Durante e lansamento oficial di Aruba su SDG ‘Young Voices’ PROME MINISTER A ENCURASHA E HOBENNAN PA NAN CONCENTRA RIBA NAN META PA CONSCIENTISA NOS COMUNIDAD

Prome Minister Evelyn Wever-Croes:


Durante e lansamento oficial di Aruba su SDG ‘Young Voices’
PROME MINISTER A ENCURASHA E HOBENNAN PA NAN CONCENTRA RIBA NAN META PA CONSCIENTISA NOS COMUNIDAD


Diahuebs anochi na Cas di Cultura a tuma luga e lansamento oficial di Aruba su SDG ‘Young Voices’. SDG Aruba a invita hobennan entre 15-30 aña pa bira un SDG Young Voice y asina hiba e mensahe di e SDG’s di Nacionnan Uni. Varios hoben a tuma e reto y diahuebs anochi nan a keda presenta.


Nacionnan Uni a stipula metanan pa crea un miho mundo na 2030, Metanan di Desaroyonan Sostenibel, SDGs. Prome Minister Evelyn Wever-Croes a expresa cu ta algo hopi bunita cu algo asina importante cu a wordo crea door di adultonan, wordo traspasa na nos hobennan pa asina nos hobennan inspira nos comunidad pa biba segun e metanan stipula di SDGs.


“Den nomber di Gobierno di Aruba, mi ta gradici cada hoben cu ta acepta e reto aki y dedica bo tempo liber tumando un responsabilidad pa conscientisa nos comunidad riba e metanan di desaroyonan sostenibel. Boso lo ta di gran ayudo tanto pa Gobierno y nos comunidad tumando un reto asina importante”.


Prome Minister a encurasha cada un di e SDG ‘Young Voices’ cu a wordo apunta, pa nan no laga nada stroba nan pero concentra riba nan meta di e responsabilidad cu nan a tuma y conscienisa nos comunidad especiamente nos hobennan.


Prome Minister a felicita Jocelyne Croes y Amy Richards di SDG Aruba pa e tremendo trabou.
Danki y hopi exito cu e proyecto aki.