Diabierna atardi Minister di Salubridad Publico Sr. Dangui Oduber a acudi na Hyatt Place pa atende un ceremonia caminda 7 empleado di SVb a ricibi nan diploma. Aki e mandatario a hiba un discurso caminda e Minister a enfoca riba e importancia pa nos mediconan keda haya e oportunidad pa sigui specialisa nan mes pa asina por duna un servicio di calidad na e comunidad. E 7 graduadonan a ricibi nan diploma di specialista den salud ocupacional. E mandatario a menciona den su discurso cu e ta contento di por a forma parti di e ceremonia special y historico aki.

Pa prome biaha pais Aruba ta logra reconoce un educacion profesional di specialisacion den ramo di medicina. Oficialmente e estudio ta yama “Arts Arbeid en Gezondheid Aruba” pues specialista den salud ocupacional. E meta principal tras di e estudio aki ta pa nos mediconan general specialisa riba e tereno di salud ocupacional na Aruba, asina e mandatario a trece dilanti. Minister Dangui Oduber a gradici SVb pa bin cu e iniciativa di estudio aki y tambe  instituto Hulandes “The Netherlands school of public and occupational Health”(NSPOH) pa nan gran sosten y sin laga afor Gobierno di Aruba, tur a hunga un rol importante den e desaroyo y realisacion di e estudio aki, asina e mandatario a indica. Esaki sigur ta un logro grandi pa Aruba pa motibo cu e tipo di trayectorianan aki ta otorga e oportunidad pa Aruba por forma su propio specialistanan y reconoce e specialismo aki riba termino corto.

“Como Minister di Salubridad Publico mi ta sumamente orguyoso cu Aruba por ofrece e tipo di specialisacion aki cual ta duna nos mediconan oportunidad pa sigui specialisa nan mes y asina duna un servicio di calidad na nan pashentnan. E parti mas special di e specialisacion aki ta cu den cooperacion entre SVb y NSPOH a desaroya un trayecto di estudio riba e mesun nivel cu esun di Hulanda cual e unico diferencia ta cu e estudio aki na Aruba a wordo specificamente adapta pa por haci e medico specialisá pa cu e situacion laboral di Aruba y cumpli cu e leynan vigente riba nos isla” asina Minister Oduber a menciona den su discurso.

Segun e mandatario Ministerio di Salubridad conhuntamente cu Departamento di Salud Publico a percura na su lugar pa e specialismo aki haña su reconocimento mereci den e ley di AruBIG. Na e momento aki ya caba un decreto nacional a wordo traha cu ta contene entre otro e concepto pa reconoce e specialismo aki na e mesun momento cu AruBIG drenta na vigor pa tur medico na Aruba.
​
E mandatario a yama danki na Sr. Edwin Jacobs, Dr. Harrie Veneman di e instituto di NSPOH, Dr.Romijn y Dr. Bieze di e opleinding di SVb, Inspecteur General di salud Sra. Lopez-Peña. Finalmente Minister Oduber ta felicita SVb pa carga e vision di Gobierno y e 7 mediconan cu a gradua den nan specialisacion di “Arbeid en Gezondheid Aruba” masha pabien.

​Nos caya grandi, Caya G.F. Betico Croes den e ultimo fin di añanan ta conociendo un bida diferente dunando e temporada di fin di aña e toke special di un Aruba di antes. Esaki tawata e vision di Gabinete Wever-Croes, pa trece movimiento di progreso y ambiente bek den nos centronan di ciudad. Nos hendenan por disfruta di un G.F. Caya Betico Croes cu ambiente renoba treciendo recuerdonan bunita di con nos centro di ciudad di Oranjestad tawata antes mientras ta disfruta di loke tiendanan tin di ofrece pa hopi ciudadano di nos pais. Un temporada importante pa comercio den nos centro di ciudad.
 
Pa cuminsa e ambiente di Pasco y Aña Nobo, diahuebs 28 di november a tuma luga e Cendemento di Luz pa 6.00 pm den G.F. Caya Betico Croes dilanti di Penha. Gruponan di Gaita Las Unicas Fabolusas y Los Gaiteros Reales de Aruba a trece e ambiente di Pasco cu gaitanan cu ritmo bailabel poniendo e publico grandi presente gosa di nan presentacion.
 
