Crecemento economico ta e unico salbabida pa San Nicolas!

​Pa varios aña nos a wordo engaña cu tantisimo manipulacion di Gabinete Eman I y II y awo supuestamente un di tres brug lo trece progreso pa San Nicolas. E nivel di estupidez politico na Aruba a pasa tur limite. Ainda nos digno pueblo no sa con lo paga pa e proyecto di mas corupto den nos historia, unda ta bende bid manera ta pastechi.
 
E unico salbabida pa San Nicolas ta un bon maneho economico y duna San Nicolas su habitantenan preferencia pa participa den e San Nicolas mas progresivo. Nos no lo keda un pueblo mendigo, esaki sigur no ta e vision di partido Movimiento Electoral di Pueblo. Nos di MEP ta lucha pa henter e teritorio Arubano haya su debido atencion y participacion debidamente. 
 
E unico dos actividadnan comercial economico na San Nicolas ta e bida nocturno y e sector bancario, despues cu AVP a hiba un politica sushi di laga Valero mete den nos asuntonan interno y a conduci cu e refineria a cera na 2012 y awo nos ta warda un Upgrader desde September 2016. Un abuso di marca mayor ta locual e Gabinete na mando a haci cu nos digno pueblo.
 
Ta tempo pa San Nicolas haya un atencion special. Conhuntamente cu e organisacion cu ta representa e establecimentonan nocturno na San Nicolas y cu e otro stakeholders di San Nicolas. Mester traha un plan con por haci San Nicolas un alternativa riba area hotelero como sitio pa "Outing" y di e manera aki crea desaroyo tan espera na San Nicolas. No mas manipulacion pero crecemento economico real pa San Nicolas cu lo hiba Aruba den e proximo nivel di progreso. Mi persona a lucha duro e ultimo 4 añanan den oposicion pa demanda di nos Gobierno nacional pa buta mas atencion na San Nicolas, pero tur esaki tawata envano. Mi ta pidi nos digno pueblo pa deposita nan confiansa di voto den mi persona pa por ehecuta e cambionan tan espera. "Nos di MEP kier crea desaroyo economico na San Nicolas, y trece progreso pa habitantenan di San Nicolas y nos pais den su totalidad”.
 

---