“AVP porfin a haya e caminda pa parlamento despues di mas di 2 luna sin traha”

Parlamentario Endy Croes a relata riba e aña Parlamentario nobo cual a inaugura 10 di september ultimo. Remarcabel tabata e presencia di fraccion di AVP den sala. Parlamentario Endy Croes ta splica cu durante e ceremonia oficial aki tabatin bastante invitadonan di diferente instancia of departamento presente unda Gobernador ta hiba su discurso y e aña aki atrobe un discurso elocuente. Parlamentarionan manera Richard Arends, Marlon Sneek, Mervin Wyatt Ras pa nombra algun y lo demas di fraccion di AVP tin alomenos 2 luna sin yega pia di trabou.


Dos siman pasa a trata halfjaar rapportage di pais Aruba pa dos dia largo unda lamentablemente ningun pero ningun a duna acto di presencia. Un set di Parlamentario mal bruha, sinberguensa y sin escrupulo. Cada bes mi mira e cifranan y sinti e dolor cu e gobierno aki ta pasa aden pa “rebaha” e deficit di malcustumber di AVP esta di 400 miyon pa 25 miyon florin e aña aki ta duna un hende normal sentido di hopi desapunto den AVP. Diamars sinembargo por a tuma nota cu hasta Benny “tereno” Sevinger tabata presente den eerste rij anto cu dashi color lila. AVP kier impresiona nos profesionalnan y busca exposicion pero en realidad di traha y haci nan trabou den parlamento net net nada.


​Ta e mesun fraccion aki di AVP a percura pa e Mega Debe y e desaster financiero. Apesar di un bunita apertura di e aña nobo parlamentario e presencia di e parlamentarionan aki di AVP kendenan normalmente nunca t’ey a laga un smaak hopi amargo den sala como esnan cu a hundi e pais aki. Parlamentario Croes ta desapunta totalmente di e politica cu AVP ta hibando despues cu e mesun hendenan aki a desgracia e pida baranca aki. Por lo demas e ceremonia mes tabata tremendo, Croes ta termina bisando.