Prome Minister Minister Evelyn Wever-Croes den nomber di Gobierno di Aruba ta felicita AREA pa e apertura di fin di aña den G.F. Caya Betico Croes. Lo bay tin diferente actividadnan durante e proximo simannan prome cu nos yama e decada nobo bon bini. Aruba completo ta keda invita pa bishita playa. Famianan hunto por disfruta di tur ambiente y tur loke tiendanan tin pa ofrece specialmente pa e dianan di fiesta nos dilanti.

​Diabierna 29 di November a termina dos dia di Dialogo Tripartita Social Laboral cu a conta cu participacion di Gremionan Comercial, Sindical y Gubernamental encabesa pa Minister di Labor, Sr. Glenbert F. Croes.
 
Durante e di dos sesion di DTSL cu tabatin un duracion di dos dia, riba e prome dia a conta cu presencia di Minister President tambe kende durante su disertacion a expresa su admiracion y aprecio pa e plataforma di dialogo. Manera e prome mandatario a declara cu esaki mester bira e manera pa hunto dialoga pa logra e miho pa Aruba.
 
Ley di ARBO
E proceso di e ley aki a cuminsa na aña 1993. E embergadura di e ley di ARBO ta asina grandi cu na mas di un ocasion el a keda poni un banda. Manera cu Minister Glenbert Croes a introduci un Dialogo Tripartita conforme exigencia y reglamentacion  di ILO (International Labor Organisation), un di e puntonan cu e mandatario a pone como prioridad tabata tratamento di e Ley di ARBO cu ta e ley cu lo regula salud, siguridad y bienestar na pia di trabou pa tur trahado. Y esaki orguyosamente a conta cu aprobacion unanime di tur gremio.
 
Dialogo
Durante e dialogo a repasa e proposicion di ley cu splicacion amplio riba cada pregunta cu a surgi. Y capitulo pa capitulo a expresa aprobacion.
E dialogo den e formato di DTSL lo continua y e proximo topico cu lo bira discusion na nivel di DTSL,  ta keda defini proponi pa gremionan. Gremio comercial a propone 5 punto pa e proximo dialogonan. Gremio sindical a propone 5 punto tambe. Gobierno tin 6 punto cu lo kier trece riba mesa di discusion. Y punto pa punto cada un lo keda trata den e mesun formato aki den futuro.
 
Minister Glenbert Croes ta sumamente orguyoso di e organisacion, di e aprobacion y mas cu logico di e gran logro unanime aki y a expresa su aprecio y admiracion na tur presente pa nan contribucion valioso.
 
Hunto nos lo logra un miho Aruba, e miho pa Aruba.

Diaranson atardi Minister di Salubridad Publico Sr. Dangui Oduber a acudi na Banco Social di Aseguradonan (SVb) na Eagle pa anuncia e renobacion y expansion di e oficina. E mandatario a duna un discurso caminda e la enfoca riba e necesidad di e renobacion y expansion di e edificio di SVb na Eagle. “Na momento cu mi a drenta den e gobierno mi tabata na altura di e situacion di escasez den espacio pa traha cu SVb tabata encontra su mes den dje” asina e mandatario a expresa den su discurso. E la pidi director di Svb pa pone como prioridad pa percura pa Svb haya un edificio nobo y tambe renoba e edificio existente. Esaki ta hopi importante pa e trahadornan tin un espacio comodo pa por haci nan trabou. E hende pa e gobierno aki ta central y minister Oduber ta contento con Svb ta wordo maneha y dirigi pa a percura pa nan haya un edificio nobo. E gobierno aki a cumpli cu deseo di e trahadornan.

Minister Oduber a anuncia cu e trabounan di expansion lo inicia na maart 2020 y lo termina pa fin di aña 2020. E inversion di e expansion den su totalidad incluyendo muebleria y ekipo ta calcula di costa entre 6 pa 8 miyon florin y despues ta sigui cu e restructuracion di e edificio existente.

