​Traspaso caotico den Bestuurskantoor
 
Nos ta cerando e prome siman di Gabinete Wever-Croes. Entusiasmo cu ta reina den Bestuurskantoor ta wordo sinti apesar di e contratiemponan cu nos a haya nos confronta cu nan for di prome dia.
 
Den e prome dianan di gobernacion, Conseho di Minister ta reuniendo tur dia pa atende cu e situacion caotico cu a worde laga atras pa nos.
 
Traspaso di gobierno anterior pa e nobo a bay sumamente caotico cu a haci difisil pa cuminsa traha di inmediato. Ningun computer a wordo laga conecta riba e lesenaarnan cu si a keda den algun oficina. Ningun documento a wordo laga atras.
Mueblenan a wordo saca for di algun oficina sin autorisacion. Di parti di Gobierno, nos ta considera esaki ladronicia cu lo wordo investiga mas pronto posibel.
 
Ta obvio cu Gabinete Eman kier a laga tur cos mas caotico atras posibel pa stroba e gobernacion nobo. No solamente nan a laga oficinanan bashi, pero loke ta mas serio ainda ta cu full e parti pabow di Bestuurskantoor biew a wordo condena pasobra e ta den masha mal estado y no por wordo uza por lo pronto.
 
Pero e team nobo ta determina y tin entusiasmo pa pone tur cos na ordo bek pa asina Bestuurskantoor por cuminsa funciona na forma optimal. Pa prome di December ta spera cu telefonistanan y recepcionistanan ta bek den trabou y cosnan por cana miho pa asina cuminsa atende pueblo tambe.
 
Prome Minister Evelyn Wever-Croes ta pidi pa tene pasenshi mientras cu tur cos ta wordo regla. Laga nos duna e ministernan espacio pa regla nan oficina pa asina cuminsa atende cu e problemanan den comunidad.
 
                                                                                              

​Pa facilita Formacion di gobierno
 
Despues cu Gobernador a duna instruccion pa cuminsa cu formacion di Gobierno, e ekipo di formacion a acerca Director di APA sr. Jossy Figaroa pa asina uza espacio den nan establecimento.
 
Pa 5 siman mas o menos a ocupa varios oficina di APA pa atende e diferente reunionnan cu mester a tuma luga. Personal di APA a ofrece e ekipo formador tur espacio necesario y trankilidad pa asina logra tur e puntonan cu nan tabata tin riba agenda. APA tambe tabata tambe e localidad na unda a tene e conferencia di prensa pa anuncia cu partidonan a yega na un acuerdo pa forma un gobierno.
 
Prome Minister di Aruba pa medio di esaki ta gradici sr. Jossy Figaroa, Sr. Humprey Tromp, sra. Rosie Arends y henter staff y personal di APA pa a ricibi nos y pa e trato cu a brinda nos durante e temporada cu nos a uza nan facilidadnan.
 

Riba Dia Internacional di Mucha, Prome Minister Evelyn Wever-Croes acompaña pa Minister Plenipotenciario Guillfred Besaril, a bishita “Kinderafdeling” na Hospital. Aki personal di Hospital y di “Kinderafdeling” tabata spera e Ministernan na entrada di Hospital pa despues guia nan na e “afdeling” na prome piso.
 
Riba su bishita na nos muchanan den hospital, Prome Minister a expesa lo siguiente:
 
“Awe riba Dia Internacional di Mucha nos a scohe pa bishita nos muchanan cu ta malo den hospital pa asina trece un regalito pa nan y alegra nan dia riba e dia importante aki. Nos a saluda y papia un rato cu mayornan pa asina nan conta nos tocante nan yiu como tambe con nan ta haya e trato di cuido den hospital”.
 
Prome Minister a bisa cu esaki tabata su prome bishita den e parti nobo di hospital y a expresa cu esaki ta sumamente bunita, amplio y multi functional na unda trahadornan tin mas espacio tambe pa traha. Y mas importante ta cu e mucha cu ta wordo tuma den hospital por sinti’e mas comodo durante su estadia na hospital.
 
