E siman aki Gobierno ta yuda 1649 compania y 28.212 trahador cu subsidio di salario

Tur trahador tin derecho pa haya sa e subsidio cu ta toca nan


Pa enfrenta e crisis di COVID19 Gobierno a prepara un pakete di sosten financiero, den cual a introduci un flexibilisacion fiscal den forma di Alivio Fiscal, ta yuda esnan cu a perde trabou cu un entrada via FASE, ta brinda yudansa di emergencia na negoshi chikito y mediano di 4.000 florin pa kwartaal, ta haci 100 microcredito special via Qredits posibel y ta brinda Subsidio di Salario pa comercio por mantene cupo di trabou y trahadornan cu un entrada.


Dia 6 di mei tur compania cu ta vulnerabel pa e efecto di COVID19, a ricibi un email di SVB cu informacion y e peticion pa aplica pa e sosten financiero den forma di Subsidio di Salario. Un total di 1649 compania a aplica pa e yudansa aki den cual Gobierno ta yuda cubri un maximo di 60% di e salario di 28.212 trahador. E siman aki e 1649 compania ta haya e promer pago di subsidio cu ta suma un tiki mas cu 48 miyon florin na yudansa pa por surpasa e momentonan dificil cu comercio y trahadornan ta pasando aden.


Comerciante cu tin pregunta riba Subsidio di Salario por tuma contacto cu SVB via MiSVB na www.svbaruba.org . Den caso di obheccion por manda esaki via bezwaarloonsubsidie@svbaruba.org . Den caso cu un trahador kier sa mas riba e yudansa aki, por aserca nan doño di trabou cu e peticion pa por mira e informacion di e subdidio cu ta toca e trahador. E ultimo aki ta un condicion pa otorgacion di Subsidio di Salario stipula den articulo 6 inciso h den e Decreto Ministerial di Minister di Finansa, Asunto Economico y Cultura di 13 di mei 2020 cu number 681/20, cu ta contene e decicion pa otorga sosten financiero den forma di Subsidio di Salario.