“Awe kier papia di pobresa, manipula y “brainwash” henter un pueblo cu un Plan Aruba Holistico?”

Parlamentario Endy Croes den conferencia di prensa dialuna a baha pisa riba Mike Eman y profesor Rycond Santos do Nascimento. Siman pasa e dos “tiponan” aki kier hunga sabi y ple salbador di Aruba. Usando SDG’s, Sustainable Development Goals esta Duurzame Ontwikkelings Doelen kier papia awor di pobresa na Aruba y kier diseña un Plan Aruba Holistico pa cu tal. SDG’S crea pa Nacionnan Uni a determina 17 punto di importancia cu tur paisan na mundo lo traha riba nan cu e meta pa na 2030 nos crea un mihor mundo pa un y tur.


Mike Eman a crea pobresa
Number 1 riba e lista di SDG’s ta poverty esta pobresa. Mike Eman kier usa un profesor pa para banda di dje y yuda construi un Plan pasobra aparentemente den 1 aña y 8 luna cu Mike no ta den poder mas Aruba lo a bira pober y lo tin pobresa. Tristo ta cu Mike y AVP mes a crea pobresa na Aruba. Segun Parlamentario Endy Croes cu Raycond mester ta sufri di un of otro malesa banda cu e tin hopi gana di subi lista di AVP. Bo mester por ta desespera pa laga Mike manipula bo y usa bo conocemento pa purba “brainwash” henter un pueblo. Ta kico e alumnonan di Universidad lo pensa di nan profesor? A caso Raycond lo por conta su alumnonan con AVP a crea e Mega Debe? Raycond por conta su alumnonan di e Desaster Financiero cu AVP a laga atras? Awor kier yuda Mike traha otro plan pa pueblo lubida esaki?


Preguntanan na Raycond
Kico ta Raycond su pensamento alrespecto Mike Eman su fiesta celebrando su cumpleaños 1 di september 2017 riba e brug cu placa di pueblo malgastando 142 MIL florin riba un solo anochi? Kico ta Raycond su pensamento riba 232 MIYON cu pais Aruba mester paga na interes e aña aki? Kico ta Raycond su pensamento riba 80.9 MIYON cu pais Aruba mester paga e aña aki na proyectonan PPP? Kico ta Raycond su pensamento na 142 MIYON florin cu a paga na coordinadornan di ministernan durante 8 aña? Kico ta Raycond su pensamento riba 6.5 miyon cu a paga Patrick Paskel via su companianan pa papia bon di Mike Eman? Kico ta Raycond su pensamento alrespecto 5.2 Miyon cu a paga Sjiemfat? Kico ta Raycond su pensamento riba 10 Miyon cu a paga Phillips y TNO ? Kico ta Raycond su pensamento riba 2 Miyon cu a malgasta cu aventuranan Wubbo Ockels? Kico ta Raycond su pensamento riba casi 30 medida cu AVP y Mike Eman a tuma den 8 aña? Kico ta Raycond su pensamento riba e corupcion den gran forma di terenonan cu Mike Eman y Benny a orchestra? Kico ta Raycond su pensamento riba Sebastian cual Mike tabata paga 27 mil pa luna pa saca su potret y post riba su Facebook? Kico ta Raycond su pensamento riba expresion di Mike cu e ta orguyoso di e debe y e debe t’ey pa nos tur pag’e den futuro? Kico ta Raycond su pensamento riba gritonan di Benny “I don’t give a damn?”


Wel cu tur respet, tin basta pregunta pa contesta promer cu Raycond cu Mike kier bin pretende cu nan lo traha un plan Aruba Holistico pa combati pobresa cu Mike Eman y AVP mes a ocasiona durante 8 aña. Parlamentario Croes kier spierta pueblo di lokual Mike y Raycond ta bezig cune pa purba brainwash nos comunidad. Maneho di Mike y AVP ta Prohibi pa lubida!