“Mi ta hopi impresiona cu e “afdeling” aki. Door di situacion familiar mi mes ta bishita “kinderafdeling” mas biaha den e edificio biew cu ta hopi mas chikito. E edificio nobo ta hopi mas amplio y ta notabel cu hendenan ta traha cu hopi mas gana y cu un dedicacion enorme y mas agradabel”.
 
Prome Minister Evelyn Wever-Croes a remarka cu e muchanan a keda hopi contento cu e regalito y cu su bishita.
“Despues di pasa dianan of te hasta simannan den un camber na hospital, e muchanan ta cuminsa fada. Y un bishita asina y un regalito chikito ta haci nan contento. Y na final di dia, esaki ta yena mi cu satisfaccion cu mi por contribui na alegria di nos muchanan”.
 

​Dia di mucha no a pasa sin haya atencion di Prome Minister Evelyn Wever-Croes riba su prome dia di trabou. Dialuna den oranan di atardi, Fundacion Sea Bunita Sea Bo Mes, a haci un bishita cerca Prome Minister.
 
Nos muchanan special a keda hopi contento di a conoce e Prome Minister di nos pais y a expresa esaki cu un sonrisa riba nan cara.
 
Presente tambe tabata Minister Otmar Oduber y Minister Plenipotenciario Guillfred Besaril. Nan tur tres a ricibi un algun regalito for di man di nos muchanan special. Na su turno tambe, Prome Minister a entrega cada mucha un regalito y a conbersa un rato ameno cu nan.
 
Na e ocacion aki, Prome Minister Evelyn Wever-Croes a expresa:
 
“Awe riba dia di mucha, mi a haci un invitacion special na Fundacion Sea Bunita Sea Bo Mes pa un encuentro na Bestuurskantoor. Nos muchanan special y fundacionnan cu ta cuida nan no a haya e atencion necesario pa hopi tempo. Nos prioridad ta pa mehora e situacion pa asina cada fundacion cu ta cuida nos muchanan special wordo ekipa miho posibel pa asina brinda nos muchanan special un miho speransa pa nan futuro. Tur mucha tin derecho di bon cuido y educacion adecua pa nan situacion.”
 
 

Siman pasa durante reunion publico di parlamento a trata e topico di expansion y renobacion di hospital dr. Horacio Oduber. E pregunta cardinal riba e topico en cuestion ta si un proyecto cu originalmente a costa alrededor di 240 miyon florin, awor ta bay costa pueblo mas placa. Esaki mirando e hecho cu e tin tur aparecer di no ta trata di trabounan adicional na e scope di e proyecto original, pero mas bien un proyecto completamente nobo cu “willens en wetens” a wordo laga afo di e plannan original.
 
Transparencia
Tambe parlamento tawata desea di haya informacion pa asina por fiha un posicion pa wak si e “machtigingsverordening”, cu ta autorisa e mandatario pa desvia di leynan existente na bienestar di e renobacion y expansion di e proyecto aki, no ta wordo malusa awor pa asina financia un proyecto completamente nobo, sin cu esaki mester bay un destaho publico y sin cu mester busca aprobacion pa e fondonan adicional aki cerca parlamento. Den cuadro di transparencia pueblo mester sa cu aki ta trata di fondonan adicional di alrededor di 80 miyon florin, cual de facto lo resulta den un suma adicional di 133.4 miyon florin – incluyendo interes - si considera cu e huur ta aumenta cu 5.8 miyon florin pa aña, pa un periodo di 23 aña.
 
Duda den e proyecto
Locual ta crea hopi duda den e proyecto ta e hecho cu entre otro preguntanan cu a wordo haci na inicio di e proyecto na aña 2013 door di ex-parlamentario sr. Booshi Wever nunca no a wordo contesta door di ex-minister sr. Visser. Esaki a wordo confirma tambe door di e mandatario demisionario actual durante e reunion publico di siman pasa. Preguntanan cu a wordo haci ta trata entre otro aspectonan pa loke ta trata e proceso di otorgacion di e  proyecto y a cuestiona con por ta posibel cu un compania cu a “bid” mucho mas placa toch a haya e proyecto aki, despues cu a negocia cu nan pa baha nan prijs. Pero nunca a negocia cu e compania cu a “bid” mas abou y cu tin mucho mas experencia den construi hospitalnan rond mundo.
 
