Gobierno di MEP den apenas un aña y mey a logra repartura di refineria na 1991Awe pueblo tin mas cu un aña ta wardando riba CITGO y nada ainda!

Gobierno di MEP den apenas un aña y mey a logra repartura di refineria na 1991
Awe pueblo tin mas cu un aña ta wardando riba CITGO y nada ainda!

Cada biaha cu AVP kier defende su mal maneho, semper nan ta recori na pasado y compara nan maneho cu e maneho hiba pa gobiernonan di MEP. Sinembargo hechonan concreto ta mustra cu durante periodo di nan gobernacion nunca nan a mustra cierto excelencia y te hasta por bisa cu nan ta goberna den forma amateur.

A para desmantelacion na 1989
Pa e biaha aki partido MEP kier a bin cu e ehempel di e proceso pa yega na reapertura di e refineria Lago cu a cera na maart 1985. Despues cu Gabinete Henny Eman na 1988 a cuminsa corta e refineria na pida pida, na januari 1989 a bin un otro gobierno di MEP/PPA/ADN. Asina cu e gobierno aki a sinta, a para e desmantelacion di e refineria y a cuminsa cu e proceso pa duna contenido na e frase di ‘si tin 1% di posibilidad pa habri e refineria atrobe, mester explora esaki’.

Proceso pa yega na reapertura
Aki ta sigui cronologicamente e proceso pa yega na reapertura di e refineria por medio di Coastal Refinery door di Gabinete Oduber 1:
· 28 di maart 1989: Apenas un luna y mey despues di a drenta gobierno, ex-Prome Minister Nel Oduber a ricibi representantenan di Coastal Oil Co, kendenan a participa cu Coastal ta interesa pa reapertura di e refineria.
· April 1989: Inspectornan tecnico di Coastal Oil Co. a bin haci inspecionnan riba e refineria di Lago.
· 23 di juni 1989: A ser firma un ‘Letter of Intent’ cu aprobacion di Parlamento.
· 19 di oktober 1989: Parlamento di Aruba a aproba e contracto pa reapertura di e refineria Coastal cu Gabinete Oduber .
· 20 di april 1991: Oficialmente e reapertura di e refineria a bira realidad. Huma a cuminsa sali for di e pipanan y San Nicolas a mira un desaroyo sumamente positivo!
Pues resumiendo por conclui cu a dura solamente 1 aña y mey pa Gabinete Oduber logra e reapertura di e refineria, esta for di e firmamento di e contracto na October 1989 te e reapertura oficial na April 1991.
​
Compara MEP, compara AVP
Pero kico nos ta mira awe? Despues cu Valero a cera e refineria na November 2012, Gabinete Eman a logra firma un contracto cu CITGO/PDVSA, na juni 2016 na Venezuela. Sinembargo te ainda despues di 15 luna ningun hende por mira un desaroyo acelera pa cu rehabilitacion di e blender CITGO. Anto tur esaki teniendo na cuenta cu tempo Gabinete Oduber a trece Coastal Aruba, e refineria tabata den un estado hopi mas pio cu awe, ya cu hopi di e tankinan y instalacionnan a wordo corta caba e tempo ey.
Asina pueblo mes por mira cu un gobierno di MEP sin haci tanto buya, sin miles di pagina di contract firma, sin distribi tanto placa pa mercadeo, sin tanto viahe pa exterior, sin un batayon di abogado y experto den refineria, sin cantidad di fiesta dilanti porta di e refineria, toch a
logra percura pa un reapertura den apenas 1 aña y mey, mientras cu awe nos tin un gobierno di AVP hunto cu CITGO te ainda no a logra bolter huma for di e pipanan di e refineria.

---