CAMBIO DI LEY PA STOP Y PREVENI SECUESTRO DI MUCHA

Den conferencia di prensa diahuebs mainta, Premier Evelin Wever-Croes a enfatisa e importancia di pone nos muchanan central. Compañando Premier Wever-Croes na e conferencia aki tawata Sr. Edmar Gietel, Sr. Jeremy Carty y Srta. Janine Wever representando e fundacion pa derecho di mucha, Kids Rights Empowerment.


Minister President a duna palabra na prome luga na Sr Edmar Gietel kende primeramente a gradici Minister President pa e invitacion aki. Sr Gietel a splica cu e mes ta victima di secuestro parental na unda su jiu chikito a ser ranca y horta for di nan famia exactamente 22 luna pasa. Durante e lunanan aki Sr. Gietel a splica cu nan a cana, grita y purba di tur forma pa por a haya un caminda unda nan por a haya yudansa pero lamentablemente leynan no tawata na su fabor. Pa es motibo aki tambe a bin na e conclusion cu lo mester haci e maximo esfuerso pa e leynan anticua aki cu Aruba wordo cambia pa asina nos ta igual na e paisnan Latino America y Europa na unda e interes di mucha ta na prome luga, y unda cada mucha tin proteccion di ley pa por tin su mama y tata den nan bida. Por ultimo Sr Gietel a bisa “Nos meta ta pa stop y preveni secuestro di mucha y nos no lo stop te ora nos logra cambia e leynan”.


Tambe Sr Gietel a gradici Prome Minister pa duna nan oido, y tambe duna nan e plataforma pa por conta nan storia y nan meta tras di e fundacion y su compromiso pa por traha hunto y asina logra cambia e leynan na interes di nos muchanan.


Siguiente na palabra tawata Sr. Jeremy Carty cu tambe a gradici Prome Minister pa e oportunidad pa nan por conta nan storia y alabes conscientisa pueblo di Aruba riba e ley atual concerniendo e derecho di cada mayor pa cu nan yiu. Sr Carty tambe ta victima di sucuestro parental y tambe mester a cana un caminda largo pa e logra haya sa cu ley actual no ta sostene su derecho como tata y por lo tanto e no tin nada di bisa den bida di su yiu aunke e la reconoce su yiu y e mucha ta carga su fam. Segun Carty ta expresa e situacion cu e a pasa aden conhuntamente cu Sr. Gietel ta uno hopi doloroso y cu no por wordo splica y pa es motibo aki Sr. Carty a dicidi di acerca Sr. Gietel y Srta. Wever pa asina por yuda nan lucha pa e leynan por wordo cambia asina evitando mas tata y/of mamanan di pasa den e situacion aki.


Srta. Janine Wever di Kids Rights Empowerment tambe a splica e dolor pa no solamente e tata sino henter e famia cu ta pasa den secuestro di un mucha pa un di e mayornan. Un di e metanan pa cu e fundacion aki ta pa conscientisa primeramente cu cada mucha tin derecho. Aruba tin un convenio di derecho di mucha firma na 2001 y pesey e fundacion aki kier enfoca riba e convenio aki y recorda cada adulto cu e ta nos obligacion como adulto pa cumpli cu esaki debidamente. Tambe e kier a enfatisa riba contact cu ambos mayor semper y cuando e
no ta un peligro pa e mucha sino den su beneficio. Kids Rights Empowerment ta promove derecho di mucha y tin un facebook page pa asina pueblo di Aruba por sigui e desaroyo di e cambio di ley y haya tur informacion necesario riba e topico aki.


Fundacion Kids Right Empowerment ta notifica tur mayor cu specialmente durante e dianan aki di vakantie, pa nan ta altanto di ki derecho a nan tin pa si acaso e otro mayor bay vakantie cu e mucha y no bolbe mas. Ta di hopi importancia pa cada tata sa cu si nan no ta casa cu mama di e mucha nan no tin derecho riba e mucha aunke e mucha tin nan fam. Esaki por wordo regla via un “ouderschap plan” traha door di ambos mayor of via corte. Srta. Wever tambe a sigui cu un gradecimento na Prome Minister pa e oportunidad aki y a informa pueblo di Aruba cu nan ta na dispocion di cada un mayor cu mester e sosten necesario of cualkier informacion.


Por ultimo Prome Minister Evelyn Wever-Croes a duna su compromiso como gobierno actual di traha conhuntamente cu Kids Rights riba cambio di e ley aki. El a notifica si cu e cambio aki lo mester cana su caminda y lo tuma su tempo pero tanten nan lo keda traha den bienestar di cada mucha informando y conscientisando pueblo di Aruba riba e ley di derecho di mucha. Pa Gabinete Wever-Croes e muchanan ta central y lo sigui cu e lucha pa logra e meta aki.