Aprobacion di dos mocion
Pa evita tipo di casonan asina aki den futuro y pa duna parlamento di Aruba su autoridad bek, partidonan MEP, POR y RED a aproba dos mocion den cual ta dicidi pa gobierno laga haci un evaluacion independiente di a. e contrato original concerni den su totalidad, su “scope” y su progreso desde inicio y b. e gastonan adicional concerni, entre otro ki tempo nan a bira conoci, si nan no tabata existi caba of por a wordo premira ora a cera e contrato original mirando e informacion obhetivamente disponibel e tempo ey.
​
Encuesta parlamentario
Loke ta hopi importante tambe, y esaki mas aun mirando tur e inquietud di siman pasa pa loke ta trata hospital, e fraccionnan menciona a dicidi pa gobierno laga investiga aspectonan operacional y e calidad di contruccion di e proyecto di renobacion y expansion di hospital.
Por ultimo den cuadro di un politica nobo, caminda ta bay laga parlamento asumi su responsabilidad berdaderamente pa controla gobierno, a dicidi pa e futuro minister, apesar cu esaki lo ta di un di e partidonan cu a entrega y aproba e mocion, lo mester bin busca aprobacion di parlamento y presenta un cuadro financiero relaciona cu gastonan adicional, acompaña tambe cu conseho di Departamento di Finansas.
En espera di e resultadonan di e investigacion independiente cu gobierno lo bay haci, no ta exclui cu un encuesta parlamentario lo wordo ehecuta.
 
 

​Partijraad di MEP den un reunion extra ordinario ayera diadomingo a aproba e resultado di negosacion y reparticion di cartera te na e momento aki entre e tres partidonan di coalicion MEP POR RED.
 
Lider di MEP a duna un splicacion di e proceso di formacion. Mester remarca manera cu lider di MEP a bisa na mas di un ocasion, cu no tabata facil. Mas facil lo tabata si no mester a negocia un coalicion. Pero pueblo a pidi un coalicion y MEP ta cumpli cu e deseo di pueblo.
 
Awor ta sigui e proceso di propone candidato pa funcion di ministernan. Partijraad di MEP a duna lider di MEP un fuerte aplauso pa tur locual ela logra den negosacion pa brinda MEP e posibilidad di forma parti di e siguiente gobierno. Por a nota un entusiasmo grandi den esnan presente y deseo pa cuminsa traha.
 
Ta lamenta cu tin tanto rumor riba caya cu lo tin problema den MEP. Cu e Partijraad di ayera a keda comproba un biaha mas cu eseynan ta rumornan falso, cu den MEP no tin problema. Locual ainda ta un reto ta pa tur hende compronde cu tin cos cu por, y tin cos cu no por. MEP no a gana eleccion su so, y pues mester pone awa den biña pa yega na e miho coalicion posibel pa Aruba.
 
“Nos no por anuncia ainda con e reparticion di carteranan lo ta, ni di esnan encarga, mirando cu e proceso oficial mester wordo aproba pa Su Excelencia Gobernador di Aruba prome. Ohala cu tur hende por respeta e proceso aki, y no difundi nomber y carteranan ainda, ya cu nada ta oficial. E proceso ta wordo cana cu hopi cautela, pa por cana e proceso corectamente.
 
Nos meta ta: un coalicion stabil pa Aruba, pa cuminsa pone e ser humano central di berdad. Y nos ta logr’e!”, ta palabranan di lider di MEP Evelyn Wever-Croes.

​Parlamento di Aruba ya pa dos siman conoce un Presidencia nobo cu a trece e cambio cu Aruba ta desea di hopi hopi tempo.
Sr. Guillfred Besaril na forma firme y mes momento husto a sa di dirigi tres reunion den Parlamento na forma sublime. Probablemente su formacion y experiencia den Cuerpo Policial a contribui na esaki, y sin duda, su experiencia durante 4 aña den oposicion durante locual facilmente por wordo cataloga como e peor parlamento cu Aruba a conoce.
 
