CUIDO MEDICO:PREVENCION TA E SOLUCION

Cuido di salud di e ciudadano a bay atras considerablemente, y e confiansa den nos sistema di
salud ta decayendo. Institutonan cu mester brinda servicio di salud ya no por cu e demanda debi na crecemento di nos poblacion. Complexidad di e tratamentonan medico ta aumenta
innecesariamente debi na e falta di atencion na tempo.

E realidad cu nos ta bibando aden awor ta cu un pashent mester warda varios luna pa haya cita cu su specialista of yega pa haci su testnan diagnostico (manera CT Scan of MRI). Algun no ta logra warda asina tanto y ta empeora cu nan salud of perde e lucha cu nan enfermedad prome cu e dia di nan cita yega.

Prevencion ta e solucion pa cuido di salud y especialmente e costo di cuido di salud riba termino largo. Esey ta e motibo pa cual nos ta pone prioridad na prevencion.
Cancer ta un enfermedad cu ta toca tur famia. Estudionan di Pan American Health Organization (PAHO) ta demostra cu cancer y enfermedad cardiovascular ta e prome causanan di mortalidad riba nos isla. Nos tur por ta di acuerdo cu e ta un enfermedad hopi cruel. P’esey MEP ta di acuerdo cu mester desaroya estudionan riba origen di e indicenan di cancer. Mester haci comparacion cu paisnan den region y asina aki, introduci metodo di accion pa preveni y trata cancer riba nos isla. Unabes cu nos conoce e causanan cu tanto hende na Aruba ta sufri di cancer, nos por enfoca mas directo riba preveni y trata cancer.

Nos ta compronde cu factornan genetico ta hunga un papel importante den e desaroyo di cancer pero tambe mester pone atencion riba ‘estilo di bida’, nutricion y obesidad.
IMSAN lo wordo desaroya den un centro oncologico y lo haya aparatonan moderno pa combati e enfermedad di cancer efectivamente. Di e forma aki nos kier fomenta desaroyo na San Nicolas pa atrae tambe turismo di salud, y asina amplia nos pilarnan economico y trece desaroyo real pa San Nicolas.
​
Sinembargo e forma mas eficaz pa combati cancer ta keda PREVENCION: ehercicio,movecion, come saludabel, y biba saludabel ta clave.
Pa nos di partido MEP salud di hende y sigur bida di hende no tin prijs. Nos ta consciente cu un pais cu ta respeta su mes, mester brinda un cuido di salud digno na su ciudadanonan, y cu esey nos ta compromete: mehora e calidad di cuido pa un y tur. Prevencion y movecion ta e solucion.

---