Minister Dangui Oduber a menciona cu e proximo añanan SVb ta bay inova den su structura di trabao, pasando di un organisacion basa riba funcionnan, cu un herarkia fuerte y centralisa, pa un organisacion basa riba rolnan, un herarkia menos fuerte y mas descentralisa. Ta pesey e intencion ta cu e diseño di e muebileria lo ta asina cu eta consistente na e desaroyonan interno pa futuro. E espacio di trabao cu ta bay crea ta bay cuadra cu e transformacion cu SVb ta bay ta traha riba dje den e periodo 2020-2025.
​
“Mi ta contento di mira cu SVb su ambicion ta pa crea espacio di trabao di calidad, y cu ta den linea cu principionan di organisacionnan moderno y flexibel, empoderando e trahador lo mas tanto posibel, dirigi riba aumenta e calidad di servicio pa e clientenan. Loke ta remarcabel ta cu SVb tin un percentahe di 80% di empleado cu no ta meld AO” esei tabata palabranan di e mandatario. Finalmente Minister Dangui Oduber a gradici y desea tur e empleadonan di SVb exito den nan funcion.

Gobierno di Aruba ta trahando pa trece un stabilidad financiero pa Pais Aruba. E reto ta uno grandi y pa awor Pueblo tambe sa cu nos mester atende cu gastonan di personal y tambe di interes cual ta e dos gastonan di mas halto den Presupuesto di Pais Aruba. No obstante e retonan fianciero, Gobierno como dunador di trabou a sa di cumpli cu e trahador publico. Pa ilustra esaki Minister Maduro di Finansa a presenta den conferencia di prensa e beneficionan cu ta conta pa mayoria empleado publico. E mandatario a enfatiza cu informacion aki no ta pa ataca e empleado publico, pero pa brinda un bista di locual Gobierno ta cumpliendo cune apesar di e retonan financiero.


Minister Maduro a indica cu Gobierno ta purba cumpli cabalmente cu tur acuerdo, pero e ta keda un reto grandi. Pa por cumpli, por ehempel, cu locual a ser palabra na 2014 cu e sindicatonan, Gobierno tur aña mester percura pa por tin por lo menos 2 miyon florin extra riba Presupuesto pa cumpli cu e pago di Bashi Premie, Gelijk Bedrag y Reparatietoeslag. E empleado publico ta ricibi cada aña e siguente suma extra di Gobierno pa por cumpli cu e acuerdo; den 2019 ta ricibi 4803 florin, den 2020 ta haya 5118 florin, den 2021 ta 5436 florin, den 2022 ta ricibi 5754 florin, den 2023 ta bira 6072 florin y na 2024 e empleado publico ta haya 6387 florin extra.


Gobierno ta purba cumpli cu e empleado publico brindando beneficio, pero nos mester tene cuenta cu e limitenan di e realidad financiero di nos Pais.

​

• Yegada di Sinterklaas 

Diadomingo mainta,  Minister di Cultura a yama Sinterklaas y su Pietnan bon bini na Aruba.  Tabata tin hopi mucha hunto cu nan mayornan presente pa cuminda Sinterklaas y su Pietnan. Den un caravana Sinterklaas y su Pietnan a sali pa Plaza Betico Croes caminda tabatin un bunita programa pa nos nos muchanan. Minister Ruiz-Maduro a gradici Fundacion Sinterklaas pa a organisa e yegada di Sinterklaas y su Pietnan y tambe a yama danki na Aruba Ports Authorithy pa e cooperacion brinda.
 
 

• Nota di Fin di Aña 2019 presenta na Parlamento 

Dialuna mainta Minister di Finansa tabata den Parlamento den un encuentro publico pa asina a brinda informacion riba finansa publico di Pais Aruba. E mandatario a presenta e Nota di Fin di Aña 2019 (Najaarsnota 2019) na Parlamento den cual ta anticipa riba e cambionan den Presupuesto Supletorio 2019. Minister Ruiz-Maduro a subraya cu Gabinete Wever-Croes a demostra disciplina financiero y ta kedando den e apoderacion cu Parlamento a duna den Presupuesto 2019.
 
 

• Groundbreaking Baby Beach Waterfront

Diamars Minister Ruiz-Maduro a presencia e proyecto di embeyecimento di Baby Beach Waterfront. Gobierno a inverti via e fondo pa producto turistico TPEF e suma di 3.6 miyon florin pa haci e area di Baby Beach mas functional  pa ofrece local y turista un experiencia bunita na un di Aruba di su beachnan mas gusta.  E dignatario a felicita su coleganan Minister Dangui Oduber y Minister Otmar Oduber cu un otro bunita proyecto pa desaroyo economico di San Nicolaas.
 