Sr Besaril ta mantene e orden den e sala, y caminda mester ta hala atencion di e parlamentarionan recordandonan cu pueblo a pidi un cambio. Especialmente e parlamentarionan di AVP cu a caba di baha como minister pa drenta bek den Parlamento.
 
E ta mantene e orden den tribuna publico tambe. Por nota cambionan tambe den e agentenan policial y esnan cu a haci propaganda publicamente pa partido AVP ya no tey mas den Parlamento. Tres reunion cu a wordo hiba na forma sublime y cu a hala atencion di henter Aruba. Unda cu bo bay, e topico di dia ta con Parlamento di Aruba ya a cuminsa gana respet bek di hendenan den comunidad.
Y sin conta mes cu ta trata di reunionnan importante mandando un mensahe cla cu e tempo di bagamunderia y ‘free for all’ a pasa. Awor tin un Parlamento cu realmente ta controla gobierno. Pabien Aruba. Pabien Guillfred Besaril.

Parlamentarionan di MEP, POR y RED a pidi reunion urgente pa trata dos tema importante. 

STATUS Y RETIRO DI MINISTER PAUL CROES

Desde 28 di maart 2017 cu minister Paul Croes a wordo declara sospechoso den un caso di corupcion serio, y a tene un ‘inval’ na su cas, Aruba su gobierno ta constantemente den un lus negativo. Desde oposicion nos a purba coregi e situacion aki, pero sin resultado. 

Dia 12 di mei 2017 gobierno di AVP a dicidi di kita e carteranan di e minister temporalmente, y desde e fecha aki e minister ta un minister sin cartera. 

E situacion a bira mas serio na momento cu dia 21 di augustus 2017 e minister a ser deteni y ta deteni ainda pendiente su caso wordo trata. Esey mester tabata motibo mas grandi pa gobierno a retira e minister. Lamentablemente cu esaki gabinete Mike Eman a duna e mal ehempel di ta acomoda corupcion, en bes di combati corupcion. Pa prome biaha den historia di Aruba y di Reino un minister a wordo encarcela. E bon nomber y integridad di nos pais a wordo daña. Lamentablemente e constelacion biew di Parlamento a aproba y a defende e decisionnan aki. 

Dia 21 di september 2017 prome minister Mike Eman a entrega retiro di su gabinete, incluyendo di minister Paul Croes, en bista di eleccion dia 22 di september. Su Excelencia Gobernador a haci un apelacion na e gabinete pa keda na cargo como un gabinete demisionario solamente pa casonan coriente. E decision pa minister Paul Croes entrante 21 di september bira demisionario pa atende casonan coriente so, no tin sentido pa e motibo cu e no por atende ningun caso mas desde 12 di mei cu a kita tur cartera for di dje, y sigur desde 21 di augustus cu e ta deteni. 

Despues di eleccion di 22 september ultimo e constelacion den Parlamento a cambia, y e mayoria di e miembronan nobo den Parlamento tin un otro punto di bista den e caso aki. 

“Nos a bay eleccion pa pidi pa un cambio y pueblo a vota pa un cambio. Cu e reunion aki nos kier demostra e cambio ey. 
Nos ta hendenan cu ta bisa loke nos ta haci y nos ta haci loke nos ta bisa. Y nos a bisa cu nos si ta bay combati corupcion y esey mes nos ta bay haci. 
Mi ta contento cu e reunion a wordo yama lihe pasobra ta algo cu den comunidad tur hende ta puntra. 
Mi ta enfatisa cu no ta trata di e persona di Paul Croes pasobra e sigur ta un persona simpatico. 
Ta bay pa e funcion di minister y e hecho cu a causa daño na imagin y integridad di Aruba. 
Cu e reunion aki e Parlamento nobo kier cuminsa repara e daño cometi pa e gobierno anterior” lider di MEP Evelyn Wever-Croes a duna di conoce.