E compromiso cu partido MEP tin pa cu e problematica di adiccion na Aruba

Den e ultimo 8 añanan e gobierno actual a inverti hopi placa pa embeyece nos pais, di cual por a uza e placa pa duna un mihor calidad di servicio na cuido mental y e problematica di adiccion. Consecuencia di esaki cu por a nota ta cu e problematica di adiccion a conoce un crecemento espantoso den e ultimo añanan, di cual ta hopi visibel den tur districto di Aruba.

Partido MEP ta tuma e problematica aki hopi na serio y lo contraresta esaki di tur angulo y riba tur nivel. Nos por a tuma nota cu tur proyecto di cual partido MEP a logra den nan gobernacion, lamentablemente e gobierno actual a destrui nan den e ultimo 8 añanan. Mas a un cuido di adiccion a bay di malo pa peor.

Nos di partido MEP ta realisa nos mes cu e problematica di adiccion ta uno bastante serio, complica y cu e solucion ta rekeri profesionalismo, sosten y energia di hopi. MEP lo percura pa e cuido necesario lo t'ey y lo ofrece esaki manera mester ta. Mundialmente (PAHO, WHO) ta considera adiccion un malesa cronico cu mester su atencion specifico pa loke ta trata e cuido.

E gobernacion actual a considera adiccion como un problema hudicial y a ponele bou ministerio di Hustica, unda cu no a mira e persona cu un problema di adiccion como un pashent cu mester yudansa pa su malesa, sino como un persona cu ta un criminal. Prome cos cu partido MEP lo haci ta, trece e problematica aki bek bou di Ministerio di Salud. Asina nos lo decriminalisa e adicto. Un adicto ta un persona cu ta sufri di un enfermedad y mester trat'e manera un persona cu ta sufri di un enfermedad.

Mas a un e gobierno actual a kibra tur e lasonan cu MEP a percura pa Aruba tin cu e organisacionnan den exterior, por ehempel na Merca, esta UNDCP (United Nations International Drug Control Programme), cual a trece cu ne cu tur organisacion den exterior a perde nan confiansa den Aruba. MEP lo percura asina cu drenta den gobernacion pa trece bek y drecha tur e lasonan internacional riba tereno di adiccion.

Prevencion:
Prevencion mundialmente ta conoci pa ta mas barata cu cuido clinico. P'esey mes MEP lo bin cu programanan riba tereno di prevencion, riba uzo/mal uzo di droga y alabes ta evita cu adiccion lo sigui crece na Aruba. Prevencion riba adiccion mester forma parti di curiculo den enseñanza.

Rehabilitacion:
Nos lo percura pa un biaha mas e cadena di cuido den adiccion lo ta e ehempel pa cuido aki na Aruba, manera esaki tabata tempo di e gobernacion di MEP. Iniciativa priva, iniciativa publico lo wordo reenforsa. E cadena di cuido mester guia e adicto for di riba caya te na un ciudadano respeta y productivo den nos comunidad. Pa cu e ultimo aki lo pone prioridad riba e siguiente institucionnan:

Amplia e oficinanan di Consultorio pa Asunto di Adiccion den diferente bario (San Nicolas, Oranjestad, Santa Cruz, Noord); amplia instituto pa e personanan bou di curatela; bin cu institucion special pa esnan cu ta sufri un malesa psikiatrico y adiccion (double trouble);
introduci bek shelter pa esnan cu no tin lugar di biba y cu ta riba caya; bin cu un institucion special pa nos hobennan cu tin un problema di adiccion; amplia e cantidad di HALF Way House unda lo tin pa hende homber y hende muhe.

Educacion:
Partido MEP lo garantisa e cuido y e servico pa esnan cu tin un problema di adiccion door di garantisa cu lo tuma profesionalnan den servicio riba dicho tereno. P'esey mes MEP lo educa y percura pa tur material y espacio pa nan por traha na un forma respetabel y profesional. Lo mester introduci un curiculo specifico riba tereno di psikiatria y adiccion na tanto Colegio EPI (sector Salubridad & Servico), como na Universidad (Bacholor in Social Work) pa e profesionalnan por brinda e guia y tratamento cu cada adicto mester.
Alabes MEP lo precura pa tin her-, om- y bijscholing di profesionalnan trahando regularmente cu e personanan cu tin un problema di adiccion.

Partido MEP lo percura y ta garantisa cu salud mental di e pueblo Arubiano lo yega e nivel cu e mester ta y lo pone sin mas atencion na e problemanan relaciona cu drogadiccion. Nos di partido MEP y mi persona cu 33 aña di experencia riba cuido mental y adiccion, ta sigur cu e calidad di bida y prosperidad di e pueblo aki lo por bira realidad, ora nos drenta gobierno dia 22 di september binidero!

---