW ta bisa cu nan ta haya cu no ta responsabel mas pa Minister President Oduber, su personal y e otro departamentonan (BID) sigui traha den e edificio aki. Finalmente DOW a conseha Minister President Oduber pa mas pronto posibel sali for di e edificio aki. Y esaki tambe a sosode despues di algun luna, hopi prome cu e eleccion di September 2009. Pues na final di 2009 ora cu AVP a asumi gobernacion no tabata tin ningun alma mas den Bestuurskantoor ya cu tur e 7 ministernan di Gabinete Oduber a ubica nan mes den otro edificionan cu no ta Bestuurskantoor. Y tambe tur conexion di awa, coriente, telefon y internet a ser desconecta ya cu no tabata tin necesidad di esakinan mas den un edificio bashi y deteriora. Y aparentemente ta sr. Arends so no a realisa esey!
 
Un gobierno iresponsabel
Pero kico e gobierno di AVP cu Mike Eman na cabez a haci ora cu nan a drenta gobierno na 2009? Contra tur e consehonan duna door di DOW nan a dicidi riba nan mes di cuminsa verf e edificio haciendo uzo di supuesto boluntarionan, a cuminsa patch up e lugar y a laga e ministernan hunto cu nan personal traha den e Bestuurskantoor afgekeurd aki. Esaki tabata algo hopi iresponsabel caminda nan a pone bida di sernan humano na peliger. Hecho ta cu si e tempo ey e 7 ministernan di Gabinete Eman kier a haya un situacion adecua caminda nan por a cuminsa traha di biaha, nan mester a bay na e oficinanan laga atras pa e 7 ministernan di Gabinete Oduber, entre otro pabao di Talk of the Town, ex-Interbank, ex-Codemsa, ex-Centro Medico SN etc. y caminda nan lo a haya e oficinanan aki full ekipa cu muebels, lessenaar, computer, telefoon, internet etc. Pues tur cos na orden laga atras pa e ministernan di MEP di e tempo ey.
 
Ningun reparacion ni mantencion
Hecho ta cu durante e ultimo 8 añanan di Gabinete Eman nada mas a ser haci na e edificio di Bestuurskantoor, ningun reparacion y ningun mantencion structural y pues lagando e edificio sigui deteriora. Awe na final di 2017 na momento cu Gabinete Wever-Croes a drenta gobernacion, a ser encontra un Bestuurskantoor den un estado asina deplorabel cu practicamente henter e edificio aki no ta sirbi pa nada mas, ni pa traha aden. Tur esakinan no a ser conta pa sr. Arends cu ainda ta biba den su ilusion cu ta hopi gran trabao su gobierno a haci durante e ultimo añanan, pero cu e realidad ta mustra un biaha mas cu e gobernantenan di AVP ta laga desaster so atras tur caminda cu nan pasa.
 

Minister Xiomara Ruiz-Maduro: 

​Diabierna anochi Minister di Finanzas, Economia y Cultura, sra. Xiomara Ruiz-Maduro, a participa na e caminata organisa pa Fundacion Hende Muher den Difilcultad pa asina brinda sosten na e trabou noble y importante di e fundacion.
 
E meta di e caminata ta pa contribui na e concientisacion den comunidad cu violencia no ta algo cu ta parti di nos cultura y pues no mester wordo tolera. Violencia domestico ta algo cu por toca nos tur y pesey ta importante pa por papia riba esaki y busca yudansa.
 
Pa tur problema tin solucion, ta curashi mester pa atende cu ne y busca yudansa pa yega na un solucion.

Minister Xiomara Ruiz-Maduro: 

​Riba Dia Internacional di Musico y Celebracion di Santa Cecilia patrona di tur musico, Minister Xiomara Ruiz-Maduro di Cultura tabata presente pa brinda honor na e prome 12 artista di musica di Aruba di cual nan biografia a keda documenta pa historia.
 
Departamento di Cultura seccion di Investigacion y Documentacion a haci un trabou bunita di documenta e biografia di 12 musiconan pa asina Pueblo por ser conoci mas cu nan trayectoria musical y pa nan legado por keda conserva pa e generacion cu ta sigui nos.
 
Un palabra di pabien na tur e 12 musico y nan famia cu e reconocemento bon mereci. Un danki special na Departamento di Cultura pa e trabou importante aki y nos ta keda pendiente pa mas biografia di musico di nos Pais. Na tur musico masha pabien y danki pa deleita nos cu tanto creatividad.
 
 

​Aruba ta den shock despues di e noticia cu un mucha di apenas 5 aña a fayece a consecuencia di maltrato severo. Un abuso cu no a wordo detecta pa autoridadnan. Talves si nos a detecta e abuso aki na tempo, nos por a scapa su bida?
Mientras tanto e ansha ta mas grandi pasobra su ruman chikito di 3 aña ta perdi. Desde un tempo e no a wordo mira mas.
 
Gobierno mesora a drenta den accion y a yama un reunion di Conseho di Minister extraordinario diasabra mainta. Apesar cu Prome Minister Evelyn Wever-Croes ta den exterior, el a declara un estado di crisis, y e ta forma parti di e cadena di instancia cu ta encarga cu atende e crisis aki.
 
Conseho di Minister a tuma varios decision importante. Prioridad ta awor na un buskeda nacional pa e mucha di 3 aña. E buskeda ta den man di Cuerpo Policial cu asistencia di Hulanda.
Un yamada oficial a wordo haci tambe pa henter comunidad di Aruba yuda den e buskeda.
 
Durante e reunion extra ordinario a atende varios aspecto di e problematica aki y lo institui un comision multi disciplinario consistiendo di varios departamento, pa bin cu proposicionnan riba termino corto.
 
“E noticia di e fayesimento di e mucha di 5 aña ta yena mi cu dolor, y sabiendo cu tin un mucha di 3 aña perdi ta causa mucho mas dolor. Problemanan social no a haya atencion den e ultimo añanan. E enfasis tabata mas riba embeyesemento y e ser humano a wordo lubida.
E consecuencia ta cu departamentonan manera Departamento di Asunto Social, Voogdijraad, Bureau Leerplicht y Cuerpo Policial, tin falta di personal y material pa por atende cu tur e problemanan. Tampoco tabatin suficiente atencion na salud mental di nos cuidadanonan. Tur esaki mester cambia y e prioridad di e gobierno aki ta pa pone e ser humano central atrobe.
 
Den e sigiente ora y dianan e prioridad ta pa haya e mucha cu ta perdi. Mientras tanto e Comision Multidisciplinario lo cuminsa traha y presenta nan proposicionnan na Conseho di Minister riba termino hopi cortico.
Cada cuidadano cu por sa algo por fabor yama na tip line 11141.
Muchanan mester wordo stima y protehi. Muchanan no por wordo abusa, door di ningun hende. Ban percura pa algo asina no pasa nunca mas”, Minister Presidente Evelyn Wever-Croes a expresa.