Gobierno a absorba subida di prijs di gasolin durante e ultimo tres lunanan

Durante e Conferencia di Prensa semanal di Gobierno, Minister Ruiz-Maduro a informa cu e prijs di gasolin, manera anuncia anteriormente lo no subi den luna di juni. Apesar cu segun calculonan prijs di gasolin lo mester a subi cu 7.6 cen e luna aki, Gobierno via Refineria di Aruba (RDA) a absorba e subida aki.


Un manera nobo pa calcula prijs
Minister Ruiz-Maduro a informa cu a cambia e manera cu ta calcula e prijs di e productonan di petroleo. Departamento di Asuntonan Economico pa largo tempo a haci uso di e plataforma di Platts cu ta usa un promedio pa luna di e prijs di e producto petrolero riba mercado internacional. Ademas tabata usa e prijs internacional di un luna anterior. Awor cu Gobierno ta doño di RDA cu ta trece producto petrolero Aruba, a habri e oportunidad pa pueblo por haña un prijs cu ta wordo calcula na un manera diferente. E manera nobo pa calcula prijs di e producto petrolero ta, cu awor ta usa e prijs real cu RDA a paga pa e producto petrolero y tambe ta tene cuenta cu e reserva di e producto cu RDA tin almacena y hunto e ora ey ta fiha e prijs.


Un calculacion di prijs mas beneficioso pa nos pueblo
Anteriormente tabata usa e plataforma di Platts pa calcula e prijs di e productonan petrolero y e prijs aki ta fluctua riba mercado internacional. E manera nobo di calcula prijs su beneficio ta cu asina por evita fluctuacion grandi den prijs na e consumidor.


Prijs di gasolin lo no subi e luna aki
Manera anticipa den luna di juni Gobierno via RDA ta absorba e subida di prijs di gasolin y pesey e prijs di gasolin no lo conoce cambio. Gobierno a yuda pueblo absorba e subida di prijs di gasolin durante e ultimo tres lunanan pa asina alivia e cartera un poco, Minister Ruiz-Maduro a termina bisando.