 

• Resultado Preliminar Investigacion di Wage Bill di IMF 

Durante un conferencia di Prensa, Minister Ruiz-Maduro a comparti e resultadonan preliminar di e investigacion tocante gastonan di personal di e aparato gubernamental. Gastonan di personal y gastonan di interes ta e dos gastonan mas grandi riba Presupuesto di Pais Aruba. E gastonan di personal no por sigui crece y mester contempla pa baha e gastonan aki pa Pais Aruba por yega na un finansa publico manehabel y sostenibel. Un di e resultadonan cu e mandatario a trece dilanti ta cu e empleado publico ta gana 40% y
 
 
 
 
 
‘gelijkgestelden’, esnan cu Gobierno ta subsidia nan salario ta gana 20% mas cu e trahadonan den sector priva. E mandatario Minister a enfatisa cu den Gobierno 7.195 hende ta central. Minister di Finansa a indica cu Gobierno ta pagando den 2019 e suma total di 605 miyon florin na 7.195 trahado den sector publico. E suma aki ta 12% di nos GDP indicando cu di e esfuerso di full nos Pais (publico y priva), 12% ta bay na pago di salario di e trahador publico. Si nada no wordo haci na aña 2020 e gastonan di personal lo bira 626 miyon florin, cual ta nifica un subida di 3.4% compara cu aña 2019. E informacion di e resultado preliminar aki ta masha importante ya cu Gobierno ta haya un bista amplio y concreto con e situacion ta y kico mester haci pa mitiga e gastonan pa asina por tene e gastonan manehabel y pagabel.
 
 

• Aruba no ta haya un ‘aanwijzing’

Diabierna mainta, Pais Aruba a haya un bon noticia  ya cu Gabinete Wever-Croes a informa cu Pais Aruba lo no haya un ‘aanwijzing. Gobierno ta haya tempo pa finalisa su presupuesto 2020 y despues cu e Presupuesto 2020 wordo aproba den Parlamento y e cumpli cu e reglanan di supervision financiero, Hulanda lo kita e ‘aanwijzing’ for di mesa definitivamente.  Minister Ruiz-Maduro ta subraya cu hopi trabou duro a ser haci y discusionnan na nivel a ser hiba, pa logra convence Conseho di Minister di Reino cu Pais Aruba no merece un ‘aanwijzing’. E mandatario ta gradici Minister President sra. Evelyn Wever-Croes y ta gradeci su conseheronan y expertonan di Departmento di Finansa cu a traha incansablemente pa logra evita un instruccion pa Pais Aruba.
 
 

• Good to great

Diabierna Minister Xiomara tabata serca e hobennan di klas 3 di La Salle College MAVO cu tabata di bishita na Departamento Economico den cuadro di e proyecto 'Good to Great,' E tabata un rato ameno den cual e mandatario a comparti algun anecdota di su tempo como studiante na Aruba y na Hulanda. Minister Ruiz-Maduro a contesta tambe e preguntanan di e hobennan cu kier tabata sa mas di e trabou, responsabilidad y motivacion pa ta un politico y un Minister. Minister Xionara a laga e hobennan cu un mensahe positivo cu den bida nos por yega mes lew cu nos mente por imagina y nos curason dicta nos. E mandatario ta gradici sr. Jalken Antonia y sra. Terry Gumbs di e proyecto 'Good to Great' pa e rato cu por a comparti cu e hobennan di La Salle College MAVO.
 
 
 
 
 
 
 

• Entrega di Certificado Kid$preneur with BIG Ideas

Diabierna merdia Minister tabata na Commandeur Pieter Boer School na San Nicolaas pa haci entrega di certificado na e hobennan cu a participa na Kid$preneur with Big Ideas. E seccion IDEA di Departamento Economico a percura pa e hobennan di Tra'imerdia San Nicolaas na Commandeur Pieter Boer School haya diferente curso con pa haci negoshi. E hobennan a siña planta, traha carchi, pinta cuadra y botter y traha wrap pa asina siña con pa traha diferente producto cu nan por bende despues. Dentro di poco lo tin un Bazaar na unda e hobennan por bay bende nan producto y demostra nan talento como comerciante. Minister Ruiz-Maduro ta gradici tur tanchi y omo di Tra'imerdia San Nicolaas, IDEA y Commandeur Pieter Boer School pa e bunita proyecto aki. Masha danki pa e paspoort bunita cu Minister a haya pa drenta 'klantrijk' sin problema. 
 

