Aruba riba agenda den Rijksministerraad diabierna awor? Hulanda kier midi cu sinceridad of kier mustra poder politico?

Parlamentario Endy Croes ta sumamente indigna cu Hulanda su presion cu e ta poniendo riba gobierno alrespecto ley di LAFT. Manera ta conoci gobierno actual a hereda un pais na rand di bancarota y pues un pais ingobernabel. Den e lama bruto aki sin placa cu un debe te na nos strop Prome Minister Evelyn Wever Croes a tuma e responsabilidad y hunto cu Minister di Finansas Xiomara Ruiz Maduro y nan conseheronan a traha un plan van aanpak esta e famoso FEM (Financiel Economisch Memorandum) pa asina trece ordo bek den cas riba e parti financiero y traha espacio pa paga entre otro e proyectonan PPP di Mike Eman y AVP. Esaki a suma na 80.9 miyon florin pa aña desde 2019 pa 20 aña largo na PPP, 232 miyon na interes pa aña riba placa cu Mike a presta y un cantidad di otro desaster cu Mike y AVP a laga atras. A lora manga di camisa y tuma decisionnan kisas algun poco inpopular pero ta necesario pa cumpli cu e debenan cu Mike Eman a laga atras pa nos. Alabes lo crea un finansas publico sostenibel.


Amor ta bin di dos banda
Den transcurso di e cambio di direccion aki pa salba Aruba nos tabata altante cu lo encontra piedranan den caminda primordialmente di esnan cu tabata t’ey, kendenan a para mira, a braza otro pero a cera wowo y laga Mike Eman sigui crea e Mega Debe y e desaster financiero. Hulanda ta un di nan cu tabata t’ey desde 2014 y a introduci ley di LAFT desde 27 augustus 2015 y un supervision CAFT pa asina controla gobierno. Parlamentario Endy Croes ta sigui splica cu amor ta bin di dos banda. Hulanda no por kere cu e gobierno nobo aki cual a wordo eligi a base di un eleccion democratico mester tin un “toverstok” pa drecha e situacion financiero den menos cu 2 aña. No obstante esaki mester por tin espacio pa Parlamento haci su trabou y no wordo poni bou presion di Hulanda pa haci su trabou. Parlamento no ta contra ningun supervision pero solamente a corigi e ley di LAFT conforme nos consitucion. Hulanda mester por respeta esaki.


Halfjaar rapportage positivo
E siman aki Parlamento a caba di trata e halfjaar rapportage di e promer 6 lunanan di 2019 y mester bisa cu na entradanan di gobierno ta 51.2% y gastonan ta 46.9% cu un Surplus per saldo di expolatieresultaat di 60.1 MIYON florin. Sin cu CAFT a haci su control riba e di dos kwartaal nos mester bisa di ta super contento cu e control cu Parlamento mes a haci y e resultado cu e cifranan ta mustrando cual tur ta den cuadro di presupuesto aproba pa cu 2019. Enbes cu Hulanda reconoce e trabou y esfuersonan sublime pa corigi e erornan di gobierno anterior bou supervision di CAFT, awor Hulanda kier menasa y kier pone presion indirectamente riba Parlamento.


Unda Hulanda tabata e 8 añanan di AVP?
Parlamentario Croes ta subraya cu no tin problema cu supervision pero si tin problema hopi grandi cu Hulanda su actitud unda Hulanda kier usa poder politico pa presiona Aruba pio awor cu cifranan ta mustrando hopi mihor. Unda Hulanda tabata e 8 añanan di AVP? Kico Hulanda a haci pa stop AVP di HORTA e pais aki desde cu nan a tuma supervision ? Pues nos tambe por cuminsa punta dede. Parlamentario Croes ta bisa hustamente nos a scoge pa traha na un manera responsabel pero parce cu esey no ta na agrado di Hulanda. Parlamentario
Endy Croes ta haci un apelacion na Hulanda pa ban busca e espacio conhuntamente pa por sali for di cualkier desenlace na un manera elegante pero semper cu respet mutuo pa cu otro sirbiendo e interes y bienestar general di Pais Aruba y nos 114 mil conciudadanonan. Aruba poco poco pero sigur ta riba e bon caminda bek.