Contesta na Parlamentario Sneek:GOBIERNO NO A DUNA LICENCIA PA PRODUCCION DI CANABIS NA ARUBA

Parlamentario di AVP, Marlon Sneek, riba 5 di februari a haci preguntanan por escrito na Prome Minister Evelyn Wever-Croes relaciona cu dunamento di licencia pa canabis. Gobierno di Aruba, den cuadro di transparencia, ta haya importante pa publica e contestanan riba e preguntanan haci door di Parlamentario Sneek.


Preguntanan di Parlemantario Sneek tawata si Gobierno ya a duna licencia pa plantamento y produccion di canabis na Aruba y cua proceduranan a wordo aplica. Si tawata tin un destaho publico, kende of cua companianan a haci un oferta y con nan peticion a wordo controla. Kico ta e condicionnan di Gobierno pa duna un licencia asina.


Prome Minister Evelyn Wever-Croes, contestando e preguntanan di Sneek, a duna di conoce cu Gobierno no a duna ningun licencia pa produccion y plantamento di canabis na Aruba.


Presupuesto 2020
Pa loke ta trata Presupuesto 2020, Prome Minister a bisa cu Gobierno ta trahando na maneho y leynan relaciona cu plantamento di canabis na unda ta tene cuenta cu tratadonan internacional. Gabinete Wever-Croes ta di opinion cu e produccion y plantamento di canabis riba un isla manera Aruba por ta exitoso y por contribui na caha di Gobierno. En todo caso, segun Prome Minister, ta hopi interesante pa explora e posibilidad aki.


Prome Minister a indica cu e gap financiero di aña pasa pa e aña aki ta hopi grandi. Pa cuminsa, Aruba mester bay di un deficit di 25 miyon di aña pasa, pa un surplus di 25 miyon e aña aki. Acerca ta bin e deficit adicional di AZV pa 2020. Tambe acerca ta bin cu Aruba pa prome biaha ta bay paga e maximo di e proyectonan PPP di 80 miyon florin pa aña. Esaki ta danki na e mal maneho di e gobierno anterior.


Gabinete Wever-Croes a dicidi cu e gab financiero sumamente grandi aki, lo no wordo yena solamente cu aumento di impuesto pasobra pueblo no por mas. Gobierno di Aruba a busca un balansa entre hisa impuesto na un banda cu ta trece un reparticion mas husto y di otro banda crea otro fuentenan di entrada cu no ta afecta pueblo di Aruba asina tanto. Un di e fuentenan di entrada aki, por bira e produccion di canabis. Esaki, Prome Minister a enfatisa, ta e plantamento di canabis pa uzo medicinal exclusivamente pa exportacion bou di condicionnan hopi stringente. Na e momento aki, ta wordo traha na e ley y maneho teniendo cuenta cu tratadonan internacional.


“Gabinete Wever-Croes ta convenci cu e produccion di canabis lo contribui na entradanan di Gobierno contal esaki tuma luga bou di controlnan hopi estricto. Por ehempel, ta duna licencia na companianan cu por cumpli cu e exigencianan den ley y maneho. Esaki ta crea tambe cuponan di trabou y ta conduci na crecemento economico. Pa aña 2020, na forma prudente, Gobierno ta tene cuenta cu entradanan pa caha di Gobierno di 15 miyon florin”, Prome Minister a duna di conoce.


Prome Minister a indica cu ainda mester bay traha riba e procedura pa duna e licencianan cu lo bay a base di destaho publico caminda cu tur hende por tin e oportunidad igual. Condicionnan hopi estricto lo wordo mara na e licencianan entre otro; e calidad di loke cu ta wordo planta; exigencia di benta di loke ta wordo planta; y e exigencianan di siguridad di e tereno y edificionan na unda ta pensa cu un tipo di bunker lo ta mas efectivo.


“Cu otro palabra, no ta tur hende por bay planta con cu ta y unda cu ta, sino por planta solamente riba terenonan cu ta wordo apunta pa esaki y bou di condicionnan hopi estricto. Ora cu ta asina leu, Gobierno lo duna mas informacion riba e topico aki”, Prome Minister Evelyn Wever-Croes a duna di conoce.