​Riba un 26 di November 33 aña pasa, sr.Gilberto François (Betico) Croes a fayece na Utrecht, 11 luna despues di un accidente tragico dia 31 di December 1985. Diamars mainta, Gobierno di Aruba a conmemora e fecha aki cu pa nos pueblo ainda ta fresco den memoria. Na e ocacion, dilanti di famianan di Betico Croes, coleganan di Gabinete, coleganan di Partido, amistadnan y esnan mas yega na nos Libertador, Prome Minister Evelyn Wever-Croes a entrega un discurso cortico expresando e gradicimento cu e tin pa Betico Croes.
 
Prome Minister a gracici esnan presente, mesun palabranan ta bay na henter pueblo di Aruba, pa e hecho cu despues di 33 aña ainda ta recorda Betico como un gran estadista, gran lider y gran persona cu a logra hopi pa nos pais.
 
“Un persona no ta muri cu su despedida fisico riba e mundo aki. E ta muri ora cu nos lubid’e y stop di record’e pa su logronan. Famia ta sumamento agradeci pa e forma con Aruba a keda recorda Betico y cu un gratitud pa su logronan”, Prome Minister a expresa.
 
Betico Croes tawata tin un vision. Pero cu su determinacion e no a lag’e solamente na un vision. Pasobra un vision sin accion ta solamente un soño. Betico a tuma accion y a mobilisa henter un comunidad scuchando kico tawata e preocupacionnan di pueblo y a traha riba e deseo di pueblo. Betico a logra uni pueblo. Como pais, nos a demostra cu union ta e forsa pa enfrenta tur reto. E mas grandi reto tawata e lucha pa logra Status Aparte.
 
Awendia, Prome Minister a duna di conoce, Aruba ta enfrentando retonan grandi. Retonan financiero, economico y social. Retonan cu e situacion na Venezuela, y retonan diariamente den Reino. Pero compara cu e reto pa logra nos Status Aparte, nos ta sigur cu nos ta surpasa cada reto riba nos caminda si nos keda inspira riba e lucha di Betico.
 
“Den nomber di Gobierno di Aruba, mi ta gradici yiunan di Betico pa e sacrificio cu boso a haci pa comparti boso tata cu henter pueblo di Aruba. Palabranan legendario di Betico Croes ta afirma cu e no tawata tata di un famia di mama y tata y 4 yiu pero e tawata tata di un pueblo completo. Y esey tambe ta e sentimento cu ta biba den e pueblo di Aruba. E consuelo cu ta keda ta cu Betico ta sigui biba den curason di cada un di nos. Nos ta hopi gradici cu nos pais a conoce un gran lider. Paisnan mas grandi cu nos ainda ta sperando un lider grandi asina nace riba nan pais. Esaki ta algo cu nos mester traspasa na nos futuro generacionnan”, ta palabranan cu Prome Minister a dirigi na ocacion di conmemoracion di 33 aña di fayecimento di nos gran lider Betico Croes.

​Diamars 26 di November, ta 33 aña pasa cu sr.Gilberto François (Betico) Croes a fayece na Utrecht na e edad di 48 aña despues di 11 luna cu el a accidenta tragicamente dia 31 di december 1985 na vispera di entrada di nos Status Aparte. Betico Croes tabata un estadista, patriota y luchador incansabel di nos pueblo, un berdadero sirbidor di su pueblo y autor di e lucha pa Aruba haya su Status Aparte na januari 1986. Betico a realisa e soño y anhelo cu tawata biba den nos pueblo pa hopi aña.
 
Gobierno di Aruba riba e fecha special aki pa nos pueblo, a conmemora 33 aña di fayecimento di Nos Libertador G.F Betico Croes na Santana di Sta. Cruz. Laga nos reflexiona riba e importancia di e lucha y logro di Betico Croes pa Aruba. Laga nos conserva nos determinacion pa sigui lucha pa no perde loke Betico a lucha p’e pa e libertad di nos dushi Aruba.

