ARUBA PRONTO LO HAYA SU PROPIO ORGANO ARUBIANO PA SIGUI CU SUPERVISION FINANCIERO DI NOS PAIS

Prome Minister a reuni cu señora Francine Giskes di Algemene Rekenkamer di Hulanda:
ARUBA PRONTO LO HAYA SU PROPIO ORGANO ARUBIANO PA SIGUI CU SUPERVISION FINANCIERO DI NOS PAIS


Pa Prome Minister Evelyn Wever-Croes, dialuna a habri y sigui cu diferente reunion importante riba agenda. Prome Minister a probecha su biahe pa Estonia pa e e-Governance Conference na unda cu su presencia un biaha mas e ta pone Aruba riba plataforma mundial. Momento cu e mandatario principal di nos pais a confirma su participacion den dicho conferencia, el a traha su agenda pa probecha hinca varios reunionnan den otro tanto na Estonia y awo na Hulanda. Reunionnan cuanan ta bayendo bon y satisfactoriamente, segun Prome Minister.


Dialuna Prome Minister a reuni cu señora Francine Giskes di Algemene Rekenkamer di Hulanda riba diferente aspecto cu nan a constata den funcionamento di CFT. Den e reunion aki Prome Minister a ricibi hopi informacion riba supervision financiero. E informacionnan aki ta mportante pa e supervision cu nos tin awor di CAFT pero mas importante pa e supervision cu Gabinete Wever-Croes ta trahando riba dje di ‘Begrotingskamer’.


“E ta asina cu nos a palabra den e protocol cu Hulanda na november 2018 cu nos ta keda cu CAFT 3 aña mas, y despues nos mesun Begrotingskamer mester ta cla pa tuma over. Nos Begrotingskamer ta un organo Arubano cu ta bay sigui cu e supervision financiero. Cu esaki nos ta gana nos autonomia financiero bek”, Prome Minister a duna di conoce.


Algemene Rekenkamer aña pasa a saca un rapport den cual ta cuestiona si e supervision di CFT na Boneiro, Saba y Sint Eustatius ta efectivo y ta cumpli cu su meta. Nan a describi con e supervision lo mester mehora pa logra su meta. Aruba, preparando pa su propio Begrotingskamer, lo tuma e consehonan aki sigur den consideracion.


Señora Francine Giskes di Algemene Rekenkamer di Hulanda a keda impresiona cu e empuhe y determinacion di Aruba pa logra su propio ‘Begrotingskamer’ sigui cu e supervision financiero di nos pais. “Nos meta ta: gana nos autonomia financiero bek”!