Gobierno a contesta Parlamentario Sneek:ATENDE REUNION DEN PARLAMENTO Y BO LO SA CUANTO HENDRIK CROES A COBRA

Siman pasa Parlamentario Marlon Sneek a manda pregunta pa Prome Minister Evelyn Wever-Croes tocante cuanto su tata ta gana como abogado di e companianan estatal RdA y Utilities.


Prome Minister a contesta e preguntanan aki, indicando cu e como minister encarga cu e companianan, no tin ningun influencia riba cual abogado e companianan ta uza. E companianan estatal RdA y Utilities ta haci uzo di sigur 5 diferente oficina di abogado, dependiendo di kico ta e problema legal, y dependiendo di e expertisio di cada abogado.


Recientemente RdA a publica esaki, indicando cu nan escogencia pa acerca e Bufete di sr. Hendrik Croes ta basa riba su expertisio y conocemento amplio den negosacion cu refineria.
Riba e pregunta cuanto sr. Hendrick Croes a cobra na RdA, Prome Minister a informa cu durante e debate den Parlamento dia 30 di augustus ultimo, el a pone tur e pagonan na tercera, incluyendo e pagonan na tur e abogadonan, ter inzage pa Parlamento, cumpliendo asina cu tur regla di transparencia.


Prome Minister finalmente a conseha Parlamentario Sneek pa atende na reunionnan den Parlamento, pa asina e por informa su mes miho.