Durante siman di celebracion di Dia di Betico:COLEGIO CRISTO REY NA BRASIL TAMBE A RICIBI BISHITA DI PROME MINISTER

Mas cerca nos ta di Dia di Betico, mas emocion tin den henter pueblo di Aruba. Aruba ta cla pa celebra e fecha natal di un gran lider y luchador di nos Status Aparte, Gilberto François ‘Betico Croes’. Nos ta den momentonan of dianan na unda cu nos pueblo ta papia y conta di e gran Arubiano aki. Y na scolnan, esaki no ta diferente. Maestronan ta dedica oranan di dia pa siña nos muchanan e storia di Betico Croes.


Prome Minister Evelyn Wever-Croes, desde comienso di siman a cuminsa cu un recorido na diferente scol basico na Aruba pa asina no solamente conta e muchanan e historia di Betico Croes sino tambe pa biba e entusiasmo y e interes cu cada mucha tin pa sa mas di nos Libertador. Colegio Cristo Rey na Brasil a ricibi bishita di Prome Minister diaranson mainta.


E tema di e aña aki ta ‘Danki na Dje’. Danki na Betico, despues di lucha duro, entrante 1 di januari 1986, Aruba a logra Status Aparte. Betico a hiba un lucha sagrado pa nos libertad. Danki Betico, danki pa tur e sacrificionan cu bo a haci pa logra realisa e soño di nos pueblo, nos Status Aparte. E lucha no tawata facil. Betico a encontra hopi contratiempo den su cambinda pa logra esaki. E tension di e pueblo tawata grandi. Betico no a lucha pa su mes. El a lucha pa su pueblo. E mes no a wak e fruta di su lucha. 3 ora prome cu Status Aparte, Betico a haya un accidente y a bay den coma y 11 luna despues el a fayece sin mira Status Aparte.


E mensahe principal cu Prome Minister a laga cerca e muchanan klas 5 y 6 di Colegio Cristo Rey tawata pa no ‘give up’. Ora cu cuminsa cu algo, sigui purba te ora cu logra. Sigui studia y pone nan meta nan dilanti y keda firme pa logr’e.


Prome Minister a gradici e Cabesante di scol y docentenan di klas 5 y 6 pa e tempo cu nan a pone pa siña e muchanan tocante di Betico. E atencion y e interes cu nan tawata tin ta grandi. Esaki ta duna nos siguridad cu e historia berdadero di Betico Croes y nos Status aparte ta keda graba den tur generacion nos dilanti.


Na final Prome Minister a invita tur mucha pa asisti na e Manifestacion Cultural diabierna awo, 24 di januari di 7:00 pa 10:30 PM na Plaza Libertador G.F. Betico Croes.