Den su discurso pa Dia di Himno y Bandera, PROME MINISTER A A PIDI PA NOS PUEBLO UNI DEN E MOMENTONAN DI MAS DIFICIL DEN HISTORIA DI ARUBA

18 di maart 2020 tawata pa mayoria hende riba nos dushi isla Aruba un dia di sentimentonan mixto. Nos dia nacional, Dia di Himno y Bandera. E aña aki nos ta celebra e hecho cu 44 aña pasa nos pais a haya su Himno y su Bandera. E tempo ey Aruba tabata forma parti di Antiya Hulandes, pero cu un deseo grandi pa ta liber, pa bira un pais riba su mes.


Den su discurso di Dia di Himno y Bandera, Prome Minister Evelyn Wever-Croes a enfatisa e importancia pa nos pueblo keda uni den e temponan dificil cu nos ta enfrentando.


“Ami ta corda ainda dia 18 di maart 1976, 44 aña pasa, como mucha di 4e klas e tempo ey, nos a bay Stadion Guillermo Prospero Trinidad pa e prome homenahe na nos bandera. Stadion tabata completamente yen. Y e orguyo y alegria di scucha nos himno momento cu nos bandera tabata bay halto, ainda mi ta sinti cada celebracion di Dia di Himno y Bandera. Y Aruba henter semper a demostra e amor y respet pa nos himno y bandera. Nos ta celebra e dia aki semper en grande, cu homenagenan protocolario, cu celebracionnan tur caminda, baile y musica tradicional y nos dushi cuminda crioyo.


Sinembargo e aña aki nos ta celebra nos dia nacional na un otro forma, debi cu mundo henter ta den e gara di Corona Virus y nos pais Aruba, no ta un excepcion.
Un situacion sin precedencia cu a causa y ainda ta causando panico, hopi dolor y di cual su efectonan nos no por ni imagina ainda.


Riba e dia nacional, dia di Himno y Bandera, mi kier haci un apelacion fuerte na henter nos pueblo pa ban uni den e momentonan di mas dificil den historia di Aruba. Sector priva, sector publico, sindicatonan, NGO’s. Ta nos tur ta Aruba, sin diferencia entre color politico, rasa, religion, sexo. E momentonan aki nos pais mester di nos tur uni.


E palabranan di nos himno ta: “Nos amor pa bo ta asina grandi, Cu no tin nada pa kibr’e”
Ohala cu e amor grandi cu nos ta sinti pa nos pais, por inspira nos y duna nos e forsa cu nos tin mester den e tempo nos dilanti. Pabien Aruba cu celebracion di dia di nos himno y bandera, y cu Dios bendiciona cada cuidadano di pais Aruba”, Prome Minister Evelyn Wever-Croes a expresa.