​Dialuna anochi a tuma luga e apertura di ‘Orange Conference’ na Futura Café organisa pa Fundacion di Hende Muhe den Dificultad. Esaki ta e di 4 ‘Orange Aruba’ anual cu ta keda crece cada aña mas. Prome Minister Evelyn Wever-Croes na e ocacion a duna un discurso relatando tur loke Gabinete Wever-Croes ta haciendo riba e tereno social den e dos aña di gobernacion.
 
Prome Minister a enfatisa cu desde e prome dia a pone e ser humano central di berdad. Pa esaki mester a pone fondonan disponibel pa atende cu tur reto riba tereno social. Esaki, segun Prome Minister no tawata un tarea facil teniendo cuenta cu nos pais ta den un crisis financiero. Pero pa Gabinete Wever-Croes, determinacion pa pone e hende central, a haci tur posibel pa logra esaki.           
 
E tereno social, segun expertonan den e veld aki, no a haya e atencion necesario den e añanan prome cu e gobernacion aki. E sintomanan di un Sociedad den decadencia tawata visible y esnan mas vulnerable tawata bira victima. Esaki ta inclui muchanan, hende grandi, esnan indocumenta. Den casonan na unda adulto ta envolvi, yiunan ta e victima.
 
E situacion aki a conduci cu Aruba henter, incluyendo e Gobierno aki, mester a cuminsa actua enbes di papia solamente tocante e problema. E logro di un vision grandi di Minister Glenbert Croes a wordo carga door di su determinacion pa haci e diferencia den e area social. Y Sociaal Crisis Plan (SCP) a nace for di e vision aki. Minister Croes a lucha y ta sigui lucha pa e existencia di Sociaal Crisis Plan tanto aki na Aruba como na Hulanda.
 
Gobierno a crea un fondo separa for di Presupuesto Nacional na unda cu a compromete pa inverti 34 miyon florin. 18 miyon florin ya caba a wordo hinca den prioridadnan di e SCP. E fondo ta wordo revalua constantemente. E fondo a wordo sepera pa motibo cu e trabounan cu mester a wordo haci riba e tereno social tawata grandi y serio y ta rekeri hopi determinacion, dedicacion y mas importante, e ta rekiri e determinacion di Gobierno pa aloca fondo pa percura cu e problemanan social di nos pais haya e debido atencion. Esaki ta sigura cu SCP ta exitoso y Gobierno lo percura tambe pa e fondonan keda disponibel pa haci proyectonan den SCP. Mirando tambe cu e fondo ta apart, Gobierno no por corta den e maneho social manera a pasa den pasado.
 
“E placa den fondo separa pa SCP ta keda comprometi pa e maneho social. E prome paso aki ta haci e diferencia den atende cu e temanan social di nos pais. Apesar cu vision ta importante, vision solamente no por bringa problemanan di nos pais. Vision mester bin cu un plan su tras, sino e ta un halucinacion. Plan no ta suficiente sin accion, sino e ta bira un soño. Vision, plan y accion, ta wordo concretisa cu un fondo. Hunto cu profesionalnan riba e tereno aki, Gabinete Wever-Croes a realisa e pasonan aki,” Prome Minister a duna di conoce.
 
Prome Minister a gradici tur professional cu ta yudando den e area aki cu hopi amor y passion pa. bringa cabes na e problemanan social. Siman pasa, Gobierno a firma un MoU cu UN-Women pa actualisa e maneho nacional di genero, pa dedica atencion na oportunidad igual pa hende homber y hende muhe, combati violencia contra hende muhe, aumenta conscientisacion cu abuso domestico no ta acceptable.
 
Prome Minister: “Na Fundacion di Hende Muhe den Dificultad, danki di curason pa boso dedicacion pa yuda muhenan den dificultad na Aruba. Boso trabou tanto na e fundacion como tambe den e maneho nacional aportando cu pensamentonan pa mehora e situacion y evita violencia domestico, ta altamente aprecia”.
 
Na final di su discurso, Prome Minister a laga e siguiente reflexion: “Algo cu a wordo neglisha pa hopi aña, no por wordo coregi den poco tempo. Pero Gabinete Wever-Croes hunto cu expertonan riba e tereno social, cu fe y determinacion ta logrando trece yudansa mas y mas riba e tereno aki”. 

• E titular di Asunto Social y Labor a culmina su siman cu e caminata di IMELDAHOF  cu na mes momento ta e evento cu a clausura e siman durante cual a enfoca riba Lantamento di Mucha cu diferente actividad di conscientisacion.

 

• E siman anterior a culmina cu 3 dia intenso di raportahe den cuadro di control di ehecucion di e Crisisplan Social. Manera Minister Glenbert Croes na mas di un ocasion a expresa, fracaso NO ta un opcion. Pa sigura cu tur instancia ta keda enfoca riba e meta comun di SCP, e raportahenan aki ta un necesidad.

 

• Diabierna 15 di november tabatin apertura di Siman di Lantamento di Mucha cu ta celebrando 30 aniversario di e tratado di Derecho di Mucha. E apertura exitoso a ser efectua pa nos Minister President kende ta un mama y un wela ehemplar. Nos orguyo Arubiano JEON tambe a aporta na e gran dia aki cu su presencia, participacion y presentacion.

 

• Diamars 19 di november a conmemora Dia Mundial di Prevencion di Abuso di Mucha. Corectamente manera SCP a highlight: Dia di Prevencion di Abuso di Mucha no ta solamente 19 di november.

 

• Aruba conhuntamente cu United Nations a yega na un acuerdo pa loke mester bira e maneho di Gobierno riba igualdad di genero (Gender Equality). Manera ta conoci, e departamento encarga cu esaki ta Centro di Desaroyo di Hende Muhe (CEDEHM). Apesar cu e ta resorta bou di Ministerio di Asunto Social y Labor e tema aki ta hopi cerca di curason y pues ta wordo carga pa nos Minister President.

 

• 20 November mundo henter a recorda e di 30 aniversario di tratado universal di Derecho di Mucha. Aki na Aruba a conmemora esaki cu un Conferencia riba Derecho di Mucha. Na e ocasion aki Minister Glenbert Croes a tene un discurso na Universidad di Aruba pa e Colegio di studiantenan den e ramo social y pa otro invitadonan presente. Corectamente manera e mandatario a expresa: tur mucha riba e suela Arubiano tin derecho sin importa su status. Tur mucha su derecho na Aruba mester wordo respeta!

 

• Inscripcion pa Formacion Social nr. 13 a habri. E proximo ta inicia 25 di februari 2020. E aña aki atrobe e mandatario a amplia e oportunidad di participacion. Si anteriormente, solamente muchanan cu no a caba scol por aplica, awor muchanan cu tin un diploma di MAVO cu tambe ta desea un di dos chens den bida, ta permiti pa participa den SVT- Formacion Social, specialmente si e hoben aki tin e interes di por drenta Arumil despues. Y pa por drenta Arumil un di e exigencianan ta cu mester tin por lo menos un diploma di MAVO.

 

• Telefon pa Hubentud cu por cierto ta un aliado den e lucha pa un miho porvenir pa nos mucha- y hobennan,  a celebra su 20 aña di existencia. Un instancia cu ta dedica su mes na alcansa nos mucha- y hobennan cu nan mensahenan di conscientisacion. E hecho cu anonimante un mucha/hoben por papia via telefon 131 y haya respaldo y oido, ta haci Telefon pa Hubentud un partner indispensabel den Aruba su mision di brinda nos Pueblo un futuro social nobo.

 

• Minister Glenbert Croes a efectua e develo di e logo nobo di Famia Planea. Un organizacion cu ta existi 49 aña trahando na promocion y conscientisacion di salud sexual cu un enfoke special riba nos hobennan. E cifranan ta alarmante pero e dedicacion di Famia Planea, cu solamente 4 empleado ta logra un scope di servicio nunca antes visto. For di conseho te servicio di entrega di productonan. E mandatario a expresa un admiracion enorme pa Famia Planea.

 

• Diasabra ultimo Fundacion Mucha pa Mucha cu apoyo di Ministerio di Asunto Social a tene su OPERATION CHRISTMAS CHILD riba e espacio di parkeo di Arubus na San Nicolas. Un evento unda mas cu 800 mucha a participa den un cantidad grandi di actividad y celebracion specialmente pa nos muchanan cu a bira un exito total.